2 Samụẹlị 4 - FỊAFỊA BAỊBỤLỤ

Ini Isi-bosẹtị Nini Tẹ

¹ Sọlụ owiḅọtụḅọ Isi-bosẹtị naam mịnẹ Abụna, Hẹbụrọnị ḅụ fịị tẹ nwẹn ḅẹẹ ye ḅụ ọ̀ ḅalafaam, tẹ Izirẹlị mẹmgba ekpe tukutukum,

² Mịọkụ Sọlụ owiḅọtụḅọ maa owiapụ tẹ ama gbaịn-gbaịn fọịn-arị maa ogbo ḅẹ ọmụ alapụ nyana wararị; ini ḅẹ gbọrụḅọ ẹrẹ Bahana osi ḅọ ḅe ẹrẹ Rekabụ, Benijamịnị ḅụ Biyarọtị ḅụ sime tẹ ḅo Rimọnị owiḅọtụḅọ ḅe (Biyarọtị sọ ịn kịẹn Benijamịnị ḅụ sunm;

³ Biyarọtị furo-ḅẹ-apụ ma ḍumo-mangị kọn so Gitahịmụ mum, tẹ anịjụ ḅụ bịan apụ sọ ḅo mịmgba lam.)

⁴ Jonatanị, Sọlụ owiḅọtụḅọ ḅe gbọrụ owiḅọtụḅọ tẹ ngụrọ-kọnḅọ nyanam, Sọlụ na Jonatanị gboloma oku mẹ ḅo Jẹzirili la sakị anie ọ̀ sịḅị sọnọ akụra; tẹ ò ḍikiḍikiarị ḅọ ò dogi ḍumo-mangị kọnm; tẹ árị ḅẹ fọnya mangị ḅụ, ọ̀ ḅịkịm, tẹ ekelim. Ori ẹrẹ anie Mẹfibosẹtị.

⁵ Mịọkụ Rimọnị owiapụ-awọmẹ Biyarọtị furo ḅẹ apụ ma Rekabụ na, Bahana na saakị pakam, tẹ ene-ogbo pembema sakị ḅụ Isi-bosẹtị warị ḅom, ori ori eneḅaka ogbo ḅẹ ịnyọsararị ogbo.

⁶ Warị mẹ ḅẹ ḅọkọ-ḍikiḍikiḅọ ma anịngẹ-kụraḅio fịturu mịẹ witi guguarị, kụma á ḅụụ-lọkọ ḅụ sịngẹ tẹ mono tẹ; anieḅụ Rekabụ na ò iyimbere Bahana na nwẹnị kẹmẹẹma warị mẹ ḅio sọ-mu.

⁷ Ịn warị mẹ ḅio sọ-mu tẹso, ori ori iḅila ọgọnọ ḅọlọlọ tẹ ò mono-ḅio ḅụ monoarị ḅara mie ini ọkọ wẹrị ò fomu ḅaa tẹ ọ̀ sịḅị pẹlẹ-siin yee. Ịn nwẹnị kem-sịḅị mẹ ọkị tẹ bebe ḍin mẹmgba kẹ ịkpa ḅio ele mẹ ḅẹ etela ḅụ mẹnjịm,

⁸ tẹ nwẹnị Isi-bosẹtị sịḅị mẹ ọkị-ḅo Hẹbụrọnị ḅụ Devidi pịrị. Ịn nwẹnị amadaḅọ ḅe ḅẹẹ, “Mie Isi-bosẹtị Sọlụ owiḅọtụḅọ ḅe sịḅị mẹ, ị́ na fịya-a ḅọ ḅe tẹ í ḍumo ḍọkịarị ḅọ ḅe; KỊNỊNYANAḄỌ ḅe mịmgba ḅụ ị̀ nyanaḅọ ḅe gbẹẹfị mẹ ḅii tẹ Sọlụ na ọ̀ ḅụụ paka-ḅo ḅọ na ọgọnọ ḅụ.”

⁹ Kụma Devidi nwẹnị Rekabụ na, Bahana na, Rimọnị Bẹrọtị furo-ḅẹ-ḅọ ḅe owiapụ-awọmẹ ma pakịrị, “KỊNỊNYANAḄỌ ḅe ḍumo-sime wararị ogbo, oriḅe tẹ ì ḍiki-ḅioḅẹlẹ-a ḅọ goḅọ-goḅọ ḅụ ì ḍumo pakịrị ọkị ḅọ ḅe,

¹⁰ gbọrụḅọ ḅo ḍuko ị̀ pịrịm, ‘Ḍikii Sọlụ fịị tẹ, tẹ ḅiotọn-arị ori iḅi-oku kẹ ḅoarị sakị, arị ori ọlọ tẹ ọ̀ ḅaam Zikilagị ḅụ, anie gbẹẹ-ye mẹ tẹ ori oku mẹ gotẹ à kẹ ọ̀ pịrị ye.

¹¹ Jen-a jen-a ọmịnị si-sịḅịḅio-sụa owiapụ nwẹnị karakara tomḅọ soku-ḅẹ warị-ḅio ori iḅila ọgọnọ ḅụ ọ̀ ḅaa tẹ ḅẹ ọkụma, arị ọmịna ḅara ḅụ ori ọmbie ḅii, tẹ tomikiri mẹ ḅụ ọ́ ḅaa fama ḅịa?’ ”

¹² Tẹ Devidi nwẹnị tọn ori asambịrịma owiapụ pịrị, tẹ ịn nwẹnị ịn ḅaa, tẹ ịna aḅara na, ḅụọ na pẹlẹ-pẹlẹ-siin, tẹ nwẹnị ịn kẹ Hẹbụrọnị ḅụ ḍaḅa mẹ akaka kpọọ sololo. Kụma ini Isi-bosẹtị sịḅị mẹ ọkịm, tẹ anị kẹ Hẹbụrọnị ḅụ Abụna ḍuḅu ḅio ḍiḅim.