2 Paka-aị 5 - FỊAFỊA BAỊBỤLỤ

¹ Mị-ḅara mie Sọlọmọnị KỊNỊNYANAḄỌ ḅe warị mẹ ḅụ kọrị kọrịnama mamgba kọrị fama ḅara. Sọlọmọnị nwẹnị ọ̀ ḍa Devidi mịẹ fịafịama sikima koroma aị ma ọkị-ḅo suu, pịkị golu mẹ na, seleḅa mẹ na, ye sụa ẹfẹrẹ mamgba na kẹ Tamụnọ warị mẹ ḅẹ ngọ-koko-aḅio ma ḅụ kokom.

Ịn Ọḅọkụ-Igbe Mẹ ịn Kẹ Tamụnọ-warị Ḅom

² Anịtẹso Sọlọmọnị nwẹnị Izirẹlị ḅẹ omongiapụ ma na, furo-furo ma ḅẹ sịḅịdapụ mamgba na, Jeruselemu simearị Izirẹlịapụ ma ḍa warị-warị ma ḅẹ tọrọkọ tarị apụ ma na kobiri ịn mu KỊNỊNYANAḄỌ ḅe Ọḅọkụ-Igbe mẹ ọkị-ḅo Zayọnị ḅụ Devidi opu ama mẹ

³ Izirẹlị ḅẹ owiapụ mamgba nwẹnị amadaḅọ ḅe tọrọkọ kobiri sọnọma akalụ karama akalụ mẹ ḅụ kopini afịaị fị anga mẹ ḅụ.

⁴ Izirẹlị ḅẹ tọrọkọ tarị apụ mamgba ḅom, tẹ Livayị furo-ḅẹ-apụ ma nwẹnị Ọḅọkụ-Igbe mẹ saakị

⁵ tẹ anị na, kobiri anga ḅẹ akpụrụ-warị mẹ na, fịafịa ye sụa ẹfẹrẹ ma tẹ akpụrụ-warị mẹ ḅio sime aị mamgba na, agbamịẹapụ ma na Livayị furo-ḅẹ-apụ ma na arị ọkị-ḅom.

⁶ Amadaḅọ Sọlọmọnị na, Izirẹlị ḅẹ tomina-ogbo mamgba na tẹ ọ̀ tọrọkọ kobiri apụ ma na nwẹnị tọnwa anana na, pootẹ-anambulo na kẹ ịn kịẹn ḅẹ ọkụ ofori anịanịa elekima kẹ gberie-gberie ḅụ sụa ḅara ofori ḅara kẹ Ọḅọkụ-Igbe mẹ tọrọkọ agba mịẹ.

⁷ Anịtẹso agbamịẹapụ ma nwẹnị KỊNỊNYANAḄỌ ḅe Ọḅọkụ-Igbe mẹ kẹ Fịafịa-tẹịn Yọ mẹ ḅụ koroma, Sẹrubimu ma suku-ḅio ḅụ.

⁸ Sẹrubimu ma gbala ịna apamba finjima Ọḅọkụ-Igbe mẹ sime kiri mẹ gbaịn wararị, anie ḅụ Sẹrubimu ma ye gbaịn ye mịẹ: Ọḅọkụ-Igbe mẹ na, kẹ anị sụa tẹ dogi nangwọ, nangwọtẹ asịn ma pịrị tẹ.

⁹ Sịn ma nangwọ lama wararị ẹrẹsị Fịafịa-tẹịn Yọ mẹ ḅụ tẹrẹmẹ mu kala-ḅio mẹ la arị asịḅị waa paka tẹ kịnị ẹrị-ẹrịm, kụma kịnị inetẹ etela-ogbo ḅụ arị ẹrị ḅịa; arị emi nwenii ḅo mịmgba lam.

¹⁰ Izirẹlịapụ Ijiputi ḅụ paka-ḅo tẹ KỊNỊNYANAḄỌ ḅe Izirẹlịapụ ma na ọḅọkụ fị sakị Mozizi kẹ Horẹbụ ḅụ anị ḅio sụa maa ḍụḅarị apakịrị ma sikima jen ye Ọḅọkụ-Igbe mẹ ḅio ofori.

KỊNỊNYANAḄỌ Ḅe Ebube Mẹ

¹¹ Mịọkụ agbamịẹapụ ma fịafịa yọ mẹ ḅụ paka-ḅo sakị (kẹ gotẹ ọkọ ḅẹẹarị, agbamịẹapụ mamgba tẹ sime apụ ma, itu-itu ma ḍiki-a ḅara ḅụ amịna aḅụụ mịẹ fịafịama tẹ,

¹² tẹ Livayị furo ḅụ Tamụnọ-warị ḅẹ nume-suapụ mamgba, Asafụ na, Hemanị na, Jedutuni na, ịna owiapụ awọmẹ na, ịna mịnapụ na iḅi lọkọ-ḅịtẹ kẹ ḅirimatẹ saịn-saịn-aị na, ọbọ na, alili na kẹ ọdụ mịnẹ agbamịẹapụ kịnị sonioa si na agbamịẹ-anga mẹ ḅẹ ama-ḅara ḅụ sịẹ wararị,

¹³ anịsakị anị ọdụ mịnẹ apụ ma na, nume-suapụ ma na kọrịnama, ini ịna aḅụụ kẹ gberie mịẹ tẹ tokini na ịmịẹtẹ ḅẹẹ nume su kẹ KỊNỊNYANAḄỌ ḅe pịrị tẹ tomi ịn naa), tẹ nume mẹ saakị tẹ ọdụ mịnẹ apụ na saịn-saịn-aị farị apụ na, ja farị-farịaị farị apụ ini na sọ KỊNỊNYANAḄỌ ḅe tokini tẹso, (mịnẹ). “Gbala ori iḅim ẹrẹsị, kẹ gotẹ ọkọ ḅẹẹarị, ò jike-a ḅẹlẹma mẹ sime gbamasom.” Anịtẹso oḅuto nwẹnị KỊNỊNYANAḄỌ ḅe warị mẹ ḅin

¹⁴ tẹ mịẹ tẹ agbamịẹapụ ma ḅarị inetẹ sịẹsime tẹ fịrịmẹnjị-a, oḅuto mẹ ẹrẹsị; gbala KỊNỊNYANAḄỌ ḅe ebube mẹ Tamụnọ warị mẹ ḅinm ẹrẹsị.