2 Samụẹlị 3 - FỊAFỊA BAỊBỤLỤ

¹ Ọmụ Sọlụ warị mẹ na, Devidi warị mẹ na ogboku sime alamam; tẹ Devidi warị mẹ ịnyọ nyana tọrọkọ-tọrọkọ mu ḅara mie Sọlụ warị mẹ ịnyọ fa tọrọkọ-tọrọkọ mu ḅara.

Devidi Owiapụ-Awọmẹ

² Hẹbụrọnị ḅụ ini iyi Devidi pịrị owiapụ-awọmẹ: ori mgbe anie Amịnọnị, Jẹzirili ḅẹ Ayinohamụ ori iyim;

³ ò gboloo anie Kilihabụ, Kamẹlị ḅẹ fịtẹ Nabalị ta Abigẹlị ori iyim; anịsakị gbolo-palịḅọ anie Abusalọmụ, Talịmayị, Gẹsọ ḅẹ amadaḅọ ḅe ẹrẹḅọtụḅọ ma ori iyim,

⁴ anịsakị ini karama ḅọ anie Adonịja, Agiti owiḅọtụḅọ ḅe; anịsakị sọnọ karama ḅọ anie Sẹfataya, Abitali owiḅọtụḅọ ḅe;

⁵ anịsakị sonio karama ḅọ anie Itiramụ, Devidi ta Egila ori iyim. Mịna apụ ma Hẹbụrọnị ḅụ in ini iyi Devidi pịrịm.

Abụna Mu Devidi Ḅụụ Sọm

⁶ Ọmụ Sọlụ warị mẹ na, Devidi warị mẹ na ogboku emi ḅẹẹ-sakị, Abụna amịna ḅụụ mịẹ-mịẹ kụrọmarị.

⁷ Mịọkụ Sọlụ gbọrụ oloḅọ nyanam, arị ma ẹrẹ Rizipa, Ahịya ẹrẹḅọtụḅọ ma; tẹ Isi-bosẹtị nwẹnị Abụna ḅẹẹ, “Í tiegotẹ sọ ị̀ ḍa oloḅọ ḍọkụma-mu?”

⁸ Anịtẹso Isi-bosẹtị ẹkwẹn-aḅịḅị ma nwẹnị Abụna ḅụụ-ḅẹsọ lama, tẹ ọ̀ nwẹnị ḅẹẹ, “Yẹrị Juda ḅẹ obiri sịḅị mụnọọ? Mịmgba mẹ sọ à paa sịḅị-tuu ị́ ḍa Sọlụ warị mẹ na, ori owiapụ-amịnapụ na, ori ikiapụ na pịrịarị, tẹ paa amụ ị́ kẹ Devidi ḅara-ḅio suu-a; tẹ anịsọ ị́ mịmgba ẹrẹḅọ gbolomaye ḅụ ye kẹ ị̀ sịḅị sẹịn-arị.

⁹ Tamụnọ fomu-ḅara kẹ ị̀ pịrịị, à nwẹnị KỊNỊNYANAḄỌ ḅe ye karị ḅara kẹ minini Devidi pịrị ye mẹ mịẹ ḅinma ọ̀ pịrị-a ḅẹḅẹ.

¹⁰ Anie Sọlụ warị mẹ ḅụ ama-da mẹ saḅama, tẹ Devidi ama-da emine mẹ saakị sịẹma Izirẹlị na Juda na pịrị Danị ḅụ ọkị mu Biyasẹba la.”

¹¹ Isi-bosẹtị, Abụna ḍiki-ḅalafaarị ẹrẹsị ẹkwẹn gbọrụmgbọ-sọ ori inetẹ kẹ ọ̀ pakịrị-a.

¹² Abụna nwẹnị oku-mẹnjịapụ kẹ Hẹbụrọnị ḅụ Devidi fịrịma, tẹ ḅẹẹm, “Ama mẹ sime tụḅọ pịrị? Ị̀ na ị́ ọḅọkụ fị, anịsakị ḍikii, Izirẹlị saḅama ḅo ị́ pịrị mẹ ḅụ ị̀ ḅarasụa mẹ sime ḅa.”

¹³ Devidi nwẹnị pakịrị, “Iḅim, àrị ị́ na ọḅọkụ fị ḅa; kụma gberie tẹ arị ị́ ḅara ḅụ ḅii ḅarịye anie, ị́ tarị Mịkalị, Sọlụ ẹrẹḅọtụḅọ ma ọkị-ḅo sikima ị́ ị̀ tọrụkuḅu ẹrị ḅịa, ị́ ḅo ị̀ na ẹrị-a ḅẹ sakị.”

¹⁴ Anịtẹso Devidi nwẹnị oku-mẹnjịapụ kẹ Sọlụ owiḅọtụḅọ Isi-bosẹtị fịrịma, tẹ ḅẹẹm, “Ì ta Mịkalị ma tẹ à Filisiteniapụ tarị aḅụụ ḅẹ sọnọa si kẹ sịḅị ḅụ ye-mịẹ tẹ sime ḅọ ma kẹ ị̀ pịrịị.”

