2 Paka-aị 6 - FỊAFỊA BAỊBỤLỤ

Sọlọmọnị Ẹkwẹn Tomi Ma Pịrịm

¹ Anịtẹso Sọlọmọnị nwẹnị ḅẹẹ: KỊNỊNYANAḄỌ ḅe ḍuko tẹ, mịnẹ ò furu-kịtịpụtẹ kanakana ḅio anga ḅa.

² À yelatẹ geletẹ opu warị nama ị́ pịrị tẹ, gbọrụ anga tẹ sime ị́ pịrị tẹ ị́ anga gbamaso ḅarị anga.

³ Anịtẹso amadaḅọ ḅe nwẹnị vuunma pịkị Izirẹlị ḅẹ kobiri-ogbo mẹmgba da, Izirẹlị ḅẹ kobiri ogbo mẹmgba sịẹsime wararị ogbo.

⁴ Tẹ ọ̀ nwẹnị ḅẹẹ, “Boma sime kẹ KỊNỊNYANAḄỌ ḅe Izirẹlịapụ tẹkẹarị Tamụnọ ḅe pịrịị, oriḅe tẹ ḅarana ori ò ḅịḅị ḅụ ọ̀ kẹ ị̀ ḍa Devidi karịma ye mẹ mịẹ tẹ, tẹ ḅẹẹm,

⁵ ‘Àrị Ijiputi ḅẹ ama mẹ ḅio ị̀ atomi ma pakama-ḅo ene mẹ kụra-ḅio, à ḅio ḅụ warị nama ḅẹ tẹ amụ gbọrụ opu ama sọ sẹlẹ ọkị-a Izirẹlị ḅẹ furo-furo mamgba ḅụ mịnẹ ị̀ ẹrẹ anịjụ sime ḅẹ ḅara, à pịkị gbọrụḅọ-sọ sẹlẹ ọkị-a ị̀ atomi Izirẹlị ma amadaḅọ owiḅọtụḅọ sọ.

⁶ Kụma à Jeruselemu sẹlẹ ọkị tẹ mịẹ tẹ ị̀ ẹrẹ mẹ anịjụ sime ḅẹ ḅara, tẹ pịkị Devidi sẹlẹ ọkị tẹ ori ị̀ atomi Izirẹlị ma ḍikiḍiki.’ ”

⁷ “Mịọkụ anị ị̀ ḍa Devidi ḅe ḅioḅẹngbọ emi gbọrụ warị nama tẹ kẹ KỊNỊNYANAḄỌ ḅe Izirẹlịapụ tẹkẹarị Tamụnọ ḅe ẹrẹ mẹ pịrị,

⁸ kụma KỊNỊNYANAḄỌ ḅe nwẹnị ị̀ ḍa Devidi ḅẹẹ, ‘Gbọrụ warị nama tẹ kẹ ị̀ ẹrẹ mẹ pịrị í ḅioḅẹngbọ ḅụụ emi ḅẹsọ, ị́ iḅiọkụ mịẹm anị í ḅioḅẹngbọ emi ye mẹ;

⁹ anị sime-ḅara, sime-ḅara ḅẹsọ ị́yẹrị warị mẹ nama ḅịa kụma ị́ owiḅọtụḅọ tẹ ini iyi ị́ pịrị ḅarị ḅọ mie warị mẹ nama ị̀ ẹrẹ mẹ pịrị ye.’ ”

¹⁰ “Mịọkụ KỊNỊNYANAḄỌ ḅe miemẹ tẹ ọ̀ karịma ye mẹ mịẹ suma tẹ; kẹ gotẹ ọkọ ḅẹẹarị, arị ị̀ ḍa Devidi ḅe kiri ḅụ saakị paka-ḅo tẹ Izirẹlị emine mẹ ọgọnọ lẹgị-sime tẹ KỊNỊNYANAḄỌ ḅe wẹrịtẹ karịma ḅara, anịsakị à warị mẹ nama tẹ kẹ KỊNỊNYANAḄỌ ḅe ẹrẹ mẹ pịrị tẹ, Izirẹlịapụ tẹkẹarị Tamụnọ ḅe.

¹¹ Anịsakị àrị Ọḅọkụ-Igbe mẹ kẹ anịjụ wẹrị tẹ, ọḅọkụ mẹ tẹ KỊNỊNYANAḄỌ ḅe Izirẹlịapụ ma na fị ye mẹ ḅio ḅụ emi ye mẹ.”

Sọlọmọnị Tẹkẹm

¹² Anịtẹso Sọlọmọnị nwẹnị Izirẹlị ḅẹ kobiri-ogbo mẹmgba simearị anga ḅụ KỊNỊNYANAḄỌ ḅe agbamịẹ-anga mẹ tọrọkọ sịẹsime, tẹ ori aḅara ma finjima.

