2 Samụẹlị 6 - FỊAFỊA BAỊBỤLỤ

Ọḅọkụ-Igbe Mẹ Ịn Kẹ Jeruselemu Ḅo Tẹ

¹ Devidi nwẹnị siin Izirẹlị ḅẹ sẹlẹmatẹ owiapụ mamgba kobiri, ini kịnị tẹra apuku, jeia ẹndẹ finji (30,000).

² Devidi saakịm, tẹ tomi mamgba tẹ Bale-Juda ḅụ ori na sime atomi ma anịjụ ḅụ Tamụnọ Ọḅọkụ-Igbe mẹ, aniemẹ tẹ ịn Kụrọmamgba Nyana KỊNỊNYANAḄỌ ḅe tẹ Sẹrubimu ma ọgọnọ ḅụ emine ọgọnọ lẹgị-sime wararị ḅọ ḅe ẹrẹ kẹ kuro wararị ye mẹ ọkị iwo ḅo ḅẹ ọ̀ ḅụụ sọ tẹ mum.

³ Ịn nwẹnị ḅara kẹ sukurumarị maa aḅụọ sụa gbọrụ ịwọ yedogi-kirimẹnjị-arụ ḅio Ọḅọkụ-Igbe mẹ dogi, tẹ Abinadabụ warị mẹ tẹ tụndụ mẹ ọgọnọ sime ye mẹ ḅio anị pakama-ḅo; Abinadabụ owiapụ-awọmẹ Uza na, Ahiyo na mie yedogi-kirimẹnjị-arụ mẹ kẹ tọrọkọ sụn wararị.

⁴ Ọḅọkụ-Igbe mẹ simearị ḅara kẹ sukurumarị maa aḅụọ sụa ịwọ kirimẹnjị-arụ mẹ dọkụarị, tẹ Ahiyo Ọḅọkụ-Igbe mẹ tọrọkọ emi.

⁵ Anịsakị Devidi na Izirẹlị warị mẹmgba na, ịna ịnyọ mẹmgba kẹ KỊNỊNYANAḄỌ ḅe tọrọkọ ḅioḅẹlẹ-ḅẹlẹ, nume su-su alili na, ọbọ amẹẹ na, akwa na, asaka-saka na, saịn-saịn-aị na farịarị.

⁶ Ịn ḅo Nakọnị mgbọlụ sẹlẹ kiri la tẹso, Uza nwẹnị ọ̀ ḅara-sụn mu Ọḅọkụ-Igbe mẹ lama, tẹ anị ọlọ, pootẹ-anambulo ma ḅụọ gbisinim ẹrẹsị.

⁷ Tẹ KỊNỊNYANAḄỌ ḅe ịganị nwẹnị kẹngẹma Uza ọgọnọ sara; tẹ Tamụnọ nwẹnị anịjụ mẹ ḅụ ọ̀ ḅaa, ori ọ̀ ḅara-sụn mu Ọḅọkụ-Igbe mẹ lamam ẹrẹsị; tẹ ori anịjụ Tamụnọ Ọḅọkụ-Igbe mẹ akaka fịịm.

⁸ KỊNỊNYANAḄỌ ḅe ịganị ḅụ Uza fomu ye mẹ nwẹnị Devidi ḅụụ-ḅẹsọọ, tẹ ọkị-ḅo mịmgba la ini anịjụ mẹ sịnm Pẹrẹzi-uza.

⁹ Devidi nwẹnị anị ene mẹ ḅụ KỊNỊNYANAḄỌ ḅe ḍiki-ḅalafaa; tẹ ọ̀ nwẹnị ḅẹẹ, “KỊNỊNYANAḄỌ ḅe Ọḅọkụ-Igbe mẹ inetẹ tọ-ḅara kẹ ị̀ ḍọkụma-ḅo ḅẹ?”

¹⁰ Anieḅụ Devidi ḅarị KỊNỊNYANAḄỌ ḅe Ọḅọkụ Igbe mẹ ọkị Devidi opu ama mẹ ḅio sọ-mu ḅẹ ḅii-a; kụma Devidi anị ọkị akaka da Obed-edọmụ, Gati ḅẹ ḅọ ḅe warị mum.

¹¹ KỊNỊNYANAḄỌ ḅe Ọḅọkụ-Igbe mẹ Obed-edọmụ, Gati ḅẹ ḅọ ḅe warị tẹra akalụ simem, tẹ KỊNỊNYANAḄỌ Obed-edọmụ na ọ̀ warị suku mẹmgba na bomam.

