Ayịzaya 1 - FỊAFỊA BAỊBỤLỤ

¹ Mị ḍiri mẹ ḅio simearị oku ma anie Juda na Jeruselemu na gboloma aị tẹ Tamụnọ mịẹfinji Emọsị tụḅọ Ayịzaya pịrị aị. Tamụnọ mịna oku ma kẹ ọ̀ pịrịm, Uzaya na Jotamụ na Ehazi na Hẹzịkaya na Juda ḅụ ama-da ene ma ḅụ.

Tamụnọ Ori Atomi Ḍiki-ịganịarị

² KỊNỊNYANAḄỌ ḅe ḅẹẹm, “So na Kiri na, ọmịnị à ḍukoarị ye pokii! Yẹrị ḍikiḍiki-pakamaḅotẹ awọmẹ ma kọngọ-kụrọma ị̀ pịrị tẹẹ.

³ Nambulo ma sọ amịna nyanaḅọ nimi wararị, yedogi-anama sọ ịn nyanaḅọ fịye kẹ ịn pịrị fị-fị yọ nimi wararị. Kụma ị̀ atomi, Izirẹlịapụ ma nimi-a mịnẹsẹ yẹrị ịna Tamụnọ. Gbala-gbala ini aniemẹ fieye naa-a.”

⁴ Yei, si amịẹaị mịẹarị sịẹ, ọ́ fa tẹẹ! Ọmịnị anie ḅụrụ-kọsịtẹ si-mịẹapụ. Ọmịna asi ma ọ́ jịjịma tẹ iku ọ́ ḅaa ḅẹ-yearị! Ọ́ KỊNỊNYANAḄỌ, Izirẹlịapụ tẹkẹarị Fịafịa Tamụnọ ḅe sịkị tẹ ọḅụ kẹ ò gbin tẹ.

⁵ Tiye ẹrẹsị ọ́ paa kọngọ-kụrọma ma-mu ḅẹ mọ? Ó ḅiiarị ọ́ paa fomu-ḅara da tọrọkọ-tọrọkọ mu? Izirẹlịapụ, ọmịna asịḅị puu tẹẹ, anịsakị ọmịna aḅioḅẹngbọ sọ obiarị.

⁶ Ḅụọ-kuḅu ḅụ iwo mu sịḅị la obi-a gbọrụ anga sọ ofori í oju ḅụ. Ịnọ akiri í oju mamgba gbaịn wararị, finji sara wararị ịnọ famam. Ị́ ịnọ ma mịẹ-a, pịkị fịna-a. Olo sọ ịn kẹ tan-a.

⁷ Ị́ amakiri mẹ papaa gberere simearị, tẹ ini í opu ama na dọkịma kiri lama tẹ. Ị́ tọrụ, tọrụ kẹ ḍikiarị ogbo jen asịẹ ḅẹ apụ ḅo ị́ ḍụọ-akiri ọkị tẹ ye mamgba guluguluma tẹ.

⁸ Kpọma-ḅẹlẹmarị Jeruselemu kịngẹ kọn tẹẹ, ama kan ọmụapụ ikelema-koro tẹ ama. Anị sime-ḅara gbala ḍụaye ofori tẹ papaa simearị kụrọ-ḍụọ-koruḅọ kala warị ọkụ, anịanịa kukumba nwẹn-sịn sịnmgbọlụ sụarị sịn ḅẹ ḍụọ ḅio nama koroma sịḅị-kikima-yọ.

⁹ Kụrọmamgba nyana KỊNỊNYANAḄỌ ḅe mịẹ tẹ ja atomi kọn wa pịrị-a namịna mimgbe Jeruselemu papaa gulugulu fa tẹẹ, tẹ wa ḅo gbọrsịḅị Sọdọmụ na Gomora na sime-ḅara sime tẹ.

