2 Paka-aị 22 - FỊAFỊA BAỊBỤLỤ

Juda Ḅẹ Amadaḅọ Ahazaya

¹ Jeruselemu ḅụ angarị apụ ma nwẹnị Ahazaya asambịrịma tẹịn owiḅọtụḅọ ḅe kẹ ò kiri ḅụ amadaḅọ sọma, gbala tomina-ogbo mẹ tẹ Arabụ ḅẹ apụ ma na in sime anga ḅo apụ ma ọ̀ tọrọkọ paka owiapụ-awọmẹ mamgba ḅaa tẹ ẹrẹsị. Anieḅụ Ahazaya Juda ḅẹ amadaḅọ Jehoramụ owiḅọtụḅọ ḅe ama mẹ dam.

² Ahazaya sịḅị kụra amesi maa kụra finji ḅọrọ tẹso, ọ̀ saakị ama-dam, tẹ gbọrụ kụra kẹ Jeruselemu ḅụ ama-dam. Ò iyingi ẹrẹ Atalaya, Omiri taa-ẹrẹḅọtụḅọ.

³ Ori sọ Ehabụ warị mẹ mẹnjị etela mẹnjịm, ò iyingi anie ọ̀ mịẹ na-iḅi ye kẹ ò tolumarị ḅọ, si-sịḅịḅio-sụa ḅara kẹ ye mịẹ ḅụ ẹrẹsị.

⁴ Ọ̀ KỊNỊNYANAḄỌ ḅe ḍiki-tọrụ ḅụ siye mịẹm, Ehabụ warị mẹ wẹrịtẹ mịẹ ḅara. Kẹ gotẹ ọkọ ḅẹẹarị, ọ̀ ḍa fịị tẹso, ini mịẹ ọ̀ mịẹ na-iḅi aị kẹ ò toluma-toluma tẹ ò si amịẹaị ma mịẹ apụ.

⁵ Ori ịn kẹ ò toluma ḅara ḍiki mẹnjị mu Izirẹlị ḅẹ amadaḅọ Ehabụ owiḅọtụḅọ Jehoramụ ḅụụ sọ tẹ ọmụ kẹ Hazẹlị, Siriya ḅẹ amadaḅọ na gbinm Ramọtị-giliyadị ḅụ. Siriya ḅẹ apụ ma nwẹnị ye kẹ Jehoramụ lama.

⁶ Ọ̀ pịkịma Jẹzirili ḅụ ọ̀ ḅụụ gwọọ ḅẹ mum, ọ̀ Rama ḅụ Hazẹlị, Siriya ḅẹ amadaḅọ na ọmụ gbin sakị ọ̀ la ye ḅụ. Ahazaya, Juda ḅẹ amadaḅọ Jehoramụ owiḅọtụḅọ ḅe nwẹnị ori obiarị mẹ gotẹ Jẹzirili ḅụ Joramụ, Ehabụ owiḅọtụḅọ ḅe ḍiki ḅẹ mu.

⁷ Kụma Tamụnọ tọn tẹ mịnẹ Ahazaya ḅịkị-koro mẹ paka-ḅo ḅa ò mu Joramụ ḍiki ḅẹ mu anga ḅụ. Gbala ori anịanga ḅo sakị ò Jehoramụ na paka mu Jehu Nimisi owiḅọtụḅọ, oriḅe tẹ KỊNỊNYANAḄỌ ḅe pulo kẹ sịḅị ḅụ sara tẹ Ehabụ warị mẹ fama ḅẹ ḅọ ḅe na bịama ḅa.

⁸ Tẹ Jehu ḅẹrẹ-pẹlẹ Ehabụ warị mẹ ọgọnọ gbanarị ogbo, ọ̀ nwẹnị Juda ḅẹ sịḅịdapụ ma na, Ahazaya iyimbere amịnapụ owiapụ-awọmẹ ma tẹ fịrịmẹnjị Ahazaya pịrịarị apụ ma na bịama, tẹ ọ̀ nwẹnị in ḅaa.

⁹ Ori Ahazaya ḍọkịm, tẹ Sameriya ḅụ ọ̀ ḅọị wararị ogbo ini ò kunm, ịn nwẹnị ori ọkị-ḅo Jehu pịrị tẹ ori ọ̀ ḅaam. Ini ò ḍiḅim, gbala in ḅẹẹm, “ori anie Jehosafatị amịna ḅioḅẹngbọ mẹmgba kẹ KỊNỊNYANAḄỌ ḅe ḍọkị ḅọ ḅe taa-tụḅọ ẹrẹsị.” Anịsakị Ahazaya warị mẹ ḅio inetẹ sịẹ mẹ da ḅẹ gbọrụḅọ-sọ ofori.

Juda Ḅe Amada-ẹrẹḅọ Atalaya

¹⁰ Mịọkụ Atalaya, Ahazaya iyingi ma árị owiḅọtụḅọ fịị tẹ mẹ ẹrị tẹso, á nwẹnị saakị tẹ Juda warị mẹ ḅẹ amada-furo mẹmgba ḅaa fama.

¹¹ Kụma Jehosabịatị, amadaḅọ ḅe ẹrẹḅọtụḅọ ma nwẹnị Johasị, Ahazaya owiḅọtụḅọ ḅe ọkị, amadaḅọ ḅe owiapụ-awọmẹ ma tẹ in ḅaa ḅẹ-ḅiiarị apụ ma ogboku, tẹ nwẹnị ọ̀ kẹ ḅọị, tẹ á nwẹnị ori na, ò ḍikiḍikiarị ḅọ ma na kẹ mono kala-ḅio ḅụ su. Mị-ḅara mịẹ Jehosabịatị, Amadaḅọ Jehoramụ ẹrẹḅọtụḅọ, Jehohada agbamịẹḅọ ḅe ta ma, arị Ahazaya ịyịmbara ẹrẹsị Atalaya ḅụụ ḅụ ọ̀ ḅọị ḅara, tẹ mịẹ tẹ á ḅarị ọ̀ ḅaa-a.

¹² Ori ini na sonio akụra angam, Tamụnọ warị mẹ ḅio ini ọ̀ kẹ ḅọịm Atalaya ama mẹ daarị sakị.