¹⁵ Isi-bosẹtị nwẹnị fịrịma tẹ á di Palitiyẹlị, Lahisi owiḅọtụḅọ ḅe ḅara ḅụ árị ọkị.

¹⁶ Kụma á di á ḅụụ sọ tẹ owu-owu á ḍukamẹnjị ma-mu Bahurimu lam. Anịtẹso Abụna nwẹnị ọ̀ ḅẹẹ, “Soo, pịkịma-soo;” tẹ ọ̀ pịkịma-som.

¹⁷ Abụna nwẹnị Izirẹlị ḅẹ omongiapụ ma na ḅịḅị-ọkịya, tẹ ḅẹẹm, “Sakị kẹlẹ ḅọrọtẹ sakị ḅụ, ọmịnị ama-da ọ́ pịrị ḅẹ ḅara ḅụ Devidi ḍọkị simem.”

¹⁸ Mịọkụ ọmịnị anị saakị ḅoo; kẹ gotẹ ọkọ ḅẹẹarị, KỊNỊNYANAḄỌ ḅe kẹ Devidi karịma tẹ ḅẹẹm, “Ị̀ fịrịmẹnjịḅọ Devidi ḅara ḅụ arị ị̀ atomi Izirẹlị ḅọrọma ḅa Filisiteniapụ ma ḅara na, ini na fịya-a apụ mamgba na ḅara ḅụ.”

¹⁹ Abụna pịkị ẹkwẹn Benijamịnị sọ pịrịm; anịtẹrẹmẹ Abụna so Hẹbụrọnị ḅụ Izirẹlịapụ ma na bebe Benijamịnị warị mẹ na kuroma tẹ mịẹ na-iḅi ye ḍuko Devidi pịrị ḅẹ mum.

²⁰ Abụna si-kem na Hẹbụrọnị ḅụ Devidi dama-ḅo sakị, Devidi kopini afịaị sọ Abụna na, owiapụ ma tẹ ori na sime apụ ma na pịrịm.

²¹ Abụna nwẹnị Devidi ḅẹẹ, “À saakị tẹ so ḅa, tẹ Izirẹlị mẹmgba kobiri ị́ nyanaḅọ amadaḅọ ḅe pịrị ḅa, mịẹ tẹ ini ị́ na ọḅọkụ fị ḅẹ ḅara, anieḅụ ị́ inetẹ ama-da í ḅioḅẹngbọ ḅii apụ mamgba pịrị ḅa.” Anieḅụ Devidi, Abụna fịrịma som; tẹ ò dein na som.

Ini Abụna Nini Tẹ

²² Anịtẹso ala-a ogbo Devidi afịrịmẹnjịapụ na Johabụ na ama gbaịn tẹ fọịn ḅụ ḅo lam, tẹ ḅaka ḅara kẹ ye fọịn ḅom. Kụma Abụna ḅarị Devidi na ofori Hẹbụrọnị ḅụ, gbala ori ò fịrịma mu tẹ ọ̀ dein na so tẹ ẹrẹsị.

²³ Johabụ na ọmụ-ogbo mẹmgba tẹ ori na sime apụ ma na ḅo tẹso, ịn nwẹnị anị ḍuko Johabụ pịrị, “Abụna, Naha owiḅọtụḅọ ḅe amadaḅọ ḅe dama-ḅom, tẹ ori ọ̀ wẹrịso tẹ ò som, tẹ ò dein na so tẹ.”

²⁴ Anịtẹso Johabụ nwẹnị amadaḅọ ḅe ḍọkụma-mu tẹ ḅẹẹ, “Ị́ tiye kẹ nwẹn mịẹ? Ḍikii, Abụna ị̀ dama-ḅom; í tiegotẹ ọ̀ fịrịma so, tẹ anieḅụ ò so tẹ?

²⁵ Í nimi wararị mịnẹ, Abụna, Naha owiḅọtụḅọ ḅe oḅori kẹ ị́ sịn ḅẹ ḅom, mịẹ tẹ ori ị́ mẹnjị paka na, ị́ mẹnjị sọ na, ị́ mịẹarị aị mamgba na nimi ḅẹ ḅara.”

²⁶ Johabụ, Devidi simearị anga ḅụ paka-ḅo tẹso, ọ̀ nwẹnị fịrịmẹnjịapụ fịrịma Abụna dama-mu, tẹ Sera ḅẹ minji-koko-anga ḅụ ọ̀ pịkịma-ḅo; kụma Devidi anị gbolomaye nimi-a.

²⁷ Abịna pịkịma-ḅo Hẹbụrọnị la tẹso, Johabụ nwẹnị ḅeri-ḅio ḅeri-ḅio ẹkwẹn ọ̀ pịrị ḅẹ ḅara kẹ ori ọkị akaka pịrị ogigo-ḅọkọ mẹ ogboku, tẹ nwẹnị anịjụ ò furo ḅụ ogie kẹ ò temi, anieḅụ ọ̀ nwẹnị fịị; ò iyimbere Asahẹlị sịḅị ẹrẹsị.

