2 Paka-aị 7 - FỊAFỊA BAỊBỤLỤ

Ịn Tẹkẹ Kẹ Tamụnọ-warị Mẹ Finjim

¹ Sọlọmọnị ọ̀ tẹkẹ mẹ kọn pẹlẹ tẹso, kọrị-fịnị nwẹnị So-ḅio koro ḅo tẹ dọkịma-agba mẹ na agbamịẹ-aị ma na dọkịma fama, tẹ KỊNỊNYANAḄỌ ḅe ebube nwẹnị Tamụnọ-warị mẹ ḅio ḅin.

² KỊNỊNYANAḄỌ ḅe ebube mẹ KỊNỊNYANAḄỌ ḅe warị mẹ ḅin ḅara mẹ ẹrẹsị agbamịẹapụ ma inetẹ KỊNỊNYANAḄỌ ḅe warị mẹ ḅio sọ-mu-a.

³ Izirẹlị ḅẹ awọmẹ mamgba koro ḅo kọrị-fịnị mẹ na, KỊNỊNYANAḄỌ ḅẹ ebube Tamụnọ-warị mẹ ḅụ sime-ḅara na ẹrị tẹso, ịn nwẹnị ịna atọrụ tuu kiri pịrị tẹ warị-anga mẹ ḅụ sụa paka wararị ye mẹ ọgọnọ sunsin tẹ ịmịẹtẹ kẹ KỊNỊNYANAḄỌ ḅe ḅẹẹ tẹ ḅẹẹ, “Gbala ori iḅim ẹrẹsị, ò jike-a ḅẹlẹma mẹ sime gbamasom”

⁴ Anịtẹso amadaḅọ ḅe na, tomi mamgba na nwẹnị KỊNỊNYANAḄỌ ḅe tọrọkọ agba mịẹ.

⁵ Amadaḅọ Sọlọmọnị pootẹ-anambulo maa apuku, jei ẹndẹ finji (22,000) na, anana jei apuku (120,000) na kẹ agba mịẹm. Mị-ḅara mie amadaḅọ ḅe na, tomi mamgba na kẹ Tamụnọ warị mẹ finji ḅara.

⁶ Agbamịẹapụ ma ịna sime akiri ḅụ sịẹsimem; Livayị furo-ḅẹ-apụ ma sọ, Amadaḅọ Devidi mịẹ tẹ kẹ KỊNỊNYANAḄỌ ḅe jike-a ḅẹlẹma sime gbamasom gotẹ farị-farị ịmịẹtẹ kẹ KỊNỊNYANAḄỌ ḅe ḅẹẹ aị ma na emi — Devidi ịna fịrị-kiri ḅụ KỊNỊNYANAḄỌ ḅe tokini sakị goyegoye, ini na dama-dama anga ḅụ mie agbamịẹapụ ma sime tẹ ịna ọdụ ofuro-ofuro yee, anịsakị Izirẹlị mẹmgba saakị sịẹ wararị.

⁷ Sọlọmọnị nwẹnị KỊNỊNYANAḄỌ ḅe warị mẹ tọrọkọ sime nụngọ mẹ ḅẹ ogboku mẹ wẹrị fịafịama, anị gotẹ ọkọ mịẹ ye, anịjụ mie ọ̀ dọkịma-agba mẹ na, dein-pịrị-agba ma ḅẹ ḅẹlẹkị mẹ na kẹ agba mẹ mịẹ ye; dọkịma-agba mẹ na, mgbọlụ agba mẹ na, ḅẹlẹkị mẹ na ojo agbamịẹ-anga tẹ Sọlọmọnị nama anga mẹ ḅụ inetẹ so-a ẹrẹsị.

⁸ Anị sakị mẹ tẹ Izirẹlị mẹmgba Sọlọmọnị ḅụụ sọ tẹ ọ̀ sọnọma ḍin kẹ kopini afịaị mẹ mịẹ ye mẹ, tomina-ogbo mẹ ḅẹlẹma gburo-gburo lamam, ịn mẹnjị Hamatị muarị ḅọkọ mẹ ḅụ so mu Ijiputi ḅẹ kuroro mẹ lam.

⁹ Ninea aḍin karama ene ḅụ ịn nwẹnị deintẹ kụn pịrị ḅara kẹ kobiri; gbala ịn sọnọma aḍin kẹ agbamịẹ-anga mẹ finjim, tẹ pịkị sọnọma aḍin kẹ kopini afịaị fịm,

¹⁰ Sọnọma akalụ karama akalụ mẹ ḅẹ si tẹra aḍin finji karama ene ḅụ ò tomi ma kẹ ịna ama fịrịmam ḍereku na, KỊNỊNYANAḄỌ ḅe kẹ Devidi na, Sọlọmọnị na, ori atomi Izirẹlị na mịẹ iḅi mẹ ḅẹ ḅioḅẹlẹ ḅioḅẹngbọ ḅụ.

