2 Timoti 2 - FỊAFỊA BAỊBỤLỤ

Sịḅị-tuu Kịrayịsị Jizọsị Pịrị Wararị Ọmụḅọ

¹ Ị́yẹrị kịngẹ kụma, ị̀ tụḅọ, wa Kịrayịsị Jizọsị na gbọrụ ḅụ emi ye ḅụ ḅo wa laarị ḍiki-ḅụụjịrị mẹ ḅụ kụrọ-sịẹ simee.

² Tọnwa apụ emi anga ḅụ à ḍuko pakama tẹ ị́ naa wararị toluma aị ma kẹ karakara atomi tẹ inetẹ kẹ ja apụ sọ toluma ḅarị apụ ḅarasụa.

³ Sịḅị-tuu Kịrayịsị Jizọsị pịrị wararị ọmụḅọ ḅara ḅụ, tọrụsiẹrị ḅụ ị́ la kiri ọkị.

⁴ Ọmụ kiri simearị ọmụḅọ jen kẹ ḅiotọn-a, mḅọ sịḅịda ọmụ alaḅọ ḅioḅẹlẹma ḅẹ ye sikima, mie ḅụ mḅọ amịna ḅụụ kẹ ama ḅio ḅẹ ḍumo amịẹaị ḅụ suu suu-a.

⁵ Mangị ị̀rụà tii kọn ḍịn-ḅọ, ịn kẹ tọrọkọ tarịḅọ pịrị-pịrị ḍiepịrịye mẹ mḅọ ḅara la ḅịa, mḅọ anị ḅẹ oloko ma kokoarị sikima.

⁶ Ḍụọ-kọrịḅọ ḅe tẹ anị ḅẹ kụrọ kọrịnama mẹ kọrị ḅọ mẹ anie tarị soku ḅo fịye mẹ nyana ye.

⁷ À nwẹn ḍukoarị aị ma kẹ kuroma ḅụ suu, KỊNỊNYANAḄỌ ḅe sịḅị ḅio kẹ ị́ pịrị tẹ í inetẹ anịmgba fiearị ye naa ḅo ḅẹ ẹrẹsị.

⁸ Jizọsị Kịrayịsị kẹ ḅiokoroma, Tamụnọ fịị ḅụ saakịma ḅọ ḅe, anie Devidi furo paka ḅọ ḅe, à ḍukoarị Iḅi Oku mẹ ḅụ à toluma ḅara ḅụ.

⁹ Àrị Iḅi Oku mẹ ḍukoarị ye mie à gotẹ tọrụsiẹrịarị, tẹ ini ị̀ kẹ si kẹ mịẹ-mịẹye sọma tẹ mịẹarị ḅọ ḅara ọkị tẹ, ì kun ikoli ḅio ịkasị wẹrị ye. Kụma Tamụnọ ẹkwẹn mẹ ini ikoli kẹ anị ịkasị wẹrị-a,

¹⁰ tẹ anie ḅụ, à Tamụnọ sẹlẹ-ọkị tẹ atomi ma gotẹ ye goyegoye inemarị, mịẹtẹ ini sọ Kịrayịsị Jizọsị ḅụ ḅọrọ tẹ ḅọrọma nyana tẹ sime gbamaso ebube mẹ la ḅarị ḅara.

¹¹ Miemẹ karakara ẹkwẹn: “Wa ori na sọ tẹ fịị tẹ ḅẹḅẹ, wa pịkị ori na sọ tẹ ḍumo ḅa.

¹² Wa inema tọrọkọ mu, muu, wa pịkị ori na sọ tẹ ḅẹrẹtọn ḅa. Wa ò piki ḅẹḅẹ, ori sọ wa piki ḅa.

¹³ Wa ḅarị ḅioḅẹngbọ-kẹ-sịrẹrẹ-niḅi ḅara sime-a sọ, ori ọ̀ paa ḅioḅẹngbọ-kẹ-sịrẹrẹ-niḅi ḅara sime wararị, ori oḅori kẹ amịna ḅụụ sịn ḅịa ẹrẹsị.”

Tamụnọ Kẹ Iḅi Kọrịnama-Kọrịḅọ Sịn Ḅọ

¹⁴ Miemẹ kẹ ị́ atomi ma ḅiokoroma, tẹ tẹmẹ-la ḅara kẹ ịna aḅeri nụnụ mịnẹ in ye ḅụ ofori ẹkwẹn gotẹ Tamụnọ tọrọkọ ye na ịgbanịya ma. Anị iḅi mịẹ-a, kụma anị dogi-ḅoarị ye anie, anị pokiarị apụ sima kịngẹ.

