2 Kọrịntị 6 - FỊAFỊA BAỊBỤLỤ

¹ Wa Tamụnọ na gboloma tẹ kọrịarị kọrịnama mẹ ḅụ wa ọmịnị Tamụnọ ḍiki-ḅụụjịrị mẹ nyana tẹ apụ ma tẹkẹarị, ọ̀ ḍụkụ tẹ anị papaa fama.

² Ọ́ Tamụnọ ḍukoarị ye naa: “Àrị iḅi kẹ ọ́ mịẹ ḅẹ sakị la sakị, arị ọ́ naam; arị ọ́ ḅọrọma ḅẹ ene mẹ ḅụ, à ḅarasụa ọ́ pịrịm.” Ó pokii! Mie Tamụnọ iḅi kẹ wa mịẹ ḅẹ sakị mẹ; mie ọ̀ wa ḅọrọma ḅẹ ene mẹ!

³ Wa ḅii-a gbọrụḅọ-sọ wamịna kọrịnama ḅụ si ḍọkị, ọkọẹrẹsị wa pịkị gbọrụḅọ-sọ etela kiki ḅẹ ḍọkị-a.

⁴ Anie nakara, wa mịẹarị ye, mịẹarị ye ḅụ, wa kẹ kịnị ḍiearị mịnẹ wamịnị Tamụnọ fịrịmẹnjịapụ, ye-inema alama na, ḅụụ-fụka na, kụrọ-kụrọ aị na kpọma ḅụụ-fụkama aị na da ḅụ.

⁵ Ịn wa fomu tẹ, wa kẹ ikoli suu tẹ, pịkị wa gbori tẹ; ịn wamịna ịnyọ nẹngị kọrịnama kẹ wa pịrị kọrị tẹ, mono sọ wa mono-a, fịye sọ wa fị-a.

⁶ Wamịna fịafịa na, ye-nimi na, ye-inema na, iḅi ḅara kẹ kịnị na anga na ḅụ wa ḍie-pakama tẹ mịnẹ wamịnị Tamụnọ afịrịmẹnjịapụ — Fịafịa Tẹmẹ ḅe ḅụ, karakara ḅẹlẹma ḅụ,

⁷ wamịna karakara oku ḅụ, na Tamụnọ kụrọ ḅụ na. Karakara mịẹ anie owuna-aị tẹ wa ḅiri ye, tẹ kẹ owu pakarị pịkị kẹ ḅụụ ḍụarị.

⁸ Ịn wa kụn-arị ịn pịkị ḅụụ-jịrịma ye kẹ wa mịẹarị; ịn wa mịẹ-simarị, ịn pịkị wa bomarị. Ịn wa kẹ iruo apụ sịn-arị, anịsọ karakara mẹ mie wa ḍukoarị;

⁹ gbala kịnị nimi-a apụ, anịsọ kịnị mamgba wa nimi wararị; wa fịtẹ pembe ḅara kụma ọmịnị ẹrịarị ḅara ḅụ, wa ḍumo ma muarị. Karakaraye ịn wa fomum, ịn wa ḅaa-a;

¹⁰ karakaraye ịn wa kururuma ḅẹ mịẹm, sakị mamgba wa ḅioḅẹlẹarị; wa igoin-apụ kịkarị, kụma wa mịẹtẹ tọnwa-apụ ngọ kọn-arị; wa gberie-sọ nyana-a apụ ḅara simearị, anịsọ wa ye goyegoye nyana wararị.

¹¹ Ì iḅi ikiapụ, tẹ Kọrịntị ḅụ simearị apụ! Wa ye ḅọị-a ḅara kẹ ẹkwẹn ọ́ pịrị tẹ; wa wamịna aḅioḅẹngbọ finji sara ọ́ pịrị tẹ.

¹² Wamịnị rẹ wamịna aḅioḅẹngbọ gbaịn ọ́ pịrị-a; ọmịnị mie ọmịna aḅioḅẹngbọ gbaịn wa pịrị wararị.

¹³ Mịọkụ àrị ị̀ awọmẹ ḅara kẹ ẹkwẹn ọ́ pịrịarị: wa sụa ọ́ pịrị iḅi ḅioḅẹngbọ mẹ, ọmịnị sọ ọmịnị ọkọ sime ye sụa wa pịrị wararị nwẹn ḅẹẹ ye kẹ wa ḍie. Ọmịnị ọmịna aḅioḅẹngbọ finji sara wa pịrịị.

Oru Nimi apụ Ḍiki-ḅụụkịẹn

¹⁴ Ọ́ Kịrayịsị minini-a apụ ma na gboloma tẹ gbọrụ ḅụ ḅụ kọrịnama kọrị ḅẹ ḍọkị ma, kẹ gotẹ ọkọ ḍukoarị, aniemẹ inetẹ mịẹ ḅẹ ye-a. Ndẹẹ kuraye na kura-aye na gbọrụ ḅụ sime ḅẹ ḅara? Ndẹẹ bele na kanakana na anga gboloma ḅẹ ḅara?

¹⁵ Ndẹẹ Kịrayịsị na Ekwesu ḅe na gbọrụ-ḅịḅị-fie ḅẹ ḅara? Minini ḅọ na minini-a ḅọ na tiye nyana gboloma?

¹⁶ Ndẹẹ Tamụnọ-warị mẹ na oru-afụḅara na gberie mịẹ ḅẹ ḅara? Kẹ gotẹ ọkọ ḍukoarị, wamịnị anie ḍumo wararị Tamụnọ ḅe warị mẹ! Anie Tamụnọ ḅarana ḅẹẹ tẹ ḅara, “Àrị ị̀ atomi ma na sime tẹ ịna ogboku anga ḅa; àrị ịna Tamụnọ sọ tẹ ini ị̀ atomi sọ ḅa.”

¹⁷ Tẹ mie ḅụ KỊNỊNYANAḄỌ ḅe mẹẹ, “Ọmịnị in koroma-so, tẹ ọmịna aḅụụ puu-ḅelema ịna ḅụ. Ọ́ fịafịa-a ye na gbọrụ mịẹye sọ nyana ma, tẹ àrị ọmịnị ọkị ḅa.

¹⁸ Àrị ọmịna Ḍaḅọ sọ ḅa, tẹ ọmịnị ị̀ owiapụ-awọmẹ na ị̀ eremịna-awọmẹ na sọ ḅa, Kụrọmamgba nyana KỊNỊNYANAḄỌ ḅe ọkọ ḅẹẹarị.”