²⁸ Sakị kẹlẹ ḅọrọtẹ, Devidi anị naa tẹso, ọ̀ nwẹnị ḅẹẹ, “KỊNỊNYANAḄỌ ḅe tọrọkọ, sime mu ḅẹẹ-sakị ḅẹẹ-sakị la, yẹrị na, ị̀ ama-da kụrọ mẹ na Abụna, Naha owiḅọtụḅọ ḅe ọmbie mẹ ḅụ mịẹ ye ofori.

²⁹ Yee anị Johabụ sịḅị na, ọ̀ ḍa warị mẹmgba na ọgọnọ gbana; anịsakị yee Johabụ warị ḅụ minji sararị ịnọ sụa ḅọ, anịanịa sofịnị-obi-kọnḅọ, anịanịa sịn ọlọ ḅụọ karama ḅọ, anịanịa, okologie ḅụ fịịḅọ, anịanịa ḅuru-ḅa ḅọ gbala-gbala ofori ḅara sime ma.”

³⁰ Anị ḅara mie Johabụ na ò iyimbere Abisahị na, Abụna ḅaa ḅara, ò Gibiyọnị ḅẹ owu ḅụ ịna iyimbere Asahẹlị ḅaam ẹrẹsị.

Ini Abụna ḍiḅi Tẹ

³¹ Anịtẹso Devidi nwẹnị Johabụ na, tomi ma tẹ ori na sime apụ ma na ḅẹẹ, “Ọmịnị ọmịna akapa kan, tẹ akpụrụ kẹ ọmịna aḅiri ọkịị tẹ Abụna tọrọkọ kururu.” Tẹ Amadaḅọ Devidi nwẹnị ḍụẹịn igbe mẹ pono mu.

³² Hẹbụrọnị ḅụ ini Abụna ḍiḅim; tẹ amadaḅọ ḅe Abụna ḍuḅu ḅụ ọ̀ pọkọ saakị tẹ tẹmẹ la ḅara kẹ owum; tẹ tomi mamgba nwẹnị tẹmẹ-la ḅara kẹ owu.

³³ Tẹ amadaḅọ ḅe nwẹnị mị ḅioḅu nume mẹ su Abụna pịrị, tẹ ḅẹẹm: “Abụna oḅori tomḅọ fịị ḅara fịị na-iḅi?”

³⁴ Ini ị́ aḅara fịna-a, ini ikoli kẹ ị́ aḅụọ sụa-a; gbọrụḅọ si-sịḅịḅio-sụaḅọ ḅe tọrọkọ ḅịkị ḅara, ị́ ḅịkị tẹẹ. Tẹ tomi mamgba nwẹnị pịkị tẹmẹ-la ḅara kẹ siin owu ọ̀ pịrịị.

³⁵ Anịtẹso tomi mamgba ḅo ene amụ ḍin-a wararị ogbo Devidi tẹkẹm mịẹ tẹ ò fịye fị ḅẹ ḅara; kụma Devidi nwẹnị ye karị, tẹ ḅẹẹm, “Tamụnọ ọkọ kẹ ị̀ mịẹ, pịkị ọkọ nẹngị ḅara sọ kẹ ị̀ mịẹẹ, nwenii ịrụa tuuideri ḅụ à paa fịye, anịanịa ḅẹẹye-ḅẹẹye kẹ ị̀ ḅẹlẹ lama-lama!”

³⁶ Tomi mamgba nwẹnị anị kẹ elekima sụa, tẹ anị ịna aḅụụ ḅẹlẹm; Devidi mịẹ ye goyegoye, tomi mamgba ḅụụ-ḅẹlẹ ḅara.

³⁷ Anieḅụ tomi mamgba na, Izirẹlị mẹmgba na nwẹnị anị eneḅaka mẹ ḅụ nimi mịnẹ Abụna, Naha owiḅọtụḅọ ḅe ḅaa mẹ anị amadaḅọ ḅe tọn ye-a.

³⁸ Tẹ amadaḅọ ḅe nwẹnị ori afịrịmẹnjịapụ ḅẹẹ, “Ó nimi-a mịnẹ mịmgba Izirẹlị ḅụ amadaḅọ gbọrụ owiḅọtụḅọ na, gbọrụ opu tomḅọ na fịị tẹ.

³⁹ Ini ama-da pulo kẹ ị̀ sịḅị sara tẹ ḅẹsọ, mịmgba ịnyọ ị̀ ḅụụ faam; mịna owiapụ ma, Zeruya owiapụ-awọmẹ ma ịn kụrọ ị̀ nẹngịm. KỊNỊNYANAḄỌ ḅe siye mịẹḅọ ḅe si-sịḅịḅio wẹrịtẹ sime-ḅara kẹ ọ̀ gbẹẹ!”