2 Samụẹlị 18 - FỊAFỊA BAỊBỤLỤ

Ini Abusalọmụ Nẹngịma Tẹ Ọ̀ Ḅaa Tẹ

¹ Anịtẹso Devidi owiapụ ma tẹ ori na sime apụ ma kobiri tẹ ịn pekele-ḍikim, tẹ ḅẹrẹtọn kịnị maa ẹndẹ oyia asi finji, finji na, kịnị sọnọa si sọnọa si na pịrị ḅẹ apụ tọn ini asịḅị damam.

² Tẹ Devidi ọmụ-ogbo mẹ fịrịma pakamam, ịn kẹ tẹra akiri ḍiya ḅẹ gbọrụ kiri Johabụ suku-ḅio simem, gbọrụ kiri Abisahị Zeruya owiḅọtụḅọ, Johabụ iyimbere ḅe suku-ḅio simem, gbọrụ kiri pịkị Itayi, Gati ḅẹ ḅọ ḅe suku-ḅio simem ḅẹrẹtọn ịn pịrị ḅụ. Amadaḅọ ḅe nwẹnị owiapụ ma ḅẹẹ, “Yẹrị ḅioju sọ ọmịna aḅụụ sọ tẹ paka-mu ḅa.”

³ Kụma owiapụ ma nwẹnị ḅẹẹ, “Ị́ paka-mu ḅịa. Kẹ gotẹ ọkọ ḅẹẹarị, wa ḍumo-mangị kọn-kọn, ịn wa bala ḅịa. Wa kẹ maa anga ḍiya ḅẹ gbọrụ pakịrị fịị sọ, ịn wa bala ḅịa. Kụma ị́yẹrị, í yela wamịna-aḅụụ ḅẹ kịnị apuku, sọnọ ẹndẹ finji na gbasịm; anịẹrẹsị anị iḅitẹịn ḅa ị́ opu ama mẹ ḅio sime tẹ ḅarasụa kẹ wa fịrịma.”

⁴ Amadaḅọ ḅe nwẹnị ịn ḅẹẹ, “Ó ḍiki tẹ ọmịna aḅụụ iḅitẹịn ye tẹịn ye, à mịẹ ḅa.” Anieḅụ amadaḅọ ḅe ogigo-ḅọkọ mẹ akaka sịẹsime wararị ogbo ọmụ-ogbo mẹmgba maa ẹndẹ oyia asi finji-finji na, kịnị sọnọa si sọnọa si na ḅụ mẹnjị-mẹnjị pakam.

⁵ Tẹ amadaḅọ ḅe nwẹnị tọn Johabụ na, Abisahị na, Itayi na pịrị, “Ọmịnị ì gotẹ dein ḅara kẹ Abusalọmụ asambịrịma owiḅọ ḅe na mịẹ.” Anịsakị tomi mamgba naam Abusalọmụ gbolomaye ḅụ amadaḅọ ḅe tọn ḅẹrẹtọn-apụ mamgba pịrị sakị.

⁶ Anieḅụ ọmụ-ogbo mẹ paka siri mẹ ḅio Izirẹlị da-paka ḅẹ mum; anịsakị Iferemu ḅẹ opu piri mẹ ḅio mie owu mẹ sọọ ye.

⁷ Devidi afịrịmẹnjịapụ ma Izirẹlị ḅẹ owiapụ ma nẹngịmam anịjụ, tẹ anị ene mẹ ḅụ, anịjụ ịn gburo-gburoma kịnị ḅaam, kịnị maa puku, oyi ẹndẹ finji (20,000) ịn nwẹn ḅaam.

⁸ Owu mẹ wasama opu sịẹ mẹmgba ikelema-korom; tẹ anị ene opu piri mẹ ḅio fịị gulugulu apụ, okologie ḅaa apụ nẹngịm.