¹³ Tomina-ogbo mẹ simearị anga mẹ ḅụ Sọlọmọnị nwẹnị ojo kẹ mịẹ kpọlị-sịẹsime-ye nama; anị ḅẹ nangwọ anie sọnọma ḅụọ-kuḅu na pakịrị na (2.2 m), nwẹnị pịkị sọnọma ḅụọ-kuḅu na pakịrị na (2.2 m) kẹ finjima, tẹ inia ḅụọ-kuḅu na pakịrị na (1.3 m) kẹ gele; ọ̀ nwẹnị anị ọgọnọ sịẹsime. Anịtẹrẹmẹ ọ̀ nwẹnị ori aḅụọ-kụkụ kẹ kparakị Izirẹlị ḅẹ kobiri-ogbo mẹ tọrọkọ ḅụ, tẹ ori aḅara finjima So da,

¹⁴ tẹ ḅẹẹ, “Yei KỊNỊNYANAḄỌ, Izirẹlị ḅẹ Tamụnọ, í pembe Tamụnọ ofori So-ḅio anịanịa kiri-ḅio sọ, tẹ ọḅọkụ kokoarị, pịkị jike-a ḅẹlẹma ḍie-pakamarị ị́ afịrịmẹnjịapụ ma tẹ ịna ḅioḅẹngbọ mẹmgba kẹ ị́ tọrọkọ mẹnjị apụ ma ḅụụ.

¹⁵ Ị́yẹrị ḅe tẹ ị́ mịẹ-pakama ị́ fịrịmẹnjịḅọ ị̀ ḍa Devidi pịrị ye mẹ koko ọ̀ pịrị ḅọ ḅe; inn, ị́ ị̀ ḅịḅị kẹ ḍuko ye mẹ, mịmgba ị́ ị́ ḅara kẹ anị mịẹ suma tẹẹ.

¹⁶ Anịẹrẹsị mịọkụ, Yei KỊNỊNYANAḄỌ Izirẹlịapụ tẹkẹarị Tamụnọ, aniemẹ tẹ ị́ ị́ fịrịmẹnjịḅọ ị̀ ḍa Devidi karịma tẹ ḅẹẹm, ‘Anị gbala-gbala gbarịma ḅịa ị́ ḅụụ gbọrụ owiḅọ ḅo ị̀ tọrọkọ Izirẹlị ḅẹ emine mẹ ọgọnọ lẹgị mẹ, ị́ owiapụ-awọmẹ ma nwẹnị ịna etela ḅụ ịna aḅụụ ẹbị tẹ ị̀ oloko ḅụ mẹnjị-mẹnjị, ị́ wẹrịtẹ ị̀ tọrọkọ mẹnjị ḅara’ ḅẹẹ ye mẹ mịẹ.

¹⁷ Ọkọẹrẹsị, Yei KỊNỊNYANAḄỌ Izirẹlịapụ tẹkẹarị Tamụnọ, mịọkụ ị́ kọọn ị́ fịrịmẹnjịḅọ Devidi pịrị tẹ ẹkwẹn mẹ mịẹ kụrọmaa.”

¹⁸ “Kụma karakara-ḅara-ḅụ Tamụnọ ḅo tomikiri ḅụ tomi na anga ḅa ọkụ emi? Ḍikii so tẹ geletẹịn so mẹ ḅio sọ ị́ ḅakam tẹ inetẹ sọ-a, kụma jen-a jen-a mị warị mẹ tẹ à nama warị mẹ!

¹⁹ Anịsọ ị́ fịrịmẹnjịḅọ ḅe tẹkẹ mẹ na, ò ḅiiarị ye mẹ na kẹ ye sịn; Yei KỊNỊNYANAḄỌ, ị̀ Tamụnọ, ḅeri-tokoloma ị́ fịrịmẹnjịḅọ owu mẹ na, tẹkẹ mẹ na tẹ ị́ tọrọkọ ọ̀ tẹkẹarị ye mẹ pịrị;

²⁰ mịẹ tẹ eneḅaka na, ḍin na ḅụ ị́ atọrụngbọ ma finji mị warị mẹ da ḅarị ḅara, ị́ ẹrẹ mẹ sịẹma ḅẹ tẹ í minini tẹ anga mẹ, mịẹ tẹ ị́ fịrịmẹnjịḅọ tẹkẹ mị yọ mẹ pịrịarị ye mẹ ị́ anị naa ḅẹ ḅara.

²¹ Anịsakị ị́ fịrịmẹnjịḅọ ḅe na, ị́ atomi Izirẹlị ma na ḅiiarị aị ma naa, ịn tọrụ kẹ mị yọ mẹ da tẹ tẹkẹ sakị; sisi, So-ḅio í sime anga mẹ ḅụ wa naa; anịsakị ị́ naa tẹ ḅẹḅẹ, si-wẹrịso wa pịrịị.”

