2 Samụẹlị 12 - FỊAFỊA BAỊBỤLỤ

Netanị Oku-ḅịḅị Na Devidi Si ḅụ pịkị Na

¹ KỊNỊNYANAḄỌ ḅe nwẹnị Netanị kẹ Devidi fịrịma. Netanị ọ̀ ḍọkụma-ḅom, tẹ nwẹnị ọ̀ ḅẹẹ, “Gbọrụ opu ama ḅụ maa owiapụ simem, gbọrụḅọ alaḅọ, osi-ḅọ igoinḅọ.

² Alaḅọ ḅe tọnwa anana ogbo na, nama ogbo-ogbo na nyanam,

³ kụma igoinḅọ ḅe gbọrụ kala anana tẹ ọ̀ fẹ ye mie ọ̀ nyana yee. Ọ̀ nwẹnị ò ḍikiḍiki ḍụḅama, tẹ ori na, ori awọmẹ na ḅụụ sọ tẹ ḍụḅa paka-ḅo; ò fịye kalịye mẹ ḅụ mie ò fịye kẹ ọ̀ pịrị fị-fị yee, tẹ ò minji-ḅuuye ḅio minji ḅuuarị, ọ̀ ḅụọ-ẹtẹnẹ ḅụ ò monom, tẹ ori ọ̀ ḅụụ ḅụ ori iyi ẹrẹḅọtụḅọ sime-ḅara simem.

⁴ Gbọrụ ene, gbọrụ igoniḅọ nwẹnị alaḅọ ḅe ḍọkụma-ḅo, tẹ alaḅọ ḅe ò soku-ḅẹ anana ogbo, anịanịa ori anama ogbo ḅụ gbọrụ ye ọkị tẹ kẹ igoni kẹ igoniḅọ ḅe tẹ ọ̀ ḍọkụma-ḅo ḅọ ḅe kọn ḅe ḅii-a, kụma ọ̀ nwẹnị igoinḅọ ḅe gbọrụ anana tụḅọ ḅe ọkị ḅaa tẹ kẹ igoniḅọ ḅe tẹ igoni kẹ ọ̀ ḍọkụma-ḅo ḅo ḅe kọnm”

⁵ Anịtẹso Devidi nwẹnị ḅẹlẹma ịganị nyana alaḅọ ḅe pịrị, tẹ Netanị ḅẹẹ, “KỊNỊNYANAḄỌ ḅe ḍumo-sime wararị ogbo, ḅị tomḅọ ḅe tẹ miemẹ mịẹ ḅọ ḅe ọ̀ fịị gbẹm;

⁶ anịsakị ori anana tụḅọ ḅe inia akiri kẹ ọ̀ gbẹẹ ḅa, gbala ori ọkụrụkụrụ nyana-a tẹ miemẹ mịẹm ẹrẹsị.”

⁷ Netanị nwẹnị Devidi ḅẹẹ, “Ị́yẹrị anie tomḅọ ḅee. Mị-ḅara mie KỊNỊNYANAḄỌ ḅe, Izirẹlịapụ tẹkẹarị Tamụnọ ḅe ḅẹẹ ḅara. À pulo kẹ í sịḅị saram, amadaḅọ sọ Izirẹlị pịrịị, anịsakị à Sọlụ ḅara-ḅio í ḍụa-ḅọrọmam;

⁸ tẹ à nwẹnị ị́ sịḅịdaḅọ warị na, ị́ sịḅịdaḅọ sime-ereme na kẹ ị́ pịrị, nwẹnị pịkị Izirẹlị warị mẹ na, Juda warị na kẹ ị́ pịrị; tẹ miemẹ nwẹnị ị́ ḅụụ ḅụ ịrụ ḅaka ḅaka, à jaị-jaị kẹ sụa ị́ pịrị ḅarị ya.

⁹ Í tiegotẹ ò ḍiki-tọrụ ḅụ siye mịẹ ḅẹ KỊNỊNYANAḄỌ ḅe ẹkwẹn-ḅịḅị mẹ ḍiki-sima? Ị́ okologie kẹ Yuraya, Hitahiti ḅọ ḅe ḅaa tẹ ọ̀ ta ọkị ị́ ta sọma tẹẹ, tẹ Amọnị ḅẹ apụ ma okologie mẹ kẹ ọ̀ ḅaa tẹẹ.

¹⁰ Mịọkụ, anịẹrẹsị okologie mẹ gbala-gbala ḅarị ị́ warị ḅụ so ḅịa, gbala ị́ ì ḍiki-sima tẹẹ, tẹ Yuraya, Hitahiti ḅọ ḅe ta ma ọkị ị́ ta sọma tẹ ẹrẹsị.