⁹ Bẹkẹma-ḅara-ḅụ, Abusalọmụ ḅo Devidi afịrịmẹnjịapụ na doniam. Abusalọmụ ọ̀ kụrọ-sịḅịsụa-asụ ọgọnọ dọkụarị tẹ kụrọ-sịḅịsụa-asụ ḅe ịn kẹ ọgbọkọ sịn kịka oku nwẹn-sịn kpokorotẹ sịn-aḅara suku-ḅio mẹnjị-tolum. Ọ̀ sịḅị-ḅẹ-inume nwẹnị sịn-aḅara ma fangala kụrọma, tẹ ọ̀ nwẹnị so na kiri na ogboku sololo sime, tẹ kụrọ-sịḅịsụa-asụ ḅe tẹ ò suku-ḅio sime ye mẹ mangị ma-mum.

¹⁰ Gbọrụ owiḅọ ori ẹrịm, tẹ ḍuko Johabụ pịrịm, “Ḍikii, arị Abusalọmụ ẹrịm ori ịn kẹ oku sịn-arị gbọrụ sịn ḅụ sololo wararị.”

¹¹ Johabụ nwẹnị owiḅọ ḅe tẹ ori ẹrị ḅọ ḅe gbela, “Tiye, ị́ ori ẹrị! Ọkọ kụma tiye mịẹ tẹ ị́ anịjụ ò fomu kiri mẹ ḅio gbin-a? Mimgbe à ḅioḅẹlẹ tẹ seleḅa oyi apakịrị na, gbọrụ ḅiri-ponoye na kẹ ị́ pịrị tẹẹ.”

¹² Kụma owiḅọ ḅe nwẹnị Johabụ ḅẹẹ, “À nwẹnị ị̀ ḅara-ḅio seleḅa pakịrị maa ẹndẹ, oyia asi finji ọlọ tẹ ḅụụ-nimi sọ, arị ị̀ ḅara sun pakama tẹ kẹ amadaḅọ ḅe owiḅọtụḅọ ḅe lama ḅịa; kẹ gotẹ ọkọ ḅẹẹarị, wamịnị-mgba naarị ḅara ḅụ amadaḅọ ḅe tọn ị́yẹrị na, Abisahị na, Itayi na pịrịm, ‘Ì gotẹ ọmịnị Abusalọmụ, asambịrịma owiḅọ ḅe ḅụụ ḍikiḍikii.’

¹³ Osi ḅara kẹ anị ọkịị, à nwẹnị oḅori kẹ kịnị sịn ḅara kẹ ò ḍumo na mịẹ ọkụma, (amadaḅọ ḅe ḅụụ gberie-sọ ḅọị-a) nwẹn ḅẹẹ sakị, ị́yẹrị nwẹnị mimgbe ị́ ḅụụ ḅelema sịẹsime ḅa.”

¹⁴ Johabụ nwẹnị ḅẹẹ, “À ḅarị mị-ḅara kẹ ị́ na sime sakị fama ḅịa.” Tẹ ọ̀ nwẹnị tẹra ḅẹkẹrẹ ọkị ọ̀ ḅara sụa tẹ Abusalọmụ paa ịn kẹ oku sịn-arị opu sịn mẹ ḅụ fịị-a tẹ simearị ogbo, ọ̀ nwẹnị arị kẹ Abusalọmụ ekpe ḅio temi-temi suu.

¹⁵ Tẹ ọmụ-aị dogi Johabụ pịrịarị oyi asambịrịma owiapụ nwẹnị Abusalọmụ gbọrụ ikelema, tẹ ò fomu, tẹ ọ̀ ḅaam.

¹⁶ Anịtẹso Johabụ nwẹnị ọdụ mẹ ofuro, tẹ itu-itu ma nwẹnị Izirẹlị ḍuka mẹ ḅụ pịkịma ḅom, gbala Johabụ ịn dasịẹmam ẹrẹsị.

¹⁷ Tẹ ịn nwẹnị Abusalọmụ ọkị, tẹ ọ̀ kẹ opu piri mẹ ḅio gbọrụ opu olulu ḅio gbin suu, tẹ nwẹnị gburo-gburo lama ḅara kẹ tọnwa aḍụḅarị kẹ ò ponoma kpoli tunduruma; tẹ Izirẹlị mẹmgba ọrụḅọ-ọrụḅọ nwẹnị ḍumo-mangị kọn so amịna soku-ḅẹ ama mu.

