2 Paka-aị 10 - FỊAFỊA BAỊBỤLỤ

Ọgọnọ-jụ Ḅẹ Afuro Ma Sịḅị-kụrọ Kẹ Puu Sikimam

¹ Rehobohamụ Sẹkẹmụ mum, gbala Izirẹlị mẹmgba ọ̀ kẹ amadaḅọ mịẹ gotẹ Sẹkẹmụ mu tẹ ẹrẹsị

² Jerobohamụ, Nebatị owiḅọtụḅọ ḅe anị naa tẹso, (ò gbala Amadaḅọ Sọlọmọnị ḅụụ ḅụ ḍumo-mangị kẹ Ijiputi mum) ọ̀ nwẹnị Ijiputi ḅụ pịkịma-ḅo.

³ In nwẹnị fịrịma ò sịn, Jerobohamụ na Izirẹlị mẹmgba na nwẹnị ḅo tẹ Rehobohamụ ḅẹẹ,

⁴ “í ḍa wamịna pọkọsụaye mịẹ tẹ anị ikum, ọkọẹrẹsị mịọkụ í ḍa kụrọtẹ fịrị mẹ mịẹ sarasarama, pịkị ori iku pọkọsụaye mẹ mịẹ feke-fekema wamịna ọgọnọ, anịsakị wa fịrịmẹnjị í pịrị ḅa.”

⁵ Ọ̀ nwẹnị in ḅẹẹ, “Tẹra aḍin ḅụ ó pịkị siin ì ḍọkụma-ḅoo.” Anie tomi ma nwẹnị so.

⁶ Anịtẹso Amadaḅọ Rehobohamụ nwẹnị ọ̀ ḍa Sọlọmọnị ḍumo wararị sakị ò tọrọkọ sịẹ-sịẹ omongiapụ ma gbela, tẹ ḅẹẹm, “ó tọ-ḅara kẹ ì toluma tẹ à kẹ mịna atomi ma pakịrị ḅẹ?”

⁷ In nwẹnị ọ̀ pakịrị, “í iḅi ḅara kẹ mịna tomi ma na mịẹ tẹ ịna ḅio ḅẹlẹma, tẹ iḅi ẹkwẹn kọn in pịrị-pịrị, anịrẹ ini í afịrịmẹnjịapụ sọ gbamaso ḅa.”

⁸ Kụma nimi ẹkwẹn mẹ tẹ omongiapụ ma kọọn ọ̀ pịrị ye mẹ ori anị sịkịm, kụma ori ọ̀ ḅara ḅẹ asawọ ma tẹ ori na ḍukama paka-ḅo tẹ ò tọrọkọ sịẹ apụ ma na ḅẹrẹ-ḅiyam.

⁹ Ọ̀ nwẹnị in ḅẹẹ “ó tiye ḍuko ì toluma tẹ à kẹ mịna tomi ma pakịrị ḅa, inima tẹ ì ḅẹẹm, ‘í ḍa kẹ wamịna pọkọ sụa ye mẹ mịẹ feke-fekemaa’, ḅẹẹ apụ ma?”

¹⁰ Ò ḅara ḅẹ asawọ ma nwẹnị ọ̀ ḅẹẹ mị-ḅara mịẹ ị́ kẹ tomi ma tẹ í ḅẹẹm, “í ḍa wamịna pọkọsụaye mịẹ ikumam, kụma anị mịẹ feke-fekema wa pịrị ḅẹẹ apụ ma;” mị-ḅara mịẹ ị́ kẹ in ḅẹẹ ḅarị ḅara, “ì kala ḅara-tụngbalị kpokoro ị̀ ḍa ḅiri nẹngịm.

¹¹ Anịsakị ị̀ ḍa nwẹnị iku ye kẹ ọmịna pọkọ sụa-sụa, yẹrị jen kẹ ọmịna pọkọ sụa ye mẹ ḅụ sụa ḅa. Fomuye mịẹ ị̀ ḍa kẹ ó fomu ye, kụma akpị mịẹ yẹrị kẹ fomuye sọma ó fomu ḅarịye”

¹² Anieḅụ Jerobohamụ na tomi mamgba na nwẹnị tẹra aḍin karama ene mẹ ḅụ Rehobohamụ amadaḅọ ḅe ḍọkụma-ḅo ọ̀ ḅẹẹ ḅara ḅụ, “ó pịkị siin tẹra aḍin karama ene ì ḍọkụma-ḅo.”

¹³ Amadaḅọ ḅe nwẹnị guda-guda ḅara kẹ in pakịrị tẹ omongiapụ mẹ kẹ ò toluma ye mẹ sịkị.

¹⁴ Asawọ ma kẹ wẹrịtẹ ò toluma ḅara mịẹ Amadaḅọ Rehobohamụ kẹ ẹkwẹn in pịrị ḅara, tẹ ḅẹẹm, “ị̀ ḍa ọmịna pọkọsụaye mịẹ ikumam, yẹrị ye kẹ anị ḅụ sụa ḅa, ị̀ ḍa fomuye kẹ ó fomum, kụma yẹrị akpị kẹ fomuye sọma ó fomu ḅa.”

¹⁵ Mịẹ ḅụ amadaḅọ ḅe tomi ma ḍuko ye mẹ ọkị-a; anị kẹ gotẹ ọkọ mịẹarị anie mịẹ tẹ KỊNỊNYANAḄỌ ḅe ẹkwẹn-ḅịḅị mẹ tẹ Ò kọn Ayija Silo ḅẹ ḅọ ḅe ḍuko Jerobohamụ Nebatị owiḅọtụḅọ ḅe pịrị ye mẹ mịẹ ḅẹ ḅara.

¹⁶ Izirẹlị mẹmgba amadaḅọ ḅe in ḍuko ye mẹ ọkị-a mẹ ẹrị tẹso, tomi ma nwẹnị amadaḅọ ḅe pakịrị, “ọrụ-warị-warịye-gbọ-kị-gbọ! wa Devidi ḅụụ tọ ḍiekiri nyana? Jese owiḅọtụḅọ ḅe ḅụụ wa ḍuu fị nyana-a. Yei Izirẹlị, ọrụḅọ-ọrụḅọ so amịna akpụrụ-warị mu! Devidi, tọrụ-pịkị í soku-ḅẹ warị ḍikii mịọkụ.” Anieḅụ Izirẹlị mẹmgba nwẹnị so in akpụrụ-warị mu.

¹⁷ Kụma Rehobohamụ ama-da Izirẹlịapụ ma pịrịm, inima tẹ Juda ḅụ anga apụ ma.

¹⁸ Anịtẹso Amadaḅọ Rehobohamụ nwẹnị Adoramụ, oriḅe tẹ kụrọ kọrịnama kẹ sịḅịdaḅọ ḅe kẹ Izirẹlị fịrịma, tẹ Izirẹlịapụ ma nwẹnị ḍụḅarị kẹ ò gbin ḅaa. Mịẹ ḅụ Amadaḅọ Rehobohamụ nwẹnị fọnya ḅara kẹ ò kirimẹnjị-ọmụarụ ḅụkụlọ tẹ ḍumo-mangị kọn Jeruselemu mu.

¹⁹ Mị-ḅara mịẹ Izirẹlị kẹ Devidi warị mẹ na ịgbanịya ḅụ sime ḅo mịmgba la ḅara.