2 Kọrịntị 4 - FỊAFỊA BAỊBỤLỤ

¹ Tamụnọ ò ḍiki-ḅụụjịrị ḅụ mị kọrịnama mẹ kẹ wa pịrị kọrịarị ẹrẹsị, wamịna ḅioḅẹngbọ lọkọ-a.

² Wa ḅọị tẹ ḅụụ-jịrịma amịẹaị mamgba saakị anga pịrị tẹ; wa oḅori-kẹ-kịnịsịn amịẹaị mịẹ-a; wa pịkị Tamụnọ ẹkwẹn mẹ ḅẹẹ-a ḅara kẹ anị ḍuko-a; wa Tamụnọ tọrọkọ ḅụ ḅintẹ ḅara kẹ karakara mẹ ḅẹ bele mẹ ḅio angarị, tẹ ḅụụkụrọma tẹ mịẹtẹ ḅẹḅọ-ḅẹḅọ iḅi tẹmẹ ḅioḅẹngbọ kẹ wamịna karakara mẹ nimi ḅẹ ḅara.

³ Wa ḍukoarị iḅi-oku mẹ kikimaye sọ wararị ḅẹḅẹ, anie faarị apụ ma ngẹrị ḅụ mie anị kikima ye sọ wararị.

⁴ In gotẹ minini-a ye anie mị tomikiri mẹ ḅẹ oru ḅe ịna akuroma kẹ kanakana ḅio wẹrị wararị. Ọ̀ ḍụkụ tẹ ịn ḅịya ịn saramarị bele mẹ ẹrị-a, anie Kịrayịsị ebube mẹ gboloma Iḅi-Oku mẹ ḅẹ bele mẹ. Kịrayịsị ḅe anie karakara ḅara kẹ Tamụnọ na kịkarị ḅọ ḅe.

⁵ Wa wamịna-aḅụụ ḍuko pakama-a; Jizọsị Kịrayịsị anie KỊNỊNYANAḄỌ ḅee mẹ mie wa ḍuko-pakamarị, tẹ wamịnị ma nwẹnị ọmịna afịrịmẹnjịapụ, Jizọsị Sịḅị ẹrẹsị.

⁶ Tamụnọ ḅe tẹ ḅẹẹm, “Bele kanakana ḅio ḅịya paka ḅa”, ḅẹẹ Tamụnọ ḅe mie mịẹtẹ ò bele wamịna aḅioḅẹngbọ ḅụ ḅịya tẹ ye, mịẹtẹ wa Tamụnọ ebube mẹ tẹ Kịrayịsị tọrụkuḅu ḅịya pakarị ye mẹ ḅẹ nimi mẹ ḅo wa pịrị ḅẹ ḅara.

⁷ Anịsọ wamịnị, mị tẹmẹ ḅụ ḅẹ ngọ mẹ kọn apụ ma, papaa aḅaịn-aḅẹlẹ mie wa kịkarị, mịẹtẹ kịnị nimi ḅẹ ḅara, mịnẹ kụrọ mamgba nyana ḅọ anie Tamụnọ, wamịnị-a.

⁸ Tọnwa sakị wa ḅụụ-fụka daarị, kụma anị wa ḅaa-a; ja sakị wamịna ḅioḅẹngbọ maaịn maaịn tọn-arị, kụma wamịna ḅioḅẹngbọ lọkọ-a;

⁹ si kẹ wa tọn-arị apụ ḅakam, kụma wa amụ gbala-gbala ikia nyana-a ḅara sime-a; tẹ karakaraye ja sakị ye iḅiọkụ wa laarị, anịsọ wa fịị kpatakpata-a.

¹⁰ Sakị mamgba wa Jizọsị fịị mẹ dogi mẹnjịarị wamịna fịị, fịị oju ma ḅio, mịẹtẹ tomi pịkị wamịna oju ma ḅụ ò ḍumo mẹ ẹrị ḅẹ ḅara.

¹¹ Jizọsị sịḅị gotẹ, bebe wamịna aḍumo mamgba ḅụ wa fịị akaka sịẹ wararị, mịẹtẹ tomi wamịna fịị-fịị oju mẹ ḅụ ò ḍumo mẹ ẹrị ḅẹ ḅara.

¹² Miemẹ fiearị mịnẹ fịị wamịna oju ḅio kọrịnama kọrịarị, kụma ḍumo ọmịna oju ḅio kọrịnama kọrịarị.

¹³ Fịafịa Ḍiri mẹ ḅẹẹarị, “Àrị ẹkwẹnm, à mininim ẹrẹsị.” Anị gbọrụ minini tẹmẹ mẹ ḅụ wamịnị sọ ẹkwẹn-arị wa mininim ẹrẹsị.

¹⁴ Wa nimi wararị mịnẹ, fịị ḅụ KỊNỊNYANAḄỌ Jizọsị ḅe saakịma tẹ ò ḍumo Tamụnọ ḅe, wa kẹ Jizọsị na sụa saakịma tẹ kẹ ọmịnị na sụa ọkị mu ọ̀ tọrọkọ la ḅa.

¹⁵ Mie-mẹmgba ọmịna sịḅị gotẹ mịẹarị; tẹ Tamụnọ ḍiki-ḅụụjịrị mu tọnwa tọnwa atomi laarị ḅara ḅụ, ịn tọnwa ḅara kẹ ịmịẹtẹ ḅẹẹ atẹkẹ kọn Tamụnọ ebube mẹ pịrị ḅa.

Minini Ḅụ Anga

¹⁶ Miemẹ ẹrẹsị, jene-jene wamịna ḅioḅẹngbọ amụ lọkọ-a. Karakaraye wamịna meni-oju mẹ lọkọ ma-muarị sọ, wamịna tẹmẹ ḍumo ḅụ wa ịwọ ịnyọ sụarị ene-ḅaaene-ḅaaene.

¹⁷ Mịọkụ mie wa daarị ḅọrọ so ḅarị ḅụụ-fụka kalịye mẹ, opu sime-gbamaso ebube, tẹ ḅụụ-fụka mẹ nẹngị lama ḅarị ye kẹ ḅo wa pịrị ḅa.

¹⁸ Kẹ gotẹ ọkọ ḍukoarị, wa tọrụngbọ ẹrịarị aị kẹ ḅiokpọma-a kụma tọrụngbọ ẹrị-a aị mie wa kẹ ḅiokpọmarị. Tọrụngbọ ẹrịarị ye mẹ boowa kala sakị kịngẹ mie anị kẹ simearị, kụma tọrụngbọ inetẹ ẹrị ḅịa ye mẹ sime gbamasoarị.