Ayịzaya 13 - FỊAFỊA BAỊBỤLỤ

¹ Mie Babịlọnị gboloma oku tẹ Emọzị-ye Ayịzaya ḅe Tamụnọ ḅara da ḅo ye mẹ.

² Gbọrụ sịn sọ ofori tụndụ ọgọnọ ḅụ arụ pike ḅịtẹ mẹ pikee! Oloku ọmụapụ ma pịrị, tẹ ḅara-kọngọ saakị gelema tẹ kẹ in ḍie mịnẹ ini owu kẹ ḅụụ-gelemarị opu ama mẹ paka onu aḅọkọ ma ḅụ.

³ KỊNỊNYANAḄỌ ḅe ori ọmụapụ sịn pakama-ḅo tẹ, ḅụụ-tọn-arị tẹ ḅiokpọ nyana wararị apụ ma, mịnẹ in mu fịafịa ọmụ mẹ gbin, tẹ fomu-ḅara kẹ ori ịganị nyana pịrị wararị apụ ma pịrịị.

⁴ Tụndụ ma ọgọnọ ḍụrụkụarị ye mẹ pokii — opu tomi ogbo yeke-yekearị, sịẹ, sịẹ na ama, ama na kobiri tẹ yeke-yekearị. Ọmụ ogbo-ogbo Nyanaḅọ ḅe ori ọmụapụ ma tẹlẹma ọmụ gbin pịrịarị.

⁵ Ala lamatẹ, kiri kunoma ḅụ sime apụ, mie ḅoarị. Ori ịganị ḅụ KỊNỊNYANAḄỌ ḅe bebe ama mẹ fama ḅẹ ḅoarị.

⁶ Akụye ḅụ olokuu! KỊNỊNYANAḄỌ ḅe eneḅaka ḅo kpeki tẹ, KỊNỊNYANAḄỌ ḅe ye guluguluma ḅẹ ene mẹ.

⁷ Ḅẹḅọ-ḅẹḅọ aḅara mḅọ angagbasa ḅụ kpịlasaịma sime ḅa, tẹ ḅẹḅọ-ḅẹḅọ ḅiokpọ sọ so ḅa.

⁸ Inimgba tẹmẹ-naịn-naịn tẹ akụye ịn nẹngịma ḅa, iyiarị ẹrẹḅọ da-da akụye kịkaye. Ịn jụmọ-jụmọ tọrụ ḅio ḍiki ḅa, ḅalafa ḅụ, tẹ ịna atọrụ ḅịya ḅa ḅụụ-jịrị ḅụ.

⁹ KỊNỊNYANAḄỌ ḅe eneḅaka mẹ ḅoarị, anị ori opu ịganị si eneḅaka mẹ. Kiri mẹ ḅo kịnị anga-a yọ sọ ḅa, tẹ si-mịẹapụ mamgba ini ịn ḅaa-guluguluma ḅa.

¹⁰ Lolia goyegoye, na So-tọrụ sime ye goyegoye na, ḅarị ḅịya ḅịa, ịrụa mẹ kanakana ḅa anị saakị sakị, tẹ akalụ mẹ bele pịrị ḅịa.

¹¹ KỊNỊNYANAḄỌ ḅe ḅẹẹarị, “Arị opu ḅụụ-fụka kẹ tomikiri ḅo ḅa, tẹ fomu-ḅara kẹ si-sịḅịḅio-sụa apụ ma pịrị ḅa, ịna asi gotẹ. Ḅụụ-gelemarị ḅọ goḅọ-goḅọ arị mḅọ iderima ḅa, tẹ Opu Ẹkwẹn kọn-arị, pịkị kụrọ-kụrọ ḅara kẹ kịnị na mịẹarị ḅọ goḅọ-goḅọ à fomu ḅa.

¹² Kiri kọn ḅarị apụ ḍọkị-ẹrị ḅụụ-fụkama golu ḍọkị-ẹrị nẹngị ḅa.

¹³ Yẹrị Kụrọmamgba nyana KỊNỊNYANAḄỌ ḅe ịganị ḍie pakama ḅarị eneḅaka mẹ, à mịẹ tẹ So ma jike ḅa, tẹ Kiri mẹ jike nwenii tẹ amịna sime yọ ḅụ sikima ḅa.

¹⁴ “Jen asịẹ ḅẹ apụ tẹ Babịlọnị ḅụ angarị apụ mangị-so ịna ama mu ḅa, ịn mangị gala-gala ḅarị ḅara gbala tụḅara ogbo piri-deeapụ ẹrị tẹ mangị-so ḅara pembe ḅara, ḍikiḍikiḅọ ofori anana ogbo ọkụ.

¹⁵ Ọkọ kẹ mangị-soarị tẹ in kun ḅọ, kun ḅọ, ini ogie kẹ mḅọ temi ḅaa ḅa.

¹⁶ Ịn ḅarasụa ofori ḅara kẹ looma-ḍikiarị ogbo, ini mgbele kẹ ịna ḍọkọḍọkọ-awọmẹ ma fomu ḅaa ḅa, ini ịna awarị fọịn tẹ kụrọ-ḅara kẹ ịna sime-ereme tii ḅa.”

¹⁷ KỊNỊNYANAḄỌ ḅe ḅẹẹarị, “À Midi apụ jikema tẹ ini owu kẹ Babịlọnị paka ḅa. Ini ma in seleḅa kẹ gberie-sọ sịn-a, golu sọ ịna pọkọ sọlịma-a.

¹⁸ Ịna iboli ma na ḍiein ma na mie ịn kẹ asambịrịma atomi ma ḅaa ḅarị aị. Ini ọkụrụkụrụ nyana ḍọkọḍọkọ-awọmẹ pịrị ḅịa, tẹ ịn pịkị kala awọmẹ ḍiki sịḅị-kụrụkụrụ ḅịa.

¹⁹ Babịlonịya anie amadapụ daarị anga mamgba ḅụ iḅi tẹịn anga; anị anie tomi ma kẹ ḅụụ-tọn-arị yọ mẹ. Kụma yẹrị, KỊNỊNYANAḄỌ ḅe, Babịlọnị sukuruma-gbin ḅa, à kẹ Sọdọmụ na Gomora na mịẹ ḅara mẹ!

²⁰ Gbọrụḅọ sọ ḅarị jen kẹ anịanga anga ḅịa. Etela ḅụ mẹnjịma-mẹnjịmarị Arabụ apụ ḅẹ gbọrụḅọ-sọ jen kẹ anịanga akpụrụ-warị pike ḅịa, tẹ gbọrụ anana-koru ḅọ sọ jen kẹ amịna anana ogbo kẹ mu tẹ ini anịanga osuka fị ḅịa.

²¹ Anị ịkpa ḅio ḅẹ anama angarị anga na mgbukumgbuku ịna awarị namarị anga na sọ ḅa. Okpo afeni ma anị yọ anga ḅa, tẹ piri-oḅori ḍosi, ḍosi kan-saratẹ ayọ ma ikelema ḅa.

²² Tawa ma na amada-awarị ma na ḅio hayịna nwẹn-sịn ja anama pẹị-pẹị anama ma na piri-obiri ma na kọn-arị oloku mẹ arị ḅio fie ḅa. Babịlọnị sakị ḅo la tẹ! Árị ene ma kẹlẹ kọnm ḅọrọ-so fama ḅa.”