2 Samụẹlị 9 - FỊAFỊA BAỊBỤLỤ

Devidi Kẹ Mẹfibosẹtị Na Kọn Iḅi-anga

¹ Devidi nwẹnị gbela, “Sọlụ warị mẹ ḅụ kirikọn gbọrụḅọ paa paka ḅịa, mịẹ tẹ à Jonatanị gotẹ iḅi-anga kẹ mḅọ na kọn ḅẹ ḅara?”

² Mịọkụ Sọlụ warị ḅẹ gbọrụ fịrịmẹnjịḅọ simem, oriḅe ẹrẹ anie Ziba, tẹ ịn nwẹnị ọ̀ sịn Devidi pịrị, tẹ amadaḅọ ḅe nwẹnị ò gbela, “Ị́yẹrị Ziba?” Ọ̀ nwẹnị pakịrị, “Ị́ fịrịmẹnjịḅọ ḅe ori.”

³ Devidi nwẹnị gbela, “Sọlụ warị mẹ ḅụ gbọrụḅọ paa paka ḅịa, mịẹ tẹ à Tamụnọ iḅi-anga mẹ kẹ mḅọ na kọn ḅẹ ḅara?” Ziba nwẹnị amadaḅọ ḅe pakịrị, “Jonatanị gbọrụ owiḅọtụḅọ paa emi; ori ngụrọ kọn-arị.”

⁴ Amadaḅọ ḅe nwẹnị ò gbela, “Ọ̀ tọ-anga emi?” Ziba nwẹnị amadaḅọ ḅe pakịrị, “Ọ̀ Mahaka, Amịyẹlị owiḅọtụḅọ ḅe warị emii, Lodeba ḅụ.”

⁵ Anịtẹso Devidi nwẹnị fịrịma mu Lodeba ḅụ Mahaka, Amịyẹlị owiḅọtụḅọ ḅe warị ori ọkị-ḅo.

⁶ Mẹfibosẹtị, Jonatanị owiḅọtụḅọ, pịkị Sọlụ taa-owiḅọtụḅọ ḅe nwẹnị Devidi ḍọkụma-ḅo, tẹ kụn pịrị ḅụ ọ̀ tọrụkuḅu kẹ ḅịkị kiri koro. Tẹ Devidi nwẹnị Mẹfibosẹtị sịn, “Mẹfibosẹtị!” Tẹ ọ̀ nwẹnị pakịrị, “Ḍikii, mie ị́ fịrịmẹnjịḅọ ḅee.”

⁷ Devidi nwẹnị ọ̀ ḅẹẹ, “Ḅalafa ma, kẹ gotẹ ọkọ ḅẹẹarị, ị́ ḍa Jonatanị gotẹ arị iḅi-anga kẹ ị́ na kọn ḅa, tẹ í opu ḍaḅọ Sọlụ kiri mẹmgba pịkịma ị́ pịrị ḅa, anịsakị ị̀ dẹbịlẹ ḅụ mie sakị mamgba í fịye fị ḅarị” ye.

⁸ Mẹfibosẹtị nwẹnị kụn pịrị ḅụ sịḅị-tuu tẹ ḅẹẹ, “Ị́ fịrịmẹnjịḅọ ḅe anie tiye, tẹ ị́ tọrụ kẹ ì pembema fịtẹ obiri ḍiki na-iḅi?”

⁹ Anịtẹso amadaḅọ ḅe nwẹnị Ziba, Sọlụ fịrịmẹnjị ḅọ ḅe sịn, tẹ ọ̀ ḅẹẹ, “Sime Sọlụ pịrị aị mamgba na, sime ọ̀ warị mẹmgba pịrị aị mamgba na àrị arị kẹ Mẹfibosẹtị ị́ sịḅịdaḅọ taa-owiḅọtụḅọ ḅe pịrị tẹẹ.

¹⁰ Anịsakị ị́yẹrị na, í owiapụ-awọmẹ na ị́ afịrịmẹnjịapụ na, ḍụọ ḍiḅi-ḍiḅi ọ̀ pịrị ḅa, anị ḅio paka-ḅo aị ọkị-ḅo ḅa, mịẹ tẹ ị́ sịḅịdaḅọ taa-owiḅọtụḅọ ḅe inetẹ fịye nyana tẹ fị ḅẹ ḅara; kụma Mẹfibosẹtị ị́ sịḅịdaḅọ taa-owiḅọtụḅọ ḅe sakị mamgba ị̀ dẹbịlẹ ḅụ fịye fị ḅa.” Mịọkụ Ziba owiapụ-awọmẹ jei apụ na, fịrịmẹnjịapụ si-kem na nyana wararị.

¹¹ Anịtẹso Ziba nwẹnị amadaḅọ ḅe ḅẹẹ, “ị̀ nyana amadaḅọ ḅe wẹrịtẹ tọn ọ̀ fịrịmẹnjịḅọ pịrị ḅara mamgba, anị ḅara mie ị̀ fịrịmẹnjịḅọ mịẹ ḅarị ḅara.” Anieḅụ Mẹfibosẹtị amadaḅọ ḅe owiapụ-awọmẹ ma fịye fị ḅara kẹ Devidi dẹbịlẹ ḅụ fịye fịm.

¹² Mẹfibosẹtị asambịrịma gbọrụ owiḅọtụḅọ nyanam, oriḅe ẹrẹ Mika. Inimgba tẹ Ziba warị ḅụ anga apụ mamgba nwẹnị ḅo Mẹfibosẹtị afịrịmẹnjịapụ sọ.

¹³ Anieḅụ Mẹfibosẹtị Jeruselemu ḅụ angam; anị gotẹ ọkọ mịẹ ye ọ̀ sakị mamgba amadaḅọ ḅe dẹbịlẹ ḅụ fịye fịarị. Mịọkụ ori maa ḅụọ mamgba ḅụ ori ekeli wararị.