2 Samụẹlị 10 - FỊAFỊA BAỊBỤLỤ

Devidi Amọnị Ḅẹ Apụ Ma Na, Siriya Ḅẹ Apụ Ma Na Nẹngịmam

¹ Miemẹ ḅọrọ tẹso, Amọnị ḅẹ apụ ma amadaḅọ ḅe fịịm, tẹ ori owiḅọtụḅọ Hanụnụ nwẹnị ò kiri ọkị tẹ ama mẹ da.

² Devidi nwẹnị ḅẹẹ, “À sịḅị-tuu ḅara kẹ Hanụnụ, Nahasi owiḅọtụḅọ ḅe na mịẹ ḅa, ọ̀ ḍa wẹrịtẹ sịḅị-tuu ḅara kẹ ị̀ na mịẹ ḅara.” Anieḅụ Devidi nwẹnị ọ̀ ḍa gbolomaye ḅụ ò ḅiokpọma ḅẹ ḅara kẹ ori afịrịmẹnjịapụ fịrịma. Tẹ Devidi afịrịmẹnjịapụ Amọnị ḅẹ apụ ma ama mẹ ḅio ḅom.

³ Kụma Amọnị ḅẹ sịḅịdapụ ma nwẹnị ịna nyanaḅọ Hanụnụ ḅẹẹ, “Í ḅiotọn-arị mịnẹ Devidi ḅiokpọma apụ kẹ ị́ fịrịma tẹ ẹrẹsị, ọ̀ kụn kẹ ị́ ḍa pịrịarị, aro? Gbala-gbala! Opu ama mẹ ẹnyẹ, tẹ anị ḍọkị nimi, tẹ anị fama ḅẹ ḅara mie ò gotẹ ori afịrịmẹnjịapụ ma kẹ ị́ fịrịma yee.”

⁴ Anieḅụ Hanụnụ, Devidi afịrịmẹnjịapụ ma ọkịm, tẹ ịna aḅụụ gbọrụḅọ-gbọrụḅọ ḅekeke ḅẹ mpọrị kẹ maa anga ḍiya ḅẹ gbọrụ anga sẹịn-sẹịn siinm, tẹ ịna akonju ḅụ ịna vọrọrọ-akapa ma ḅụ ogboku kịrị-kịrị siinm, tẹ ịn fịrịma tẹ ịn som.

⁵ Ini anị ḍuko Devidi pịrị tẹso, ọ̀ nwẹnị ịn mu ini na bịama ḅẹ ḅara kẹ kịnị kẹ ịn fịrịma, owiapụ ma opu ḅara kẹ Ḅụụ-jịrịarị ẹrẹsị. Tẹ amadaḅọ ḅe nwẹnị ịn ḅẹẹ, “Ó Jeriko ḅụ sime nwenii ọmịna ḅekeke ḅẹ mpọrị ma paka-ḅo tẹrẹmẹ ọ́ pịkịma-ḅo.”

⁶ Amọnị ḅẹ apụ ma ẹrịm mịnẹ ịn ḅo Devidi tọrụ ịnọ ḅara sime tẹso, Amọnị ḅẹ apụ ma nwẹnị fịrịma mu Bẹtị-rehobu ḅẹ Siriya ḅẹ apụ ma na, Zoba ḅẹ Siriya ḅẹ apụ ma na ḅụ ḅụọ kẹ mẹnjịarị ọmụgbin-apụ kịnị maa apuku, oyi ẹndẹ finji (20,000), ọkọ, pịkị Mahaka ḅẹ amadaḅọ ḅara kịnị maa ẹndẹ, oyia asi finji (1,000) na, Tọbụ ḅẹ owiapụ ḅụ kịnị puku, oyi ẹndẹ finji (12,000) na kẹ sụa ọkọ.

⁷ Devidi anị gbolomaye naa tẹso, ọ̀ nwẹnị Johabụ na, ọmụ-ogbo mamgba ḅụ kụrọ-nyanatẹ opu apụ ma fịrịma mu.

⁸ Amọnị ḅẹ apụ ma nwẹnị paka-ḅo, tẹ mẹnjị ịna opu ama mẹ ḅẹ ogigo-ḅọkọ mẹ sọarị anga ḅụ ḅụụ tẹlẹma owu mẹ pịrị; tẹ Zoba na, Rehobu na ḅẹ Siriya ḅẹ apụ ma na Tọbụ na, Mahaka ḅẹ owiapụ ma na nwẹnị ama na kpeki anga ḅụ ịna aḅụụ ḅelema-ḅelema tẹ simem.