¹⁸ Mịọkụ Abusalọmụ ò ḍumo sakị ḅụ ye ọkị tẹ ịḅalị mẹ tẹ Amadaḅọ ḅe Tụndụ Ogboku ḅụ simearị ye mẹ nama sịẹma amịna ḅụụ pịrịm, gbala ori mẹẹ, “Àrị iyi tẹ kịnị ị̀ ẹrẹ kẹ ḅiokoroma ḅẹ owiḅọtụḅọ à nwẹn nyana-a,” ẹrẹsị, ọ̀ nwẹnị ò soku-ḅẹ ẹrẹ kẹ ịḅalị mẹ kuro tẹ ini Abusalọmụ Ḅụụ Ḍiki Mịẹ Kpokobia kẹ anị sịn ḅo mịmgba lam.

Ini Abusalọmụ Fịị Gbolomaye Ḍuko Devidi Pịrịm

¹⁹ Anịtẹso Ayimazi, Zadọkụ owiḅọtụḅọ ḅe nwẹnị ḅẹẹ, “Yee àrị iḅi-oku ma dogi tẹ kẹ mangị mu amadaḅọ ḅe pịrị, mịnẹ KỊNỊNYANAḄỌ ḅe ori na fịya-a apụ ma kụrọ ḅụ ọ̀ ḍụa-ḅọrọma tẹ.”

²⁰ Johabụ nwẹnị ọ̀ ḅẹẹ, “Mịmgba mie ị́ iḅi-oku dogi ḅẹ ye anị-a; jen ene ḅụ mie ị́ inetẹ iḅi-oku dogi ḅarịye, gbala amadaḅọ ḅe owiḅọtụḅọ fịị tẹ ẹrẹsị.”

²¹ Anịtẹrẹmẹ Johabụ nwẹnị Kusu ḅẹ ḅọ ḅe ḅẹẹ, “Muu, ị́ ẹrị ye ḍuko amadaḅọ ḅe pịrịị.” Kusu ḅẹ ḅọ ḅe nwẹnị sịḅị-tuu Johabụ pịrị, tẹ mangị mu.

²² Anịtẹso Ayimazi, Zadọkụ owiḅọtụḅọ ḅe nwẹnị pịkị siin Johabụ ḅẹẹ, “Pakaye-pakaye sọ, yee yẹrị sọ mangị Kusu ḅẹ ḅọ ḅe ḍuka.” Tẹ Johabụ nwẹnị ḅẹẹ, “Ì owiḅọtụḅọ, ị́ ẹrịarị mịnẹ iḅi-oku mẹ gotẹ ị́ gbọrụ gbẹẹ-ye sọ nyana ḅịa, í tiegotẹ mangị ḅẹ?”

²³ Ayimazi nwẹnị ḅẹẹ, “Pakaye-pakaye sọ à mangị ḅa.” Anieḅụ Johabụ nwẹnị ọ̀ ḅẹẹ, “Ọkọ ḅẹḅẹ, mangịị.” Anịtẹso Ayimazi nwẹnị ele mẹ ḅẹ etela mẹ ḅụ mangị mu, tẹ mangị Kusu ḅẹ ḅọ ḅe ḅọrọ.

²⁴ Mịọkụ Devidi maa ogigo-aḅọkọ ma ogboku lẹgị-sime wararị; ye-yọ mẹ ḍikiḍikiarị ḅọ ḅe nwẹnị onu mẹ ḅụ kpọlị ogigo-ḅọkọ mẹ ḅẹ isun mẹ ọgọnọ mu, tẹ ori ọ̀ tọrụ saakị-gelema tẹ ḍiki tẹso, ọ̀ nwẹnị ngẹrị mangị ma-ḅoarị gbọrụ owiḅọ ẹrị.

²⁵ Ye-yọ mẹ ḍikiḍikiarị ḅọ ḅe nwẹnị ideri-ḅo ḍuko amadaḅọ ḅe pịrị. Tẹ amadaḅọ ḅe nwẹnị ḅẹẹ, “Ori ngẹrị emi ḅẹḅẹ, iḅi-oku ọ̀ ḅịḅị-ḅio emi.” Tẹ ọ̀ fọnya mangịma ḅo kpekim.