¹¹ Mie KỊNỊNYANAḄỌ ḅe ḍuko yee, ‘Ḍikii, ị́ soku-ḅẹ warị ḅio ḅụ à siye saakị ḅo ị́ da-paka ḅa, anịsakị arị ị́ tọrụ-ogbo ḅụ ị́ sime-ereme ma ọkị ḅa, tẹ ịn kẹ ị́ na kpeki ḅọ pịrị ḅa, tẹ ori í sime-ereme ma na eneḅaka-fịafịa-ogbo gboloma ḅa.

¹² Kẹ gotẹ ọkọ ḅẹẹarị, ị́yẹrị ḅọị ḅara kẹ anị mịẹm, kụma yẹrị miemẹ mịẹ ḅa Izirẹlị mẹmgba tọrọkọ na eneḅaka-fịafịa-ogbo na ḅụ.’ ”

¹³ Devidi nwẹnị Netanị ḅẹẹ, “À KỊNỊNYANAḄỌ ḅe ḅụụ siye mịẹ tẹẹ.” Tẹ Netanị nwẹnị Devidi pakịrị, “KỊNỊNYANAḄỌ ḅe sọ í si-wẹrịso tẹẹ; ị́ ḅarị fịị ḅịa.

¹⁴ Anịsọ, miemẹ tẹ ị́ mịẹ ye mẹ ḅụ, ị́ gbọrsịḅị KỊNỊNYANAḄỌ ḅẹ ḍiki-simam ẹrẹsị, tụḅọ ḅe tẹ in iyi ị́ pịrị ḅọ ḅe ọ̀ fịị ḅa.”

¹⁵ Anịtẹso Netanị so ọ̀ warị mum. Tẹ KỊNỊNYANAḄỌ ḅe tụḅọ mẹ tẹ Yuraya ta iyi Devidi pịrị ḅọ mẹ fomum, tẹ anị ḅo obim.

Devidi Owiḅọtụḅọ Fịịm.

¹⁶ Devidi anịẹrẹsị Tamụnọ tẹkẹ tụḅọ mẹ pịrịm, tẹ Devidi ḅuru-ịmọm, tẹ ḍin mamgba ḅụ warị ḅio ḅụ warị ḅio sọ, sọ mu papaa kiri mẹ ḅio mono simem.

¹⁷ Ọ̀ warị ḅẹ omongiapụ ma kiri mẹ ḅio ọ̀ saakị ḅẹ ḅara kẹ ori akaka sịẹsimem, kụma ọ̀ saakị ḍụkụ-a, ọ̀ pịkị ini na fịye fị-a.

¹⁸ Sọnọma aḍin karama ene ḅụ tụḅọ mẹ nwẹnị fịị. Ḍuko Devidi pịrị mịnẹ tụḅọ mẹ fịị tẹ mẹ nwẹnị ori afịrịmẹnjịapụ ḅalafama; anị kẹ gotẹ ọkọ mịẹ ye ini mẹẹ, “Ḍikii, tụḅọ mẹ paa ḍumo wararị sakị, wa ẹkwẹn ọ̀ pịrịm, kụma ọ̀ wa poki-a, anị ọkụma wa tọ-ḅara kẹ inetẹ ḍuko ọ̀ pịrị ḅẹ tụḅọ mẹ fịị tẹ? Ori inetẹ ye kẹ amịna ḅụụ lama ḅa.”

¹⁹ Kụma Devidi ori afịrịmẹnjịapụ ḅeri-ḅio ḅeri-ḅio ẹkwẹn-ẹkwẹn gbolomarị ye ẹrị tẹso, ọ̀ nwẹnị tọnma nimi mịnẹ tụḅọ mẹ fịị tẹẹ, ọ̀ nwẹnị ori afịrịmẹnjịapụ ma gbela, “tụḅọ mẹ fịị tẹ?” Ịn nwẹnị pakịrị, “Inn ọ̀ fịị tẹẹ”

²⁰ Anịtẹso Devidi nwẹnị kiri mẹ ḅio saakị tẹ minji ḅiri, tẹ olo kẹ amịna oju ọmbị; tẹ ori akapa ḍima, tẹ nwẹnị mẹnjị KỊNỊNYANAḄỌ ḅe warị ḅio sọ-mu, tẹ sunsin; anịtẹrẹmẹ ò so ò soku-ḅẹ warị mum; ò fịye ḅii tẹso, in fịye kẹ ḅo ọ̀ tọrọkọ gbanam, tẹ ọ̀ nwẹnị fị.

