2 Samụẹlị 14 - FỊAFỊA BAỊBỤLỤ

Johabụ, Abusalọmụ Pịkịma-ḅo Kẹ Kịnị Na Ḅịḅị-Kẹ-Ogbosọm

¹ Mịọkụ Johabụ, Zeruya owiḅọtụḅọ ḅe tọnma nimim mịnẹ amadaḅọ ḅe ḅioḅẹngbọ mẹnjị paka mu Abusalọmụ ọgọnọ gbana tẹ.

² Johabụ nwẹnị kịnị kẹ Tẹkowa fịrịma, tẹ anịjụ ye-nimi gbọrụ ẹrẹḅọ ọkị-ḅo, tẹ nwẹnị á ḅẹẹ, “Ḍụẹịn ḍuu elekimaa, tẹ ḍụẹịn ḍuu apụ akapa sụa, olo kẹ í oju ọmbị ma, kụma ẹrẹḅọ tẹ tọnwa aḍin kẹ anịngẹ-kụraḅio ḍụẹịn ḍuuarị ḅọ ye mịẹ ḅara kẹ ye mịẹ,

³ tẹ amadaḅọ ḅe ḍọkụma-mu, tẹ mị-ḅara kẹ ẹkwẹn ọ̀ pịrịị.” Anieḅụ Johabụ á kọn ḅẹ ẹkwẹn ḍuko á pịrịm.

⁴ Tẹkowa ḅẹ ẹrẹḅọ ma ḅo amadaḅọ ḅe la tẹso, á nwẹnị á tọrụkuḅu kẹ ḅịkị kiri-ḅio koro, tẹ kụn kẹ ọ̀ pịrị, tẹ ḅẹẹ, “yei amadaḅọ, ḅarasụa.”

⁵ Amadaḅọ ḅe nwẹnị á gbela, “Í tiye ḅiiarị?” Á nwẹnị pakịrị, “Ḍikii, yẹrị anie diḅọ-fịtẹ-ẹrẹḅọ, ì di fịị tẹ.

⁶ Ị́ fịrịmẹnjị-ẹrẹḅọ maa owiapụ-awọmẹ nyanam, tẹ piri-ḅio ini maa apụ ma nwẹnị kamụ-sọ, ịn kọrị ḅẹ gbọrụḅọ-sọ ofori, tẹ gbọrụḅọ nwẹnị osi ḅọ fomu tẹ ọ̀ ḅaa.

⁷ Mịọkụ bebe furo mẹ saakị ị́ fịrịmẹnjị-ẹrẹḅọ da-paka tẹ, tẹ ini mẹẹ, ‘Anị owiḅọ ḅe tẹ amịna iyimbere fomu ḅaa ḅọ ḅe kẹ wa pịrị, mịẹ tẹ wa ò iyimbere ḅe tẹ ọ̀ ḅaa ḅọ ḅe ḍumo mẹ gotẹ ọ̀ ḅaa ḅẹ ḅara; tẹ anieḅụ ḍuu fị ḅẹ ḅọ ḅe sọ ḅaa ḅẹ ḅara.’ Mị-ḅara ḅụ ini ị̀ anyịmgbọ kpo mẹ tẹ kirikọn wararị ye mẹ biinma, tẹ tomikiri tọrụ mẹ ḅụ ẹrẹ, anịanịa ye kọnma ì di ḅe pịrị ḅịa ḅara.”

⁸ Anịtẹso amadaḅọ ḅe nwẹnị ẹrẹḅọ ma ḅẹẹ, “So ị́ warị muu, anịsakị àrị í gboloma ḅẹrẹ tọn ḅa.”

⁹ Tẹ Tẹkowa ḅẹ ẹrẹḅọ ma nwẹnị amadaḅọ ḅe ḅẹẹ, “Ị̀ nyana amadaḅọ, ḅẹrẹ-ḅarasii mẹ yẹrị na, ị̀ ḍa warị na ọgọnọ gbanaa; yee amadaḅọ ḅe na, ori emine na, ḅẹrẹ-ḅarasii nyana ma.”