¹² “Tamụnọ Ọḅọkụ-Igbe mẹ ẹrẹsị KỊNỊNYANAḄỌ ḅe Obed-edọmụ na, ọ̀ warị suku na, ye mẹmgba tẹ sime ọ̀ pịrị aị na boma tẹ” mẹ ini anị ḍuko Amadaḅọ Devidi pịrịm. Anieḅụ Devidi mum tẹ ḅioḅẹlẹ ḅụ Obed-edọmụ warị ḅụ Tamụnọ Ọḅọkụ-Igbe mẹ ọkị iwo Devidi opu ama mẹ ḅom;

¹³ tẹ inima tẹ KỊNỊNYANAḄỌ ḅe Ọḅọkụ-Igbe mẹ dogiapụ ma sonio aḅụọ mẹnjị tẹso, ọ̀ nwẹnị gbọrụ pootẹ-nambulo na, tim-timtẹ gbọrụ asambịrịma nambulo na kẹ agba mịẹ.

¹⁴ Devidi lọkọ-ḅịtẹ kẹ ò ḅiri ọkịm, tẹ ori ịnyọ mẹmgba kẹ KỊNỊNYANAḄỌ ḅe tọrọkọ sẹkịm.

¹⁵ Mị-ḅara mie Devidi na Izirẹlị warị mẹmgba na KỊNỊNYANAḄỌ ḅe Ọḅọkụ-Igbe mẹ kẹ ḅioḅẹlẹ oloku mẹ na, ọdụ fie pọkọ mẹ na ḅụ iwo ḅo ḅara.

¹⁶ KỊNỊNYANAḄỌ ḅe Ọḅọkụ-Igbe mẹ Devidi opu ama mẹ ḅio sọ-ḅoarị ogbo, Mịkalị, Sọlụ ẹrẹḅọtụḅọ ma nwẹnị ikiḅa-ḅọkọ ḅụ toluma ḍiki tẹ Amadaḅọ Devidi ḍosi-ḍositẹ KỊNỊNYANAḄỌ ḅe tọrọkọ sẹkịarị ḅara ẹrị; tẹ á nwẹnị á ḅioḅẹngbọ ḅụ ò ḍiki-sima.

¹⁷ Tẹ ịn nwẹnị KỊNỊNYANAḄỌ ḅe Ọḅọkụ Igbe mẹ kẹ sọ-ḅo, tẹ anị kẹ akpụrụ-warị mẹ tẹ Devidi pike anị pịrị ye mẹ ḅio koromam; tẹ Devidi nwẹnị KỊNỊNYANAḄỌ ḅe tọrọkọ dọkịma-agba na, dein-pịrị-agba na mịẹ.

¹⁸ Devidi dọkịma-agba ma na, dein-pịrị-agba ma na mịẹ fama tẹso, ọ̀ nwẹnị Kụrọmamgba Nyana KỊNỊNYANAḄỌ ḅe ẹrẹ ḅụ tomi mamgba boma,

¹⁹ tẹ tomi mamgba ogbo-ḅio, bebe Izirẹlị tomina-ogbo mẹ fịturu kpo-kpo na, fọịtẹ nama pakịrị-pakịrị na, ịn kẹ rezini sịn sịnmgbọlụ kẹ mịẹ kịkị na kẹ ḍie owiapụ-o, ereme-o gbọrụḅọ-gbọrụḅọ pịrịm. Anịtẹrẹmẹ tomi mamgba gbọrụḅọ-gbọrụḅọ so amịna warị mum.

²⁰ Devidi nwẹnị pịkịma ọ̀ warị-kpo boma ḅẹ ḅo. Kụma Mịkalị, Sọlụ ẹrẹḅọtụḅọ ma nwẹnị Devidi na bịama ḅẹ paka-ḅo, tẹ ḅẹẹ, “Izirẹlị ḅẹ amadaḅọ ḅe mịmgba tọ-ḅara kẹ amịna ḅụụ kụn, ori afịrịmẹnjị-eremịna-awọmẹ ma atọrụ mịmgba ori oju finji-finji sararị, ofori-ofori atomi ma ḅẹ gbọrụḅọ ḅụụ-jịrị-a ḅara kẹ amịna ḅụụ mịẹ ḅara!”

²¹ Devidi nwẹnị Mịkalị ḅẹẹ, “KỊNỊNYANAḄỌ ḅe tọrọkọ mie anị mịẹ ye, oriḅe tẹ ị̀ kẹ amadaḅọ owiḅọtụḅọ mịẹ Izirẹlị KỊNỊNYANAḄỌ ḅe atomi ma pịrị ḅẹ ḅara kẹ ị̀ sẹlẹ-ọkị ị́ ḍa na, ọ̀ warị mẹmgba na nẹngịma ḅọ ḅe — anịsakị à KỊNỊNYANAḄỌ ḅe tọrọkọ ḅụ ḅioḅẹlẹ ḅa.

²² À pịkị paa ị̀ ḅụụ mịẹ-sima miemẹ sọ nẹngịma ḅa, tẹ arị ị́ atọrụngbọ ḅụ iderima ḅa, kụma fịrịmẹnjị-eremịna-awọmẹ ma tẹ í ḍuko apụ ma, ini aḅụụ à kụn nyana ḅa!”

²³ Anịsakị Mịkalị, Sọlụ ẹrẹḅọtụḅọ ma gbọrụ tụḅọ sọ iyi-a mu á fịị ene lam.