2 Samụẹlị 20 - FỊAFỊA BAỊBỤLỤ

Sẹba Sịḅị-kụrọ

¹ Mị sakị mẹ ḅụ gbọrụ papaa tomḅọ anịjụ sime simem, oriḅe ẹrẹ anie Sẹba, Benijamịnị furo ḅẹ gbọrụ Bikiri owiḅọtụḅọ; tẹ ọ̀ nwẹnị ọdụ mẹ ofuro, tẹ ḅẹẹ: Wa Devidi ḅụụ gbọrụ ḍiekiri sọ nyana-a, anịsakị wa Jese owiḅọtụḅọ ḅe ḅụụ sime anga so nyana-a; ọrụḅọ-ọrụḅọ so amịna akpụrụ-warị muu, yei Izirẹlị!

² Anieḅụ Izirẹlịapụ mamgba Devidi ḅụ amịna ḅụụ nụnụ-ọkịm, tẹ Sẹba, Bikiri owiḅọtụḅọ ḅe ḍukamẹnjịm; kụma Juda ḅẹ apụ ma jike-a ḅara kẹ Jodanị mẹ ḅụ ịna amadaḅọ ḍukamẹnjị ḅo Jeruselemu lam.

³ Tẹ Devidi ḅo Jeruselemu ḅụ ọ̀ warị lam; tẹ amadaḅọ ḅe nwẹnị oyia ịgwa-ereme ma tẹ ò koroma-som warị mẹ ḍikii kẹ ḅẹẹ apụ ma ọkị, tẹ ịn kẹ ḍikiḍiki ḅara ḅụ wẹrị, tẹ ịn ḅii-ye ḅii-ye kẹ ịn pịrịm, kụma ọ̀ sọ ịn ḍọkụma-mua. Anieḅụ ini ịn ịkasị wẹrị nwenii ịna fịị eneḅaka lam, gbala diapụ-fịtẹ-ereme ḅara ịn nwẹn simem.

⁴ Anịtẹso amadaḅọ ḅe nwẹnị Amasa ḅẹẹ, “Tẹra aḍin ḅụ Juda ḅẹ apụ mamgba sịn ḅo gboloma ị̀ pịrịị, tẹ ị́yẹrị ḅioju sọ mịanga simee.”

⁵ Anieḅụ Amasa nwẹnị Juda sịn ḅẹ mu, kụma ọ̀ nwẹnị sime sakị mẹ tẹ ịn tọn ọ̀ pịrị ye mẹ ḅụrama.

⁶ Tẹ Devidi nwẹnị Abisahị ḅẹẹ, “Mịọkụ Sẹba, Bikiri owiḅọtụḅọ ḅe siye kẹ wa mịẹ Abusalọmụ nẹngị ḅa. Ị̀ afịrịmẹnjịapụ ma ọkị tẹ ò ḍukaa, anieofori ò ḅofa ini ọmụ-aị kẹ mịẹ kụrọma-kụrọmatẹ opu ama nyana-nyana ọ̀ ḅụụ pịrị, tẹ ḅụụ-fụka kẹ wa pịrị.”

⁷ Johabụ na, Keretayịtị opu ma na Pẹlẹtayịtị apụ ma na, kụrọ, kụrọtẹ opu atomi mamgba nwẹnị Jeruselemu ḅụ Abisahị ḍuka paka Sẹba, Bikiri owiḅọtụḅọ ḅe ḍuka ḅẹ mu.

⁸ Ịn ḅo opu ḍụḅarị mẹ tẹ Gibiyọnị ḅụ sime ye mẹ la tẹso, Amasa nwẹnị ḅo ini na bịama. Mịọkụ Johabụ ọmụgbin-apụ kapa sụa, tẹ anị ọgọnọ, lubulu ḅio simearị okologie emi ḅiri-ponoye kẹ anị kpọ wararị, tẹ ọ̀ mẹnjị tọrọkọ mu ḅara ḅụ okologie mẹ nwẹnị siin-koro.

⁹ Johabụ nwẹnị Amasa ḅẹẹ, “Ì iyimbere tọ-ḅara, gbeke iḅi wararị?” Tẹ Johabụ nwẹnị Amasa ḅịḅị nọnjị ḅẹ ḅara kẹ ori ama-ḅara kẹ ò ḅekeke ḅẹ mpọrị ọlọ.

¹⁰ Kụma Amasa, okologie mẹ tẹ Johabụ ḅara-ḅio emi ye mẹ kẹ elekima sụa-a; anieḅụ Johabụ anị kẹ ò furo ḅụ ò temi, tẹ maaịn karama sakị kẹ ò temi-a ḅara ḅụ ò furo ḅẹ ịla ma tan ḅo kiri-ḅio saram, tẹ ọ̀ fịịm. Anịtẹrẹmẹ Johabụ na, ò iyimbere Abisahị na Sẹba, Bikiri owiḅọtụḅọ ḅe ḍukam.

¹¹ Johabụ atomi ma ḅẹ gbọrụḅọ nwẹnị Amasa akaka sịẹsime tẹ ḅẹẹ, “Johabụ pakịrị ḅụ sime ḅọ sime ḅọ, anịsakị sime Devidi pịrị ḅọ, pịrị ḅo, ye mḅọ Johabụ ḍuka mu.”

¹² Tẹ Amasa ọmbie ori oju gbaịn tẹ ori opu etela mẹ ogboku koro-simem. Ḅẹḅọ-ḅẹḅọ tẹ ḅo ori ẹrịḅọ-ẹrịḅọ, daasịẹm; tẹ owiḅọ ḅe tomi mamgba ḅo-ḅo daasịẹarị mẹ ẹrị tẹso, ọ̀ nwẹnị opu etela mẹ ogboku Amasa oju mẹ dogi piri-ḅio suu, tẹ gbọrụ kapa kẹ ọ̀ gbaịn.

