2 Kọrịntị 5 - FỊAFỊA BAỊBỤLỤ

¹ Wa nimi wararị mị tomikiri ḅụ wa angarị akpụrụ-warị mẹ, anie wamịna oju mẹ, ḅịkị sakị, Tamụnọ So-ḅio ḅẹ warị kẹ wa pịrị anga ḅa, ori ḅarana nama warị, tẹ sime gbamaso ḅarịye mẹ.

² Tẹ mịọkụ wa ẹsịmarị, anie wa kpọma ḅii lamarị mịnẹ wamịna So-ḅio ḅẹ warị mẹ ḅo wa pịrị, tẹ wa gbaịn;

³ anị wa gbaịn wararị ogbo wa ḅarị paụ ḅịa.

⁴ Kẹ gotẹ ọkọ ḍukoarị wa mị tomikiri mẹ ḅẹ akpụrụ-warị mẹ ḅio simearị sakị mẹ ḅụ wa iningiarị, gbala ikuye wa ponoma wararị ye ọkụ; anie ḅẹẹ-a mịnẹ wa ḅarị wamịna tomikiri ḅẹ oju mẹ ḅii-a, kụma wa ḅiiarị mịnẹ Tamụnọ So-ḅio ḅẹ oju kẹ wa sụa, mịẹtẹ fịị, fịị ye mẹ ḍima ḅo ḍumo sọ.

⁵ Tamụnọ anie wa tẹlẹma mị ḍima mẹ pịrị ḅọ, tẹ pịkị ọ̀ Tẹmẹ kẹ wa pịrị tẹ ori onyo-sẹịn ọ̀ kẹ wa wẹrịma wararị aị mamgba pịrị ye.

⁶ Anie mịẹtẹ wamịna tẹmẹ jikearị gbọrụ sakị sọ ofori. Wa nimi ye, wa mị oju mẹ ḅio angarị sakị goyegoye, wa KỊNỊNYANAḄỌ ḅe sime anga mẹ na ḅele wararị.

⁷ Gbala minini ḅụ mie wa angarị, tọrụngbọ kẹ ẹrịarị ye ḅụ-a.

⁸ Wa ḅiokpọ lama wararị, tẹ mie wa angarị meni-oju ḅẹ ḍumo mẹ ḅụ so mu KỊNỊNYANAḄỌ ḅe na anga wamịna ḅụụ-ḅẹlẹ tẹịn ḅa.

⁹ Anị sime-ḅara, sime-ḅara sọ, wamịna ḅụ ḅẹrẹ ḅẹẹye-ḅẹẹye nẹngị ye, anie KỊNỊNYANAḄỌ ḅe ḅioḅẹlẹma, wa angarị anga ḅọrọ mịanga-o, anịanga-o.

¹⁰ Kẹ gotẹ ọkọ ḍukoarị, wamịnị-mgba Kịrayịsị tọrọkọ paka-ḅo tẹ ọ̀ wa kọn ḅa. Ọrụḅọ-ọrụḅọ mḅọ ọkị gbẹẹ ye ọkị ḅa, anie mḅọ meni-oju mẹ ḅụ ḅẹ ḍumo ḅụ sime sakị mḅọ mịẹ ye, mịẹ ye sime-ḅara, iḅiye-o, siye — ó.

Kịrayịsị Ḅụ Ḅọrọtẹ Tamụnọ Na Ikia So

¹¹ Wa KỊNỊNYANAḄỌ ḅe mangịma mẹ fiearị ye nimi wararị, ọkọẹrẹsị wa ḅụụkụrọma tẹ ja apụ daa-karakaramarị. Tamụnọ wamịna ḅụ nimi kọnma ye ofori, tẹ à ḅiokpọ wararị mịnẹ ọmịna aḅioḅẹngbọ ḅụ sọ ọmịnị ì nimi wararị.

