2 Samụẹlị 15 - FỊAFỊA BAỊBỤLỤ

Abusalọmụ Nyana Devidi Fịrị Sịḅị-kụrọ

¹ Miemẹ ḅọrọ tẹso, Abusalọmụ nwẹnị gbọrụ kirimẹnjị-ọmụarụ na, asụ amẹẹ na, ọ̀ kẹ tọrọkọ tarị, tarị mẹnjị ḅẹ owiapụ amesi oyi finji na nyana ọ̀ ḅụụ pịrị

² Abusalọmụ nwẹnị iḅi sakị saakị-saakị tẹ ogigo-ḅọkọ mẹ ḅẹ etela mẹ akaka sịẹsime ḅa; tẹ ḅẹḅọ-ḅẹḅọ ịgbanịya nyana tẹ amadaḅọ ḅe tọrọkọ ḅẹrẹkọn ḅẹ ḅo ḅoo, Abusalọmụ ọ̀ sịn ḅụụ pịrị tẹ ò gbela ḅa, “Ị́ tọ opu ama ḅụ sime tẹ ḅo?” Tẹ owiḅọ ḅe ḅẹẹm, “ị́ fịrịmẹnjịḅọ Izirẹlị furo ḅụ nwẹn pembe anga ḅụ ḅom” nwẹn ḅẹẹ ḅẹẹ,

³ Abusalọmụ mḅọ ḅẹẹ ḅa, “Ḍikii, ị́ ịgbanịarị ye mẹ iḅim, pịkị kuram; kụma amadaḅọ ḅe tọn tẹ ọ̀ tọrụ ḍima tẹ sime tẹ í poki ḅẹ ḅọ ofori.”

⁴ Abusalọmụ nwẹnị pịkị kẹ sụa ḍuko ḅa, “yei, mimgbe yẹrị nwẹnị ama mẹ ḅẹ ḅẹrẹkọnḅọ namịna! Anịtẹrẹmẹ mie ogbo-ogbo, anịanịa mịẹ ḅẹ ye nyanaḅọ-nyanaḅọ ị̀ ḍọkụma-ḅo ḅarịye, anịsakị à karakara ḅẹrẹ kọn mḅọ pịrị ḅa.”

⁵ Anịsakị tomḅọ kụn kẹ ọ̀ pịrị ḅẹ sọma kpeki sakị, kpeki sakị, ori ọ̀ ḅara sụn-pakama mḅọ ọlọ tẹ mḅọ ḅịḅị nọnjị ḅa.

⁶ Mị-ḅara mie Abusalọmụ kẹ Izirẹlịapụ mamgba tẹ ḅẹrẹkọn gotẹ amadaḅọ ḅe dama-ḅo apụ ma mịẹ ḅara; mị-ḅara mie Abusalọmụ kẹ Izirẹlị ḅẹ owiapụ ma aḅioḅẹngbọ furu ọkị ḅara.

⁷ Inia akụra kunoma ḅụ Abusalọmụ nwẹnị amadaḅọ ḅe ḅẹẹ, “À tẹkẹm yee àrị Hẹbụrọnị mu tẹ ịlọ tẹ à minini KỊNỊNYANAḄỌ ḅe pịrị tẹ ye mẹ suma.

⁸ Kẹ gotẹ ọkọ ḅẹẹarị, ị́ fịrịmẹnjịḅọ Aramụ ḅio Gẹsọ ḅụ angarị sakị àrị ịlọ minini tẹ ḅẹẹm, ‘KỊNỊNYANAḄỌ ḅe tụkụma ḅara ḅụ ị̀ pịkịma Jeruselemu ḅom ḅẹḅẹ, à sunsin KỊNỊNYANAḄỌ ḅe pịrị ḅa.’ ”

⁹ Amadaḅọ ḅe nwẹnị ọ̀ ḅẹẹ, “Dein na muu.” Anieḅụ Abusalọmụ saakịm, tẹ so Hẹbụrọnị mum.