¹³ Ini opu etela mẹ ogboku ò dogi siin tẹso, tomi mamgba nwẹnị Sẹba, Bikiri owiḅọtụḅọ ḅe ḍuka ḅẹ Johabụ ḍuka mu.

¹⁴ Sẹba, Izirẹlị ḅẹ furo-furo mamgba ḅọrọ tolu mu Bẹtị-mahaka ḅe Ebẹlị lam, tẹ Bikiri furo-ḅẹ-apụ mamgba kobirim, tẹ ò ḍuka sọ-mum.

¹⁵ Tomi mamgba tẹ Johabụ na sime apụ ma nwẹnị ḅo, tẹ Bẹtị-mahaka ḅẹ Ebẹlị ḅio ori ikelema-koro tẹ owu kẹ ọ̀ paka. Ini aḅaịn kẹ ọgọnọ lẹsẹrẹtẹ ẹbẹ pembe onu gbọrụ opu ama mẹ ikelemam, tẹ ini onu mẹ sukuruma-gbin ḅẹ ḅara kẹ ye kẹ anị fomum.

¹⁶ Anịtẹso ye-nimi gbọrụ ẹrẹḅọ nwẹnị opu ama mẹ ḅio sime tẹ sịn, “Ó pokii! Ó Pokii! Ó ḍuko Johabụ pịrị ọ̀ mịanga ḅoo, mịẹ tẹ àrị ẹkwẹn ọ́ pịrị ḅẹ ḅara.”

¹⁷ Ọ̀ nwẹnị ḅo á kpeki; á nwẹnị ọ̀ gbela, “Johabụ ḅe ị́yẹrị?” Ọ̀ nwẹnị pakịrị, “Yẹrịị.” Anịtẹso á nwẹnị ọ̀ ḅẹẹ, “À kọn ḅẹ ẹkwẹn-aḅịḅị ma pokii.” Ọ̀ nwẹnị pakịrị, “À pokiarị.”

¹⁸ Anịtẹso á nwẹnị ḅẹẹ, “Elemu sakị ḅụ ịn ḅẹẹ ḅẹẹm, ‘Yee ịn mu Ebẹlị ḅụ datụkụma nimi ẹkwẹn gbela nimi’; anịsakị anị ḅara mie ịn kẹ gbọrụ ḅẹrẹ kọn fama ḅara.

¹⁹ Yẹrị anie inima tẹ Izirẹlị ḅụ dein ḅara na, minini nyana ḅara sime apụ ma ḅẹ gbọrụḅọ; ị́ gbọrụ opu ama tẹ Izirẹlị ḅụ iyingiḅọ sọ wararị ama fama ḅẹ ḍọkịarị; í tiegotẹ KỊNỊNYANAḄỌ ḅe sime anga mẹ mẹnị-ọkị ḅẹ ḅii ḅẹ?”

²⁰ Johabụ nwẹnị pakịrị, “Gbala-gbala yẹrị-yaa ndẹ, yẹrị-yaa, mịnẹ yẹrị ḅo mẹnị-ọkị, anịanịa fama ḅẹ mẹ!

²¹ Aniemẹ karakaraye-a. Kụma Iferemu, tụndụ ọgọnọ ḅẹ opu sịẹ mẹ ḅẹ gbọrụ owiḅọ, Bikiri owiḅọtụḅọ ịn Sẹba kẹ sịn ḅọ ḅe, ọ̀ ḅara saakị Amadaḅọ Devidi da-pakam; ọmịnị ori ngẹrị kẹ ị̀ pịrịị, anịsakị arị opu ama mẹ ḅụ ị̀ ḅụụ nụnụ-ọkị ḅa.” Tẹ ẹrẹḅọ ma nwẹnị Johabụ ḅẹẹ, “Ḍikii ini ọ̀ sịḅị kẹ onu mẹ ọgọnọ gbin saḅama ị́ pịrị ḅa.”

²² Anịtẹso ẹrẹḅọ ma nwẹnị á ye-nimi ḅụ tomi mamgba ḍọkụma-mu. Tẹ ịn nwẹnị Sẹba, Bikiri owiḅọtụḅọ ḅe sịḅị pẹlẹ-siin, tẹ anị kẹ gbin pakama Johabụ pịrịm. Anieḅụ Johabụ ọdụ mẹ ofurom, tẹ ini opu ama mẹ ḅụ gala-galam, ọrụḅọ-ọrụḅọ so amịna ama mum. Tẹ Johabụ pịkịma Jeruselemu ḅụ amadaḅọ ḅe ḍọkụma-mum.

Devidi Fịrịmẹnjị-Opuapụ

²³ Mịọkụ Johabụ Izirẹlị ḅẹ ọmụ-ogbo mẹmgba kẹ sịḅị-dam; anịsakị Bẹnaya, Jehohada owiḅọtụḅọ ḅe Keretayịtị apụ na, Pẹlẹtayịtị apụ na Devidi ḅụụ-ḍikiḍikiapụ ma kẹ sịḅị-dam; anịsakị.

²⁴ Adoramụ fịrịma ḅẹ kụrọ afịrị kẹ sịḅị-dam; anịsakị Jehosafatị, Ayiludu owiḅọtụḅọ ḅe ịn kẹ ye kẹẹ sụa wararị aḍiri ma ḍikiḍiki kẹ sịḅị-dam;

²⁵ anịsakị Seva anie ḍiri-kẹẹḅọ; anịsakị Zadọkụ na, Abịyata na anie agbamịẹapụ;

²⁶ anịsakị Ịra, Jahiri ḅẹ ḅọ ḅe sọ Devidi agbamịẹḅọ.