2 Samụẹlị 13 - FỊAFỊA BAỊBỤLỤ

Amịnọnị Na, Tama Na

¹ Mịọkụ Abusalọmụ, Devidi owiḅọtụḅọ ḅe iḅi tẹ amụ owiḅọ sime-a gbọrụ ịyịmbara nyanam, arị ẹrẹ Tama; sakị kẹlẹ ḅọrọ tẹso, á nwẹnị Amịnọnị, Devidi owiḅọtụḅọ ḅụụ-ḅẹlẹ.

² Amịnọnị ori ịyịmbara Tama gotẹ ḅụụ-ḅalaḅala nwenii, nwẹnị obi kẹ amịna ḅụụ pịrị; gbala árị ḅụụ-gboloa ḅọ, anịsakị anị sime-ḅara Amịnọnị inetẹ gberie-sọ kẹ á mịẹ ḅịa ẹrẹsị.

³ Kụma Amịnọnị gbọrụ ikiaḅọ nyanam, ori ẹrẹ anie Jonadabụ, Devidi iyimbere Simẹya owiḅọtụḅọ ḅe; anịsakị Jonadabụ anie epele tii ḍin lama wararị tomḅọ.

⁴ Jonadabụ nwẹnị ọ̀ ḅẹẹ, “yei amadaḅọ ḅe owiḅọtụḅọ, tiegotẹ dede-ḅio goyegoye ị́ ḅụụ-gine-a? Í ḍuko ị̀ pịrị ḅịa?” Amịnọnị nwẹnị ọ̀ ḅẹẹ, “À Tama ì iyimbere Abusalọmụ ịyịmbara ma ḅẹlẹmam.”

⁵ Jonadabụ nwẹnị ọ̀ ḅẹẹ, “Ị́ iḅila ọgọnọ ḅụ ḅọlọlọ sime, tẹ obi elekimaa; anịsakị ị́ ḍa ḅo ị́ ẹrị ḅẹ ḅo tẹ ḅẹḅẹ, ọ̀ ḅẹẹ, ‘Yee ị̀ ịyịmbara Tama ḅo tẹ fịye kẹ ị̀ pịrị fị, tẹ ị̀ tọrụ-ogbo ḅụ fịye mẹ tẹlẹma, mịẹ tẹ arị, anị ẹrị, tẹ á ḅara ḅụ anị fị ḅẹ ḅara.’ ”

⁶ Anieḅụ Amịnọnị ḅọlọlọ sime tẹ obi elekimam; tẹ amadaḅọ ḅe ori ẹrị ḅẹ ḅo tẹso, Amịnọnị amadaḅọ ḅe ḅẹẹ “Arị ị́ tẹkẹm yee ị̀ ịyịmbara Tama ḅo kịkị maa mgbọ ye ị̀ pịrị ị̀ tọrụ-ogbo ḅụ mịẹ tẹ arị á ḅara ḅụ anị fị ḅẹ ḅara.”

⁷ Anịtẹso Devidi nwẹnị ḅịḅị kẹ Tama fịrịma tẹ ḅẹẹ, “Í iyimbere Amịnọnị warị muu, tẹ fịye tẹlẹma ọ̀ pịrịị.”

⁸ Anieḅụ Tama á iyimbere Amịnọnị warị mum, ọ̀ ḅọlọlọ sime wararị anga ḅụ. Á nwẹnị minji na, jaị na kẹ gwa-pikiri tẹ fịlawa ọkị tẹ anị kpoo tẹlẹma, tẹ kẹ ọ̀ tọrụ-ogbo ḅụ kịkị mịẹ, tẹ kịkị mẹ fọị.

⁹ Á nwẹnị panị mẹ ọkị tẹ ọ̀ tọrọkọ anị kẹ sụa, kụma ọ̀ fị ḍụkụ-a. Amịnọnị nwẹnị ḅẹẹ, “Ị̀ tọrọkọ ḅụ ḅẹḅọ-ḅẹḅọ fịrịma pakamaa.” Anieḅụ ḅẹḅọ-ḅẹḅọ ọ̀ tọrọkọ ḅụ mẹnjị pakam.