¹⁰ Amadaḅọ ḅe nwẹnị pakịrị, “Ḅẹẹye-ḅẹẹye ẹkwẹn ị́ pịrị-ḅọ pịrị-ḅọ, mḅọ ọkị-ḅo ị̀ pịrịị, anịsakị mḅọ ḅarị gbala-gbala ḅara kẹ siin ị́ lama ḅịa.”

¹¹ Anịtẹso á nwẹnị ḅẹẹ, “À tẹkẹm, yee amadaḅọ ḅe KỊNỊNYANAḄỌ ị́ Tamụnọ ḅe kụrọ sịn saakị, mịẹ tẹ ọmbie gbẹẹfị ḅii ḅọ ḅe ḅarị jen-maaịn kẹ ḅaa ḅịa, tẹ ì owiḅọtụḅọ ḅe fịị ḅịa ḅara.” Ọ̀ nwẹnị pakịrị, “KỊNỊNYANAḄỌ ḅe ḍumo sime wararị ogbo, í owiḅọtụḅọ ḅe sịḅị-ḅẹ-inume ḅụ gbọrụmgbọ-sọ siin-koro kiri mẹ la ḅịa.”

¹² Anịtẹso ẹrẹḅọ ma nwẹnị ḅẹẹ, “À tẹkẹm yee à paa ẹkwẹn gbọrụmgbọ kọn ị́ pịrị, ị̀ nyanaḅọ” Ọ̀ nwẹnị ḅẹẹ, “Ekwẹẹn.”

¹³ Ẹrẹḅọ ma nwẹnị ḅẹẹ, “Ị́ nwẹnị anịtẹrẹmẹ tiegotẹ nwẹn sime ye mịẹ ḅẹ tọn Tamụnọ atomi ma pịrị? Kẹ gotẹ ọkọ ḅẹẹarị, miemẹ tọn-pẹlẹ ḅụ, ị́ ḅẹrẹ-ḅarasii pẹlẹ ị́ ḅụụ pịrị tẹ, ị́ ḅarị siin ama koroma so wararị gbọrụḅọ ḅe ọkị-ḅo-a nwẹn ḅẹẹ sakị.

¹⁴ Wamịnị-mgba wa fịị nyanam, kiri-ḅio ọsụ sara minji sime-ḅara mie wa simearị ḅara aniemẹ tẹ ḅarị siin ọkị-ḅo gboloma ḅịa ye mẹ. Tamụnọ ḅe sọ anịḅọ ḅe tẹ mḅọ ḍumo fama ḅẹ ḍọkịarị ḅọ ḅaa-a, kụma ḅọkọ ḍọkị tẹ in ọ̀ tọrọkọ dee-pakama ḅọ ḅe pịkịma-ḅoarị.

¹⁵ Mịọkụ à ḅo miemẹ ḍuko ị́ pịrịarị, ị̀ nyana, gbala tomi ma ị̀ mịẹ tẹ á ḅalafa tẹ ẹrẹsị, tẹ à nwẹnị ị̀ ḅụụ ḅẹẹ mịnẹ à ḍuko ị́ pịrị ḅa; sosi anị paka ḅa mịnẹ ị́ à ḅii ye mẹ mịẹ ḅa.

¹⁶ Kẹ gotẹ ọkọ ḅẹẹarị, à kuromam ị́ ị̀ naa ḅa, tẹ ị̀ ḍụa-ḅọrọma ḅa tomḅọ ḅe tẹ yẹrị na, ì owiḅọtụḅọ ḅe na ḅaa gboloma ḅẹ ḅọ ḅe ḅara-ḅio Tamụnọ kẹ ori atomi pịrị ama mẹ ḅụ.