²⁶ Anịtẹso ye-yọ mẹ ḍikiḍikiarị ḅọ ḅe nwẹnị pịkị mangị ma-ḅoarị jen gbọrụ owiḅọ ẹrị, tẹ ye-yọ mẹ ḍikiḍikiarị ḅọ ḅe nwẹnị ogigo-ḅọkọ mẹ mu tẹ ḅẹẹ, “Ḍikii, jen gbọrụ owiḅọ pịkị ngẹrị mangị ma-ḅoarị.” Amadaḅọ ḅe nwẹnị ḅẹẹ, “Ori sọ iḅi-oku kẹ ḅoarị.”

²⁷ Ye-yọ ḍikiḍikiarị ḅọ ḅe nwẹnị ḅẹẹ, “À sịn-arị tọrọkọ-tọrọkọ mangị ma-ḅoarị ḅọ ḅe Ayimazi, Zadọkụ owiḅọtụḅọ ḅe mangị ḅụọ kịkam.” Tẹ amadaḅọ ḅe nwẹnị ḅẹẹ, “Ori anie iḅi tomḅọ, tẹ iḅi-oku kẹ ḅoarị ḅọ.”

²⁸ Anịtẹso Ayimazi nwẹnị oloku pakama amadaḅọ ḅe sịn, “Ye mẹmgba iḅi wararị.” Tẹ ọ̀ nwẹnị amadaḅọ ḅe tọrọkọ ọ̀ sịḅị-tuu mu ọ̀ tọrụ kẹ kiri lama tẹ ḅẹẹ, “Boma sime KỊNỊNYANAḄỌ ị́ Tamụnọ ḅe tẹ inima tẹ ịna ḅara saakị kẹ ị̀ nyana amadaḅọ ḅe da-paka atomi ma ḅọrọmaḅọ ḅọ ḅe pịrịị.”

²⁹ Amadaḅọ ḅe nwẹnị gbela, “Ye gbeke Abusalọmụ asambịrịma owiḅọ ḅe na iḅi wararị?” Ayimazi nwẹnị pakịrị, “Johabụ ị́ fịrịmẹnjịḅọ fịrịma sakị à gburo-gburotẹ ye-yọ fiemarị tomi ogbo ẹrịm, kụma arị anị gotẹ mịẹarị ye nimi-a.”

³⁰ Amadaḅọ ḅe nwẹnị ḅẹẹ, “Akaka pịrịị, tẹ anịanga sịẹsimee.” Anieḅụ ọ̀ tọrụ-pịkị akaka da tẹ tụkụ sịẹm.

³¹ Kusu ḅẹ ḅọ ḅe nwẹnị ḅo laa, tẹ amadaḅọ ḅe ḅẹẹ, “Iḅi-oku sime ị̀ nyana amadaḅọ ḅe pịrịị! Kẹ gotẹ ọkọ ḅẹẹarị, KỊNỊNYANAḄỌ ḅe mịmgba ḅụ tomi mamgba tẹ saakị ị́ da-paka apụ ma kụrọ mẹ ḅio ị́ ḍụa-ḅọrọma tẹẹ.”

³² Amadaḅọ ḅe nwẹnị Kusu ḅẹ ḅọ ḅe gbela, “Ye gbeke Abusalọmụ asambịrịma owiḅọ ḅe na iḅi wararị?” Kusu ḅẹ ḅọ ḅe nwẹnị pakịrị, “Yee ị̀ nyana amadaḅọ ḅe na fịya-a apụ ma na, inima tẹ siye gotẹ saakị ị́ da-paka apụ mamgba anị asambịrịma owiḅọ ḅe sime-ḅara sime.”

³³ Anị nwẹnị ḅẹlẹma amadaḅọ ḅe ḅụụ koro lama, tẹ ọ̀ nwẹnị iwo ogigo-ḅọkọ mẹ ọgọnọ ḅẹ kala-ḅio mẹ mu, tẹ tẹmẹ-la ḅara kẹ owu; tẹ ò muarị sakị ọ̀ nwẹnị ḅẹẹ, “yei ì owiḅọtụḅọ Abusalọmụ! Ì owiḅọtụḅọ, ì owiḅọtụḅọ Abusalọmụ! Mimgbe ị́yẹrị fịị ḅẹ nakara yẹrị kọkọ fịị tẹ, yei ì owiḅọtụḅọ, í owiḅọtụḅọ Abusalọmụ!”