2 Paka-aị 2 - FỊAFỊA BAỊBỤLỤ

Ịn Ḅụụ tẹlẹma Tamụnọ-warị Mẹ Nama Pịrịm

¹ Sọlọmọnị mịọkụ gbọrụ Tamụnọ-warị nama KỊNỊNYANAḄỌ ḅe ẹrẹ na, gbọrụ amadaḅọ warị na nama ọ̀ ḅụụ pịrị ḅii tẹ.

² Sọlọmọnị nwẹnị kịnị nine apuku, jeia ẹndẹ finji (70,000) tọn ye dogiapụ, kịnị oyia puku (80,000) tụndụ ọgọnọ ḅe opu asịẹ ma ḅio ḍụḅarị pẹlẹ apụ, anịsakị kịnị eseni ẹndẹ (3,600) tọrụ kẹ ịna aḅụụ wẹrị.

³ Sọlọmọnị nwẹnị oku kẹ Huramụ, Taya ḅẹ amadaḅọ ḅe fịrịma: “Ị́ wẹrịtẹ ị̀ ḍa Devidi na mịẹ tẹ ịn kẹ sida sịn-arị sịn mẹ kẹ ọ̀ fịrịma mịnẹ ọ̀ kẹ ori anga ḅẹ warị nama ọ̀ ḅụụ pịrị ḅẹ ḅara, ọkọ kẹ ị̀ na mịẹ.

⁴ Ḍikii, à gbọrụ warị nama kẹ KỊNỊNYANAḄỌ Ị̀ Tamụnọ ḅe ẹrẹ mẹ pịrị ḅẹ tẹ, tẹ anị mịẹ fịafịama wẹrị kẹ ọ̀ tọrọkọ iḅiọkụ kụnụarị ẹnyị kẹ mịẹ kụnụaị dọkịma na, sịkọpẹlẹ-a ḅara kẹ fịafịa fịturu kẹ agba mịẹ na, tẹkẹ ene ma na, ịwọ akalụ paka ene ma na, tọn wẹrị wararị KỊNỊNYANAḄỌ wamịna Tamụnọ ḅẹ kopini afịaị fị mẹ wẹrịtẹ tọn koro Izirẹlị pịrị gbamaso ḅara ḅụ dede na, ḅoḅiri na kẹ dọkịma-agba mịẹ pịrị.

⁵ À nama ḅarị warị mẹ gburo-gburo ḅa, kẹ gotẹ ọkọ ḅẹẹarị, wamịna Tamụnọ ḅe ḍụḅa oru-atamụnọ mamgba nẹngịm.

⁶ Kụma tụḅọ ịnyọ nyana tẹ inetẹ warị nama ọ̀ pịrị ḅa, so sọ, jen-a jen-a geletẹịn so mẹ sọ inetẹ ọ̀ sọ-a kụma? Yẹrị ḅọrọ tụḅọ tẹ warị nama ọ̀ pịrị ḅẹ, kẹ ọ̀ tọrọkọ kụnụaị dọkịma ḅẹ anga sikima?

⁷ Anịẹrẹsị mịọkụ golu na, seleḅa na, ojo na, ikulele na kẹ kọrịnama kọrị ḍin ḅọ na, pịkị pọpụlụ nwẹn-sịn tọrụ na, awụ tọrụ na, bulo tọrụ na ḅẹ aḅịtẹ mịẹ ḍin tẹ pịkị ye sọkị na kara na ḍawọ-ḍịntẹ ḅọ na kẹ fịrịma tẹ ịn ḅo ị̀ ḍa Devidi Juda na, Jeruselemu na ḅụ ḍọkị koroma ye mịẹ ḍin apụ ma ḅụụ sọ.

⁸ In kẹ Sida na, Sayịpẹrẹsị na, Alịgọmụ na sịn-arị opu asịn ḅiri tẹ Lẹbanọnị ḅụ ḅo aị ma sọ kẹ ị̀ fịrịmaa, gbala à nimi wararị mịnẹ ị́ afịrịmẹnjịapụ Lẹbanọnị ḅụ opu asịn aḅiri pẹlẹ-pẹlẹ ḅara nimi wararị. Anịsakị ị̀ afịrịmẹnjịapụ ḅo ị́ afịrịmẹnjịapụ ḅụụ sọ ḅa,

⁹ tẹ tọnwa ḅara kẹ opu asịn ḅiri tẹlẹma ị̀ pịrị ḅa, kẹ gotẹ ọkọ ḅẹẹarị, gburo-gburotẹ ḅụụ-gbiripuma warị mie à nama ḅarịye.