¹⁷ Anịsakị à nwẹnị kẹ ḅiokoroma mịnẹ ị́ ẹkwẹn-ḅịḅị mẹ, ị̀ nyanaḅọ, ịnyọsara kẹ ì pịrị ḅa; kẹ gotẹ ọkọ ḅẹẹarị, Tamụnọ enjẹlị ḅe iḅiye na siye na lekiri ḅara mie í sime-ḅara. KỊNỊNYANAḄỌ ị́ Tamụnọ ḅe ị́ na simee!”

¹⁸ Anịtẹso amadaḅọ ḅe nwẹnị ẹrẹḅọ ma pakịrị, “À kẹ ị́ gbela ye, gbela ye, ị̀ ḅụụ ḅụ gberie-sọ ḅọị ma.” Ẹrẹḅọ ma nwẹnị ḅẹẹ, “Ị̀ nyanaḅọ ì gbelaa”

¹⁹ Amadaḅọ ḅe nwẹnị gbela, “Mie-mẹmgba ḅụ Johabụ ḅara ị́ ḅụụ ofori?” Ẹrẹḅọ ma nwẹnị pakịrị tẹ ḅẹẹ, “Ị̀ nyanaḅọ, tụkụma ḅara ḅụ, ị́ ḍumo-sime wararị ogbo, gbọrụḅọ-sọ inetẹ ḅẹẹye-ḅẹẹye, tẹ í ḍuko tẹ ye mẹ ḅụ pịkị ama-ḅara, anịanịa ere-ḅara da ḅịa; ị́ fịrịmẹnjịḅọ Johabụ mie ị̀ ḅẹẹ ye; ori mie mịna ẹkwẹn-aḅịḅị mamgba kẹ ị̀ ḅịḅị-ḅio suu ye.

²⁰ Kẹ mịẹ tẹ mịẹ-aị ma simearị ḅara mẹ ḍima gotẹ ị́ fịrịmẹnjịḅọ Johabụ miemẹ mịẹm. Kụma ị̀ nyanaḅọ, ị́ Tamụnọ enjẹlị ḅe nyana nimi pembema nimi nyanam, kẹ ye mamgba tẹ tomikiri mẹ ḅụ simearị aị ma nimi.”

²¹ Anịtẹso amadaḅọ ḅe nwẹnị Johabụ ḅẹẹ, “Ḍikii, mịọkụ miemẹ à minini tẹ; muu, ị̀ asambịrịma owiḅọtụḅọ Abusalọmụ pịkịma-ḅoo.”

²² Johabụ nwẹnị ọ̀ tọrụkuḅu kẹ ḅịkị kiri mẹ ḅio koro tẹ kụn pịrị, tẹ amadaḅọ ḅe boma; tẹ Johabụ nwẹnị ḅẹẹ, “Mịmgba mie ị́ fịrịmẹnjịḅọ nimi ye mịẹ arị ị̀ nyana amadaḅọ ḅe ḍiki-tọrụ ḅụ ḍiki-ḅụụjịrị ḍọkị-ẹrị tẹ, mịnẹ amadaḅọ ḅe ọ̀ fịrịmẹnjịḅọ ḅii ye mẹ minini tẹ”

²³ Anieḅụ Johabụ nwẹnị saakị, tẹ Gẹsọ mu, tẹ Abusalọmụ kẹ Jeruselemu ḅom.

²⁴ Amadaḅọ ḅe nwẹnị ḅẹẹ, “Yee ò sikima ḅele tẹ ò soku-ḅẹ warị ḅụ anga, ọ̀ sọ à sime anga ḅụ ị̀ tọrọkọ ḅo ḅịa ḅara.” Anieḅụ Abusalọmụ sikima ḅele tẹ ò soku-ḅẹ warị ḅụ angam, tẹ sọ amadaḅọ ḅe sime anga ḅụ ọ̀ tọrọkọ ḅo-a.

