2 Pita 2 - FỊAFỊA BAỊBỤLỤ

Iruo Ye-tolumapụ

¹ Elemu sakị iruo ịkịankoro apụ tomi ma ogboku paka gbọrụ ḅara mẹ, mie ọmịna ogboku sọ iruo ye-tolumapụ paka ḅarị ḅara. Ye gala-galama na kura-a toluma aị na mie in dogi-ḅo ḅarịye, tẹ pịkị ịn pakịrị ḅo Sịḅịdaḅọ ḅe sọ pịkị ḅa, anị ḅara ḅụ ịn bẹkẹ-ḅara-kẹ in ḅaa guluguluma ḅarị ḅụụ-fụka dogi-ḅo amịna ọgọnọ gbana ḅa.

² Anịsọ tọnwa-apụ ịna si ḍumo mẹ ḍukamẹnjị ḅa; tẹ ịn mịẹarị aị ma gotẹ osi apụ karakara mẹ ḅẹ Etela mẹ kẹ siye fie ḅa.

³ Ịna opu pọkọ-ḅẹngbọ ḅụ mịna iruo ye-tolumapụ ma, ini ḅarana kuroma ḅo ịlụkụ ma gbaa-gbaa ọ́ pịrị tẹ ọmịna ḅụ sọye fị ḅa. Alatẹ sakị kụra-ḅio ịn kọn ḅarị Ḅẹrẹkọnḅọ ḅe tẹlẹma tẹ emi, tẹ ịn Ḅaa guluguluma ḅarị ḅọ ḅe sọ mono-a tẹ ẹbịarị.

⁴ Enjẹlị tẹ si mịẹ apụ ma sọ, Tamụnọ papaa ḅara kẹ ịn wẹrịso-a, kụma ori ịn kẹ ẹlị ḅio, ikoli kẹ ini ịkasị koromam, kanakana ḅio, tẹ ini anịanga sime tẹ Ḅẹrẹkọn Ene mẹ koruarị.

⁵ Elemu sakị ḅẹ tomikiri mẹ sọ Tamụnọ papaa ḅara kẹ anị wẹrịso-a, kụma ori opu minji kẹ ḅo Tamụnọ nimi-a atomi ma tomikiri mẹ gbaịnm; ọ̀ ḅọrọma apụ anie Noha, tẹ karakara mịẹ ḍuko ḅọ ḅe na, ja sọnọma apụ na ngẹrị.

⁶ Tamụnọ ḅẹrẹ-ḅarasii pẹlẹ Sọdọmụ na Gomora na ama ma ọgọnọ gbana tẹ fịnị kẹ ịn ḅaa gulugulumam, tẹ ịn kẹ Tamụnọ nimi-a atomi ḅụ paka ḅarịye ḅẹ elekima sọmam.

⁷ Kụma ọ̀ Lọtị pụkọ-pakamaḅom, anie iḅi tomḅọ tẹ oloko bala-a atomi ma si ḍumo mẹ ḅụụ ḅụ si lama ḅọ ḅe.

⁸ Anị iḅi tomḅọ ḅe ịna ogboku anga tẹ ene-ḅaaene-ḅaaene ịna si amịẹaị ma ẹrị tẹ pịkị naarị ye mẹ ó ḅioḅẹngbọ fụkama lamam.

⁹ Tẹ mị-ḅara ḅụ KỊNỊNYANAḄỌ ḅe ọ̀ kẹ Tamụnọ nimi atomi ma adaa-ḍiki ma ḅụ ịn pụkọ-pakamaḅo ḅẹ ḅara nimi wararị, pịkị ọ̀ kẹ si-sịḅịḅio-sụapụ kẹ fomu-ḅara wẹrịma mu Ḅẹrẹkọn Ene mẹ la ḅẹ ḅara sọ nimi wararị,

¹⁰ karakaramatẹ, ini ma tẹ Tamụnọ ḅẹrẹtọn ịn pịrị ma ḅẹẹ tẹ meni-oju mẹ gotẹ lẹlẹarị sịḅị-ngụngụnmarị aị ma ḍukamẹnjịarị apụ ma. Mịna iruo ye-tolumapụ ma, in ḅiokpọma tẹ ḅịḅị kẹ opu, aị opu, aị ḍukoarị, ọgọnọ simearị ebube nyana apụ ma sọ ini ịn mangịma-a: anie nakara, ini ịn mịẹ-simarị.

¹¹ Enjẹlị apụ ma ḅioju, tẹ kpọma kụrọ na opu na nyana mịna iruo ye-tolumapụ ma nẹngị lama wararị apụ ma sọ, mịẹ-sima aị kẹ ye kẹ ịna sịḅị sẹịn-a KỊNỊNYANAḄỌ ḅe tọrọkọ.

