2 Pita 3 - FỊAFỊA BAỊBỤLỤ

KỊNỊNYANAḄỌ Ḅe Mininim Ò Ḅo Ḅa

¹ Ị̀ iḅi ikiapụ, miemẹ anie mịọkụ maaịn karama ḍiri tẹ à kẹẹ tẹ kẹ ọ́ fịrịmarị ye. Mịna maa aḍiri ma ḅio, à kụrọma ọmịna aḅioḅẹngbọ ḅụ iḅi akuroma jike saakịma ḅẹ ḅara ḍọkịm, mịna aị ma kẹ ọmịna ḅiokoroma ḅụ.

² À ḅiiarị mịnẹ ọmịnị, iḅere-iḅerea kụra-ḅio, fịafịa ịkịankoroapụ ma ḍuko tẹ aị ma kẹ ḅiokoroma, na KỊNỊNYANAḄỌ, pịkị Ḅọrọmaḅọ ḅe tọn koroma ye mẹ, tẹ ọmịna fịrịmẹnjịapụ ma da-saḅama ọ́ pịrị tẹ ye mẹ na.

³ Arịmgba ḅụ tarị ye, ó nimii mịnẹ mịna kunoma ene ma ḅụ, ja atomi tẹ, amịna meni-oju sọlịmarị aị ḅẹrẹtọn pịrịarị apụ, tolu-sịẹ ḅa. Ini ó kombo ḅa

⁴ tẹ gbela ḅa, “Ọ̀ kọkọ minini mịnẹ ò ḅo ḅa, ori ọkọ ḅẹẹ-a? Ọ̀ tọ-anga emi? Wamịna aḍapụ ma fịị ḅọrọ tẹ, kụma ye goyegoye paa tomikiri mẹ tẹmẹ kụra-ḅio anị sime ḅara simearị!”

⁵ In tọrụ-gelegele, mịẹ tẹ ye mẹ, saakị anga pịrị tẹ, alatẹ sakị kụra-ḅio Tamụnọ tọn tẹ So ma na Kiri mẹ na tẹmẹm. Minji ḅio na minji mẹ na ḅụ kiri mẹ mịẹm,

⁶ anịsakị pịkị minji ḅụ, anie opu minji mẹ ḅụ, mie elemu tomikiri mẹ ḅọrọ tẹ gulugulu fa ye.

⁷ Kụma mịọkụ simearị So ma na Kiri mẹ na Tamụnọ tọn gbọrụ ḅara mẹ ḅụ mie arị simearị ye, mịẹtẹ kunoma ḅụ fịnị arị guluguluma fama ḅarị ḅara. Ini arị kẹ ịn Tamụnọ nimi-a atomi ma kọntẹ ịn ḅaa guluguluma ḅarị ene mẹ wẹrịmarị.

⁸ Kụma, ì iḅi ikiapụ, ọ́ mị gberie mẹ kẹ ḅioḅọrọma ma! KỊNỊNYANAḄỌ ḅe tọrọkọ gbọrụ ene na kụra maa ẹndẹ oyia asi finji na ḅụ kịrị ofori; ọ̀ ḅụụ ḅụ maaịn ma gberie.

⁹ KỊNỊNYANAḄỌ ḅe ò minini ye mịẹ ḅụ ọ̀ sakị fama fama-a, ja apụ kuromarị mịnẹ ọ̀ sakị famarị ḅara mẹ. Anie nakara, ọmịna ḅụ, ò ye-inemarị, ò ḅii-a gbọrụḅọ-sọ fịị gulugulu ẹrẹsị, kụma ò ḅiiarị inweni-mgba ịna asi ḅụ pịkị.

¹⁰ Kụma furuḅọ ḅo ḅara mie KỊNỊNYANAḄỌ ḅe Ene mẹ ḅo ḅarị ḅara. Anị Ene mẹ ḅụ So ma ịmaịn-faa ḅa, ḅeri-iningima ḅẹ ḅara ḅẹ fieye ḅụ, tẹ So-tọrụ simearị aị mamgba dọkị gulugulu-faa ḅa, tẹ kiri mẹ na anị ḅio sime ye goyegoye na ịmaịn-faa ḅa.

¹¹ Mịna aị mamgba mị ḅọkọ ḅụ ḅọrọ tẹ gulugulu fama ḅa ḅẹ sakị, ọ́ tọ-ḅara sime atomi sọ na-iḅi? Ọmịna aḍumo ma mịẹ fịafịama tẹ saakị Tamụnọ pịrị tẹ aị sọ,

¹² anie ó sime tẹ Tamụnọ Ene mẹ koruarị tẹ ọmịnị ọmịnị inetẹ ḅara, inetẹ ḅara mịẹ tẹ anị sarasara ḅarị ene mẹ — So ma dọkị fa tẹ gulugulu ḅa, tẹ So-tọrụ sime aị ma ọfịrị mẹ ḅụ sanị ḅa.

¹³ Kụma wamịnị wa Tamụnọ minini tẹ ye mẹ koruarị: ịwọ So ma na ịwọ Kiri mẹ na, karakara mịẹ sime ḅarị anga mẹ.

¹⁴ Anie ḅụ, ì ikiapụ, ọmịnị anị Ene mẹ koruarị ḅara ḅụ, ọmịnị, ọmịnị inetẹ ḅara, inetẹ ḅara mịẹ tẹ kpaịntẹ, ḅẹẹ, ḅẹẹ ye ofori ḍumo kọn Tamụnọ tọrọkọ, tẹ ori na dein ḅụ simee.

¹⁵ Ọ́ Wanyanaḅọ ḅe ye-inema mẹ ḍiki, anie ọ́ ḅọrọma ḅẹ gotẹ ọ̀ sara ọ́ pịrịarị ḍigi mẹ, wamịna iyimbere Pọlụ kẹ ḍiri kẹẹ ọ́ fịrịma ḅara ḅụ, Tamụnọ kẹ ọ̀ pịrị ye-nimi ḅụ.

¹⁶ Ọ̀ kẹẹ aḍiri mamgba ḅio mị gbọrụ ye mẹ mie ọ̀ kẹ ḅẹrẹ-sịḅị sọma tẹ kẹẹarị ye. Ori aḍiri ma ḅio ḅụụ-fụkama aị emi, anie gberie-sọ nimi-a apụ ma tẹ ḅụọ gbọrụ anga sịẹ sịẹ-a apụ iruo ḅara kẹ ḍuko finjiarị aị ma, anie ịn kẹ Fịafịa Ḍiri mẹ ḅio paka-ḅo aị ma ḅẹ jaị sọ na mịẹarị ḅara. Mie ḅụ in gulugulu dogi-ḅo ịna ḅụụ pịrịarị.

¹⁷ Kụma ọmịnị, ì ikiapụ ma, miemẹ ó nimi kụra-ḅio iḅerea. Ọkọẹrẹsị, ọmịnị ẹbịị, mịẹtẹ ḅiotọn aị, tọn aị mịẹarị atomi ḅarị kura-a aị ḅụ ọ́ mịẹtẹ ọmịnị ọ́ sịẹ wararị karakara kiri mẹ ḅụ ḅịkị so ḅịa ḅara.

¹⁸ Kụma ọ́ paa ḍiki-ḅụụjịrị na wa Nyanaḅọ pịkị wa Ḅọrọmaḅọ Jizọsị Kịrayịsị nimi mẹ na ḅụ lolo tọrọkọ, tọrọkọ mu. Ebube sime ọ̀ pịrịị, mịọkụ mu ḅẹẹ-sakị ḅẹẹ-sakị la! Amẹnị.