²² “Gbọrụ tomḅọ si kẹ amịna pembe tomḅọ mịẹ-mịẹ, tẹ ịn mịẹ tẹ mḅọ ḅụụ pịkịma tẹ mị warị mẹ ḅio, ị́ agbamịẹ-anga mẹ tọrọkọ ḅo tẹ ye karị karị,

²³ So-ḅio sime tẹ naa, tẹ ị́ afịrịmẹnjịapụ ma kọọn, tẹ ye mịẹ, ḅẹrẹ-ḅarasii-ḅọ mẹ si ye-mịẹ-ḅara ḅẹ gbẹẹ-ye mẹ kẹ mḅọ sịḅị ọgọnọ gbana ḅụ, tẹ ḅẹrẹ-ḅaraiḅi pẹlẹ karakara ḅọ mẹ pịrị ḅụ, mḅọ karakara mẹ wẹrịtẹ sime-ḅara kẹ mḅọ gbẹẹ.”

²⁴ “Ị́ atomi Izirẹlị ma ị́ ḅụụ ḅụ si mịẹm ẹrẹsị inina fịya-a apụ ma tọrọkọ ini ịn nẹngịma nẹngịma, ịn pịkị siin pịkị-ḅo tẹ ị́ ẹrẹ minini, tẹ mị warị mẹ ḅio tẹkẹ tẹ ị́ ḅara ḅụ ye ḅii sakị ḅii sakị,

²⁵ So-ḅio sime tẹ naa, tẹ ị́ atomi Izirẹlị ma si wẹrịso ịn pịrị, tẹ pịkị siin ịn kẹ ị́ kẹ ini na, ịna aḍapụ na pịrị ama mẹ ḅoo.”

²⁶ “Ini ị́ ḅụụ ḅụ si mịẹm ẹrẹsị, so gbaịn tẹ eene ḅarị koro-a sakị, ị́ fomu-ḅara kẹ ịn pịrị tẹ in tọrụ kẹ mị yọ da tẹ tẹkẹ tẹ vuunma ịna si ḅụ pịkị tẹ karakara ḅara kẹ ị́ ẹrẹ minini-minini,

²⁷ anị rẹ ị́ afịrịmẹnjịapụ, ị́ atomi Izirẹlị ma naa So-ḅio tẹ si-wẹrịso ịn pịrị ị́ ịn mẹnjị na-iḅi etela mẹ kẹ ịn toluma tẹ so sakị, tẹ gburo-gburotẹ eene kuroma anị ama mẹ tẹ ị́ kẹ ị́ atomi ma pịrị nyana tẹ anga mẹ ḅụ.”

²⁸ “Ịnụ ama mẹ ḅio paka-paka; si obi ama mẹ gbaịn-gbaịn; anịanịa sịn kpatụ fịị, anịanịa otito sọ, anịanịa igurube, anịanịa isuke-ḅisima arị fị ḅaa; ini na fịya-a apụ ịna opu ama ma ḅẹ gbọrụ ama ḅụ ini ikelema-koro tẹ owu paka-paka; Tamụnọ ḅara ḅo ḅẹ fomu-ḅara, fomu-ḅara anịanịa sime obi, sime obi ḅẹ sọ,

²⁹ ḅẹḅọ-ḅẹḅọ anịanịa ị́ atomi Izirẹlị mẹmgba kẹ ị́ tẹkẹ ḅara, tẹkẹ ḅara anịanịa ḅii ḅara ḅii ḅara, ḅụọ-ḅụọ mḅọ ḅụụ-fụka na, mḅọ kururu na nimi ḅara ḅụ amịna aḅara sụn-pakama mị warị mẹ da-da,

³⁰ So-ḅio í sime anga ḅụ naa, tẹ si-wẹrịsoo, tẹ mịẹ ḅụọ-ḅụọ pịrịị, ị́ wẹrịtẹ mḅọ ḅioḅẹngbọ na mḅọ etela mamgba na nimi ḅara. Kẹ gotẹ ọkọ ḅẹẹarị, ị́yẹrị ngẹrị anie tomina awọmẹ ma aḅioḅẹngbọ nimi ḅọọ;

³¹ mịẹ tẹ ini í mangịma tẹ ịn kẹ ị́ kẹ wamịna aḍapụ ma pịrị ama mẹ ḅụ anga ḅarị ene mamgba kẹ ị́ etela ma ḅụ mẹnjị ḅarị ḅara.”

