2 Kọrịntị 9 - FỊAFỊA BAỊBỤLỤ

¹ Karakara-ḅara-ḅụ, à ḅarị jen kẹ ọ́ kẹ ḅarasụa, Tamụnọ atomi ma tẹ Judiya ḅụ simearị apụ ma, pịrị ḅẹ ye mẹ gboloma ḍiri kẹẹ ọ́ fịrịma na-iḅi-a.

² Ọ́ ḅarasụa ḅẹ-ḅiiarị mẹ à nwẹn nimi wararị ẹrẹsị, à pịkị ọ́ kẹ ḅụụ-boma Masidoniya ḅẹ apụ pịrị tẹ mịnẹ osi kụra kụra-ḅio, Akaya ḅẹ apụ tẹlẹma mị kọrịnama mẹ pịrị tẹ, tẹ ọmịna ḅio-sẹsẹ mẹ pịkị ịna ḅụ ḅẹ tọnwa-apụ jikema tẹ.

³ Mịọkụ à mịna mịnapụ ma kẹ fịrịmarị, mịẹtẹ mị mịẹye mẹ gboloma ye ḅụ wa kẹ ọ́ kẹ ḅụụ-bomarị ye mẹ ḅarị ḅo papaa ẹkwẹn sọ ḅịa ḅara. Kụma à ḍuko tẹ ḅara mẹ ḅụ, ọmịnị ọ́ kẹ ḅarasụa ḅẹ ye mẹ tẹlẹma wẹrị ḅẹ ḅara.

⁴ Kẹ ḍikii, à nwẹnị Masidoniya ḅẹ apụ na ḅo tẹ ọ́ tẹlẹma-a ḅara ḍọkị-nimi kụma, anị tọ-ḅara na gbasị ye kẹ ị̀ ḅụụ-jịrịma ḅa — ḅarị ọmịnị ma ḅioju ḅụụ-jịrị ḍuko-a ḅara ḅụ — anie wa ọkị lama ye mẹ mịnẹ ọ́ tẹlẹma wararị!

⁵ Anie gotẹ à kuromam anị mịẹ na-iḅi ye, ḍuko kụrọma mịna mịnapụ ma pịrị tẹ ini tarị mu ọ́ la tẹrẹmẹ yẹrị ḅo sakị la, tẹ ọ́ sakị pịrị tẹ ó minini ḍiepịrịye mẹ tẹlẹma wẹrị. Anịtẹso yẹrị ḅo la sakị anị nwẹnị tẹlẹma wẹrị wararị ye sọ, tẹ tomi nwẹnị nimi mịnẹ anị ọmịna ḅụụ-ḅẹlẹ ye sọ kẹ ọ́ pịrịarị; ọ́ pịrị-a so ḅịa nwẹn ḅẹẹ ye-a.

⁶ Ọ́ kẹ ḅiokoroma mịnẹ boowa mgbọlị ḍiḅi ḅọ boowa ye soku ḅa; tọnwa mgbọlị ḍiḅi ḅọ tọnwa aị soku ḅa.

⁷ Ọkọẹrẹsị, ọrụḅọ-ọrụḅọ, mḅọ ḅiotọn ḅara pịrị, pịrị tẹ tiye ì gbo ḅẹẹ, anịanịa pịrị-a so ḅịa, ḅẹẹ ḅara-a; kẹ gotẹ ọkọ ḍukoarị, Tamụnọ ḅioḅẹlẹ ḅara kẹ ye pịrịarị ḅọ mẹ ḅẹlẹmarị.

⁸ Anịsakị Tamụnọ ọ́ pịrị ḅinma wama tẹ ọ́ kẹ ọmịna ḅụụ-fụka mịẹ tẹ, pịkị kẹ jen mịẹ na-iḅi ye goyegoye mịẹ ḅa.

⁹ Anie Fịafịa Ḍiri mẹ ḍukoarị ḅara, “Ọ̀ tọnwa ḅara kẹ ye kẹ mịẹ ḅẹ ọkụ ofori apụ ma pịrịarị; ori iḅi-yemịẹ-ḅara sime gbamasom.”

¹⁰ Tamụnọ, tẹ ḍiḅi ḅẹ sịnmgbọlị na fị ḅẹ fịye na kẹ tomi pịrịarị ḅọ ḅe, ó ḍiḅi na-iḅi mgbọlị mẹmgba kẹ ọ́ pịrị, tẹ mịẹ tẹ anị so-paka tẹ fịaị pakama sara ḅa, ọmịna ḅara sarasara mẹ ḅụ.

¹¹ Tẹ Tamụnọ ọ́ mịẹtẹ ọmịnị iḅi ḅara kẹ sakị mamgba ngọ kọn tẹ sakị mamgba ḅara sarasara ḅara kẹ ye ḍie kịnị pịrị, tẹ wamịna ḅara ọmịna ḍiepịrị-aị ma daa-ọkị apụ ma ḅẹ tọnwa-apụ ịmịẹtẹ kẹ Tamụnọ ḅẹẹ ḅa.

¹² Ọ́ nwẹn mẹnjịarị iḅi fịrị mẹ, anị Tamụnọ atomi ma ḅụụ-fụka mịẹ pẹlẹarị mẹ kịngẹ-a, tomi pịkị kpọma anị ḅụ ḅọrọ tẹ tẹmẹ-la ịmịẹtẹ kẹ Tamụnọ ḅẹẹarị.

¹³ Tẹ ọ́ mẹnjịarị fịrị mẹ dogi-ḅo ye gotẹ, tọnwa atomi ọ́ sịḅị-tuu Kịrayịsị iḅi-oku mẹ pịrị ye ẹrẹsị Tamụnọ ebube mẹ boma ḅa, anie ó ḍuko-pakamarị ye mẹ, ọmịna ḅara sarasara ḅụ ọ́ nyana aị kẹ ḅẹḅọ-ḅẹḅọ na ḍiyarị mẹ.

¹⁴ Mie ḅụ pokolotẹ ḅẹlẹma ḅụ ịn Tamụnọ tẹkẹ ọ́ pịrị ḅa, ḍuko na-iḅi-a ḍiki-ḅụụjịrị tẹ Tamụnọ kẹ ọ́ pịrị ye mẹ ẹrẹsị.

¹⁵ Ó yee wa ịmịẹtẹ kẹ Tamụnọ ḅẹẹ, ọ̀ kẹ wa pịrị wararị igbigi inetẹ fẹẹ ḅịa ḍiepịrịye mẹ gotẹ.