¹⁰ Kụma Abusalọmụ nwẹnị ḅọị oku-mẹnjịapụ kẹ Izirẹlị ḅẹ afuro mamgba fịrịma ikelema-koro, tẹ ḅẹẹm, “Ọmịnị ọdụ mẹ ḅẹ fie mẹ naa kirikiri, anị sakị mẹ ḅụ ọ́ ḅẹẹ, ‘Hẹbụrọnị ḅụ Abusalọmụ anie amadaḅọ ḅee!’ ”

¹¹ Jeruselemu ḅụ kịnị oyia asi Abusalọmụ ḅụụ sọ tẹ mum, inima tẹ gberie-sọ nimi-a tẹ ori igoniapụ ḅara kẹ sịn tẹ ḅio sarasara ḅụ mu apụ ma.

¹² Abusalọmụ agba ma mịẹarị sakị ọ̀ ḅịḅị kẹ Ayitofẹlị, Gilo ḅẹ ḅọ, datụkụma ẹkwẹn kọn Devidi pịrịarị ḅọ ḅe fịrịmam Gilo ori opu ama ḅụ. Tẹ ḅiya ḅẹrẹ mẹ kụrọ tọrọkọ-tọrọkọ mum, tẹ Abusalọmụ ḅụụ sime apụ ma ḅụụ, ja apụ ja apụ mu sọm.

Devidi Jeruselemu Ḅụ Ḍumo-mangị Kọnm

¹³ Gbọrụ fịrịmẹnjịḅọ nwẹnị Devidi ḍọkụma-ḅo tẹ ḅẹẹ, “Izirẹlị ḅe owiapụ ma aḅioḅẹngbọ ma, arị so Abusalọmụ ḍọkụma-mu tẹẹ.”

¹⁴ Anịtẹso Devidi nwẹnị ori afịrịmẹnjịapụ mamgba tẹ ori na Jeruselemu ḅụ sime apụ ma ḅẹẹ, “Ọ́ saakịị, tẹ yee wa ḍumo-mangị kọn; anieofori Abusalọmụ ḅara ḅụ pụkọ-so ḅarị wamịnị na ofori ọ́ fọnya ḅara kẹ soo; anieofori ò ḅofa fọnya ḅo wa la, tẹ siye ọkị-ḅo wamịnị ọgọnọ gbana, tẹ okologie kẹ opu ama mẹ pẹlẹ-ḅaa fama.”

¹⁵ Amadaḅọ ḅe afịrịmẹnjịapụ ma nwẹnị amadaḅọ ḅe ḅẹẹ, “Ḍikii, ị́ afịrịmẹnjịapụ ịn tẹlẹma wararị wa nyana amadaḅọ ḅe tọn-pẹlẹye-pẹlẹye mịẹ.”

¹⁶ Anieḅụ amadaḅọ ḅe saakị mẹnjịm, tẹ ọ̀ warị suku mẹmgba ò ḍuka-mum. Amadaḅọ ḅe nwẹnị oyia ịgwa-ereme kẹ koroma ịn warị mẹ ḍikiḍiki ḅẹ ḅara.

¹⁷ Tẹ amadaḅọ ḅe saakị mẹnjịm, tẹ tomi mamgba ò ḍuka-mum; tẹ kunoma warị mẹ ḅụ ịn nwẹnị daasịẹ.

¹⁸ Ori afịrịmẹnjịapụ mamgba ori akaka mẹnjị, mẹnjị ḅọrọm, Kẹrẹtị apụ mamgba na, Pẹlẹti apụ mamgba na, Gati ḅẹ apụ tẹ Gati ḅụ ò ḍuka ḅo kịnị ẹndẹ, oyia asi finji (600) mamgba amadaḅọ ḅe tọrọkọ mẹnjị-mẹnjị ḅọrọm.

¹⁹ Anịtẹso amadaḅọ ḅe nwẹnị Itayi, Gati ḅẹ ḅọ ḅe ḅẹẹ, “Ị́yẹrị sọ tiegotẹ wamịnị na so? Pịkị-soo, tẹ amadaḅọ ḅe na simee; kẹ gotẹ ọkọ ḅẹẹarị, ị́yẹrị anie igoniḅọ; tẹ pịkị ị́ ama ḅụ ịn tọrụ-fama ḅara kẹ dee jen sịẹ pịrị wararị ḅọ.

