Ayịzaya 12 - FỊAFỊA BAỊBỤLỤ

Ịmịẹtẹ Ḅẹ Nume

¹ Ene ḅoarị kịnị nume suu ḅarị sakị: KỊNỊNYANAḄỌ, àrị ì tokiniarị! Í ì ḍiki ịganị simem, kụma mịọkụ ị̀ ḅarị jen kẹ ịganị-a tẹ ì dedemarị.

² Tamụnọ anie ị̀ ḅọrọmaḅọọ; arị ọ̀ kẹ ḅiokpọma tẹ ḅalafaa ḅịa. KỊNỊNYANAḄỌ ḅe kụrọ na ịnyọ na kẹ ị̀ pịrịarị; Ori ị̀ ḅọrọmaḅọọ.

³ Ḅuu-minji minji pọkọ-tarịarị ḅọ ḅioḅẹlẹma ḅara, anị ḅara mie Tamụnọ atomi ma ḍerekuarị ḅara ori ịn ḅọrọmarị sakị.

⁴ Ene ḅoarị Tamụnọ atomi ma nume-suu tẹ ḅẹẹ ḅa: Ịmịẹtẹ kẹ KỊNỊNYANAḄỌ ḅe ḅẹẹ! Ọ̀ sịịn, ori ị́ ḅọrọma! Ọ̀ kọrị tẹ ye ḍuko sịẹ mamgba pịrị! Ọ̀ ḍụḅa la ḅara ḍuko ịn pịrị!

⁵ Nume su KỊNỊNYANAḄỌ ḅe boma, ọ̀ kọrị tẹ opu aị ma ẹrẹsị. Yee bebe tomikiri mẹ anị gboloma ye naa.

⁶ Yee Zayọnị ḅụ angarị ḅọ goḅọ-goḅọ oloku-oloku nume su! Izirẹlị tẹkẹarị Fịafịa Tamụnọ ḅe ọ̀ ḍụḅam, tẹ ori ori atomi ogboku angarị.