¹⁰ Jeruselemu, í ḅio ḅụ ḅẹrẹtọn-arị apụ na ị́ atomi na ịn Sọdọmụ na Gomora na ḅẹ apụ na kịka tẹ. KỊNỊNYANAḄỌ ḅe ḍuko ị́ pịrịarị ye poki. Wamịna Tamụnọ ḅe kẹ í tolumarị ye kẹ ye-sịn.

¹¹ Ori mẹẹ, “Ị́ sịn-arị ị́ nwẹn mịẹ, siin-mịẹ, siin-mịẹ ị̀ pịrịarị agba ma à ḅiiarị aro? Agba mịẹ ḅụ ị́ dọkịma-dọkịma ị̀ pịrị tẹ anana ma na, í iḅi anama ma ḅẹ ḅẹlẹkị mẹ na ị̀nịna iḅi tẹẹ. Nambulo na, anana na, oḅori na ọmbie mẹ ịnyọ kẹ ị̀ tama tẹ.

¹² Tụḅọ ị́ ḅẹ mịnẹ ma mamgba kẹ ḅo, í ḅo sunsin ị̀ pịrị ḅẹ ḅoarị sakị? Ḅarị ị̀ Warị mẹnjị iwo-na-ideri-na ma.

¹³ Ị́ kẹ ḅoarị aḍiepịrị-aị ma papaa mịẹ-aị. Kụnụaị dọkịma-agba ma ị̀ ḅụụ si lama tẹẹ. Ọmịna Ịwọ Akalụ Alalị ma na, Ịnyọsara-Ene mẹ na Tẹkẹ-akobiri ma na, ọmịna asi arị ḅụrụma kọsịma fama tẹẹ; à ḅarị arị ḅii-a.

¹⁴ Àrị ọmịna Ịwọ Akalụ Alalị ma na fịafịa ene ma na ḍiki-ḅioḅuarị; arị dogi ịnyọ kẹ ị̀ tama tẹ ikuye sọ ị̀ pịrị tẹ.”

¹⁵ “Ọ́ ḅara saakị so da tẹ tẹkẹ ḅarị sakị arị ó ḍiki ḅịa. Ọ́ tẹkẹ mu laa ḅara laa ḅara sọ, à poki ḅịa, kẹ gotẹ ọkọ ḍukoarị, ọmbie ọmịna aḅara ọmbịma fama wararị.

¹⁶ Ọmịnị ọmịna aḅụụ sịkịrị fịafịama. Ọ́ mịẹ tẹ àrị ẹrịarị siye mẹ ḅụ ọ́ ḅara-siin. Ó si mịẹ ḅụ ḅara-siin,

¹⁷ tẹ ḍawọ tẹ kuraye mịẹẹ. Ọmịnị ẹrị mịnẹ ó tomḅọ la kiri kẹ mḅọ pịrịm, ḅarasụa ja apụ ponomarị apụ pịrị, sime ḍapụ na iyingiapụ na fịtẹ awọmẹ pịrị aị kẹ ịn pịrị, diapụ-fịtẹ-ereme ma ḍụa.”

¹⁸ KỊNỊNYANAḄỌ ḅẹẹarị “Mịọkụ ó ḅo wa ḅẹrẹ mẹ fama. Karakaraye ọmịna si mẹ ọmịnị ọmbịma tẹ ọmịnị awụ ḅịyarị sọ, arị ọ́ sịkịrị tẹ ọmịnị eene mgbọlị yori-yori ḅara yori-yori ḅa. Ọmịna ịlọlị ma pọpụlụ nwẹn-sịn ḅịya ḅara ḅịya sọ, ọmịnị afalafa pịna ḅara pịna ḅa.

¹⁹ Ọmịnị ị̀ ḅịḅị poki ḅarị ḅẹḅẹ, ọmịnị amakiri mẹ pakama-ḅoarị iḅi aị ma fị ḅa.

²⁰ Kụma ọmịnị ị̀ na tụḅụrụ ḅẹḅẹ, ọ́ fa tẹ, fịị sime ọ́ pịrịm. Yẹrị KỊNỊNYANAḄỌ ḅe ọkọ ḅẹẹm.”

