2 Samụẹlị 19 - FỊAFỊA BAỊBỤLỤ

Johabụ Ịganị Devidi Pịrịm

¹ In nwẹnị anị ḍuko Johabụ pịrị, “Ḍikii, amadaḅọ ḅe Abusalọmụ gotẹ tẹmẹ-la ḅara kẹ owu-owu tẹ kururuarị.”

² Anieḅụ owu-ḅara-iḅi mẹ anị ene pịkị-ḅo kururu sọ tomi mamgba pịrịm; gbala tomi ma anị ene ḅụ naam, “Amadaḅọ ḅe ori owiḅọtụḅọ gotẹ kururuarị ẹrẹsị”.

³ Tẹ tomi ma nwẹnị anị ene owu ḅụ ḍumo-mangị kọn apụ ḅụụ-jịrị tẹ furu ama sọ ḅara kẹ furu opu ama mẹ ḅio sọ-mu.

⁴ Amadaḅọ ḅe ḅara kẹ ọ̀ tọrụ gbaịnm, tẹ lee-leema gele pọkọ kẹ owu pakamam, “yei, ì owiḅọtụḅọ Abusalọmụ! yei, Abusalọmụ, ì owiḅọtụḅọ, ì owiḅọtụḅọ!”

⁵ Anịtẹso Johabụ nwẹnị mẹnjị warị mẹ ḅio sọ amadaḅọ ḅe ḍọkụma-ḅo tẹ ḅẹẹ, “Mịmgba ị́ ḅụụ-jịrị kẹ ị́ afịrịmẹnjịapụ ma tẹ mịmgba í ḍumo na, í owiapụ-awọmẹ na, í eremịna-awọmẹ na, í sime-ereme na, ị́ ịgwa-ereme na aḍumo ḅọrọma apụ mamgba atọrụ gbaịn tẹ;

⁶ gbala ị́ inima tẹ í ḍiki-ḅioḅuarị apụ ma na, ị́ ḅẹlẹma apụ ma ḍiki-ḅioḅuarị apụ ma na ḅẹlẹmam ẹrẹsị. Kẹ gotẹ ọkọ ḅẹẹarị, mịmgba ị́ anị mịẹ giregirema tẹ mịnẹ ḅẹrẹtọn-apụ na, fịrịmẹnjịapụ na ị́ ḅụụ gberie-sọ la-a; kẹ gotẹ ọkọ ḅẹẹarị, mịmgba à tọnma nimim mịnẹ mimgbe Abusalọmụ ḍumo-sime wararị, tẹ wamịnị-mgba mịmgba fịị tẹ namịna anịrẹ í ḅioḅẹlẹ ḅa.

⁷ Anịẹrẹsị mịọkụ saakịị, paka muu, tẹ ḅio deinma iḅi ḅara kẹ ẹkwẹn ị́ afịrịmẹnjịapụ pịrịị; kẹ gotẹ ọkọ ḅẹẹarị, à KỊNỊNYANAḄỌ ḅe ẹrẹ ḅụ ye karịm, í mu-a ḅẹḅẹ, gbọrụ owiḅọ sọ mị ḍin ị́ na sime ḅịa; anịsakị miemẹ ị́ ḅụụ ḅụ si tẹịn kẹ si-aị mamgba tẹ ị́ kala-sakị ḅụ ọkị nwenii ḅo mịọkụ la ị́ ḅụụ paka tẹ aị nẹngị ḅa.”

⁸ Anịtẹso amadaḅọ ḅe nwẹnị saakị, tẹ mu ori ngada ọgọnọ lẹgị-sime ogigo mẹ ḅio, Ịn nwẹnị ḍuko tomi mamgba pịrị, “Ḍikii, amadaḅọ ḅe ori ogigo mẹ ḅio lẹgị-sime wararị”; tẹ tomi mamgba nwẹnị amadaḅọ ḅe tọrọkọ ḅo. Mịọkụ Izirẹlị ḍumo-mangị kọn tẹ, owiḅọ goḅọ-goḅọ amịna soku-ḅẹ ama mum.

