2 Samụẹlị 24 - FỊAFỊA BAỊBỤLỤ

Devidi Kịnị Kịẹnm

¹ Jen sakị ḅụ, KỊNỊNYANAḄỌ ḅe ịganị mẹ siin Izirẹlị ọgọnọ kẹngẹma saram, tẹ ò Devidi toluma ịn da-paka tẹ ḅẹẹm, “Ó mu Izirẹlị na Juda na ḅụ simearị atomi kịẹn.”

² Anieḅụ amadaḅọ ḅe Johabụ na, ọmụ-ogbo mẹ ḅẹ ḅẹrẹtọn-apụ ma tẹ ori na simearị apụ ma na ḅẹẹm, “Ọmịnị Izirẹlị ḅẹ afuro mamgba mẹnjị-toluu, Danị ḅụ ọkị mu Biyasẹba la, tẹ tomi ma kịẹn, mịẹtẹ à tomi ma kịẹn-ḅịḅị nimi ḅẹ ḅara.”

³ Kụma Johabụ nwẹnị amadaḅọ ḅe ḅẹẹ, “Yee KỊNỊNYANAḄỌ, ị́ Tamụnọ ḅe tomi ma ḅẹ kiri sọnọa si kẹ kịẹn-ḅịḅị ḅụ ịn ḅin tẹ simearị ḅara mẹ ḅụ sụa, ị̀ nyana amadaḅọ ḅe atọrụngbọ ma paa sime tẹ anị ẹrịarị ogbo; ọkụma ị̀ nyana amadaḅọ ḅe tiegotẹ mị ye mẹ ḅẹlẹma?”

⁴ Kụma amadaḅọ ḅe Johabụ na, ọmụ-ogbo mẹ ḅẹ ḅẹrẹtọn-apụ ma na mịẹ tẹ ini ọ̀ tọn ye mịẹm. Anieḅụ Johabụ na, ọmụ-ogbo mẹ ḅẹ ḅẹrẹtọn-apụ ma na Izirẹlị ḅẹ atomi ma kịẹn ḅẹ tẹ ọ̀ tọrọkọ saakị pakam.

⁵ Ịn Jodanị mẹ mẹnjị saḅam tẹ Arowa na, opu ama mẹ tẹ Tụndụ Ogboku mẹ ḅụ simearị ye mẹ na ḅụ saakịm, tẹ Gadi da mẹnjịma mu Jaza lam.

⁶ Anịtẹso ịn ḅo Gilẹdị la tẹ ḅo Hitahiti apụ ma ama mẹ ḅio Kadẹsị lam; tẹ ịn ḅo Danị lam, tẹ Danị ḅụ mẹnjị ikelema ḅo Sayịdọnị lam.

⁷ Anịtẹso ịn ḅo Taya ḅẹ ini ọmụ gotẹ nama kụrọma opu ama mẹ na, Hivayịtị apụ na, Kenanị ḅẹ apụ na opu ama mamgba lam; tẹ ịn paka-so Juda suku-jụ ḅẹ Biyasẹba mum.

⁸ Anieḅụ ini ama mamgba mẹnjị tolu fama tẹso, esenia akalụ na si aḍin na kunoma ḅụ ịn ḅo Jeruselemu lam.

⁹ Tẹ Johabụ mu tomi ma kịẹn mẹ ḅẹ kịẹn gboloma mẹ kẹ amadaḅọ ḅe pịrịm; Izirẹlị ḅụ ḅiokpọtẹ okologie siin owu sọ ḅarị owiapụ puku sonioa si (800,000), anịsakị Juda ḅụ puku tesi maa puku finji na, kịnị oyia ẹndẹ na, (500,000).

¹⁰ Kụma Devidi ḅioḅẹngbọ nwẹnị ọ̀ ḅụụ-fụkama ò tomi ma kịẹn tẹso. Tẹ Devidi nwẹnị KỊNỊNYANAḄỌ ḅe ḅẹẹ, “Miemẹ tẹ à mịẹ ye mẹ arị opu ḅara kẹ si mịẹ tẹẹ. Yei KỊNỊNYANAḄỌ, kụma mịọkụ arị ị́ tẹkẹm, mị iri-mịẹye mẹ saakị siin ị̀ fịrịmẹnjịḅọ ḅụ; kẹ gotẹ ọkọ ḅẹẹarị, à ḅẹlẹma oḅori-sọ ḅara kẹ ye mịẹ tẹẹ.”

