2 Samụẹlị 11 - FỊAFỊA BAỊBỤLỤ

Devidi Na, Batisẹba Na

¹ Kụra mẹ ḅẹ kala fẹngụ sakị ḅụ, amadapụ paka-mu owu sọ-sọ sakị mẹ, Devidi ori afịrịmẹnjịapụ kẹ Johabụ ḅụ sụam, tẹ ori na, Izirẹlị mẹmgba na, fịrịmam; tẹ ini Amọnị ḅẹ apụ ma ama ma gbaịn-koro tẹ ye simam; tẹ Raba ikelema-koro, tẹ owu pakam. Kụma Devidi Jeruselemu ḅụ simem.

² Ene-ogbo ḅọrọ lama tẹ gbọrụ ene ḅụ, Devidi ọ̀ nangwọtẹ ngada ọgọnọ saakị, tẹ amadaḅọ warị isun mẹ ọgọnọ mẹnjịarị ogbo, ọ̀ nwẹnị isun mẹ ọgọnọ sime tẹ ḍiki tẹ minji ḅiriarị gbọrụ ẹrẹḅọ ẹrị, anịsakị ẹrẹḅọ ma iḅi lama wararị

³ Devidi nwẹnị fịrịma mu tẹ ẹrẹḅọ ma gbolomaye gbela. Gbọrụḅọ nwẹnị ḅẹẹ, “Mie Batisẹba, Ẹlịyamụ ẹrẹḅọtụḅọ, Yuraya, Hitahiti ḅọ ḅẹ ta ma árị-a?”

⁴ Anieḅụ Devidi nwẹnị fịrịmẹnjịapụ fịrịma mu arị ọkị-ḅo, tẹ arị ọ̀ ḍọkụma-ḅom, tẹ ọ̀ nwẹnị árị na gboloma. (Mịọkụ á so ẹrị tẹ paa warị sọ tẹ á ḅụụ mịẹ fịafịamarị). Anịtẹso á nwẹnị pịkịma-so á warị mu.

⁵ Tẹ ẹrẹḅọ ma sime kọnm; tẹ á nwẹnị fịrịma mu ḍuko Devidi pịrị, “À sime kọn tẹẹ.”

⁶ Anieḅụ Devidi nwẹnị oku kẹ Johabụ fịrịma, “Yuraya, Hitahiti ḅọ ḅe kẹ ị́ fị̀rịmaa.” Tẹ Johabụ nwẹnị Yuraya kẹ Devidi fịrịma.

⁷ Yuraya ọ̀ ḍọkụma-ḅo tẹso, Devidi nwẹnị Johabụ mịẹ sime-ḅara na, tomi ma kẹ ye mịẹ ḅara na, ọmụ mẹ lolo ma-muarị ḅara na kẹ ò gbela,

⁸ Anịtẹso Devidi nwẹnị Yuraya ḅẹẹ, “Ideri-so ị́ warị muu, tẹ ị́ aḅụọ-suku sịkịrịị.” Tẹ Yuraya amadaḅọ ḅe warị ḅụ mẹnjị pakam, tẹ amadaḅọ ḅe ḅara ḅẹ ḍie pịrịye nwẹnị ò pono mu.

⁹ Kụma Yuraya amadaḅọ ḅe ḅọkọ ḅụ ọ̀ nyanaḅọ ḅe afịrịmẹnjịapụ mamgba na sọ tẹ monom, tẹ ideri-so ọ̀ warị mu-a.

¹⁰ Ịn “Yuraya ideri-so ọ̀ warị mu-a” mẹ ḍuko Devidi pịrị tẹso, Devidi nwẹnị Yuraya ḅẹẹ, “Í ye mu tẹ ḅo-a? Í tiegotẹ ideri-so í warị mu-a?”

¹¹ Yuraya nwẹnị Devidi pakịrị, “Ọḅọkụ-Igbe mẹ na, Izirẹlị na, Juda na, igurugu awarị ḅio emi, anịsakị Johabụ ị̀ nyanaḅọ ḅe na, ị̀ nyanaḅọ ḅe afịrịmẹnjịapụ ma na pịkị piri-ḅio kobiri sime wararị, yẹrị rẹ nwẹnị tọ-ḅara kẹ so ị̀ warị mu, tẹ fị-na-ḅuu-na, tẹ ị̀ ta na mono sime ḅẹ? Í ḍumo sime wararị tẹ ị́ tẹmẹ ḍumo wararị ogbo, miemẹ à mịẹ ḅịa.”

¹² Anịtẹso Devidi nwẹnị Yuraya ḅẹẹ, “Mịmgba mẹ sọ kẹ mịanga simee, anịsakị ḅaa ḅụ àrị ị́ wẹrịso tẹ í so ḅa.” Anieḅụ Yuraya anị ene mẹ na, anị palị ene mẹ na kẹ Jeruselemu ḅụ simem.

¹³ Devidi nwẹnị ọ̀ sịn, tẹ ọ̀ nwẹnị ò sime anga ḅụ fịye fị, tẹ iru ḅuu, anie mịẹ tẹ ori ọ̀ mịẹ tẹ ori iru ḅuu tọrụ-ḅaamam; tẹ ḅoḅiri-so ḅụ ọ̀ nwẹnị paka-so mu ọ̀ nangwọtẹ ngada ọgọnọ ọ̀ nyanaḅọ afịrịmẹnjịapụ ma na mono sime, kụma ori ideri-so ọ̀ warị mu-a.

