2 Paka-aị 16 - FỊAFỊA BAỊBỤLỤ

Izirẹlị La Ḅụụ-fụka

¹ Asa ama-da tẹ ini akụra ofori kụra amesi karama kụra ḅụ, Basa, Izirẹlị ḅẹ amadaḅọ nwẹnị mu Juda si anga sịẹ tẹ ọmụ gotẹ Rama nama kụrọma, mịẹ tẹ ọ̀ ḍụkụ tẹ gbọrụḅọ-sọ paka-so anịanịa so ḅo Asa, Juda ḅẹ amadaḅọ ḅe la ḅịa ḅara.

² Anịtẹso Asa nwẹnị KỊNỊNYANAḄỌ ḅe warị mẹ ḅẹ ngọ ma ḅụ na, amadaḅọ ḅe warị ḅụ na seleḅa na golu na ọkị tẹ kẹ Bẹnị-hadadị, Siriya ḅẹ amadaḅọ, tẹ Damasịkọsị ḅụ anga ḅọ ḅe fịrịma tẹ ḅẹẹ,

³ “Yee yẹrị na ị́yẹrị na gboloma tẹ gbọrụ ḅụụ sime, anị wẹrịtẹ ị̀ ḍa na ị́ ḍa na ogboku sime-ḅara; ḍikii, à seleḅa na, golu na kẹ í fịrịmarị, mu Basa Izirẹlị ḅẹ amadaḅọ ḅe ị́nịna nyana gbọrụ ḅụụ sime mẹ kan, mịẹ tẹ ori ì ḅụ ḅụụ ọ̀ ḅụụ nụnụ ọkị ḅẹ ḅara.”

⁴ Bẹnị-hadadị nwẹnị Amadaḅọ Asa ḍukoye mẹ minini, tẹ ori ọmụ-ogbo ma ḅẹ ḅẹrẹtọn-apụ ma fịrịma tẹ ini owu kẹ Izirẹlị ḅẹ opu ama ma paka. In nwẹnị Ijọnị na, Danị na, Ebẹlị-mahịmu na, Nafutali ḅụ ngọ koko opu ama mamgba ọkị.

⁵ Basa anị naa tẹso, ò Rama nama mẹ dasịẹmam tẹ nwẹnị mịẹ tẹ ọ̀ kọrịnama daasịẹ.

⁶ Anịtẹso Amadaḅọ Asa nwẹnị Juda mẹmgba ọkị, tẹ in Rama ḅẹ aḍụḅarị ma, na, anị ḅẹ opu asịn ḅiri ma tẹ Basa kẹ nama sime aị ma dogi-so, tẹ arị aị ma mịẹ ọ̀ kẹ Geba na, Mizipa na nama ye.

Ịkịankoroḅọ Hanani Ḅe

⁷ Anị sakị mẹ ḅụ Hanani so-ḅịrịḅọ ḅe Asa Juda ḅẹ amadaḅọ ḍọkụma-ḅom, tẹ nwẹnị ọ̀ ḅẹẹ, “ị́ KỊNỊNYANAḄỌ ị́ Tamụnọ ḅe ḅụụ sịrẹrẹ-a tẹ Siriya ḅẹ amadaḅọ ḅe ḅụụ sịrẹrẹm ẹrẹsị, Siriya ḅẹ amadaḅọ ḅe ọmụ-ogbo mẹ ị́ ḅara pẹlẹ mangị-so tẹẹ.

⁸ Ẹtịyopịya na, Libiya na ọmụ-ogbo mẹ ḍụḅa lama tẹ tọnwa kirimẹnjị-ọmụarụ na, asụ-dọkụ-ọmụapụ na nyana tẹịn-a? Anịsọ ị́ KỊNỊNYANAḄỌ ḅe ḅụụ ḅụ sịrẹrẹm ẹrẹsị ori ịn kẹ ị́ ḅara-ḅio sunm,

⁹ kẹ gotẹ ọkọ ḅẹẹarị, KỊNỊNYANAḄỌ ḅe atọrụngbọ ma bebe tomikiri mẹ ḍiki tolu tẹ ye goyegoye ẹrịarị, ori ori opu kụrọ kẹ inima tẹ ḅioḅẹngbọ ḅụ ye kẹ ọlọ-ọlọ ọkụ ofori ḅara kẹ ò sọmarị apụ ma ḍie ḅẹ ḅara. Mie ḅụ í oḅori ḅara kẹ ye mịẹ tẹẹ; anịsakị mịọkụ saakị tọrọkọ mu ị́ ọmụ nyana ḅa.”

¹⁰ Anịtẹso Asa nwẹnị so-ḅịrịḅọ ḅẹ ḅụụ ịganị nyana, tẹ ọ̀ kẹ ikoli-warị ḅio ịkasị wẹrị, ò miemẹ gotẹ ọ̀ ḅụụ ḅụ ịganị nyana tẹ gbọrsịḅị ḅọrọarị ẹrẹsị. Asa pịkị mbasị ḅara kẹ tomi ma ḅẹ ja apụ na mịẹm anị gbọrụ sakị mẹ ḅụ.

Asa Ama-da Mẹ Ḅẹ Kunoma

¹¹ Asa amịẹaị tarịye ḅụ mu kunoma la Juda na, Izirẹlị na Amadapụ ma Ḍiri ḅio kẹẹ wararị.

¹² Ori ama-da ḅụ gbọrụ kụra ofori kụra amesi karama kụra ḅụ Asa ḅụọ-obi kọnm; ori obi mẹ nwẹnị ḅo kụrọ; anịsọ, ori obi mẹ ḅụ sọ ọ̀ KỊNỊNYANAḄỌ ḅọ ḅe dọkị-a, kụma ḅịrịapụ ḅụụ mie ọ̀ ḅarasụa ḍọkị ye.

¹³ Anịtẹso Asa fịịm, ori ama-da tẹ kụra amesi gbọrụ kụra finji karama kụra ḅụ.

¹⁴ Jeruselemu, anie Devidi opu ama mẹ, ḅio ọ̀ sọkị finji ọ̀ ḅụụ pịrị ḍuḅu mẹ ḅio ini ò ḍiḅim. Kịrị-kịrị ẹnyị ḅara tẹ kụnụaị mịẹarị apụ ma mịẹ aị ḅin wararị, ḍụẹịn dọkị ye ọgọnọ ini ọ̀ kẹ gbanam, tẹ ịn nwẹnị kụn kẹ ọ̀ pịrị ḅụ ḍụḅa ḅụratẹ opu fịnị kiri tọnọ.