¹¹ Dede mẹ ḅio Devidi saakị tẹso, KỊNỊNYANAḄỌ ḅe nwẹnị ẹkwẹn ịkịankoro Gadi, Devidi so-ḅịrịḅọ ḅe pịrị, tẹ ḅẹẹm,

¹² “Mu Devidi ḅẹẹ mie KỊNỊNYANAḄỌ ḅe ḍuko yee, ‘à ye ḅụ ḅẹ tẹrẹị kẹ ị́ pịrịarị, arịḅẹ gberie sẹlẹ-ọkịị, mịẹ tẹ àrị anị kẹ ị́ mịẹ ḅẹ ḅara.’ ”

¹³ Anieḅụ Gadi, Devidi ḍọkụma-ḅo tẹ ḍuko ọ̀ pịrị tẹ ọ̀ ḅẹẹm, “Tẹra akụra ḅẹ ḅuru-ḅa ị́ ama koro ḅẹ mụnọọ? Anịanịa, tẹra akalụ kẹ ọmụ ḅio ị́ na fịya-a apụ tọrọkọ ini í ḍukarị ogbo ḍumo-mangị kọn ḅẹ mụnọọ? Anịanịa, tẹra aḍin ḅẹ ama gbaịn obi ị́ ama koro ḅẹ mụnọọ? Mịọkụ anị kẹ ḅiokoromaa, tẹ à pịkịma-mu oriḅe tẹ ị̀ fịrịma ḅọ ḅe pịrị ḅarị pakịrị-ḅịḅị tọn pẹlẹ.”

¹⁴ Anịtẹso Devidi nwẹnị Gadi ḅẹẹ, “Arị opu ḅụụ-ḅalaḅala ḅụ emi; yee wa ḅịkị KỊNỊNYANAḄỌ ḅe ḅara-ḅio sọ; kẹ gotẹ ọkọ ḅẹẹarị, ọ̀ nyana ọkụrụkụrụ gburo-gburom; kụma yee tomi fomu-ḅara kẹ ị̀ pịrị ma.”

¹⁵ Anieḅụ KỊNỊNYANAḄỌ ḅe dede-ḅio ḅụ ama gbaịn gbọrụ obi kẹ Izirẹlị fịrịmaa nwenii mu pẹlẹ wararị sakị mẹ lam; tẹ Danị ḅụ ọkị mu Biyasẹba la tomi ma ḅụ kịnị ninea apuku, jeia ẹndẹ finji (70,000) fịịm.

¹⁶ Enjẹlị ḅe Jeruselemu fama ḅẹ tẹ ọ̀ ḅara sụn-pakama anị daa tẹso, KỊNỊNYANAḄỌ ḅe nwẹnị siye mẹ wẹrịso tẹ anị ḅụ pịkị, tẹ enjẹlị ḅe tẹ tomi ma ogbo-ḅio kịnị ḅaa kọrịnama mẹ kọrịarịḅọ ḅe ḅẹẹ, “Iḅi tẹ, mịọkụ ị́ ḅara kẹ ị́ ḅụụ wẹrịị.” Anịsakị KỊNỊNYANAḄỌ ḅe enjẹlị ḅe Arahụna, Jebusayịtị ḅọ ḅe mgbọlụ sẹlẹ kiri ḅụ emi.

¹⁷ Anịtẹso Devidi nwẹnị ẹkwẹn KỊNỊNYANAḄỌ ḅe pịrị ori enjẹlị ḅe tẹ tomi ma fomu-fomu ḅaarị ḅọ ḅe ẹrị tẹso, tẹ nwẹnị ḅẹẹ, “Ḍikii, à si mịẹ tẹ, tẹ pịkị si-sịḅịḅio-sụa ḅara kẹ ye mịẹ tẹ; kụma mịna anana ma ịn tiye mịẹ tẹ? Àrị ị́ tẹkẹm, yee ị́ ḅara mẹ yẹrị na, ị̀ ḍa warị mẹ na da-paka.”