¹⁰ Anịtẹso Amịnọnị nwẹnị Tama ḅẹẹ, “Fịye mẹ kẹ kala-ḅio mẹ sọ-ḅoo, mịẹtẹ àrị ị́ ḅara ḅụ anị fị ḅẹ ḅara.” Tẹ Tama nwẹnị á mịẹ tẹ akịkị ma ọkị, tẹ arị kẹ kala-ḅio mẹ sọ-ḅo árị iyimbere Amịnọnị pịrị.

¹¹ Kụma árị ọ̀ fị ḅẹ ḅara kẹ anị kẹ ò kpekima tẹso, ọ̀ nwẹnị árị ọlọ, tẹ á ḅẹẹ, “Ị̀ ịyịmbara ḅo ị̀ na ḅọlọlọọ.”

¹² Á nwẹnị ọ̀ pakịrị, “Ẹn-ẹn, ì iyimbere, kụrọ ḅara kẹ ị̀ ọlọ ma; kẹ gotẹ ọkọ ḅẹẹarị, ọkọsime ye Izirẹlị ḅụ mịẹ-mịẹ-a, mie kuroma nyana-a oḅori mịẹye mẹ mịẹ ma.

¹³ Yẹrị ma kụma, àrị inetẹ ị̀ ḅụụ-jịrị mẹ dogi tọ-anga mu ḅẹ? Ị́yẹrị ḅe kụma, ị́ Izirẹlị ḅụ kuroma nyana-a oḅori atomi ma ḅẹ gbọrụḅọ-sọ ḅa. Ọkọẹrẹsị mịọkụ àrị ị́ tẹkẹm, ẹkwẹn amadaḅọ ḅe pịrịị; kẹ gotẹ ọkọ ḅẹẹarị, ori ị́ ḅụụ ḅụ ị̀ ọlọ-sịẹma ḅịa.”

¹⁴ Kụma ori á poki ḍụkụ-a, tẹ ori kụrọ á nẹngị ḅara ḅụ, ọ̀ kụrọ-ḅara kẹ árị ọlọ tẹ árị na gbolomam.

¹⁵ Anịtẹso Amịnọnị nwẹnị gburo-gburotẹ opu ḍiki-ḅioḅu nyana á pịrị lama, anieḅụ ḍiki-ḅioḅu mẹ tẹ ọ̀ nyana á pịrị ye mẹ ḍụḅa ḅẹlẹma mẹ tẹ ọ̀ kẹ á ḅẹlẹma ye mẹ nẹngịm. Tẹ ọ̀ nwẹnị á ḅẹẹ, “Saakịị, mẹnjị-soo!”

¹⁶ Kụma á nwẹnị ọ̀ pakịrị, “Ì iyimbere, ẹn-ẹn; kẹ gotẹ ọkọ ḅẹẹarị, mie kura-a ḅara kẹ ị̀ fịrịma pakama mẹ ḍụḅa osi ye mẹ tẹ ị́ kẹ ị̀ mịẹ ye mẹ nẹngịm!” Kụma ori á poki-a;

¹⁷ ọ̀ nwẹnị asatụḅọ ḅe tẹ fịrịmẹnjị ọ̀ pịrịarị ḅọ ḅe sịn tẹ ọ̀ ḅẹẹ, “Ị̀ tọrọkọ ma ẹrẹḅọ ma sukuruma pakamaa, tẹ ḅọkọ mẹ ịkasị á pịrịị!”

¹⁸ Mịọkụ, Tama ḅara nangwọtẹ vọrọrọ-kapa sụa wararị, gbala mị-ḅara mie elemu sakị ḅụụ gbolo-a amadapụ eremịna-awọmẹ kapa sụa-sụa ḅara ẹrẹsị. Anieḅụ ọ̀ fịrịmẹnjịḅọ ḅe á sukuruma pakama tẹ ḅọkọ mẹ ịkasị á pịrịm.

