2 Samụẹlị 8 - FỊAFỊA BAỊBỤLỤ

Devidi Ò Gbin Ọmụ Ḅụ Nyana Owu-ḅara-iḅi

¹ Miemẹ ḅọrọ tẹso, Devidi Filisiteniapụ ma nẹngịmam, tẹ mịẹ tẹ ịn sịḅị-tuum, tẹ Devidi Filisiteniapụ ma ḅara Mẹtẹgị-Ama ọkịm.

² Ò Mohabụ nẹngịmam, ori ịn tọnm ọgbụrụ-sụn ḅụ, tẹ ịn mịẹ tẹ ịn kiri-ḅio lẹgịm; ịn sụn maa ọgbụrụ ḅụ sime apụ ini ịn ḅaam, tẹ gbọrụ ḅintẹ ọgbụrụ ḅụ sime apụ wẹrịsom. Mohabụ ḅẹ apụ ma ḅo Devidi afịrịmẹnjịapụ sọm, tẹ sịẹ oso jen sịẹ pịrịarị igbigi oso-oso ḅom.

³ Devidi pịkị Adadeza, Zoba ḅẹ amadaḅọ, Rehobu owiḅọtụḅọ ḅe nẹngịmam, Adadeza mu Yuferetisi tọrụ mẹ ḅụ siin ọ̀ kụrọ pịkịma ọkị ḅẹ-muarị ogbo.

⁴ Devidi ọ̀ ḅara ḅụ asụ-dọkụ-ọmụapụ kịnị inia ẹndẹ sọnọa si finji (1,700) na, ḅụọ kẹ mẹnjịarị ọmụgbin-apụ kịnị maa apuku, oyi ẹndẹ finji (20,000) na ọkịm; tẹ Devidi nwẹnị kirimẹnjị-ọmụarụ ma ḅẹ asụ mamgba aḅụọ pẹlẹ-pẹlẹ-siin fama, kụma nwẹnị kirimẹnjị-ọmụarụ sọnọa si na-iḅi ḅẹ asụ kọnma.

⁵ Damasịkọsị ḅẹ Siriya ḅẹ apụ ḅarasụa Adadeza, Zoba ḅẹ amadaḅọ pịrị ḅẹ ḅo tẹso, Devidi Siriya ḅẹ apụ ma ḅụ kịnị maa apuku, jei ẹndẹ finji (22,000) ḅaam.

⁶ Anịtẹso Devidi nwẹnị ọmụgbin-apụ itu-itu kẹ Damasịkọsị ḅụ Aramụ nwẹn-sịn ama ḅụ koroma; Siriya ḅẹ apụ ma nwẹnị ḅo fịrịmẹnjịapụ sọ Devidi pịrị, tẹ sịẹ oso jen sịẹ pịrịarị igbigi oso-oso ḅom. Anịsakị Devidi mu anga mu anga ḅụ, KỊNỊNYANAḄỌ ḅe owu-ḅara-iḅi kẹ ọ̀ pịrịm.

⁷ Devidi golu-golu ekpeke ma tẹ Adadeza afịrịmẹnjịapụ dogi aị ma ọkịm, tẹ arị kẹ Jeruselemu ḅom.

⁸ Tẹ Adadeza opu ama Bẹta na, Berotayị na ḅụ Amadaḅọ Devidi ḅaka ḅara kẹ ojo-ikulele ọkịm.

⁹ Toyi, Hamatị ḅẹ amadaḅọ naam mịnẹ Devidi Adadeza bebe ọmụ-ogbo mẹ nẹngịma tẹ ḅẹ ye ḅụ,

¹⁰ Toyi ori owiḅọtụḅọ Joramụ kẹ nwẹnị Devidi fịrịma, ori Adadeza na owu sọ, tẹ ọ̀ nẹngịma ye mẹ ẹrẹsị ḅii-ḅịḅị kẹ Devidi pịrị, pịkị ò tokini ḅẹ gotẹ; gbala Adadeza wọlọ-wọlọ Toyi na owu sọ tẹ ẹrẹsị. Joramụ nwẹnị ịn seleḅa kẹ tẹmẹ-aị na, golu kẹ tẹmẹ-aị na, ojo kẹ tẹmẹ aị na kẹ sụa ḅo;

¹¹ mịna ị̀ ma sọ, Amadaḅọ Devidi kẹ golu na, seleḅa na tẹ ọ̀ mịẹ tẹ sịḅị-tuu opu asịẹ mamgba ḅụ ori ọkị tẹ mịẹ-fịafịama KỊNỊNYANAḄỌ ḅe pịrị tẹ aị ma ḅụ sụa mịẹ-fịafịamam,

¹² anie Idọmụ na, Mohabụ na, Amọnị ḅẹ apụ ma na, Filisiteniapụ ma na, Amalẹkị na, Adadeza, Rehobu owiḅọtụḅọ, Zoba ḅẹ amadaḅọ ḅe ḅara ḅụ ọ̀ fọịn ọkị aị ma na.

¹³ Devidi gbọrụ ẹrẹ mịẹ amịna ḅụụ pịrịm. Ọ̀ pịkịma-ḅo sakị, ọ̀ Fụn Tụndụ Ogboku mẹ ḅụ, Idọmụ ḅẹ apụ ḅụ kịnị maa apuku, sọnọ ẹndẹ finji (18,000) ḅaam.

¹⁴ Devidi nwẹnị ọmụgbin-apụ itu-itu kẹ Idọmụ ḅụ koroma; Idọmụ mẹmgba ikelema-koro ori ọmụgbin-apụ itu-itu kẹ koromam. Idọmụ ḅẹ apụ mamgba nwẹnị ḅo Devidi afịrịmẹnjịapụ sọ. Anịsakị Devidi mu anga mu anga KỊNỊNYANAḄỌ ḅe owu-ḅara-iḅi kẹ ọ̀ pịrịm.

¹⁵ Anieḅụ Devidi ama-da Izirẹlị mẹmgba pịrịm; tẹ Devidi karakara ḅẹrẹtọn na, kịnị na-iḅi ḅẹ ḅara kẹ ḅẹrẹtọn tomi mamgba pịrịm.

¹⁶ Johabụ, Zeruya owiḅọtụḅọ ḅe anie ọmụ-ogbo mẹ ḅẹ ḅẹrẹtọnḅọ; anịsakị Jehosafatị Ahiludu owiḅọtụḅọ ḅe anie ye kẹ ḍiri ḅio sụa mẹ ḅẹ sịḅịdaḅọ;

¹⁷ anịsakị Zadọkụ, Ahitubu owiḅọtụḅọ ḅe na, Ayimẹlẹkị, Abịyata owiḅọtụḅọ ḅe na, anie agbamịẹapụ; anịsakị Sẹraya anie ḍiri-kẹẹḅọ.

¹⁸ Bẹnaya Jehohada owiḅọtụḅọ ḅẹ anie ḅụụ ḍikiḍiki apụ Keretayịtị apụ ma na, Pẹlẹtayịtị apụ ma na sịḅịdaḅọ; anịsakị Devidi owiapụ awọmẹ ma anie agbamịẹapụ.