²⁰ Mị ḅịẹịn-ḅịẹịn mie í ḅo yee, anịsakị ndẹẹ à mịmgba ḅụ ị́ mịẹ tẹ ị́ wamịnị na irima-irima mẹnjị ma-ḅọrọ ḅẹ ḅara, ị́ ẹrịarị à soarị, àrị à muarị anga nimi-a. Pịkịma-soo, tẹ ị́ amịnapụ kẹ ị́ ḅụụ sụa soo; anịsakị KỊNỊNYANAḄỌ ḅe jike-a ḅẹlẹma na, minini na nyana ọ́ pịrịị.”

²¹ Kụma Itayi nwẹnị amadaḅọ ḅe pakịrị, “KỊNỊNYANAḄỌ ḅe ḍumo-sime wararị, anịsakị ị̀ nyana amadaḅọ ḅe sọ ḍumo-sime wararị ogbo, ị̀ nyana amadaḅọ ḅe sime-anga sime-anga, anị ḍumo ḅụ-o, fịị ḅụ-o anịjụ mie ị́ fịrịmẹnjịḅọ sọ sime ḅarịye.”

²² Tẹ Devidi nwẹnị Itayi ḅẹẹ, “Ọkọ ḅẹḅẹ, mẹnjị ḅọrọ, tẹ mẹnjị muu.” Anieḅụ Itayi, Gati ḅẹ ḅọ ḅe na, ọ̀ ḅụụ sọ owiapụ mamgba na, ḍọkọḍọkọ-awọmẹ mamgba tẹ ori na sime apụ mamgba na mẹnjị ḅọrọ mum.

²³ Opu sịẹ mẹmgba tẹmẹ-la ḅara kẹ lee-leema sule-sule owum tomi mamgba wẹrịtẹ mẹnjị-mẹnjị-ḅọrọarị ḅara ḅụ, tẹ amadaḅọ ḅe mẹnjị Kidirọnị kuroro mẹ saḅam, tẹ tomi mamgba mẹnjị saḅa tọrụ kẹ ịkpa mẹ da-mum.

²⁴ Abịyata nwẹnị ḅo la, tẹ Zadọkụ na Tamụnọ Ọḅọkụ-Igbe mẹ dogiarị Livayị furo-ḅẹ-apụ mamgba na ọ̀ ḅụụ sọ tẹ ḅo laa; tẹ ịn nwẹnị Tamụnọ Ọḅọkụ-Igbe mẹ da koroma nwenii tomi mamgba opu ama mẹ ḅio mẹnjị pakam.

²⁵ Anịtẹso amadaḅọ ḅe nwẹnị Zadọkụ ḅẹẹ, “Ọ́ Tamụnọ Ọḅọkụ-Igbe mẹ dogi pịkịma opu ama mẹ ḅio suu. À KỊNỊNYANAḄỌ ḅe tọrụ ḅụ ḍiki-ḅụụjịrị ḍọkị-ẹrị-ẹrị ori ị̀ pakama-ḅo ḅa, anịsakị yee àrị Ọḅọkụ-Igbe mẹ-o, ò sime anga mẹ-o ẹrị;

²⁶ kụma ọ̀ nwẹnị, ‘À ḅarị ị́ ḅụụ ḅioḅẹlẹ nyana-a,’ ḅẹẹ ḅẹẹ, ḍikii, mie yẹrịị, yee ori ḍiki tẹ ọ̀ ḅụụ-ḅẹlẹ ye kẹ ị̀ mịẹ.”

²⁷ Amadaḅọ ḅe nwẹnị pịkị Zadọkụ, ịkịankoroḅọ ḅe ḅẹẹ, “Ḍikii, dein na, pịkịma-so opu ama mẹ muu, ị́yẹrị na, Abịyata na ọmịna maa owiapụ-awọmẹ, í owiḅọtụḅọ Ayimazi na, Abịyata owiḅọtụḅọ Jonatanị na kẹ ọmịna aḅụụ sụa.