³² “Anị gbọrụ ḅara ḅụ, ị́ atomi Izirẹlịapụ ma ḅẹ ḅọ-a jen sịẹ ḅẹ ḅọ alatẹ sịẹ ḅụ í gburo-gburotẹ ẹrẹ mẹ na, ị́ ḍụḅatẹ ḅara mẹ na, ị́ sụụn-paka tẹ ḅara-kọngọ mẹ na gotẹ ḅo tẹ tọrụ kẹ mị warị mẹ da tẹ tẹkẹ-tẹkẹ,

³³ So-ḅio í sime anga mẹ ḅụ naa, tẹ igoniḅọ ḅe gotẹ wẹrịtẹ ị́ sịn ḅara mamgba mịẹ ọ̀ pịrịị; mịẹ tẹ tomikiri ḅẹ atomi mamgba ị́ ẹrẹ nimi tẹ í mangịma ḅarị ḅara ị́ atomi Izirẹlịapụ ma wẹrịtẹ í mangịma ḅara, anịsakị ịn nimi ḅa mịnẹ mị warị mẹ tẹ à nama ye mẹ ị́ ẹrẹ mie à kẹ anị kuro ye.”

³⁴ “Ị́ atomi ma paka inina fịya-a apụ ma na ọmụgbin ḅẹ mu-mu, ị́ kẹ ịn fịrịma pakama ḅara, pakama ḅara, tẹ ịn tọrụ kẹ mị sịẹ mẹ tẹ ị́ sẹlẹ-ọkị tẹ ye mẹ na, warị mẹ tẹ à nama ị́ ẹrẹ pịrị ye mẹ na da tẹ tẹkẹ-tẹkẹ,

³⁵ anịsakị ịna tẹkẹ naa, ịn ḅiiarị aị ma naa So-ḅio tẹ ịn ḅii ḅara mịẹ ịn pịrịị.”

³⁶ “Ini ị́ ḅụụ ḅụ si mịẹ-mịẹ — kẹ gotẹ ọkọ ḅẹẹarị, si mịẹ-mịẹ-a ḅọ ofori — tẹ ị́ ịna ḅụụ ịganị nyana tẹ ịn kẹ ini na fịya-a apụ pịrị, anie ḅụ ini ịn kun tẹ ịn dogi-so ala-jụ anịanịa kpeki ama mum;

³⁷ anịsọ ịn nwẹnị ini ịn kun mu ama mẹ ḅụ anị kẹ ịna ḅioḅẹngbọ ponoma, tẹ si ḅụ pịkị, tẹ ịn kun-ḅara mẹ ḅio simearị ama mẹ ḅio owu ị́ pịrị, tẹ ḅẹẹm, ‘Wa si mịẹ tẹẹ, tẹ mịẹ na-iḅi-a ḅara na, si-sịḅịḅio-sụa ḅara na kẹ ye mịẹm’;

³⁸ tẹ ịna ḅiokoroma mẹmgba na, ịna ḅioḅẹngbọ mẹmgba na kẹ ini ịna kun mu tẹ ịn kun-ḅara ḅio simearị ama mẹ ḅio si ḅụ pịkị, tẹ tọrụ kẹ ịna ama, ị́ kẹ ịna aḍapụ ma pịrị ama mẹ na ị́ sẹlẹ ọkị tẹ opu ama mẹ na, à nama tẹ kẹ ị́ ẹrẹ pịrị warị mẹ na da tẹ tẹkẹ-tẹkẹ,

³⁹ anịrẹ So-ḅio í sime anga mẹ ḅụ ịna tẹkẹ na, ịn ḅiiarị aị ma na naa, tẹ ịn ḅii ḅara mịẹ ịn pịrịị, tẹ si-wẹrịso ị́ atomi ma tẹ ị́ ḅụụ ḅụ si mịẹ apụ ma pịrịị.”

⁴⁰ “Yei ị̀ Tamụnọ, yee mịọkụ ị́ atọrụngbọ ma finji tẹ í ḅeri-tokoloma mị yọ ḅẹ atẹkẹ ma pịrị.”

⁴¹ Yei KỊNỊNYANA-TAMỤNỌ, mịọkụ saakị, tẹ ị́ ịnyọsara anga muu, ị́yẹrị na, ị́ kụrọ mẹ ḅẹ Ọḅọkụ-Igbe mẹ na. Yei KỊNỊNYANA-TAMỤNỌ, yee ḅọrọma ị́ agbamịẹapụ ma gbaịn anịsakị yee ị́ fịafịa atomi ma í iḅi ḅụ ḍereku.

⁴² Yei KỊNỊNYANA-TAMỤNỌ, ị́ pulo kẹ sịḅị ḅụ sara tẹ gbọrụḅọ ḅe tọrụ pịkị siin ma! Í jike-a ḅẹlẹma mẹ kẹ ḅiokoroma ị́ fịrịmẹnjịḅọ Devidi pịrịị.