¹⁰ Ị́ afịrịmẹnjịapụ opu asịn aḅiri ma pẹlẹarị apụ ma, à tọnị nwẹn-sịn sọnọa ẹndẹ (2,000 tonnes) ḅẹ gbẹẹtẹ witi na, pịkị ọkọ la tẹ gbẹẹtẹ bali na, lita nwẹn-sịn mesi oyi finji apuku (400,000 litres) ḅẹ iru na, ọkọ la tẹ olivu pulo na kẹ ịn pịrị ḅa.”

¹¹ Anịtẹso Huramụ Taya ḅẹ amadaḅọ ḅe nwẹnị ḍiri kẹẹ tẹ kẹ ọ̀ pakịrị aniemẹ tẹ ọ̀ kẹ Sọlọmọnị fịrịma ye mẹ mịnẹ, “KỊNỊNYANAḄỌ ḅe ori atomi ḅẹlẹmarị ẹrẹsị ori ị́ kẹ amadaḅọ sọma ịn pịrịm.”

¹² Huramụ nwẹnị pịkị ḅẹẹ, “Boma sime KỊNỊNYANAḄỌ Izirẹlịapụ tẹkẹarị Tamụnọ ḅe pịrị, oriḅe tẹ So na Kiri na tẹmẹḅọ ḅe, oriḅe tẹ ye nimi owiḅọtụḅọ kẹ Amadaḅọ Devidi pịrị, tẹ ḅarana ḅẹrẹtọn ḅụụ pịrị nimi na, ye fie ye naa na kẹ pịrị ḅinma ḅọ ḅe, oriḅe tẹ Tamụnọ-warị nama KỊNỊNYANAḄỌ ḅe pịrịị, pịkị amadaḅọ warị nama amịna ḅụụ pịrị ḅarị ḅọ ḅe.

¹³ À mịọkụ ye mịẹ ḍin gbọrụ tomḅọ tẹ yefieye naa ḅụụ ḅụ ḅin wararị ḅọ kẹ ị́ fịrịma tẹ, anie Huramụ-Abị,

¹⁴ Danị eremịna-awọmẹ ma ḅẹ gbọrụ ẹrẹḅọ iyi owiḅọtụḅọ ḅe, ọ̀ ḍa Taya ḅẹ ḅọ. Ò golu na, seleḅa na, ojo na, ikulele na, ḍụḅarị na, ḍụḅọ na kẹ kọrịnama kọrị ḍawọ-ḍịịn wararị, tẹ pọpụlụ nwẹn-sịn na, bulo na, awụ aḅịtẹ tọrụ na, iḅi lọkọ-ḅịtẹ na mịẹ ḍin wararị, pịkị ḅẹ ye, ḅẹ ye tẹ sọkị sụa ḅẹ ye ḅara-ḅara mamgba tẹ kẹ ọ̀ pịrị ye pịrị ye, ị́ aḅara-akanịapụ, ị̀ nyanaḅọ ị́ ḍa Devidi aḅara-akanịapụ ma na ori na anị mịẹ ḅa.

¹⁵ Ọkọẹrẹsị yee ị̀ nyanaḅọ ḅe ịn kẹ witi na, bali sịn afịaị ma na, pulo mẹ na, iru mẹ na tẹ ò ḍuko tẹ aị ma kẹ fịrịmẹnjịapụ ma fịrịma;

¹⁶ anịsakị Lẹbanọnị ḅụ opu sịn ḅiri tẹ í ḅii-ye ḅii-ye wa pẹlẹ ị́ pịrị ḅa, tẹ arị fịna tẹ kẹ tọrụ-minji tẹịnma ḅo ị́ pịrị ḅa Jọpa ḅụ, mịẹ tẹ ị́ anị iwoma ọkị Jeruselemu mu ḅẹ ḅara.”

Tamụnọ-warị Nama Mẹ Suku-saakị Tẹ

¹⁷ Anịtẹso Sọlọmọnị nwẹnị Izirẹlị mẹ ḅio simearị igoniapụ mamgba kịẹn, ọ̀ ḍa Devidi kịẹn ḅara pembe ḅara; tẹ gbọrụ puku fa kịnị si apuku, ini ẹndẹ finji (153,600) ḍọkị-ẹrịm.

¹⁸ Ọ̀ nwẹnị ye dogi kọrịnama kẹ kịnị ninea apuku, jei ẹndẹ finji (70,000) pịrị, tụndụ opu sịẹ ḅụ ḍụḅarị pẹlẹ kẹ kịnị oyia puku (80,000) pịrị tẹ kẹ tomi ma mịẹ tẹ ịn kọrịnama kọrị gotẹ kịnị eseni ẹndẹ (3,600) tọnm ịn tọrụ kẹ ịna ḅụụ wẹrịị.