²⁸ Ḍikii, ịkpa mẹ ḅio ḅẹ tọrụ mẹ mẹnjị-saḅarị kpongbo mẹ ḅụ à sime koru nwenii ọmịna ḅịḅị ḅo ye sime-ḅara ḍuko ị̀ pịrị sakị la ḅa.”

²⁹ Anieḅụ Zadọkụ na, Abịyata na Tamụnọ Ọḅọkụ Igbe mẹ dogi pịkịma Jeruselemu mum; tẹ ini anịjụ simem.

³⁰ Kụma Devidi, Olivu Tụndụ mẹ ḅẹ kpọlị iwo anga mẹ ḅụ ḅara kẹ ọ̀ sịḅị-ogbo gbana, tẹ tẹmẹ-la ḅara kẹ owu-ma papaa ḅụọ kẹ kpọlị iwom; tẹ tomi ma tẹ ori na sime apụ mamgba ḅara kẹ ịna asịḅị-ogbo gbanam, tẹ tẹmẹ-la ḅara kẹ owu-ma mẹnjịma mum.

³¹ Tẹ ịn nwẹnị anị ḍuko Devidi pịrị mịnẹ Ayitofẹlị Abusalọmụ ḅụụ sọ tẹ ḅẹrẹ-ḅiya apụ ma ogbo-ḅio emi. Tẹ Devidi nwẹnị tẹkẹ, “Yei KỊNỊNYANAḄỌ, àrị ị́ tẹkẹm, Ayitofẹlị datụkụma nimi ẹkwẹn mẹ pịkị oḅori ẹkwẹn mịẹ.”

³² Devidi ḅo tụndụ mẹ sịḅị ọgọnọ ịn sunsin Tamụnọ pịrị-pịrị anga mẹ la tẹso, Usayị Akayịtị ḅọ ḅe ori akapa kan wararị, tẹ ọ̀ sịḅị mẹmgba lịka-lịka-lịka ḅara kẹ nwẹnị ḅo ori na bịama.

³³ Devidi nwẹnị ọ̀ ḅẹẹ, “Ị́ ị̀ ḅụụ sọ tẹ so ọkụma, í ḅofa iku dogiye sọ ị̀ pịrị.

³⁴ Kụma ị́ nwẹnị pịkịma-so opu ama mẹ mu tẹ Abusalọmụ ḅẹẹ, ‘yei amadaḅọ, àrị ị́ fịrịmẹnjịḅọ sọ ḅa, à wẹrịtẹ ḅọrọ tẹ sakị ḅụ ị́ ḍa fịrịmẹnjịḅọ sọ ḅara, anị ḅara mie à kẹ mịọkụ ị́ fịrịmẹnjịḅọ sọ ḅarị ḅara’ ḅẹẹm ḅẹḅẹ, anịtẹrẹmẹ mie ị́ Ayitofẹlị datụkụma nimi ẹkwẹn mẹ nẹngịma ị̀ pịrị ḅarịye.

³⁵ Zadọkụ na Abịyata na agbamịẹapụ ma anịjụ ini ọmịnị na ofori? Anieḅụ amadaḅọ ḅe warị ḅụ ị́ naa ye, naa ye ḍuko agbamịẹapụ ma Zadọkụ na, Abịyata na pịrịị.

³⁶ Ḍikii, ịna maa owiapụ-awọmẹ anịjụ ini na emi, Zadọkụ owiḅọtụḅọ Ayimazi na, Abịyata owiḅọtụḅọ Jonatanị na; anịsakị ịna ḅụụ mie ḅẹ ye, ḅẹ ye tẹ naa ye, naa ye kẹ ị̀ fịrịma ḅarịye.”

³⁷ Anieḅụ Usayị, Devidi ikiaḅọ ḅe pịkịma opu ama mẹ ḅio sọ-ḅom, Abusalọmụ paa Jeruselemu sọ-muarị ogbo.