2 Kọrịntị 7 - FỊAFỊA BAỊBỤLỤ

¹ Ì iḅi ikiapụ, mịna aị mamgba Tamụnọ minini wa pịrị tẹẹ. Ọkọẹrẹsị, ó yee wa ye goyegoye, tẹ oju na tẹmẹ na simearị ye ḅụ, wamịna-aḅụụ wẹrị fịafịama, tẹ wa nwẹnị gbọrsịḅị fịafịa fama, Tamụnọ ḍiki-ḅalafa ḅụ ḍumo kọn ḅụ.

Pọlụ Ḍerekum

² Ọ́ mịẹtẹ wa ọmịna aḅioḅẹngbọ ḅụ kiri nyana; wa si kẹ mịẹ ḅọ ofori; wa mịẹtẹ ye si pịrị fama ḅọ ofori; wa pịkị mḅọ la ḅẹ kiri mingirima ọkị ḅọ sọ ofori.

³ Àrị ọmịna ḅụụ ḅẹ siye ḍuko-a; kẹ gotẹ ọkọ ḍukoarị, à tarị ḍuko tẹ ḅara ḅụ, ọ́ wamịna ḅụụ yela wararị ye ḅụ, sakị mamgba wa ọmịnị na gbọrụ ḅụ ḅụ emii, wa ḅọrọ ḍumoarị-o, fịịarị-o.

⁴ Àrị ọmịna ḅụụ ḅiokpọ nyana lama wararị; àrị ọ́ kẹ ḅụụ-tọn-arị ḅara ḅakam! Wamịna ḅụụ-fụka mamgba ḅụ sọ ị̀ tẹmẹ paa kụrọ wararị; ḅioḅẹlẹ ị̀ ḅụụ ḅio sọ ḅin waa tẹ.

⁵ Wa ḅo Masidoniya la tẹso, wa paa ịnyọsara nyana-a. Wa ḅọrọ anga, ḅọrọ anga, ḅẹrẹ, ḅẹrẹ, ḅẹrẹ, ja apụ wamịnị na kamụ-sọarị, ḅalafama aị pịkị wamịna aḅioḅẹngbọ emi.

⁶ Kụma ḅioḅẹngbọ ḅịkị fama tẹ apụ ma ḅiokpọmarị Tamụnọ ḅe mịẹ tẹ Tayịtọsị ḅo ye mẹ nwẹnị wamịna ḅiokpọma.

⁷ Ò ḅo la ye mẹ kịngẹ wamịna ḅiokpọma-a, kụma ọ́ kẹ wẹrịtẹ ò ḅiokpọma tẹ ò ḍuko wa pịrị ye mẹ sọ wamịna ḅiokpọmam. Ị̀ ẹrị ọ́ tarị la ḅara na, paka ye mẹ ó kururuma la ḅara na, ọ́ tẹlẹma tẹ ị̀ ḍụa ḅii ḅara na sọ ò ḍuko famam, tẹ anị nwẹnị mịọkụ ì ḅioḅẹlẹma lamarị.

⁸ À kẹẹ tẹ kẹ ọ́ fịrịma ḍiri mẹ nwẹnị ó kururuma sọ, à tiye-ì-gbo ḅẹẹ-a. Mimgbe à tiye-ì-gbo ḅẹẹ tẹ, arị ẹrịm mịnẹ boowa kala-sakị kịngẹ mie anị kẹ ó kururuma yee nwẹn ḅẹẹ kụma.

⁹ Kụma mịọkụ anị kẹ ì ḅioḅẹlẹmarị ye anie, anị ó kururuma ye mẹ-a, kụma anị mịẹtẹ ọmịna ḍumo ḍima tẹẹ. Tamụnọ ọmịna kururu mẹ kẹ kọrịnama kọrị tẹ, anị ḅarị si kẹ ọ́ mịẹ-a.

¹⁰ Kẹ gotẹ ọkọ ḍukoarị, Tamụnọ kururu mẹ kẹ mịẹtẹ ḅioḅẹngbọ ḍima paka tẹ, ọ́ kẹ mu ḅọrọma ḅụ suu tẹ — anie ḅụ tomḅọ gotẹ tiye-ì-gbo ḅẹẹ ḅẹẹ ye ofori! Kụma papaa tomina ḅara kẹ kururu mẹ fịị dogi-ḅoarị.

¹¹ Tamụnọ ọmịna kururu mẹ kẹ kọrị kọrịnama ḍikii: anị mịẹtẹ ọmịnị iḅiọkụ ḅẹrẹ kẹ ḅiokoroma, tẹ ọmịnị ó nimi ye ofori mẹ mịẹ pakamam! Anị mịẹtẹ ịganị na, tiye pakarị mọ ḅẹ ḅụụ-ḅalaḅala na, ye ḅụụ ịnọ akuroma na, kpọma ye kẹ ye-sịn tẹ mịẹ tẹmẹ na, pịkị tẹlẹma tẹ fomu-ḅara kẹ si mịẹye pịrị sọ anị dogi-ḅom. Paka ye mẹmgba ḅụ ó nimi ye ofori mẹ ọ́ mịẹtẹ anị giregire tẹ kịnị ẹrị tẹ.

¹² Mie ḅụ, karakaraye arị anị ḍiri mẹ kẹẹm ḅẹsọ, à si mẹ mịẹ ḅọ, anịanịa mḅọ si mẹ kẹ mịẹ ḅọ gotẹ ḍiri mẹ kẹẹ-a. Anie nakara, à gotẹ anị kẹẹ ye, kẹ mịẹtẹ ọ́ banabana ḅara kẹ nimi, Tamụnọ ẹrịarị ḅara ḅụ, ọ́ ḅụụ saakị wa pịrị ḅara mẹ pokolo la ḅiri kẹ ó ḍie, karakara-ḅara-ḅụ.

¹³ Anie wa pịkị gotẹ ḅiokpọ ye. Ó ḅo mẹ wamịna ḅiokpọmam ngẹrị-a, Tayịtọsị kẹ wamịna ḅioḅẹlẹma ye ḅakam; ori mẹẹ ọmịnị-mgba ḅarasụa ọ̀ pịrị tẹ pịkị ọ̀ ḅụụ-sọnsọnma tẹ ò ḅioḅẹlẹm!

¹⁴ À kẹ ọ́ kẹ ḅụụ-boma ọ̀ pịrị ḅara ḅụ, ọmịnị ị̀ tọrụ-tuu-a. Sakị mamgba wa karakara mẹ ḍuko ọ́ pịrị tẹ; anị gbọrụ ḅara ḅụ wa ọ́ kẹ ḅụụ-boma Tayịtọsị pịrị ḅara mẹ sọ karakara ye sọ tẹ.

¹⁵ Mie ḅụ, ọ̀ nyana ọ́ pịrị wararị ḅẹlẹma mẹ kụrọ tarị ḅara nẹngị tẹ, anie ori ọmịnị-mgba tẹlẹma tẹ ọ̀ ḅịḅị poki ḅara na, ọ́ ḅalafa na ḅụụ tukutuku ḅara kẹ ọ̀ daa-ọkị ḅara na, kẹ ḅiokoroma sakị sakị ḅụ.

¹⁶ Anị kpọma ì ḅioḅẹlẹmarị mịnẹ arị inetẹ ye kọnma-a ḅara kẹ ọ́ kẹ ḅiokpọma fama ḅa.