¹⁹ Tama nwẹnị fọọn ḍuu á sịḅị sara, tẹ vọrọrọ-kapa mẹ tẹ á sụa ye mẹ kaan-sara; tẹ á ḅara kẹ á sịḅị-ogbo gbana tẹ nwẹnị oloko oloku owu-ma mẹnjị so

²⁰ Á iyimbere Abusalọmụ nwẹnị á gbela, “Í iyimbere Amịnọnị ori ị́ na ye mịẹ tẹ? Mịọkụ, ị̀ ịyịmbara dein simee, ori anie í iyimbere; miemẹ ọkị mu í ḅioḅẹngbọ lama ma.” Anieḅụ Tama, ḅụụ fatẹ ẹrẹḅọ ma á iyimbere Abusalọmụ warị ḅụ angam.

²¹ Amadaḅọ Devidi mịna aị mamgba naa tẹso, anị nwẹnị ori ịganịma lama.

²² Kụma iḅiye-o, siye-o, Abusalọmụ ẹkwẹn Amịnọnị pịrị-a; anị kẹ gotẹ ọkọ mịẹ ye, Abusalọmụ, Amịnọnị ḍiki-ḅioḅum, ọ̀ kụrọ ḅara kẹ ori mbịra Tama ọlọ ye mẹ ẹrẹsị.

Abusalọmụ Ḅii Gbẹẹfị

²³ Ḅintẹ maa kụra ḅọrọ tẹso, Abusalọmụ, Balị-hazọ tẹ Iferemu kpeki wararị anga ḅụ anana oju ḅẹ isuke-kịrịapụ nyanam, ọ̀ nwẹnị amadaḅọ ḅe owiapụ-awọmẹ mamgba sịn.

²⁴ Abusalọmụ nwẹnị amadaḅọ ḅe ḍọkụma-ḅo, tẹ ḅẹẹ, “Ḍikii, ị́ fịrịmẹnjịḅọ anana oju ḅẹ isuke-kịrịapụ nyana tẹ; à tẹkẹm, yee amadaḅọ ḅe na, ori afịrịmẹnjịapụ na ị́ fịrịmẹnjịḅọ ḅụụ sọ tẹ mu alalị mẹ fị.”

²⁵ Kụma amadaḅọ ḅe nwẹnị Abusalọmụ ḅẹẹ, “Ẹn-ẹn, ì owiḅọtụḅọ, yee wamịnị-mgba mu ma, wa ḅofa iku ḅaka dogiye sọ ị́ pịrị.” Abusalọmụ ḍụkụ-a tẹ paa ọ̀ sịnm, kụma amadaḅọ ḅe ḍụkụ-a, tẹ ḅụụkụrọma kẹ ọ̀ ḅẹẹm.

²⁶ Anịtẹso Abusalọmụ nwẹnị ḅẹẹ, “Ị́ ḍụkụ-a ḅẹḅẹ, à tẹkẹm, yee ì iyimbere Amịnọnị wamịnị na mu.” Amadaḅọ ḅe nwẹnị ò gbela, “Ò tiegotẹ ọmịnị na mu na-iḅi?”

²⁷ Kụma Abusalọmụ ḍụkụ ọ̀ pịrị-a nwenii ọ̀ wẹrịso tẹ Amịnọnị na, amadaḅọ ḅe owiapụ-awọmẹ mamgba na ori na mum.

²⁸ Anịtẹso Abusalọmụ nwẹnị tọn ori afịrịmẹnjịapụ pịrị “ọmịnị Amịnọnị iru ḅuu tọrụ-ḅaama ḅẹ sakị kẹ elekima sụa, anịsakị arị ọ́ ḅẹẹm, ‘Ọmịnị Amịnọnị fomuu,’ ḅẹḅẹ, anịrẹ ọmịnị ọ̀ ḅaa. Ọ́ ḅalafa ma; yẹrị mie tọn ọ́ pịrị yee, ọkọ-a? Ó ḅiokpọọ, tẹ ḅụụ tukutuku ma,”

²⁹ Anieḅụ Abusalọmụ afịrịmẹnjịapụ Abusalọmụ wẹrịtẹ tọn ịn pịrị tẹ ḅara kẹ Amịnọnị mịẹm. Anịtẹso amadaḅọ ḅe owiapụ-awọmẹ mamgba virikama saakị, tẹ ọrụḅọ-ọrụḅọ amịna kụrọ-sịḅịsụa-asụ kpọlị tẹ ḍumo-mangị kọnm.