Tamụnọ Pịkị Siin Ọ̀ Ḅụụ Kẹ Sọlọmọnị Ḍiem

¹¹ Mị ḅara mie Sọlọmọnị kẹ KỊNỊNYANAḄỌ ḅe warị mẹ na, amadaḅọ warị mẹ na nama karama ḅara; Sọlọmọnị tọn tẹ kẹ KỊNỊNYANAḄỌ ḅe warị mẹ na, ò soku-ḅẹ warị mẹ na ḅụ mịẹ aị mamgba ọ̀ lọkọlọkọ ḅara kẹ arị kọrị famam.

¹² Anịtẹso KỊNỊNYANAḄỌ ḅe nwẹnị ḍin ḅụ ḅụụ kẹ Sọlọmọnị ḍie tẹ ọ̀ ḅẹẹ, “Àrị ị́ tẹkẹ naa tẹẹ, anịsakị à mị anga mẹ sẹlẹ-ọkị tẹẹ, agba mịẹ warị ḅara ḅụ.

¹³ À So ḅọkọ mẹ ịkasị tẹ eene ḅarị koro-a, anịanịa tọn igurube ma pịrị tẹ arị ọmịna kịrị mẹ guluguluma, anịanịa ama gbaịn obi kẹ ị̀ atomi ma ogbo ḅụụ fịrịma sakị,

¹⁴ ị̀ atomi ma tẹ ini ị̀ ẹrẹ kẹ sịn apụ ma amịna ḅụụ iderima tẹ ị̀ tẹkẹ, tẹ ì tọrụkuḅu ḍọkị, tẹ ịna si-sịḅịḅio etela ma ḅụ pịkị-pịkị, anịrẹ arị ịn naa ḅa So-ḅio, tẹ ịna si-wẹrịso tẹ ịna ama mẹ gwọ ḅa.

¹⁵ Mịọkụ ị̀ atọrụngbọ ma finji ḅa, anịsakị arị à ḅeri-tokoloma tẹ kẹ mị anga ḅụ kọọn ḅarị tẹkẹ mẹ pịrị ḅa

¹⁶ Kẹ gotẹ ọkọ ḅẹẹarị, mịọkụ à mị warị mẹ sẹlẹ-ọkị tẹ anị mịẹ fịafịama tẹ, mịẹ tẹ ị̀ ẹrẹ mẹ mị anga ḅụ sime gbamaso ḅarị ḅara, anịsakị ị̀ atọrụngbọ na, ị̀ ḅioḅẹngbọ na sakị mamgba anịjụ sime ḅa.

¹⁷ Ị́yẹrị kụma ị́ nwẹnị ị́ ḍa Devidi ị̀ tọrọkọ mẹnjị ḅara kẹ ị̀ tọrọkọ mẹnjị, à wẹrịtẹ tọn ḅara mẹmgba mịẹ, pịkị kẹẹ wararị oloko ma na, à tọn aị mamgba na kokom ḅẹḅẹ,

¹⁸ anịrẹ àrị ị́ ama-da emine mẹ mịẹ pakama ḅa, à wẹrịtẹ ị́ ḍa Devidi na ọḅọkụ fị ḅara tẹ ḅẹẹm, ‘Àrị ị́ ḅụụ ḅụ ḅẹrẹtọn Izirẹlị pịrị ḅẹ ḅọ kẹ ị́ gbarịma ḅịa.’

¹⁹ Kụma ị́ nwẹnị tọrụ pịkị jen anga da tẹ ị̀ oloko ma tẹ kẹẹ wararị aị ma na, à tọn aị ma na tẹ à kẹ ị́ tọrọkọ koroma aị ma sịkị, tẹ fịrịmẹnjị oru-atamụnọ pịrị tẹ sunsin ịn pịrị-pịrị,

²⁰ anịrẹ anị ama mẹ tẹ à kẹ ọ́ pịrị tẹ ama mẹ ḅụ arị ọ́ pẹlẹ-siin ḅa, tẹ mị warị mẹ tẹ à mịẹ fịafịama ị̀ ẹrẹ pịrị ye mẹ, arị anị wakị-nguma ḅa ị̀ tọrụ ḅụ tẹ anị kẹ egberima-ẹkwẹn na, goo ḍuko ye na sọma tomi mamgba pịrị ḅa.”

²¹ “Anịsakị mị warị mẹ tẹ saakị geletẹ ye mẹ ḅụ mẹnjị-ḅọrọ ḅọ ḅọrọ ḅọ ḅụụ-bua tẹ ḅẹẹ ḅa, ‘Tiye gotẹ KỊNỊNYANAḄỌ ḅe mị ḅara kẹ mị ama mẹ na, mị warị mẹ na mịẹ?’

²² Anịtẹrẹmẹ ịn ḅẹẹ ḅa, ‘Anị kẹ gotẹ ọkọ mịẹ ye, ịn KỊNỊNYANAḄỌ ịna aḍapụ ma Tamụnọ ḅe tẹ Ijiputi ama mẹ ḅio ịn pakama-ḅo ḅọ ḅe sịkịm, tẹ oru-atamụnọ ọlọ tẹ sunsin ịn pịrị tẹ fịrịmẹnjị ịn pịrịm. Anịẹrẹsị ọ̀ mị siye mẹmgba kẹ ḅo ịna ọgọnọ gbanam.’ ”