⁹ Johabụ ẹrịm mịnẹ ọḅụ-na-kuḅu-na ḅụ owu mẹ tẹlẹma ori ẹngbẹsẹ wararị tẹso, ọ̀ nwẹnị Izirẹlị ḅẹ owiapụ ma ḅụ sẹlẹma paka-ḅo apụ ma ḅẹ jen-apụ ọkị, tẹ ịn tẹlẹma Siriya ḅẹ apụ ma ẹngbẹsẹ;

¹⁰ ọ̀ nwẹnị owiapụ ma ḅẹ kirikọn-apụ ma kẹ ori iyimbere Abisahị ḅara sụa, tẹ ori nwẹnị ịn tẹlẹma Amọnị ḅẹ apụ ma da-paka pịrị.

¹¹ Ọ̀ nwẹnị ḅẹẹ, “Siriya ḅẹ apụ ma ị̀ ḅụụ kụrọ ḅaka ḅaka, anịrẹ ị́ ḅarasụa ị̀ pịrị ḅa, kụma Amọnị ḅẹ apụ ma ị́ ḅụụ kụrọ ḅaka ḅaka, anịrẹ à ḅo ḅarasụa ị́ pịrị ḅa.

¹² Iḅi ḅiokpọ nyana-a, tẹ yee wa owiapụ ḅara kẹ owu sọ wamịna atomi na, wamịna Tamụnọ opu ama ma na pịrị; anịsakị yee KỊNỊNYANAḄỌ ḅe ḍiki tẹ ori na iḅi ḅara, iḅi ḅara mịẹ.”

¹³ Anieḅụ Johabụ na tomi ma tẹ ori na sime apụ ma na Siriya ḅẹ apụ ma na owu sọ ḅẹ sọma kpekim, tẹ ini ọ̀ tọrọkọ ḍumo-mangị kọnm.

¹⁴ Amọnị ḅẹ apụ ma ẹrịm mịnẹ Siriya ḅẹ apụ ma ḍumo-mangị kọnm ḅẹ ye ḅụ, ini sọ nwẹnị anị ḅara kẹ Abisahị tọrọkọ ḍumo-mangị kọn, tẹ opu ama mẹ ḅio sọ-mu. Anịtẹso Johabụ nwẹnị Amọnị ḅẹ apụ ma na owu sọ mẹ ḅụ pịkịma-so; tẹ Jeruselemu ḅo

¹⁵ Kụma Siriya ḅẹ apụ ma ẹrịm mịnẹ Izirẹlịapụ ma ịn nẹngịma tẹ ḅẹ ye ḅụ ịn nwẹnị ịna aḅụụ kobiri gboloma.

¹⁶ Adadeza nwẹnị fịrịma tẹ Siriya ḅẹ apụ ma tẹ Yuferetisi Tọrụ mẹ ọgọnọ-jụ sime apụ ma pakama-ḅo, tẹ ịn nwẹnị Sobakị, Adadeza ọmụ-ogbo mẹ ḅẹ ḅẹrẹtọnḅọ ḅụụ sọ ori ịna sịḅịdaḅọ, tẹ ịn nwẹnị Ẹlamụ ḅo.

¹⁷ Ini anị ḍuko Devidi pịrị tẹso, ọ̀ nwẹnị Izirẹlị mẹmgba kobiri, tẹ Jodanị mẹ saḅa, tẹ Ẹlamụ ḅo, Siriya ḅẹ apụ ma nwẹnị ịna aḅụụ tẹlẹma Devidi pịrị, tẹ ori na owu sọ.

¹⁸ Siriya ḅẹ apụ ma Izirẹlị tọrọkọ ḍumo mangị kọnm, tẹ Devidi Siriya ḅẹ apụ ma ḅụ kirimẹnjị-ọmụarụ ẹndẹ jeia si finji (700) ḅẹ owiapụ na, asụ-dọkụ-ọmụapụ kịnị sọnọ apuku (40,000) na, ḅaam, tẹ ye kẹ Sobakị ịna ọmụ-ogbo mẹ ḅẹ ḅẹrẹtọnḅọ ḅe lamam, anie mịẹ tẹ ori anịjụ fịịm.

¹⁹ Amadapụ mamgba tẹ fịrịmẹnjị Adadeza pịrị sime apụ ma ẹrịm mịnẹ Izirẹlị ịn nẹngịma tẹ ḅẹ ye ḅụ, ịn nwẹnị Izirẹlị na ḅẹrẹ fama, tẹ ịna suku-ḅio sime Anieḅụ Siriya ḅẹ apụ ma ḅalafaam, tẹ ḅarị jen-maaịn kẹ ḅarasụa Amọnị ḅẹ apụ ma pịrị-a.