Devidi Saakị Pịkịma-so Jeruselemu Mum

⁹ Izirẹlị ḅẹ afuro mamgba ikelema-koro, tomi mamgba ịgbanịya ḅụ emi, tẹ ḅẹẹm, “Amadaḅọ Devidi wa ḍụa-ḅọrọmam wamịnị na fịya-a apụ ḅara ḅụ na, Filisiteniapụ ma ḅara na ḅụ; tẹ mịọkụ ori Abusalọmụ ḅụụ ḅụ ḍumo-mangị kọn paka-so tẹ ama mẹ ḅụ.

¹⁰ Kụma Abusalọmụ, oriḅe tẹ wa pulo kẹ sịḅị ḅụ saram ama-da wa pịrị ḅẹ ḅọ ḅe owu ḅụ fịị tẹ. Wa mịọkụ anịẹrẹsị tiegotẹ mu amadaḅọ ḅe pịkịma-ḅo gbolomaye ḅụ ḅarị gberie-sọ ḍuko-a?”

¹¹ Tẹ Amadaḅọ Devidi nwẹnị mị oku-ḅịḅị mẹ kẹ Zadọkụ na, Abịyata na agbamịẹapụ ma fịrịma, “Ó Juda ḅẹ omongiapụ ma gbela, ‘Ó tiegotẹ amadaḅọ ḅe pịkịma ọ̀ warị ḅo ḅụ kunoma apụ sọ na-iḅi, Izirẹlị mẹmgba oku-ḅịḅị ḅo amadaḅọ ḅe la fama tẹ ḅẹẹ-sakị?

¹² Ọmịnị anie ori amịnapụ, ọmịnị anie ori mgbe na, ori oju meni na; ó tiegotẹ anịtẹrẹmẹ amadaḅọ ḅe pịkịma-ḅo ḅụ ọḅụ kunoma na-iḅi?’

¹³ Tẹ ọmịnị Amasa ḅẹẹ ị̀ pịrị, ‘Ị́yẹrị ị̀ mgbe na, ì oju meni naa-a mọ? Tamụnọ anị ḅara mịẹ, pịkị ọkọ nẹngị ḅara sọ mịẹ ị̀ pịrịị, Johabụ kiri ḅụ ị́yẹrị ḅo mịmgba saakị tọrọkọ mu ḅụ ḅẹrẹtọn ị̀ ọmụ-ogbo mẹ pịrị ḅọ sọ-a ḅẹḅẹ.’ ”

¹⁴ Tẹ ọ̀ nwẹnị gbala gbọrụ tomḅọ ḅara kẹ Juda ḅẹ apụ mamgba ḅioḅẹngbọ pịkị; anie mịẹ tẹ ịn nwẹnị oku-ḅịḅị kẹ amadaḅọ ḅe fịrịma, “Ị́yẹrị-o, ị́ afịrịmẹnjịapụ mamgba na-o, ọ́ pịkịma-ḅoo.”

¹⁵ Anieḅụ amadaḅọ ḅe pịkịma-ḅo Jodanị mẹ lam; tẹ Juda ḅo amadaḅọ ḅe na bịama, tẹ amadaḅọ ḅe ọkị-ḅo Jodanị mẹ saḅama ḅẹ ḅara kẹ Giligalị ḅom.

¹⁶ Simeyi, Gera owiḅọtụḅọ, Benijamịnị furo-ḅẹ-ḅọ, Bahurimu ḅụ ḅo ḅọ ḅe nwẹnị ori atomi na ideri-ḅo Juda ḅẹ apụ ma ḅụụ sọ, tẹ ḅo Amadaḅọ Devidi na bịama ḅẹ ḅara kẹ fọnya mịẹ;

¹⁷ tẹ kịnị maa ẹndẹ oyia asi finji Benijamịnị ḅụ ọ̀ ḅụụ sọm. Ziba, Sọlụ warị mẹ ḅẹ fịrịmẹnjịḅọ na, ori jei owiapụ-awọmẹ na, ori afịrịmẹnjịapụ si-kem na ọ̀ ḅụụ sọ tẹ pụrụ-pụrụma fọnya mangị ideri Jodanị mẹ ḅụ amadaḅọ ḅe tọrọkọ ḅom,

