2 Timoti 4 - FỊAFỊA BAỊBỤLỤ

¹ Tamụnọ tọrọkọ ḅụ na, Kịrayịsị Jizọsị, ḍumo wararị apụ na fịtẹ-apụ na kọn ḅarị ḅọ ḅe tọrọkọ ḅụ na, anie ori Amadaḅọ ḅara kẹ ḅẹrẹtọn ḅẹ ḅoarị ẹrẹsị, à tẹmẹ-la ḅara kẹ ḍuko kụrọma ị́ pịrịarị,

² oku mẹ ḍukoo; ịgbanị mịnẹ ini anị ḍukoo — kura sakị-o, kura-a sakị-o — ẹkwẹn tomina aḅioḅẹngbọ pịkịị; in ḍiki-ịganịị; pịkị ịna ḅiokpọmaa, í ye-inema mẹmgba kẹ ye-tolumarị sakị.

³ Sakị ḅo ḅa, tomi ḅarị karakara tolumaye poki ḅịa sakị, kụma ịna ḅiotọn aị mịẹ in ḍukamẹnjị ḅarị yee, tẹ ḅarana ye-tolumapụ kobiri ịna aḅụụ pịrị ḅa, ịn naa ḅẹ-ḅiiarị aị ḍuko ịn pịrị ḅẹ apụ.

⁴ Ini ọḅụ pịkị karakara mẹ poki mẹ gbin, tẹ ịna ḅioḅẹngbọ kẹ etemi ofori, sịḅị ofori ịlụkụ ma ḅụ gbana ḅa.

⁵ Ị́yẹrị kụma, ị́ ḅụụ ọlọ-sịẹma, paka ye, paka ye sọ; tọrụsiẹrị inema alama, Iḅi Oku mẹ ḍukoarịḅọ kọrịnama mẹ kọrị, tẹ Tamụnọ fịrịmẹnjịḅọ ḅara kẹ sime ị́ pịrị fịrị mẹ mẹnjịị.

⁶ Yẹrị kịngẹ kụma, ini ị̀ kẹ agbamịẹ ḅẹ sakị mẹ la tẹ; mie à mị tomikiri ḅẹ ḍumo mẹ koroma-so ḅẹ sakị mẹ.

⁷ Àrị àrị ine-ḅara, ine-ḅara mịẹ tẹ mangị ị̀rụà mẹ ḅụ, anị ḅẹ bebe nangwọ mẹ mangị fama tẹ, à pịkị mininiye mẹ koko tẹ.

⁸ Tẹ mịọkụ Karakara mịẹ Ḅẹrẹkọnḅọ ḅe kẹ tọrọkọ tarị ḅọ pịrị-pịrị ama-da sun mẹ sime ì koruarị, ọ̀ kẹ ị̀ pịrị ḅa anị ene mẹ ḅụ — tẹ yẹrị ngẹrị-a, kụma inimgba tẹ ḅẹlẹma ḅụ ò tolu-sịẹ ḅarị mẹ koruarị apụ ma sọ.

Kịrị-kịrị Atomi Gboloma Ẹkwẹn

⁹ Ị́ inetẹ ḅara, inetẹ ḅara mịẹ tẹ ala-a sakị ḅụ ị̀ dama-ḅoo,

¹⁰ Dẹmasị mị sakị ḅẹ tomikiri mẹ ḅẹlẹma tẹ ì koroma so Tẹsalonika mu tẹ. Kirisẹnịsị so Galesiya mu tẹ, anịsakị Tayịtọsị so Dalịmatịya mum.

¹¹ Luku ngẹrị ị̀nịna emi. Makị ọkị ị́ ḅụụ sụa ḅoo, kọrịnama mẹ ḅụ ori inetẹ ḅarasụa ị̀ pịrị ḅa ẹrẹsị.

¹² À Tịkịkọsị kẹ Ẹfisọsị fịrịmam.

¹³ Ị́ ḅoarị sakị, Torohasị ḅụ à kẹ Kapọsị ḅarasụa kapa mẹ kẹ ḅo ị̀ pịrịị; ḍiri ma sọ kẹ ḅoo, jen-a jen-a nama apara kẹ kẹẹ aị ma.

¹⁴ Alẹkịzanịda, kọpa (anie alapẹlẹa) tẹmẹḅọ ḅe kẹ ị̀ mịẹ siye ḅakam; KỊNỊNYANAḄỌ ḅe ọ̀ mịẹ ḅara ḍiki tẹ gbẹẹ-ye kẹ ọ̀ pịrị ḅa.

¹⁵ Ọ̀ ḅụụ ị́ ḅụụ ẹbị, kẹ gotẹ ọkọ ḍukoarị, ori ḅe ọ̀ kụrọ-kụrọ ḅara kẹ kịnị na mịẹ ḅẹ ḅara kẹ wamịna oku mẹ na tụḅụrụ wararị.

¹⁶ Tarị mẹ, àrị ịn kẹ ị̀ sịḅị sẹịn aị ma ḅụ ị̀ ḅụụ ḍụarị sakị gbọrụḅọ-sọ ị̀ akaka sịẹ-a; inimgba ì koroma-som. Sisi Tamụnọ paa anị kẹ si kịẹn ịn pịrị ma.

¹⁷ Kụma KỊNỊNYANAḄỌ ḅe ị̀ na sime tẹ ịnyọ kẹ ị̀ pịrịm, anie mịẹtẹ àrị inetẹ bebe oku mẹ ḍuko wasama Ja asịẹ ḅẹ apụ mamgba pịrị tẹ ịn naam; tẹ Tamụnọ ịn ḅaa-ḅẹrẹ-pẹlẹ ị̀ pịrị ḅẹ ye mẹ ḅio ị̀ pụkọ-pakamaḅom.

¹⁸ Tẹ KỊNỊNYANAḄỌ siye mẹmgba ḅio ị̀ pụkọ-pakamaḅo tẹ ị̀ kẹ ye-ḅụụ-la-a ḅara ḅụ mu ò So-ḅio ḅẹ Ama mẹ la ḅa. Ebube sime ọ̀ pịrị mu ḅẹẹ-sakị ḅẹẹ-sakị la! Amẹnị.

Kunoma Ḅii-ḅịḅị

¹⁹ À ḅii-ḅịḅị kẹ Pirisila na, Akịwila na, Ọnẹsịforọsị warị-kpo na fịrịmam.

²⁰ Ẹrasitọsi, ori Kọrịntị ḅụ korom, tẹ à Torofimọsi kẹ Milẹtọsị ḅụ koromam ori obim ẹrẹsị.

²¹ Ị́ inetẹ ḅara, inetẹ ḅara mịẹ tẹ ḅo tẹrẹmẹ okiringa sakị mẹ la. Ubulọsi na, Pudenisi na Layịnọsị na, Kịladiya na í ḅiim, tẹ osi Kịrayịsị ḍukamẹnjị amịnapụ mamgba sọ ọkọ mịẹm.

²² KỊNỊNYANAḄỌ ḅe na ọmịna tẹmẹ na simee. Tamụnọ ḍiki-ḅụụjịrị ọmịnị-mgba na simee.