¹² Kụma mịna tomi ma, ịna ḅụụ ḅio ye kẹ in sukuruma ḅara, sukuruma ḅara mie in ḍiki mịẹarị ye, gbala piri-ḅio-ḅẹ anama tẹ iyi tẹ tomi kun tẹ ḅaa ḅẹ aị sime-ḅara; ini fiearị ye nimi-a ye mẹ koro kụma, in mịẹ-sima kẹ kamụ pakamam. Piri-ḅio-ḅẹ anama ḅaa guluguluma ḅara ịn nwẹn kẹ ịn ḅaa guluguluma ḅa,

¹³ tẹ ịn kẹ kịnị ẹrịmatẹ tọrụsiẹrị mẹ mie ini sọ kẹ gbẹẹ-ye sọma tẹ ẹrị ḅarịye. Ịna tọrụ-ḅẹlẹ simearị anga anie, ene ḅaka fịafịa ogbo ḅụ ịna oju ḅẹ meni mẹ ḅiiarị in mịẹ ḅẹ aị ma mịẹ furo ḅinma; ịn ḅụụ-jịrịma ye na ḅụụ-sima ye na sọ ọ́ pịrị wararị, ọmịnị ini na ḅara gboloma ye fịarị ye mẹ, tẹ anị sakị mẹmgba ḅụ ịn kẹ oḅori kẹ kịnị sịn ḅẹ aị ḅẹ aḅọkọ mie ịna ḅioḅẹlẹmarị!

¹⁴ Sakị mamgba ịna atọrụngbọ jen anga ofori, si mẹnjị kọn-arị ereme ọgọnọ sikima tẹ; si mịẹ ịna apọkọ tata-a. In minini kụrọ-a apụ dogi-mu ḍiein ḅio koromarị. Ini ịna aḅioḅẹngbọ tẹlẹma tẹ kẹ opu pọkọ-ḅẹngbọ sụa ḅara wẹrịarị. Ini ma Tamụnọ wori-nume ịna ọgọnọ emi!

¹⁵ In gono-gono etela mẹ wẹrịso tẹ iri-faa tẹ; in Bẹyọ tụḅọ Balamụ sọ etela mẹ ḍuka mu tẹ, anie kura-aye mịẹ tẹ nyana ḅẹ igbigi ḅẹlẹmaḅọ ḅe,

¹⁶ tẹ ini ò si gotẹ ḍiki-ịganịḅọ ḅe. Ori asụ nwẹnị tomina pọkọ kẹ ẹkwẹn tẹ ịkịankoroḅọ ḅe mịẹ ḅẹ sịḅịḅio-kuḅua mịẹye mẹ dasịẹma.

¹⁷ Mịna atomi ma in minji fa kpalịkpalịtẹ ngụngụḅa na kịkarị ẹrẹsị fẹrụ gala-galamatẹ oḅuto ọkụ; Tamụnọ kpiti tẹịn kanakana ḅio ḅụ sime-yọ tẹlẹma ịn pịrị tẹ.

¹⁸ Nimi ofori opu ẹkwẹn, opu ẹkwẹn mie ịn kọn-arị ye, tẹ nwẹnị ịna meni-oju sọlịmarị si amịẹaị kẹ ịwọma kura-a ḍumo kọn-arị apụ ogboku ḅụ pụkọ-pakaḅoarị apụ ma ḅọrọma ḍiein ḅio suuarị.

¹⁹ Ịn ḅarana sịḅị-nyana minini tomi pịrịarị, kụma ini ma ḅioju omoni-sọ kẹ ḍumo famarị si-yemịẹ-ḅara pịrị wararị — kẹ gotẹ ọkọ ḍukoarị, tomḅọ ḅụụ-fịtẹ mḅọ nẹngịma ye goyegoye, mḅọ anị omoniḅọ sọ tẹẹ.

²⁰ Tomi nwẹnị wa Nyanaḅọ pịkị wa Ḅọrọmaḅọ Jizọsị Kịrayịsị nimi mẹ ḅụ ḅọrọ tẹ tomikiri mẹ ḅụ kịnị ḍumo gulugulumarị akụrọ ma ḅara-ḅio pụkọ-pakaḅo, tẹ arị akụrọ ma siin jen kẹ ịn nẹngịmam ḅẹḅẹ, ọkọ sime atomi ma kunoma mẹ sii tarị in sime-ḅara nẹngị tẹẹ.

²¹ Ịn gbala-gbala karakara mịẹ etela mẹ nimi-a, iḅi ini anị nimi tẹrẹmẹ ịn kẹ ịn piri fịafịa oloko mẹ ḅụ pịkị so nẹngịm.

²² Ịna ḅụụ paka ye mẹ ḍie-pakamarị mịnẹ mịna egberi ma karakaram: “Obiri pịkị mu amịna ọsụ ye mẹnịarị” na “Ịn sịkịrị fịafịamatẹ opuropo pịkị mu lịka ḅio mbelembelearị” na.