¹⁸ tẹ amadaḅọ ḅe warị-kpo mẹ saḅama ḅo, tẹ ọ̀ ḅụụ-ḅẹlẹ ye mịẹ ḅẹ ḅara gotẹ tọrụ mẹ ḅụ kpongbo mịẹ tẹ ḅụọ kẹ mẹnjị saḅa anga mẹ ḅụ saḅa-korom. Tẹ amadaḅọ ḅe mẹnjị Jodanị mẹ saḅa ḅẹ-yearị ogbo, Simeyi, Gera owiḅọtụḅọ ḅe nwẹnị ọ̀ tọrụkuḅu kẹ amadaḅọ ḅe tọrọkọ ḅịkị kiri-ḅio koro,

Devidi Iḅi-anga Kẹ Simeyi Na Kọnm

¹⁹ tẹ nwẹnị amadaḅọ ḅe ḅẹẹ, “Yee ị̀ nyanaḅọ ḅe ḅẹrẹ-ḅarasii kẹ ye kẹ ị̀ ọlọ ma, anịanịa ị̀ nyana amadaḅọ ḅe Jeruselemu koroma so ene mẹ ḅụ, ị́ fịrịmẹnjịḅọ wẹrịtẹ mịẹ-irima ḅara mẹ kẹ ḅiokoroma; yee amadaḅọ ḅe anị kẹ ḅioḅẹngbọ ḅụ sụa ma.

²⁰ Kẹ gotẹ ọkọ ḅẹẹarị, ị́ fịrịmẹnjịḅọ nimi wararị mịnẹ à si mịẹ tẹ; anịẹrẹsị ḍikii, mịmgba mẹ ḅụ à ḅo tẹ, Josẹfụ warị mẹmgba ḅụ tarị ị̀ nyana amadaḅọ ḅe na bịama ḅẹ ideri-ḅo ḅọ.”

²¹ Abisahị, Zeruya owiḅọtụḅọ ḅe nwẹnị pakịrị, “Ọ̀ KỊNỊNYANAḄỌ ḅe pulo kẹ sịḅị ḅụ sara ḅọ ḅe wori ye mẹ ẹrẹsị, miemẹ gotẹ Simeyi ḅe ọ̀ ḅaa na-iḅi-a?”

²² Kụma Devidi nwẹnị ḅẹẹ, “Arị ọmịnị na tọ mịẹ ye nyana tẹ mịẹ ḅẹ, ọmịnị Zeruya owiapụ-awọmẹ, mịnẹ ó ḅo mịmgba ì ḍiki ḅioḅẹlẹ-a apụ ḅara sime ị̀ pịrị na-iḅi? Ḅẹḅọ-ḅẹḅọ, mịmgba Izirẹlị ḅụ ịn kịnị ḅaa na-iḅi? Kẹ gotẹ ọkọ ḅẹẹarị, à nimi-a mịnẹ mịmgba yẹrị anie Izirẹlị ḅụ amadaḅọ?”

²³ Tẹ amadaḅọ ḅe nwẹnị Simeyi ḅẹẹ, “Ị́ fịị ḅịa.” Tẹ amadaḅọ ḅe Tamụnọ ḅarasụa ḅụ minini kụrọma ọ̀ pịrịm.

Devidi Iḅi-anga Kẹ Mẹfibosẹtị Na Kọnm

²⁴ Mẹfibosẹtị, Sọlụ taa-owiḅọtụḅọ ḅe nwẹnị ideri amadaḅọ ḅe na bịama ḅẹ ḅo. Amadaḅọ ḅe mẹnjị-so kụra-ḅio ọkị nwenii gberie-sọ ọ̀ la-a tẹ ọ̀ pịkịma ḅo ene mẹ la, Mẹfibosẹtị amụ ori aḅụọ sịkịrị-a, anịanịa ò ḅekeke ḅẹ mpọrị kịrị tẹlẹma, anịanịa ori akapa sịkịrị.

²⁵ Tẹ ò Jeruselemu ḅụ sime tẹ amadaḅọ ḅe na bịama ḅẹ ḅo tẹso, amadaḅọ ḅe nwẹnị ọ̀ gbela, “Mẹfibosẹtị, tiye mịẹ tẹ ị́ ị̀ ḅụụ sọ tẹ ị̀ na so-a?”

²⁶ Ọ̀ nwẹnị pakịrị, “Ị̀ nyanaḅọ ị̀ amadaḅọ, í nimi ḅara ḅụ yẹrị ekeliḅọ. Àrị ị̀ fịrịmẹnjịḅọ Ziba ḅẹẹm ọ̀ gbọrụ yedogi-nama dẹẹ tẹlẹma ị̀ pịrịị, mịẹtẹ àrị anị ọgọnọ dọkụma ị́ ḅụụ sọ tẹ ị́nịna mu ḅẹ ḅara, kụma ori oḅori kẹ ị̀ sịnm.

