2 Samụẹlị 21 - FỊAFỊA BAỊBỤLỤ

Ịn Sọlụ Ḅụụ Ḅụ Paka-ḅo Apụ Ḅaa Tẹẹ

¹ Mịọkụ Devidi Ama-daarị ene ma ḅụ sịḅị, sịḅị tẹra kụra ḅụ ịnụ ama mẹ ḅio simem, tẹ Devidi, KỊNỊNYANAḄỌ ḅe tọrụkuḅu ḍọkịm. KỊNỊNYANAḄỌ ḅe nwẹnị ḅẹẹ, “Ọmbie ọsụma ḅẹrẹ-ḅarasii Sọlụ na, ọ̀ warị na ọgọnọ emi, gbala ò Gibiyọnị ḅẹ apụ ma ḅaam ẹrẹsị.”

² Anieḅụ ò Gibiyọnị ḅẹ apụ ma sịnm. Mịọkụ Gibiyọnị ḅẹ apụ ma ini Izirẹlị ḅẹ apụ-a, kụma. Amọrayịtị apụ ma ḅẹ kirikọn wararị apụ; Izirẹlịapụ ḅarị ịn ḅaa ḅịa tẹ ye karịm ḅẹsọ, Sọlụ ọ̀ nyana Izirẹlị na, Juda na pịrị ḅẹlẹma ḅụ ịn ḅaam.

³ Tẹ Devidi nwẹnị Gibiyọnị ḅẹ apụ ma ḅẹẹ, “À tiye mịẹ ọ́ pịrị ḅẹ? Anịsakị à tọ-ḅara kẹ ḅẹrẹ fama tẹ mịẹ tẹ ó sime KỊNỊNYANAḄỌ ḅe pịrị atomi ma boma ḅẹ?”

⁴ Gibiyọnị ḅẹ apụ ma nwẹnị ọ̀ pakịrị, “Wamịnị na Sọlụ, anịanịa ọ̀ warị na ogboku ḅẹ ḅẹrẹ mẹ anie seleḅa, anịanịa golu gboloma ye-a, anị pịkị wamịna kiri-a Izirẹlị ḅụ ḅẹḅọ-ḅẹḅọ kẹ fịị ḅụ suu.” Devidi nwẹnị gbela, “À mịẹ ọ́ pịrị ḅẹ tẹ ó ḍuko ye tiye?”

⁵ Ịn nwẹnị amadaḅọ ḅe ḅẹẹ, “Izirẹlị ye-yọ mẹmgba ḅụ wa gbọrụ anga sọ nyana ma gotẹ tomḅọ ḅe tẹ wa ḅaa, tẹ wa fama ḅẹ tọn ḅọ ḅe,

⁶ yee ori sọnọma owiapụ-awọmẹ ị́ nwẹn kẹ wa pịrị, mịẹ tẹ Gibiyọnị ḅụ, KỊNỊNYANAḄỌ ḅe tụndụ mẹ ọgọnọ, wa KỊNỊNYANAḄỌ ḅe tọrọkọ ịn kpọ-ḅaa ḅẹ ḅara.” Amadaḅọ ḅe nwẹnị pakịrị, “Arị ịn kẹ ọ́ pịrị ḅa.”

⁷ Kụma amadaḅọ ḅe na Jonatanị na KỊNỊNYANAḄỌ ḅe tọrọkọ fị wararị ọḅọkụ mẹ gotẹ, ọ̀ nwẹnị Mẹfibosẹtị Jonatanị owiḅọtụḅọ, pịkị Sọlụ taa-owiḅọtụḅọ ḅe wẹrịso.

⁸ Amadaḅọ ḅe nwẹnị Rizipa, Ahịya ẹrẹḅọtụḅọ ma maa owiapụ-awọmẹ ma tẹ arị iyi Sọlụ pịrị Amọnị na, Mẹfibosẹtị na; Mẹrabụ, Sọlụ ẹrẹḅọtụḅọ ma sọnọ owiapụ-awọmẹ ma tẹ arị iyi Adirẹlị, Bazilayị owiḅọtụḅọ, Mẹhola ḅẹ ḅọ ḅe pịrị apụ ma na ọkị;

⁹ tẹ ọ̀ nwẹnị ịn kẹ Gibiyọnị ḅẹ apụ ma aḅara-ḅio ịn pịrị, tẹ ini tụndụ mẹ ọgọnọ, KỊNỊNYANAḄỌ ḅe tọrọkọ ịn kpọ-ḅaam, tẹ ini sọnọma apụ ma fịị fa gbolomam. Ịn kẹ bali sịn fịye mẹ soku-soku sakị ene ma ḅụ mie ini ịn ḅaa ye.

¹⁰ Anịtẹso Rizipa, Ahịya ẹrẹḅọtụḅọ, Sọlụ ịgwa-ẹrẹḅọ ma nwẹnị akpụrụ ḅịtẹ ọkị, tẹ anị kẹ ịkụ mẹ ọgọnọ anya finjima á ḅụụ pịrị fịye-soku sakị mẹ Suku-saakị ḅụ ọkị nwenii eene so ma ḅio sime tẹ koro arị ọgọnọ saram; anịsakị á ḍụkụ tẹ So-tọrụ ḅẹ afeni ma eneḅaka ḅụ ḅo ịn gbọn-gbọn pẹị-a, anịanịa piri-ḅio-ḅẹ anama ḍin ḅụ.