¹⁴ Ene-ḅaa ḅẹ dede-ḅio ḅụ, Devidi nwẹnị ḍiri kẹẹ tẹ anị kẹ Yuraya ḅara ḅụ Johabụ fịrịma.

¹⁵ Ḍiri mẹ ḅio ọ̀ kẹẹm, “Yuraya kẹ kụrọ-tẹịn owu-sọarị anga ḅẹ fụḅara ogbo ḅụ koromaa, tẹ ọ̀ ḅụụ ḅụ ọḅụ daa, mịẹ tẹ ini inetẹ ò fomu-gbin tẹ ọ̀ fịị ḅẹ ḅara.”

¹⁶ Tẹ Johabụ opu ama mẹ ikelema-koro tẹ owu pakarị ogbo, ọ̀ nwẹnị Yuraya kẹ ò nimim ḅiokpọma kụrọma owu-sọarị apụ sime anga ḅụ koroma.

¹⁷ Opu ama mẹ ḅẹ owiapụ ma paka-ḅom, tẹ Johabụ na owu sọm; tẹ Devidi afịrịmẹnjịapụ ma ḅẹ ja apụ ḅịkị fịịm. Yuraya Hitahiti ḅọ ḅe sọ fịịm.

¹⁸ Anịtẹso Johabụ fịrịma tẹ owu mẹ gbolomaye ḅụ mịẹ aị mamgba ḍuko Devidi pịrịm;

¹⁹ tẹ ọ̀ nwẹnị oku-mẹnjịḅọ ḅe toluma, “Í owu mẹ gbolomaye ye ḅụ mịẹ aị, mamgba ḍuko-ḍuko amadaḅọ ḅe pịrị fama tẹso,

²⁰ tẹrẹmẹ, amadaḅọ ḅe ịganị nwẹnị saakị, tẹ ọ̀ nwẹnị, ‘Ó tiegotẹ ọkọ kẹ opu ama mẹ kpeki tẹ owu sọ ḅẹ mu? Ó nimi-a mịnẹ ini onu mẹ ḅụ sime tẹ okoro-ḍiein kẹ ọ́ tẹịn ḅẹ?

²¹ Tụḅọ Abimẹlẹkị, Jerubẹsẹtị owiḅọtụḅọ ḅe ḅaa? Gbọrụ ẹrẹḅọ mie Tẹbẹzi ḅụ onu mẹ ḅụ sime tẹ ọgọnọ ḅẹ ye gbẹẹ opu ḍụḅarị siin ori ọgọnọ koroma ye anị-a? Ó tiegotẹ ọkọ kẹ mu onu mẹ na kpeki?’, kẹ í gbela-gbela anịrẹ ị́ ḅẹẹ ḅa, ‘Ị́ fịrịmẹnjịḅọ Yuraya, Hitahiti ḅọ ḅe sọ ọ̀ fịị tẹẹ.’ ”

²² Anieḅụ oku-mẹnjịḅọ ḅe mum, tẹ Devidi ḍọkụma-ḅo tẹ Johabụ ọ̀ fịrịmam ḍuko Devidi pịrị ḅẹ aị mamgba ḍukom.

²³ Oku-mẹnjịḅọ ḅe Devidi ḅẹẹm, “Tomi ma ḅara wamịna ḅara nẹngịm, tẹ paka-ḅo wa da-pakam pịrị mẹ ḅio; kụma wa ịn dee-pịkị mu mẹnjị ogigo-ḅọkọ mẹ sọ anga mẹ lam.

²⁴ Anịtẹso okoro-ḍiein tẹịn apụ ma nwẹnị onu mẹ ḅụ sime tẹ wa tẹịn, tẹ amadaḅọ ḅe afịrịmẹnjịapụ ma ḅẹ ja apụ fịị tẹẹ, anịsakị ị́ fịrịmẹnjịḅọ Yuraya Hitahiti ḅọ ḅe sọ fịị tẹẹ.”

²⁵ Devidi nwẹnị oku-mẹnjịḅọ ḅe ḅẹẹ, “Mị-ḅara mie ị́ kẹ Johabụ ḅẹẹ ḅarị ḅara, ‘Ḍụkụ tẹ mị ḅẹrẹ mẹ ị́ ḅụụ-fụkama ma, kẹ gotẹ ọkọ ḅẹẹarị, okologie mẹ mịọkụ gbọrụḅọ guluguluma ḅa, tẹ pịkị jen sakị jụmọ guluguluma ḅa; ịwọ ịnyọ kẹ owu kẹ opu ama mẹ paka ḅụ sụa-a, tẹ anị ọkịị’. Anịsakị ò ḅiokpọmaa.”

²⁶ Yuraya ta Batisẹba naam mịnẹ á di Yuraya fịị tẹ ḅẹ ye ḅụ, árị á di ḍum.

²⁷ Kururu sakị mẹ ḅọrọ tẹso, Devidi fịrịma tẹ arị ọkị ọ̀ warị ḅom, tẹ á ḅo ọ̀ ta sọm, tẹ gbọrụ owiḅọtụḅọ iyi ọ̀ pịrịm. Kụma ye mẹ tẹ Devidi mịẹ ye mẹ KỊNỊNYANAḄỌ ḅo ḅụụ-ḅẹlẹ-a.