2 Timoti 1 - FỊAFỊA BAỊBỤLỤ

¹ Pọlụ, Kịrayịsị Jizọsị fịrịmẹnjịḅọ ḅe, Tamụnọ minini ḅara ḅụ, ọ̀ kẹ fịrịma mu ò minini tomi pịrị ḍumo mẹ ḍuko wasama ḅẹ ḅọ ḅe, anie Kịrayịsị Jizọsị na gbọrụ ḅụ sime ḅụ wa nyanarị ye mẹ, ḅara ḅụ mie mị ḍiri mẹ ḅo,

² Timoti, ì iḅi tụḅọ ḅe, pịrị yee: Yee Tamụnọ Ḍaḅọ ḅe na Kịrayịsị Jizọsị wa Nyanaḅọ ḅe na, ḍiki-ḅụụjịrị na, ọkụrụkụrụ na, dein na kẹ ị́ pịrị.

Ịmịẹtẹ-Ḅẹẹ Na Ḅiokpọma Na

³ Arị ịmịẹtẹ kẹ à fịafịa tẹmẹ ḅioḅẹngbọ kẹ fịrịmẹnjị pịrịarị Tamụnọ ḅe ḅẹẹm, ì atẹngịapụ ma mịẹ ḅara. Ḍin na eneḅaka na ḅụ àrị ị́ kẹ ḅiokoroma tẹ tẹkẹ ị́ pịrịarị sakị mamgba tẹ ịmịẹtẹ kẹ ọ̀ ḅẹẹarị.

⁴ Àrị ị́ tọrụ sararị owu minji mẹ kẹ ḅiokoromarị, à pịkị kpọma ị́ ẹrị ḅẹ ḅii lamarị, mịẹtẹ ḅioḅẹlẹ ị̀ ḅụụ ḅio sọ ḅin ḅẹ ḅara.

⁵ Àrị ị́ nyana aka ofori minini mẹ kẹ ḅiokoromarị, anie í opu iyingiḅọ Lọyịsị nyana minini pembe ye, anie furo ḅio í iyi iyingiḅọ Unisi sọ nyana minini mẹ. À nimi lama wararị mịnẹ ị́ ḅụụ ḅio sọ anị emi.

⁶ Miemẹ gotẹ à kẹ í ḅiokoromarị mịnẹ, àrị ị̀ aḅara kẹ ị́ ọgọnọ gbana sakị ḅụ Tamụnọ kẹ ị́ pịrị ḍiepịrịye mẹ mịẹ tẹ anị ị́ ḅụụ ḅio ḍumo sime.

⁷ Kẹ gotẹ ọkọ ḍukoarị, Tamụnọ kẹ wa pịrị tẹ Tẹmẹ ḅe ọ̀ wamịna tẹmẹ-naịn-naịnma-a; anie nakara, ọ̀ Tẹmẹ ḅe kụrọ na, ḅẹlẹma na, ḅụụ-ọlọ na kẹ wamịna ḅụụ ḅio suu ḅinmarị.

⁸ Ọkọẹrẹsị, wa Nyanaḅọ ḅe ḅụ í nimi ye mẹ ḍuko tẹ ọkọ ḍiki anga mẹ ị́ ḅụụ-jịrịma ma; yẹrị Kịrayịsị sịḅị ẹrẹsị ikoli ḅio simearị ḅọ ḅe sọ ị́ ḅụụ-jịrịma ma. Anie nakara, Iḅi Oku mẹ gotẹ tọrụsiẹrị mẹ ḅụ í ḍiekiri nyana, Tamụnọ wẹrịtẹ ị́ kẹ anị mịẹ ḅẹ ịnyọ kẹ ị́ pịrịarị ḅara ḅụ.

⁹ Ori wa ḅọrọma tẹ wa sịnm wa ori atomi sọọ, wamịna kọrịnama ḅụ-a, kụma ori tọn ḅara na ó ḍiki-ḅụụjịrị na ẹrẹsị. Kịrayịsị Jizọsị ḅụ mie ọ̀ ḅọrọ tẹ mị ḍiki-ḅụụjịrị mẹ kẹ wa pịrị ye, tomikiri mẹ amụ tẹmẹ-a kụra-ḅio,

¹⁰ kụma mịọkụ, wa Ḅọrọmaḅọ, Kịrayịsị Jizọsị ḅụ, ori anị mịẹfinji wa pịrị tẹ. Ọ̀ mịẹ tẹ fịị ḅarị kụrọ nyana-a, tẹ iḅi-oku mẹ ḅụ ọ̀ ḅọrọ tẹ sime gbamaso ḍumo mịẹfinji tẹ.

¹¹ Tamụnọ ị̀ tọn tẹ à fịrịmẹnjịḅọ na ye-tolumaḅọ na sọ tẹ Iḅi Oku mẹ ḍuko wasama,

¹² tẹ miemẹ mie à gotẹ mịna atọrụsiẹrị ma ẹrịarị. Kụma ḅiokpọ paa ị̀ ḅụụ ḅio ḅin wararị, kẹ gotẹ ọkọ ḍukoarị, à kẹ ḅiokpọmarị ḅọ ḅe à nwẹn nimi wararị, anịsakị à ḅio-maaịn-tọn nyana-a, mịnẹ ori inetẹ à kẹ ọ̀ ḅara sụa ye mẹ wẹrị kpaịnma nwenii anị Ene mẹ la ḅa.

¹³ À kẹ í toluma karakara ẹkwẹn ma ọlọ kụrọmaa, tẹ arị ḍiki anga ye sọ ị́ pịrị, tẹ pịkị anị minini mẹ na ḅẹlẹma mẹ na, tẹ wa Kịrayịsị Jizọsị na gbọrụ ḅụ sime ye ḅụ wa nyanarị ye mẹ ḅụ simee.

¹⁴ Wamịna ḅụụ ḅio angarị Fịafịa Tẹmẹ ḅe ḅụ ḅọrọ tẹ ịn kẹ ịn ḅarasụa iḅi aị ma koko.

¹⁵ Ị́ kọkọ nimi, Esiya ibe ḅụ kịnị mamgba ì koroma mangị tẹ, Figelusi na Amojinisi na sọ ịna ḅụ sọm.

¹⁶ Yee KỊNỊNYANAḄỌ ḅe ọkụrụkụrụ nyana Ọnẹsịforọsị warị-kpo mẹ pịrị, ọ̀ tọnwa sakị kẹ ḅo ì ḅiokpọma ye mẹ ẹrẹsị. Yẹrị ikoliḅọ mẹ ọ̀ ḅụụ-jịrịma-a,

¹⁷ kụma ò ḅo Romu ḅụ koro sịẹ gbọrụ sakị ori à sime anga ḍọkị nwenii ḅo ị̀ lam.

¹⁸ Yee KỊNỊNYANAḄỌ ḅe ori ọkụrụkụrụ kẹ ọ̀ pịrị anị ene mẹ ḅụ! Anịsakị Ẹfisọsị ḅụ ọ̀ mịẹ ị̀ pịrị ye ḍụḅa la ḅara í nimim.