²¹ Anịtẹso ori afịrịmẹnjịapụ nwẹnị ọ̀ ḅẹẹ, “Ị́ nwẹn mịẹ ye mẹ anie tiye? Ị́ tụḅọ mẹ gotẹ ḅuru-ịmọ tẹ tẹmẹ-la ḅara kẹ owum tụḅọ mẹ ḍumo wararị sakị ḅụ, kụma tụḅọ mẹ fịị tẹso ọkụma, ị́ saakị tẹ fịye fịm.”

²² Ọ̀ nwẹnị ịn pakịrị, “Tụḅọ mẹ paa ḍumo wararị sakị, à ḅuru-ịmọ, tẹ tẹmẹ-la ḅara kẹ owum anị kẹ gotẹ ọkọ mịẹ ye, yẹrị mẹẹ, ‘Tụḅọ nimi, KỊNỊNYANAḄỌ ḅe ḍiki-ḅụụjịrị nyana ị̀ pịrị tẹ tụḅọ mẹ ḍumoma ḅarị ḅoto?’

²³ Kụma mịọkụ tụḅọ mẹ fịị tẹ ḅẹẹ-sakị, à tiegotẹ ḅuru-ịmọ na-iḅi? Àrị inetẹ siin ọ̀ pịkịma-ḅo ḅẹ? Yẹrị mie ò ḍọkụma-mu ḅarịye, kụma ori ḅarị pịkịma ị̀ ḍọkụma-ḅo ḅịa.”

Ịn Sọlọmọnị Iyim

²⁴ Anịtẹso Devidi ọ̀ ta Batisẹba ḅiokpọmam, tẹ mẹnjị-so á ḍọkụma-mu, tẹ árị na gbolomam; tẹ á gbọrụ owiḅọtụḅọ iyim, tẹ ọ̀ nwẹnị Sọlọmọnị kẹ ẹrẹ kẹ ò korom. KỊNỊNYANAḄỌ ḅe nwẹnị ọ̀ ḅẹlẹma,

²⁵ tẹ Netanị ịkịankoroḅọ ḅe ḅụụ ḅụ oku kẹ ò fịrịma anieḅụ ọ̀ Jedidaya kẹ ẹrẹ kẹ ọ̀ sịnm, gbala KỊNỊNYANAḄỌ ḅe ọ̀ ḅẹlẹmam.

Devidi Raba Ọkịm

²⁶ Mịọkụ Johabụ Amọnị ḅẹ apụ ma ḅụ Raba na owu sọm, tẹ amadapụ opu ama mẹ ọkịm.

²⁷ Johabụ nwẹnị oku-mẹnjịapụ kẹ Devidi fịrịma, tẹ ḅẹẹ “À Raba na owu sọ tẹẹ; anie sikima, minji simearị opu ama mẹ arị ọkị tẹẹ.

²⁸ Anịẹrẹsị mịọkụ tomi ma ḅụ kirikọn-apụ ma kobiri gboloma, tẹ owu kẹ ḅarana opu ama mẹ paka tẹ anị ọkịị; anieofori à ḅofa opu ama mẹ ọkị, tẹ anị ị́ ẹrẹ go.”

²⁹ Anieḅụ Devidi tomi mamgba kobiri gboloma, tẹ Raba mum, tẹ owu kẹ anị paka tẹ anị ọkịm

³⁰ Devidi nwẹnị Mịlịkọnị, Amọnị ḅẹ oru-tamụnọ, ịna amadaḅọ ḅe sịḅị ḅụ golu-golu ama-da sun mẹ siin ọkị; anị ḅẹ iku anie golu kpo sọnọma ẹndẹ, oyia asi finji, anịsakị anị ḅio ḅụụ ḅụ yela ḍụḅarị gbọrụ pakịrị simem; tẹ ịn nwẹnị anị kẹ Devidi sịḅị sure. Ori opu ama mẹ ḅio ọmụ mẹ ḅio ịn fọịn aị ma ọkị-ḅom, ḅẹlẹma gburo-gburo lamam.

³¹ Ọ̀ nwẹnị tomi ma tẹ anị ḅio sime apụ ma ọkị-ḅo tẹịn kẹ fụkụ-fụkụma na, ikulele kiri-sokuye na, ikulele akumbu na kụrọ kọrịnama ḅụ suu, tẹ ịn mịẹ tẹ ịn biriki tẹmẹ anga ma ḅụ sime tẹ lịlịm. Mị ḅara mie ọ̀ kẹ Amọnị ḅẹ apụ ma opu ama mamgba mịẹ ḅara. Anịtẹrẹmẹ Devidi na tomi mamgba na pịkịma Jeruselemu mum.