¹⁸ Tẹ anị ene mẹ ḅụ Gadi nwẹnị Devidi ḍọkụma-ḅo tẹ ọ̀ ḅẹẹ, “Iwo muu, Arahụna, Jebusayịtị ḅọ ḅe mgbọlụ sẹlẹ kiri mẹ ḅụ gbọrụ agbamịẹ-anga nama KỊNỊNYANAḄỌ ḅe pịrịị.”

¹⁹ Anieḅụ Devidi, Gadi ẹkwẹn-ḅịḅị ḅụ, KỊNỊNYANAḄỌ ḅe tọn ḅara ḅụ iwo mum.

²⁰ Tẹ Arahụna ḍiki iderima tẹso, ọ̀ nwẹnị amadaḅọ ḅe na, ori afịrịmẹnjịapụ na ẹrị ini iwo ọ̀ dama ḅoarị, tẹ Arahụna nwẹnị paka mu, tẹ kụn kẹ amadaḅọ ḅe pịrị ḅụ sịḅị-tuu mu ọ̀ tọrụkuḅu kẹ kiri lama,

²¹ tẹ Arahụna nwẹnị gbela, “Ị̀ nyana amadaḅọ ḅe tiegotẹ ọ̀ fịrịmẹnjịḅọ dama-ḅo?” Devidi nwẹnị pakịrị, “À ḅo ị́ ḅara mgbọlụ sẹlẹ kiri mẹ fẹẹ ḅẹ ḅom, mịẹ tẹ à gbọrụ agbamịẹ-anga nama KỊNỊNYANAḄỌ ḅe pịrị, mịẹ tẹ Tamụnọ ḅara ḅẹ fomu-ḅara mẹ tomi ma ḅụụ ḅụ so ḅẹ ḅara.”

²² Anịtẹso Arahụna nwẹnị Devidi ḅẹẹ, “Yee ị̀ nyana amadaḅọ ḅe ḍiki tẹ anị ori na iḅi ḅẹ ye ọkị tẹ kẹ agba mẹ mịẹẹ; mie sime dọkịma-agba mẹ mịẹ pịrị pootẹ-anambulo ma na, kẹ fịnị mịẹ ḅe mgbọlụ fomu mgbele ma na, pootẹ-anambulo pọkọ sụa asịn ma na.

²³ Mie-mẹmgba, yei amadaḅọ, Arahụna kẹ amadaḅọ ḅe pịrịm.” Arahụna ḅe nwẹnị pịkị amadaḅọ ḅe ḅẹẹ, “KỊNỊNYANAḄỌ ị́ Tamụnọ ḅe ị́ agba mẹ ọkịị.”

²⁴ Kụma amadaḅọ ḅe nwẹnị Arahụna ḅẹẹ, “Ẹn-ẹn, ọkụma wa tuḅo tẹ arị ị́ ḅara ḅụ anị fẹẹ ḅa; arị ị̀ ḅara ḅụ igbigi fama pịrị-a ye kẹ dọkịma-agba mịẹ KỊNỊNYANAḄỌ ị̀ Tamụnọ ḅe pịrị ḅịa.” Anieḅụ Devidi seleḅa pakịrị amesi oyi finji kẹ mgbọlụ sẹlẹ kiri mẹ na, pootẹ-anambulo ma na fẹẹm.

²⁵ Tẹ Devidi anịanga agbamịẹ-anga nama KỊNỊNYANAḄỌ ḅe pịrịm, tẹ dọkịma-agba na, dein-pịrị-agba na mịẹm. Anieḅụ KỊNỊNYANAḄỌ ḅe ama mẹ ḅiiarị aị ma naa ịn pịrịm, tẹ Tamụnọ ḅara ḅẹ fomu-ḅara mẹ Izirẹlị ḅụ som.