³⁰ Ini etela mẹ ḅụ emi ogbo, “Abusalọmụ amadaḅọ ḅe owiapụ-awọmẹ mamgba ḅaa fama tẹ, tẹ ịna aḅụụ gbọrụḅọ-sọ kọn-a,” nwẹn ḅẹẹ ḅịḅị nwẹnị ḅo Devidi la.

³¹ Anịtẹso amadaḅọ ḅe nwẹnị saakị, tẹ ori opu akapa kaan-sara, tẹ ọ̀ ḅụụ saakị kiri gbin, tẹ ori afịrịmẹnjịapụ tẹ akaka ḅụ sịẹ, sịẹ wararị apụ mamgba nwẹnị ịna opu akapa kan.

³² Kụma Jonadabụ, Devidi iyimbere, Simẹya owiḅọtụḅọ ḅe nwẹnị ḅẹẹ, “Yee ị̀ nyanaḅọ ḅiotọn ma mịnẹ ini asambịrịma owiapụ-awọmẹ mamgba, amadaḅọ ḅe owiapụ-awọmẹ ma ḅaa fama tẹ, kẹ gotẹ ọkọ ḅẹẹarị, Amịnọnị ngẹrị mie fịị ye, gbala ọ̀ kụrọ ḅara kẹ Abusalọmụ ịyịmbara Tama ọlọ ene ḅụ mie Abusalọmụ miemẹ mịẹ ḅẹ tọn wẹrị ye ẹrẹsị.

³³ Anịẹrẹsị yee mịọkụ ị̀ nyana amadaḅọ ḅe mị ḅara kẹ anị ọkị ḅioḅẹngbọ lama tẹ ḅiotọn ma mịnẹ amadaḅọ ḅe owiapụ-awọmẹ mamgba fịị fama tẹ; kẹ gotẹ ọkọ ḅẹẹarị, Amịnọnị ngẹrị mie fịị ye.”

³⁴ Kụma Abusalọmụ ḍumo-mangị kọnm Tẹ asambịrịma owiḅọ ḅe tẹ ye-yọ mẹ ḍikiḍikiarị ḅọ ḅe ọ̀ tọrụ saakị tẹ ḍiki sakị, tọnwa atomi Horonayịmu opu etela tụndụ mẹ akaka ḅụ mangịma ḅoarị.

³⁵ Jonadabụ nwẹnị amadaḅọ ḅe ḅẹẹ, “Ḍikii, amadaḅọ ḅe owiapụ-awọmẹ ma ịn ḅo tẹ; ị́ fịrịmẹnjịḅọ ḍuko ḅara mie anị paka tẹ ḅara.”

³⁶ Ọ̀ paa ẹkwẹn fama gbọrụ sakị, ḍikii mie amadaḅọ ḅe owiapụ-awọmẹ ma ḅo ye, tẹ nwẹnị ịna pọkọ saakị tẹ tẹmẹ-la ḅara kẹ owu, amadaḅọ ḅe so, na ori afịrịmẹnjịapụ mamgba na, nwẹnị ye ḅụụ ḅụ akụ ḅara kẹ tẹmẹ-la owu kọn.

³⁷ Kụma Abusalọmụ ḍumo-mangị kọn so Talịmayị, Amihudu owiḅọtụḅọ, Gẹsọ ḅẹ amadaḅọ ḅe ḍọkụma-mum, tẹ Devidi ene-ḅaaene-ḅaaene ḅụ ori owiḅọtụḅọ gotẹ owum.

³⁸ Mị-ḅara mie Abusalọmụ ḍumo-mangị kọn Gẹsọ mu, tẹ anịjụ tẹra akụra sime-ḅara.

³⁹ Amadaḅọ Devidi tẹmẹ nwẹnị Abusalọmụ ḍọkụma-mu ịgbanị, gbala ori ẹrịm Amịnọnị fịị tẹ ḅẹ sakị ò gboloma ye ḅụ ori ò ḅio mịẹ kụrọma tẹ ẹrẹsị.