¹² Wa jen kẹ wamịna-aḅụụ ḍuko finji ọ́ pịrị ḅẹ ḍọkị-a; anie nakara wa mịẹ tẹ ó gotẹ wa kẹ ḅụụ-tọn na-iḅi ye-nimi, mịẹtẹ tọrụ kẹ tomḅọ sime-ḅara ḍiki tẹ mḅọ ye-mịẹ-ḅara ḍukoarị apụ ma ḅụụ-boma ḅẹ sakị ọmịnị inetẹ kẹ ịn pakịrị ḅarịye nyana ḅẹ ḅara.

¹³ Karakara-ḅara-ḅụ wa nọmụarị aro? Ọkọ ḅẹḅẹ, wa Tamụnọ gotẹ nọmụarị. Anịanịa wamịna tọrụ kpaịn wararị ḅarị ya? Ọkọ ḅẹḅẹ, ọmịnị mie anị gotẹ ọkọ sime ye.

¹⁴ Kịrayịsị ḅẹlẹma mie ḅẹrẹtọn wa pịrịarị, mịọkụ wa ḅo nimi tẹ ḅara, mịnẹ gbọrụ tomḅọ fịị ḅẹḅọ-ḅẹḅọ pịrịm, anie fiearị kịnị mamgba ọ̀ fịị mẹ ḅụ ḍiekiri nyana tẹ.

¹⁵ Ọ̀ fịị inweni-mgba pịrịm, mịẹtẹ ḍumoarị apụ ma ḅarị jen kẹ ḍumo ịna aḅụụ pịrị ḅịa ḅara, kụma ḍumo fịtẹ ịn fịị ḅụ saakịma ḅọ ḅe ngẹrị pịrị.

¹⁶ Ọkọẹrẹsị, wa ḅarị jen kẹ tomina tọrụ kẹ gbọrụḅọ-sọ ḍiki tẹ kọn ḅịa. Karakaraye gbọrụ sakị wa tomina tọrụ kẹ Kịrayịsị ḍiki tẹ ọ̀ kọn tẹ nwẹn ḅẹẹ sọ, wa ḅarị jen kẹ ọkọ mịẹ-a.

¹⁷ Ḅẹḅọ-ḅẹḅọ tẹ Kịrayịsị na gboloma tẹ ḅọ, mḅọ ịwọ tomḅọ sọ tẹ; elemu ye mẹ ḅọrọ-so tẹ, ịwọ ye mẹ ḅo la tẹ.

¹⁸ Mie-mẹmgba Tamụnọ kọrịnama. Kịrayịsị ḅụ ḅọrọ tẹ wamịnị si kẹ ọ̀ tọn apụ ḅụ wa ḍima ḅo ori ikiapụ sọma, Tamụnọ ḅe mie mị fịrị mẹ kẹ wa pịrị ye wa mẹnjịị, tẹ ja apụ mịẹtẹ ini sọ ḅo ori ikiapụ sọ.

¹⁹ Wa kẹ ḅo oku anie, Tamụnọ Kịrayịsị ḅụ ḅọrọtẹ tomikiri ḅẹ atomi mamgba kẹ ori ikiapụ sọma ḅẹm. Tamụnọ wamịna asi kịẹn wamịna ọgọnọ gbana-a, tẹ ọ̀ mịẹtẹ in ḅo ori ikiapụ sọarị ḅara mẹ ḅẹ oku mẹ kẹ wa pịrị tẹ wa mu ḍukoo.

²⁰ Ọkọẹrẹsị, mịanga wa sime tẹ Kịrayịsị tọrụ ḍima tẹ ẹkwẹn-arị apụ ḅara ḅụ, gbala Tamụnọ ḅarana wamịna ḅịḅị ḅụ ọ̀ tẹkẹarị mịnẹ: sisi ó minini tẹ Tamụnọ si kẹ ọ̀ tọn apụ ḅụ ó ḍima ḅo ori ikiapụ sọmaa!

²¹ Kịrayịsị ḅụụ gbọrụ si sọ ofori, kụma wamịna sịḅị gotẹ Tamụnọ mịẹtẹ ọ̀ wamịna si ḅụ ḍiekiri nyanam, mịẹ tẹ wamịnị sọ, ori na gbọrụ ḅụ sime ḅụ, Tamụnọ karakara mịẹ mẹ ḅụ ḍiekiri nyana ḅẹ ḅara.