Ayịzaya 11 - FỊAFỊA BAỊBỤLỤ

Dein Amada-yọ Mẹ

¹ Devidi ama-da ọrụ mẹ kịkarị ye anie pẹlẹ gbin tẹ opu sịn; kụma ịwọ sịn-ḅara suku mẹ ḅụ so-pakarị gbọrụ ḅara mẹ anie Devidi furo-ḅẹ-apụ ma ogboku ịwọ amadaḅọ saakị paka-ḅo ḅarị ḅara.

² KỊNỊNYANAḄỌ ḅe tẹmẹ mẹ nimi kẹ ọ̀ pịrị ḅa, pịkị ḍawọye ḍin na ḅẹrẹtọn kịnị pịrị aka na. Ọ̀ KỊNỊNYANAḄỌ ḅe ḅiiarị ye nimi tẹ ọ̀ kụn ḅa,

³ tẹ ọ̀ ḅịḅịpoki ḅụ tọrụ-ḅẹlẹ nyana ḅa. Ọ̀ tọrụngbọ kẹ ye ẹrịarị ḅara na ḅeri kẹ ye naarị ḅara na kẹ ḅẹrẹkọn ḅịa;

⁴ ori inoma ofori ḅara kẹ ḅẹrẹkọn igoin-apụ ma pịrị ḅa, tẹ ḅarasụa-pịrịḅọ nyana-a apụ ma ḍụa tẹ ini ịn la kiri ọkị ḅa. Ọ̀ tọn tẹ in tomi ma fomu, tẹ si amịẹaị mịẹarị apụ ma fịị ḅa.

⁵ Inoma ofori ḅara na gasị ḅara na mie ọ̀ kẹ tomi ma da ḅarịye.

⁶ Anana kun pẹị, pẹị anama na anana ma na anga gboloma ḅa dein ḅụ, tẹ sịrị ma na kala oḅori ma na gbọrụ anga ḅọlọlọ sime ḅa. Kala nambulo ma na kala ọkụkụ ma na yefị gboloma ḅa, tẹ kala awọmẹ in ḍikiḍiki ḅa.

⁷ Nambulo ma na tuu ma na fịye fị gboloma ḅa, tẹ ịna awọmẹ ma gbọrụ anga ḅọlọlọ sime ḅa dein ḅụ, ọkụkụ ma na ḍụọ ḅio ḅẹ opu anama ma na samụnọtẹ asịra fị ḅa.

⁸ Si oronwi akaka sime tẹ tii-arị kalatụḅọ sọ ye mḅọ la ḅịa.

⁹ Zayọnị tụndụ ọgọnọ, Tamụnọ fịafịa tụndụ mẹ, ye kẹ kịnị lama ḅẹ gberie, anịanịa siye, sọ paka ḅịa. KỊNỊNYANAḄỌ ḅe nimi amakiri mẹ ḅụ ḅin ḅa minji abajị mẹ ḅio ḅin ḅara.

Kun-soapụ ma Pịkị-ḅo ḅa

¹⁰ Anị ene mẹ ḅụ, anie Devidi furo ḅụ ịwọma amadaḅọ sọ ḅọ ḅe elekima sọ sịẹ-sịẹ ma pịrị ḅa. In ḅo ori ama-daarị opu ama mẹ ḅio kobiri tẹ kụn kẹ ọ̀ pịrị ḅa.

¹¹ Anị ene mẹ ḅụ, KỊNỊNYANAḄỌ ḅe pịkị siin jen kẹ ọ̀ kụrọ pakama tẹ ori atomi ma tẹ kirikọn-apụ ma ọkị pịkị warị ḅo ḅa, Asiriya na, Ijiputi na ḅụ, pịkị Patọrọsị na, Sudanị na, Ẹlamụ na, Babịlonịya na, Hamatị na, amakiri ma ḅụ tọrụ akaka ḅẹ akiri ma ḅụ na, tọrụ-minji ḅẹ asọ ma ḅụ sọ.

¹² Kẹ tomikiri ḅẹ asịẹ ma ḍie mịnẹ, ò siin ori atomi ma kobiri gboloma ḅo ḅa ḅẹ ye ḅụ, KỊNỊNYANAḄỌ ḅe arụ pike ḅịtẹ pike gelema ḅa, tẹ Izirẹlị na Juda na ḅụ gala-gala atomi ma, tomikiri ḅẹ ini ịkọlị ma ḅụ, ini ọkị pịkị ḅoarị.

¹³ Izirẹlị sịẹ mẹ ḅarị jen kẹ afana tẹmẹ sụa Juda sịẹ mẹ pịrị ḅịa, tẹ Juda pịkị si kẹ Izirẹlị tọn apụ sọ ḅịa.

¹⁴ Ịn gbọrụ ḅụ sime tẹ owu kẹ Filisiteniapụ paka ḅa, ịrụa-ideriarị-anga anga mẹ ḅụ, tẹ pịkị ịrụa saakịarị anga sime apụ ma aị fọịn ḅa. Ini owu-kiri ḅụ Idọmụ na Mohabụ na ḅẹ apụ ma nẹngịma ḅa, tẹ Amọnị ḅẹ apụ sịḅị-tuu ịn pịrị ḅa.

¹⁵ KỊNỊNYANAḄỌ ḅe Suwezi ḅẹ Ewere mẹ samụnọma ḅa, tẹ ori ọfịrịarị fẹrụ fiema tẹ anị Yuferetisi tọrụ mẹ samụnọma ḅa, sọnọma ḍọkọḍọkọ okolo kala aị kịngẹ mie ọ̀ kọnma ḅarịye, mịẹ tẹ ḅẹḅọ-ḅẹḅọ inetẹ mẹnjị saḅa ḅẹ ḅara.

¹⁶ Oḅoroma paka ḅa, Asiriya ḅụ saakị, anie ori atomi Izirẹlị tẹ anịanga kirikọn-apụ ma mẹnjị paka-ḅo ḅẹ yọ, ịna elemu aḍapụ ma Ijiputi sime tẹ paka-ḅo sakị mẹ anị sime gbọrụ ḅara mẹ.