¹⁵ Í inetẹ ḅara, inetẹ ḅara mịẹ tẹ Tamụnọ tọrụ ḅụ gbọrsịḅị iḅi kọrịnama-kọrịarịḅọ sọ famaa, anie amịna kọrịnama ḅụ ḅụụ-jịrị nyana-a ḅọ, pịkị kurama Tamụnọ oku mẹ ḅẹ karakara mẹ tolumarị ḅọ.

¹⁶ Ḅịḅị ḅẹ sọ ye, sọ ye na oḅori ẹkwẹn na ḅẹ ye nụnụa amịẹaị ma ḅụ ị́ ḅụụ ḅelemaa, anie Tamụnọ ḅụụ tomi dee-siin tarị in sime-ḅara nẹngị kịngẹ mie arị mịẹarị ye.

¹⁷ Ọkọ sime tolumaye mẹ kịkarị ye, anie kan-arị ịnọ tẹ meni mẹ pẹị-pẹịtẹ ịnọ mẹ tọrụ finjimarị ye. Ọkọ sime aị toluma tẹ maa owiapụ emi, Himẹnọsị na Filetosi na.

¹⁸ Ịn karakara etela mẹ koroma-so tẹ minini apụ ma ḅẹ ja apụ minini pikirimarị, ḅẹẹarị mịnẹ wamịna fị-ḅụ-saakị mẹ kiri ọkị ḅọrọma kụra-ḅio iḅerea.

¹⁹ Kụma kụrọtẹ suku mẹ tẹ Tamụnọ saakị tẹ ye mẹ, inetẹ jike ḅịa; tẹ anị ọgọnọ mie mịna ẹkwẹn ma kẹẹ wararị ye: “KỊNỊNYANAḄỌ ḅe sime ọ̀ pịrị apụ ma nimi wararị” na “Ḅẹḅọ-ḅẹḅọ tẹ ḅẹẹarị mḅọ sime KỊNỊNYANAḄỌ ḅe pịrịm nwẹn ḅẹẹ ḅọ, kura-a mịẹye ḅụ ḅụụ ḅelemaa.”

²⁰ Opu warị ḅụ tọnwa kịrị-kịrị opu ẹfẹrẹ na kịrị-kịrị abọlị na emi, arịḅẹ jaị in seleḅa na golu na kẹ tẹmẹm, osi-aị sịn na aḅaịn na; jaị ịn kẹ karakara sakị ḅẹ ye mịẹarị, osi-aị ene-ḅaaene-ḅaaene ḅẹ mịẹ ye.

²¹ Gbọrụḅọ mịna si-aị mamgba ḅụ amịna ḅụụ wẹrị fịafịamarị ḅẹḅẹ, ini mḅọ kẹ karakara amịẹaị ḅụ suu ḅa, anie mḅọ ḅụụ saakị sikima wẹrịtẹ kẹ ye mịẹ na iḅi ḅara wẹrị mḅọ Nyanaḅọ pịrị tẹ ẹrẹsị, tẹlẹma tẹ kẹ iḅi mịẹye goyegoye mịẹ ḅẹ ḅara.

²² Asambịrịma sịḅịḅio lẹgẹlẹgẹ amịẹaị ma ḍiki ḅụụ-kịẹn, tẹ ḅụụkụrọma tẹ karakara mịẹ na, minini na, ḅẹlẹma na, dein na nyana ḅẹ ḅara ḍọkịị, fịafịatẹ ḅioḅẹngbọ ḅụ KỊNỊNYANAḄỌ ḅe sịn-sịn tẹ ọ̀ ḅara ḅarasụa ḅiiarị apụ ma na gbọrụ ḅụ sime ḅụ.

²³ Kụma oḅori-sọ na gberie-sọ nimi-a ḅara kẹ ye-nụnụa na ḅụ ị́ ḅụụ wẹrị ḅelemaa; í nimi wararị mịnẹ kamụ-sọ ḅụ mie arị kunoma kunoma yee.

²⁴ KỊNỊNYANAḄỌ ḅe fịrịmẹnjịḅọ mẹ mḅọ kamụ-sọ-sọ-a. Mḅọ iḅi ḅara kẹ kịnị mamgba na mịẹ, iḅi tẹ pịkị ye-inemarị ye-tolumaḅọ sọ,

²⁵ anie gbene tẹ mḅọ na tụḅụrụarị apụ datụkụmarị ḅọ, kẹ gotẹ ọkọ ḍukoarị ye, ẹbịsịya Tamụnọ sakị kẹ ịn pịrị tẹ in si ḅụ pịkị tẹ ḅọ karakara mẹ nimi ḅarị ḅoto.

²⁶ Anịtẹso ịn naa-ḅo tẹ ịna karakara kuroma ḅụ sọ tẹ Ekwesu ḅe ḍiein mẹ ḅio pụkọ-pakaḅo ḅarị ḅara, anie in kuun-sịẹma tẹ ini ọ̀ ḅịḅị pokiarị ye mẹ ḅio.