Si Mịẹarị Ama Mẹ

²¹ Gbọrụ sakị ḅụ ḅioḅẹngbọ-kẹ-sịrẹrẹ-niḅi ḅara sime ama mẹ mịọkụ ḅo sẹfị-ẹrẹḅọ kịka tẹ á mịẹarị ḅara mịẹarị. Gbọrụ sakị ḅụ anị ḅio karakara atomi-atomi ḅinm, kụma mịọkụ kịnị-ḅaapụ ngẹrị kọn tẹ.

²² Jeruselemu, gbọrụ sakị ḅụ í seleḅa kịkam, kụma mịọkụ í ḅo papaa minji ngẹrị sọ tẹ.

²³ Ọmịna sịḅịdapụ ma kọngọ kụrọmatẹ furuapụ ikiapụ sọ tẹẹ; sakị mamgba in ḍiepịrị-aị na ọḅụ-fịaị na daarị. Gbala-gbala ịn ḍapụ na iyingiapụ na fịtẹ awọmẹ ḍụa, ḍụa-a ḅẹrẹ-siri ḅio, anịanịa diapụ-fịtẹ-ereme poki ini ịna ḅịḅị ḍukoarị sakị.

²⁴ Mie ḅụ, ọ́ Kụrọmamgba nyana KỊNỊNYANAḄỌ, Izirẹlị kụrọtẹ Tamụnọ ḅe ḍukoarị ye pokii mịọkụ, “Si kẹ ị̀ tọn-arị apụ, àrị ọmịna aḅụụ gbẹẹfị fị ḅa, tẹ ọ́ ḅarị jen kẹ ị̀ ḅụụ-fụkama ḅịa.

²⁵ Àrị ọmịnị na mịẹ ḅa. Àrị ọ́ mịẹ kpaịnma ḅa, anie kẹ ḍisi-ḍisi ye mịẹ fịafịama-fịafịama gbọrụ ḅara mẹ, tẹ ọ́ ḅụrụmarị ye mẹmgba kọrọrọ-siin fama ḅa.

²⁶ À ḅẹrẹtọn-apụ na ḅẹrẹ ḍuko-tolumapụ na kẹ ọ́ pịrị ḅa, anie alatẹ sakị ḅụ ó nyana ḅọrọma tẹ apụ ma na kịka apụ. Anịtẹso ịn kẹ Jeruselemu sịn ḅarịye — Karakaraye mịẹ Tẹ Ḅioḅẹngbọ-kẹ-sịrẹrẹ-niḅi Ama.”

²⁷ KỊNỊNYANAḄỌ ḅe karakara mịẹ ḅọ ẹrẹsị, ò Jeruselemu ḅọrọma ḅa, pịkị á ḅio ḅụ si ḅụ pịkị-ḅo, pịkị-ḅo.

²⁸ Kụma ò si mịẹ tẹ kọngọ-kụrọma ọ̀ pịrịarị-ḅọ, pịrịarị-ḅọ nanga kiri pịrị ḅa; Ọ̀ sịkị ḅọ sịkị ḅọ ori mḅọ ḅaa ḅa.

²⁹ Ó tiye-ì-gbo ḅẹẹ ḅa mịnẹ ọ́ sịn ma kẹ tamụnọ sọma tẹ tẹkẹm, pịkị ọ́ kẹ Tamụnọ-tẹkẹ-yọ mịẹ ḅẹ aḍụọ ḍiḅim mẹ.

³⁰ Fịịarị sịn kpatụ ḅara mie ọ́ kpatụ ḅarịye minji kẹ sararị ḅọ ofori ḍụọ pembe ḅara.

³¹ Fịnị osuka ḅụ sọ tẹ anị veremuma kọrị paka ḅara, anie kụrọ atomi ma fịị gulugulu ḅarị ḅara ịna si amịẹaị ma ḅụ; gbọrụḅọ-sọ inetẹ ịna fịị guluguluma mẹ kiki ḅịa.