²⁷ Ori ị̀ kẹ iruo ị́yẹrị ị̀ nyanaḅọ ḅe pịrị tẹẹ. Kụma ị́yẹrị ị̀ nyanaḅọ ḅe anie Tamụnọ enjẹlị sime-ḅara sime ḅọ. Anịẹrẹsị, ḍiki tẹ ị́ na iḅi ḅara iḅi ḅara mịẹ.

²⁸ Kẹ gotẹ ọkọ ḅẹẹarị, ị̀ ḍa warị mẹmgba anie tomi tẹ ịn fịị pẹlẹ pịrị tẹ apụ famam, ị́yẹrị ị̀ nyanaḅọ ḅe tọrọkọ; kụma ị́ yẹrị ị̀ fịrịmẹnjịḅọ kẹ inima tẹ ị́ dẹbịlẹ ḅụ fịye fịarị apụ ma ogbo-ḅio wẹrịm. Anịtẹrẹmẹ tọ jen ye sime ị̀ pịrị na-iḅi tẹ àrị owu ị́yẹrị ị̀ nyanaḅọ ḅe pịrị ḅẹ?”

²⁹ Tẹ amadaḅọ ḅe nwẹnị ọ̀ ḅẹẹ, “Í tiegotẹ paa ị́ amịẹaị ḅẹ jaị ẹkwẹn-arị? À tọn-pẹlẹ tẹẹ, ị́yẹrị na Ziba na kiri mẹ ḍiema ḅa.”

³⁰ Mẹfibosẹtị nwẹnị amadaḅọ ḅe ḅẹẹ, “Ịya, yee ori arịmgba ọkị, ị́yẹrị ị̀ nyanaḅọ ḅe ye ḅụụ la-a ḅara kẹ ḅo ama la tẹẹ ḅẹẹ-sakị.”

Devidi Iḅi-anga Kẹ Bazilayị Na Kọnm

³¹ Mịọkụ Bazilayị, Gilẹdị ḅẹ ḅọ ḅe Rogẹlimu ḅụ sime tẹ ideri-ḅo tẹ; tẹ ori amadaḅọ ḅe ḅụụ sọ tẹ ori na mẹnjịma Jodanị mẹ mu, ọ̀ ḅọrọma mu Jodanị mẹ saḅa-koro ḅẹ ḅara.

³² Bazilayị anie omongi lama tẹ kụra inia si sịḅị ḅụ ḅọrọtẹ ḅọ; amadaḅọ ḅe Mahanahịmu ḅụ sime sakị, à fịye kẹ mu, mu ọ̀ pịrịm, gbala ori anie ngọ kọn lama tẹ owiḅọ ẹrẹsị.

³³ Amadaḅọ ḅe nwẹnị Bazilayị ḅẹẹ, “Ḅo ị̀ ḅụụ sọ tẹ ị̀ na saḅa Jeruselemu muu, anịsakị ị́ ị̀ na Jeruselemu ḅụ emi ye ḅụ àrị í ḅii-ye ḅii-ye kẹ ị́ pịrị ḅa.”

³⁴ Kụma Bazilayị nwẹnị amadaḅọ ḅe ḅẹẹ, “Àrị nda akụra nyana tẹ kẹ paa ḍumo-sime ḅẹ, tẹ àrị amadaḅọ ḅe ḅụụ sọ tẹ ori na Jeruselemu mu na-iḅi?

³⁵ Mịmgba mẹ ị̀ sịḅị kụra inia si karamam. Àrị inetẹ ḅụụ-ḅẹlẹma ye na, ḅụụ-ḅẹlẹma-a ye na lekiri ḅẹ? Àrị inetẹ à fịarị fịye, anịanịa, à ḅuuarị iru ḅẹlẹ nimi ḅẹ? À paa inetẹ nume-suapụ pọkọ poki ḅẹ? Tiye sịḅị ẹrẹsị yẹrị ị́ fịrịmẹnjịḅọ ḅo ḅụụ kẹ ikuye sọ ị́ pịrị ḅẹ?

