2 Paka-aị 3 - FỊAFỊA BAỊBỤLỤ

¹ Anịtẹso Sọlọmọnị nwẹnị Jeruselemu ḅụ Moraya tụndụ ọgọnọ, Ọnanị, Jebusayịtị ḅọ ḅe mgbọlụ sẹlẹ kiri KỊNỊNYANAḄỌ ḅe ḅụụ kẹ ọ̀ ḍa Devidi ḍie tẹ Devidi tọn anga mẹ ḅụ KỊNỊNYANAḄỌ ḅe warị mẹ nama suku-saakịm.

² Ori ama-da tẹ ini akụra karama kụra mẹ ḅẹ maa akalụ karama akalụ mẹ ḅụ ọ̀ warị nama mẹ saakịm.

³ Mịna aḅara ma mie Sọlọmọnị tọn lama ḅara Tamụnọ warị mẹ ḍụḅa la ḅarị ḅara; anị ḅẹ nangwọ anie inia asi oyia aḅụọ-kuḅu finji (27 m); anị ḅẹ finjima anie ḅụọ-kuḅu asuei (9 m).

⁴ Mẹnjị-toluḅọrọ-anga mẹ ḅẹ nangwọ anie ḅụọ-kuḅu asuei (9 m), anị nangwọ warị mẹ ḅẹ finjima na gbasịm; anị ḅẹ gele sọ pịkị ḅụọ-kuḅu asuei (9 m). Ọ́ nwẹnị golu kẹ ḅioju ḅụ warị-anga mẹ sara gbaịn.

⁵ Ori ịn kẹ Sayịpẹrẹsị sịn ḍụḅọ kẹ opu ḅio mẹ ḅụ warị-akaka ma ḅakụ gbaịn tẹ iḅi tẹ golu kẹ anị sara gbaịn tẹ anị ḅụ eneme-kọrọ na, ikoli na kịkama aị mịẹ koroma.

⁶ Ò yela aḍụḅarị kẹ warị mẹ nama tẹ kẹ anị ḅirimam. Golu mẹ Pavayimu ḅụ ḅom.

⁷ Anị ḅara mie ò golu kẹ anị ḅẹ oluku ma na, ḅọkọ asuku ma na, anị ḅẹ warị-anga ma na, ḅọkọ ma na sara gbaịn tẹ ịn kẹ sẹrubimu sịn enjẹlị kịkama apụ mịẹ koroma warị-anga ma ḅụ.

⁸ Ọ̀ mịẹ tẹ Fịafịa-tẹịn Yọ mẹ nangwọ warị mẹ ḅẹ finjima na gbasịm; anị ḅẹ nangwọ anie ḅụọ-kuḅu asuei (9 m), anị ḅẹ finjima pịkị ḅụọ-kuḅu asuei (9 m). Iḅi golu kpo-kpo, si tọnị (20 tonnes) nwẹn-sịn ye iku la ḅara mie ịn kẹ Fịafịa-tẹịn Yọ mẹ sara yee.

⁹ Golu kpo, mesi oyi finji sẹkẹlị (50 shekels) nwẹn-sịn ye iku la ḅara ịn nwẹn kẹ ngbọ tẹmẹm tẹ golu kẹ ọgọnọ ḅẹ kala-ḅio ma sọ saram.

¹⁰ Fịafịa-tẹịn Yọ mẹ ḅio, ọ̀ sịn kẹ maa Sẹrubimu kara koromam, tẹ golu kẹ ịn sara gbaịnm.

¹¹ Sẹrubimu ma apamba ma ḅẹ finjima gboloma anie, ḅụọ-kuḅu asuei (9 m); gbọrụḅọ-gbọrụḅọ gbọrụ pamba ḅẹ finjima anie sọnọma ḅụọ-kuḅu na pakịrị na (2.2 m), tẹ warị-anga mẹ la tẹ mu osi Sẹrubimu ḅe pamba lam;

¹² anịsakị ḅị Sẹrubimu ḅe gbọrụ pamba tẹ sọnọma ḅụọ-kuḅu na pakịrị na (2.2 m) kẹ finjima ye mẹ warị-anga mẹ la tẹ osi pamba mẹ tẹ pịkị sọnọma ḅụọ-kuḅu na pakịrị na (2.2 m) kẹ finjima ye mẹ sọ mu osi Sẹrubimu pamba lam.

¹³ Mịna Sẹrubimu ma apamba ma ḅẹ finjima anie ḅụọ-kuḅu asuei (9 m); Sẹrubimu ma ịna aḅụọ kẹ sịẹsime tẹ tọrụ kẹ opu ḅio mẹ da wararị.

¹⁴ Ọ̀ nwẹnị bulo tọrụ na, pọpụlụ nwẹn-sịn tọrụ na, awụ tọrụ na sụa ḅịtẹ na lọkọ-ḅịtẹ na kẹ kpọ Fịafịa-tẹịn Yọ mẹ kikima. Ḅịtẹ ma ḅụ in Sẹrubimu kịka enjelị mịẹ sụa wararị.

Maa Ojo Ịḅalị Ma

¹⁵ Warị mẹ nụngọ tọrọkọ ḅụ ò mesi oyi maa ḅụọ-kuḅu finji na pakịrị na (15.5 m) kẹ gele wararị maa ḅeriaị mịẹ sịẹmam, tẹ gberie-gberie ọgọnọ ḅụ sọnọma ḅụọ-kuḅu na pakịrị na (2.2 m) kẹ geletẹ ejikila tẹmẹ gbanam.

¹⁶ Ọ̀ nwẹnị pọkọsụa ikoli pembe aị mịẹ tẹ kẹ ḅeriaị ma sịḅị ọgọnọ gbana, tẹ ikoli ma ọgọnọ ḅụ omburo kịkama aị sọnọa si mie gbana.

¹⁷ Tamụnọ-warị mẹ nụngọ ḅụ ò ḅeriaị ma sịẹmam, gberie suku-jụ, gberie ọgọnọ-jụ suku-jụ ḅẹ ye mẹ ori anị sịnm Jakini, anịsakị ọgọnọ-jụ ḅẹ ye mẹ Bohazi.