Abusalọmụ, Devidi Na Ḅẹrẹ-fama Tẹ

²⁵ Mịọkụ Izirẹlị mẹmgba ḅụ, gbọrụḅọ sọ ofori mḅọ kọn tọrụ iḅi ḅụ ini Abusalọmụ kọn iḅi tokini ḅara kẹ tokini ḅọ, ọ̀ ḅụọ-kuḅu ḅụ ọkị mu ọ̀ sịḅị-ogbo la gbọrụ ḅẹkụ sọ ofori.

²⁶ Kụra kunoma goyegoye ḅụ mie ori ọ̀ sịḅị-ḅẹ-inume kịrị-kịrị ye anị ọ̀ ḅụụ ḅụ iku tẹso, ọkụma, anịsakị ori ọ̀ sịḅị-ḅẹ-inume mẹ kịrị tẹso ọkụma ori anị ḅẹ iku tọnm amadaḅọ iku-tọn-ye ḅụ, anị ḅẹ iku anie ịrụ-tẹịn kala fịlawa akpa mẹ ḅẹ iku pembeye.

²⁷ Ịn tẹra owiapụ-awọmẹ na, Tama kẹ ẹrẹ kẹ koro gbọrụ ẹrẹḅọtụḅọ na iyi Abusalọmụ pịrịm, arị anie tọrụ iḅi kọn ẹrẹḅọ.

²⁸ Anieḅụ Abusalọmụ sọ-ḅo amadaḅọ ḅe sime anga la-a ḅara kẹ Jeruselemu ḅụ maa kụra angam.

²⁹ Anịtẹso Abusalọmụ nwẹnị ọ̀ fịrịma amadaḅọ ḅe ḍọkụma-mu ḅẹ ḅara kẹ fịrịma Johabụ sịn, kụma Johabụ ọ̀ ḍọkụma-ḅo ḍụkụ-a. Ọ̀ maaịn karama sakị kẹ fịrịma ọ̀ sịnm; kụma Johabụ ḅo-a.

³⁰ Anịtẹso Abusalọmụ nwẹnị ori afịrịmẹnjịapụ ḅẹẹ, “Ḍikii Johabụ ḍụọ ị̀ nye palị wararị, anịsakị ori anị ḅio bali nwẹn-sịn fịye nyana wararị; ó mu fịnị kẹ anị ḅụ sụa dọkịmaa.” Anieḅụ Abusalọmụ afịrịmẹnjịapụ fịnị kẹ ḍụọ mẹ ḅụ sụam.

³¹ Anịtẹso Johabụ nwẹnị saakị tẹ Abusalọmụ warị ḅụ ọ̀ dama-mu tẹ ọ̀ ḅẹẹ, “Ị́ afịrịmẹnjịapụ tiegotẹ fịnị kẹ ị̀ ḍụọ ḅụ sụa?”

³² Abusalọmụ nwẹnị Johabụ pakịrị, “Ḍikii, à ḅịḅị kẹ ị́ fịrịmam mịanga ḅoo, mịẹ tẹ àrị ị́ kẹ amadaḅọ ḅe fịrịma tẹ gbela ḅẹ ḅara, ‘À tiegotẹ Gẹsọ ḅụ sime-a tẹ ḅo? Mimgbe à paa anịjụ sime iḅitẹịnm.’ Anịẹrẹsị yee mịọkụ à nwẹnị amadaḅọ ḅe sime anga sọ-mu, tẹ mịẹ-irima ị̀ ḅụụ emi-emii, yee ori ị̀ ḅaa!”

³³ Anịtẹso Johabụ nwẹnị amadaḅọ ḅe ḍọkụma-mu tẹ ḍuko ọ̀ pịrị; tẹ amadaḅọ ḅe nwẹnị ḅịḅị kẹ Abusalọmụ fịrịma. Anieḅụ ori amadaḅọ ḅe ḍọkụma-ḅom, tẹ amadaḅọ ḅe tọrọkọ ọ̀ sịḅị-tuu mu ọ̀ tọrụkuḅu kẹ kiri mẹ lamam, tẹ amadaḅọ ḅe Abusalọmụ ḅịḅị nọnjịm.