¹¹ Ịn Rizipa, Ahịya ẹrẹḅọtụḅọ, Sọlụ ịgwa-ẹrẹḅọ ma mịẹ ye mẹ ḍuko Devidi pịrị tẹso,

¹² Devidi nwẹnị mu Sọlụ na, ori owiḅọtụḅọ Jonatanị na mgbe ma ọkị Jabẹsị-giliyadị ḅẹ apụ ma ḅara ḅụ, inima tẹ Ḅẹtị-seyani ḅẹ ama-ogbo, Filisiteniapụ ma Giliboha tụndụ ọgọnọ Sọlụ ḅaa ene mẹ ḅụ ini ịn kpọ sololo wẹrị anga ḅụ ịn furu ọkị apụ ma;

¹³ tẹ ori anịanga ḅụ Sọlụ mgbe ma na, ori owiḅọtụḅọ Jonatanị mgbe ma na ọkị-ḅom; tẹ pịkị inima tẹ ịn kpọ-ḅaa apụ ma mgbe ma kobirim.

¹⁴ Tẹ ịn Sọlụ mgbe ma na, ori owiḅọtụḅọ Jonatanị mgbe ma na kẹ ọ̀ ḍa Kisi ḍuḅu ḅio ḍiḅim Zela Benijamịnị ama mẹ ḅio ḅụ, tẹ ini amadaḅọ ḅe tọn aị mamgba mịẹm. Aniemẹ ḅọrọ tẹso, Tamụnọ kiri mẹ gotẹ ịn ḅii aị ma naam.

Devidi Filisiteni Ḅẹ Nonji-atomi Ma Na Owu Sọm

¹⁵ Filisiteniapụ ma pịkị siin Izirẹlị na ọmụ gbinm, tẹ Devidi ori afịrịmẹnjịapụ ḅụụ sọ tẹ ini na ideri-mum tẹ ịn Filisiteniapụ ma na owu sọm. Ịn mị ḅara kẹ owu mẹ sọarị ogbo ịnyọ nwẹnị Devidi ta.

¹⁶ Tẹ Isibi-bẹnọbụ, ḍụḅa tomi nẹngị-nẹngịtẹ nonji-atomi ma ḅụụ ḅụ paka-ḅo gbọrụḅọ emi. Ọ̀ sụḅaa, iku ojo-ikulele pakịrị jeia si na gbasịm tẹ ori ịwọ-jaja okologie kẹ amangara wararị. Ò Devidi ḅaa kẹ ḅiotọnm.

¹⁷ Kụma Abisahị, Zeruya owiḅọtụḅọ ḅe nwẹnị ḅo ḅarasụa ọ̀ pịrị, tẹ owu kẹ Filisiteniḅọ ḅe paka tẹ ọ̀ ḅaam. Anịtẹso Devidi atomi nwẹnị ọ̀ mịẹ tẹ ọ̀ ḅụụ-pikima, “Ị́ ḅarị jen-maaịn kẹ wamịnị na paka owu mu ḅịa, anieofori ị́ ḅofa Izirẹlị tọnjọ mẹ biinma.”

¹⁸ Miemẹ ḅọrọ tẹso, Gọbụ ḅụ Filisiteniapụ ma ọmụ pịkị korom; anị sakị ḅụ Sibekayi, Husa ḅẹ ḅọ ḅe Safụ tẹ ḍụḅa tomi nẹngị-nẹngịtẹ nonji-atomi ma ḅụụ ḅụ paka-ḅo gbọrụḅọ ḅaam.

¹⁹ Gọbụ ḅụ Filisiteniapụ ma ọmụ pịkị korom; tẹ Ẹlịhananị, Jarẹ-ọrẹgimu owiḅọtụḅọ, Bẹtịlịhẹmụ ḅẹ ḅọ ḅe Golayatị, Gati ḅẹ ḅọ ḅe tẹ sụḅa pịkọ ḅịtẹ ḍori apụ ḅịtẹ ḍori ye mẹ ḅẹ ẹngbẹsẹ mẹ sime-ḅara sime ḅọ ḅe ḅaam.

²⁰ Jen ọmụ pịkị siin Gati ḅụ korom, anịjụ gele na kpokoro na tẹ gbọrụ opu owiḅọ, tẹ gbọrụ ḅara, gbọrụ ḅara ḅụ sonio aḅara-tụngbalị na, gbọrụ ḅụọ, gbọrụ ḅụọ ḅụ sonio aḅụọ-tụngbalị na kịẹn-ḅịḅị ḅụ arịmgba si ini finji sụa ḅọ simem; anịsakị ori sọ anie ḍụḅa tomi nẹngị-nẹngịtẹ nonji-atomi ma ḅụụ ḅụ paka-ḅo ḅọọ.

²¹ Tẹ ori Izirẹlị wori guluguluma tẹso, Jonatanị, Devidi iyimbere Simeyi owiḅọtụḅọ ḅe nwẹnị ọ̀ ḅaa.

²² Mịna ini apụ ma anie Gati ḅụ ḍụḅa tomi nẹngị-nẹngịtẹ nonji-atomi ma ḅụụ ḅụ paka-ḅo apụ famam; anịsakị Devidi ḅara na, ori afịrịmẹnjịapụ ḅara na ḅụ ịn ḅịkị fịị famam.