³⁶ Àrị ị́ ḅụụ sọ tẹ ị́nịna Jodanị mẹ saḅa-koro kẹlẹ mu ḅa. Tiegotẹ ị́ nwẹn sime gbẹẹ-ye kẹ ị̀ gbẹẹ ḅẹ?

³⁷ À tẹkẹm yee à pịkịma-so, mịẹ tẹ àrị ì soku-ḅẹ opu ama ḅụ ị̀ ḍa-na-iyingi-na ḍuḅu mẹ kpeki tẹ fịị ḅẹ ḅara. Kụma mie ì owiḅọtụḅọ Kimihamụ mịanga, yee ori ị́ ḅụụ sọ tẹ ị́ na saḅa-ḅọrọ; anịsakị ḍiki tẹ ị́ ḅụụ iḅiye-iḅiye mịẹ ọ̀ pịrịị.”

³⁸ Tẹ amadaḅọ ḅe nwẹnị pakịrị, “Kimihamụ ị̀ ḅụụ sọ tẹ ị̀ na mẹnjị saḅa ḅa, anịsakị à ḍiki tẹ ị̀ ḅụụ iḅiye-iḅiye à mịẹ ọ̀ pịrị ḅa; anịsakị ị̀ ḅara ḅụ í ḅii-ye ḅii-ye mẹmgba à mịẹ ị́ pịrị fama ḅa.”

³⁹ Anịtẹso tomi mamgba mẹnjị Jodanị mẹ saḅa-korom, tẹ amadaḅọ ḅe mẹnjị saḅam; tẹ amadaḅọ ḅe nwẹnị Bazilayị ḅịḅị nọnjị, tẹ ò boma, tẹ ọ̀ nwẹnị pịkịma-so ò soku-ḅẹ ama mu.

Juda Na, Izirẹlị Na Amadaḅọ Ḅe Gotẹ Ḅịḅị-damam

⁴⁰ Amadaḅọ ḅe mẹnjịma sọ Giligalị mum; anịsakị Kimihamụ ọ̀ ḅụụ sọ tẹ ori na mẹnjịma mum; Juda ḅẹ apụ mamgba na, pịkị Izirẹlịapụ ma kẹ maa anga ḍiya ḅẹ gbọrụ anga na sọ amadaḅọ ḅe ọkị-ḅom ori etela ḅụ.

⁴¹ Anịtẹso Izirẹlị ḅẹ owiapụ mamgba nwẹnị amadaḅọ ḅe dama-ḅo, tẹ nwẹnị amadaḅọ ḅe ḅẹẹ, “Wamịna amịnapụ Juda ḅẹ owiapụ ma tiegotẹ í furu so, tẹ ị́yẹrị na, ị́ warị-kpo na, ị́ atomi mamgba na, kẹ ị́ ḅụụ sụa Jodanị mẹ saḅa-ḅọrọ?”

⁴² Juda ḅẹ owiapụ mamgba nwẹnị Izirẹlị ḅẹ owiapụ ma pakịrị, “Gbala amadaḅọ ḅe anie wamịnị na kpeki tẹịn mịnaḅọ ẹrẹsị. Anị ọkụma ó tiegotẹ mị ḅẹrẹ mẹ ḅụ ye ḅụụ-ḅẹsọ nyana? Amadaḅọ ḅe ori igbigi fama fịye fẹẹ wa pịrị fị tẹ? Anịanịa ḍiepịrịye tẹ ọ̀ kẹ wa pịrị tẹ ye emi?”

⁴³ Tẹ Izirẹlị ḅẹ owiapụ ma nwẹnị Juda ḅẹ owiapụ ma pakịrị, “Wamịnị amadaḅọ ḅe ḅụụ oyia ḍie-akiri nyanam, anịsakị Devidi ḅụụ ḅụ sọ wa ḍie-akiri nyana ọ́ nẹngịm. Ọmịnị anịtẹrẹmẹ tiegotẹ wa ḍiki-sima? Wamịna amadaḅọ ḅe pịkịma-ḅo mẹ wamịnị tarị anị ḅẹ ẹkwẹn kọn-a?” Kụma Juda ḅẹ owiapụ ma ẹkwẹn-aḅịḅị ma ye ḅụụ-ḅẹsọ ḅara sime Izirẹlị ḅẹ owiapụ ma ẹkwẹn-aḅịḅị nẹngịm.