2 Kọrịntị 3 - FỊAFỊA BAỊBỤLỤ

Ịwọ Ọḅọkụ Mẹ Ḅẹ Fịrịmẹnjịapụ

¹ Miemẹ ḅọrọ gbala wa pịkị ḅụụ-bomarị ye kịkarị ḅoto? Anị ḅọrọ wa kịnị aḅara wamịna sime-ḅara ḍukoarị ḍiri da ḅo ye, anịanịa ọmịna ḅara ḅụ ḅo ḍiri kẹ ọ́ pịrịarị ye ḅoto?

² Ọmịnị ma anie ḍiri tẹ wa nyana ye, wamịna ḅioḅẹngbọ ḅụ kẹẹ koro wararị, tẹ ḅẹḅọ-ḅẹḅọ nimi tẹ goarị ye.

³ Anị giregire wararị, mịnẹ Kịrayịsị ḅarana mị ḍiri mẹ kẹẹ tẹ kẹ wamịna ḅara fịrịmam. Ịn ḅuruma kẹ kẹẹ-a, kụma ḍumo wararị Tamụnọ ḅe Tẹmẹ ḅe mie ịn kẹ kẹẹ ye, pịkị ḍụḅarị ḍiri kẹẹ aị ọgọnọ-a, kụma tomina aḅioḅẹngbọ ḅụ.

⁴ Wa gotẹ miemẹ ḍukoarị, wa Tamụnọ kẹ ḅiokpọmarị, Kịrayịsị ḅụ.

⁵ Wamịna aḅụụ ḅio emi tẹ wa gotẹ wa inetẹ mị kọrịnama mẹ kọrị ḅa kẹ wamịna-aḅụụ ḅẹẹarị gberie-sọ ofori. Wa nyana kụrọ Tamụnọ ḅara mie anị ḅoarị;

⁶ ori mie mịẹtẹ wa ịwọ ọḅọkụ mẹ ḅẹ fịrị mẹ mẹnjịarị, anie kẹẹ koro wararị Oloko ḅụ ofori ye mẹ, kụma Tẹmẹ ḅe ḅụ. Kẹẹ koro wararị Oloko mẹ fịị dogi-ḅoarị, kụma Tẹmẹ ḅe ḍumo pịrịarị.

⁷ Oloko mẹ ḍụḅarị ọgọnọ mie ịn sọkị ḅara kẹ anị kẹẹ ye, tẹ ini anị kẹ ḅo sakị Tamụnọ ori ebube ḍie-pakamam. Ebube mẹ ḅịya mẹ tẹ ḅo Mozizi tọrụkuḅu sarama ye mẹ ḍisi simem sọ, anị ḅẹ kụrọ mẹ gotẹ Izirẹlịapụ ma inetẹ da-da ò ḍiki-a. Fịị dogi-ḅoarị oloko mẹ kụrọ nyana wararị sakị ḅụ, anị ọkọ sime ebube nyana kụma,

⁸ Tẹmẹ ḅe kọrịnama mẹ ḅẹ ebube mẹ tọ-ḅara kẹ ḍụḅa ḅẹ!

⁹ Si kẹ tomina sịḅị sẹịn-arị ye mẹ ḅẹ kọrịnama mẹ sọ ọkọ sime ebube nyana kụma, ḅọrọma ọkị-ḅoarị kọrịnama mẹ ḅẹ ebube mẹ kpọma tọ-ḅara kẹ tẹịn ḅa!

¹⁰ Wa inetẹ ḅẹẹ ḅa mịnẹ mịọkụ ḅẹ ebube mẹ ḅẹ ḅịya mẹ tarị ye mẹ nẹngị la ḅara ḍiki sakị, elemu ye mẹ ḅịya ḅara, ḅịya ḅara sọ, anị ḅọrọ tẹ.

¹¹ Kẹlẹ sime tẹ ḅọrọ so ḅarịye sọ ebube nyana kụma, sime gbamaso ḅarịye tọ-ḅara kẹ ebube nyana tẹịn ḅa!

¹² Wa mị ḅiokpọmaye mẹ nyana wararị ẹrẹsị wa ḅiokpọ lama wararị.

¹³ Wamịnị Mozizi tẹ Izirẹlịapụ ma ḅofa ebube mẹ ḍisi tẹ ḅọrọ soarị ye mẹ ẹrị gotẹ ḅịtẹ kẹ tọrụ gbaịn ḅịa.

¹⁴ Karakara-ḅara-ḅụ ịna ḅioḅẹngbọ pụụnm. Ọkị ḅo mịmgba la sọ, ịna atẹngịapụ ma ọḅọkụ mẹ ḅẹ ḍiri mẹ go sakị go sakị, gbala ḅịtẹ paa ịna akuroma gbaịn wararị. Tomḅọ Kịrayịsị na gberie mịẹ tẹrẹmẹ mie mḅọ tọrụ gbaịn wararị ḅịtẹ mẹ so ḅarịye.

¹⁵ Mịmgba mẹ sọ, in Mozizi Oloko mẹ goarị sakị ịna ḅioḅẹngbọ paa gbaịn wararị.

¹⁶ Kụma anị inetẹ so ḅa Fịafịa Ḍiri mẹ Mozizi gboloma ye mẹ ḅụ ḅẹẹ ḅara, “Mozizi pịkị KỊNỊNYANAḄỌ ḅe da tẹso, ọ̀ tọrụ gbaịn ḅịtẹ mẹ som.”

¹⁷ Mịọkụ mịanga ịn kẹ “KỊNỊNYANAḄỌ ḅe” ḅẹẹ ḅọ ḅe anie Tẹmẹ ḅe, tẹ KỊNỊNYANAḄỌ ḅe Tẹmẹ ḅe simearị goyegoye, anịanga omoni-sọ ofori.

¹⁸ Ọkọẹrẹsị, wamịnị-mgba, ye tọrụ kikima-a ḅara ḅụ, KỊNỊNYANAḄỌ ḅe ebube mẹ ḅịya wa saramarị; tẹ anị gbọrụ ebube mẹ tẹ KỊNỊNYANAḄỌ ḅe ḅụ sime tẹ ḅoarị ye mẹ, anie Tẹmẹ ḅe tẹ wa ḍima tẹ wa ḅo ọ̀ kịka tẹ mu ḅaka-ḅaka-ḅakarị ebube ḅụ sọarị.