2 Kọrịntị 13 - FỊAFỊA BAỊBỤLỤ

Kunoma Ḅeri nụnụ Ẹkwẹn Ma Na Ḅii-ḅịḅị Ma Na

¹ Mie tẹrẹị karama sakị tẹ à ḅo ọ́ la ḅẹ ḅoarị sakị. Fịafịa Ḍiri mẹ mẹẹ, “Kịnị kẹ tomḅọ sịḅị sẹịn ye, sẹịn ye, anị mịẹ kiri ḅụ sime maa apụ anịanịa tẹra apụ in nimi ḅara kẹ anị mịẹ kụrọma tẹrẹmẹ ọ́ kẹ bebe ye sịn.”

² À ḍuko ọmịna ḅụ, ḅọrọ tẹ sakị ḅụ, si mịẹ tẹ apụ ma na, kirikọn-apụ ma na pịrị ḅẹ-ḅiiarị ye emi; à maa sakị karama sakị kẹ ḅo ọ́ la sakị à ḍukom, mịọkụ à pịkị ḍukoarị, arị anịanga ofori sakị mẹ ḅụ, mịnẹ yẹrị ḅẹ jen ḅo ḅụ siye mịẹ tẹ fomu-ḅara gbarị ḅẹ gbọrụḅọ-sọ paka ḅịa.

³ Ó ḅii ḅara, ḅii ḅara à nwẹn kẹ ọmịnị na mịẹ tẹ ó nimi ḅa mịnẹ Kịrayịsị mie ị̀ ḅụụ ẹkwẹn-arị. Ori ọmịnị na ye mịẹarị sakị, ori ịnyọ nyana-a ḅara sime-a: anie nakara, ori ọ̀ kụrọ ḍie-pakamarị ọmịna ogboku.

⁴ Kẹ gotẹ ọkọ ḍukoarị, karakaraye, ịnyọ ofori ḅụ ini ọ̀ kẹ ẹngbẹsẹ-sịn mẹ ḅụ ḅakụ ḅaam ḅẹsọ, Tamụnọ kụrọ ḅụ mie mịọkụ ò ḍumoarị. Wa ori na gbọrụ ḅụ emi tẹ ịnyọ nyana-a ḅara, kẹ emi; kụma wamịnị na ọmịnị na gboloma ḅụ wa Kịrayịsị ḍumo mẹ ḅụ ḅọrọ tẹ Tamụnọ kụrọ mẹ ḅụ ḍiekiri nyana ḅa.

⁵ Ọmịnị ọmịna aḅụụ daaḍikii, tẹ ḅarana ọmịna aḅụụ kọọn, tẹ ḍọkị-nimii ó minini ḅụ ḍumo kọn-arị ḅoto. Piki-pikiye-ofori ḅara ḅụ, ó nimi-a mịnẹ Kịrayịsị Jizọsị ḅe ọmịna ḅụụ ḅio emi? — anie ọ́ gbọrsịḅị ḅịkị koro tẹẹ sikima.

⁶ À ḅiokpọ wararị mịnẹ ó nimi ḅa wamịnị papaa ḅara ọlọ apụ-a.

⁷ Wa Tamụnọ tẹkẹarị, ó kura-aye mịẹ ḅịa ḅara kẹ ḍie mịnẹ wa papaa ḅara ọlọ-a ye-a, kụma mịẹtẹ ó kuraye mịẹ ḅẹ ḅara, karakaraye tomi wa kẹ papaa ḅara ọlọ apụ ḅara ọkịarị sọ.

⁸ Kẹ gotẹ ọkọ ḍukoarị, wa inetẹ karakara mẹ na tụḅụrụ gberie-sọ mịẹ ḅịa, kụma wa kọrịnama kọrị anị ngẹrị pịrịarị.

⁹ Wamịna ḅio ḅẹlẹarị mịnẹ wamịnị ịnyọ nyana-a sakị mẹ ọmịnị kụrọ wararị. Tẹ mie ḅụ wa pịkị tẹkẹarị mịnẹ ó ḅo kpaịn sime ḅarị ḅara.

¹⁰ Anie à gotẹ à jen anga simearị sakị mị ḍiri mẹ kẹẹ tẹ kẹ ọ́ fịrịmarị; mịẹtẹ à ḅo ọ́ la ḅarị sakị à ḅarị kụrọ kụrọ-ḅara kẹ ọmịnị na mịẹ ḅịa ḅara, anie KỊNỊNYANAḄỌ ḅe kẹ ị̀ pịrị wararị kụrọ mẹ sime-ḅara ḅụ — anị kụrọ mẹ anie kẹ ọ́ nama sịẹma ḅẹ ye, kẹ ọ́ kan sara ḅẹ ye-a.

¹¹ Anịsakị mịọkụ, ị̀ amịnapụ, ọmịnị iḅiọkụ simee! Ọ́ ḅụụkụrọma tẹ bebe ḅẹ ḅara ḍọkịị; ọmịnị à kẹ ọmịna tọrọkọ koroma aị ma pokii; ọ́ jụmọ-jụmọ na gbọrụ-ḅịḅị-fie; ó dein ḅụ angaa. Tẹ ḅẹlẹma na, dein na, Tamụnọ ḅe ọmịnị na sime ḅa.

¹² Ọ́ ḅẹlẹma ḅara ḅụ ekpe kẹ jụmọ-jụmọ fịnama tẹ ọmịna aḅụụ ḅii.

¹³ Tamụnọ atomi mamgba ịna ḅii-ḅịḅị kẹ ọ́ fịrịmam.

¹⁴ KỊNỊNYANAḄỌ Jizọsị Kịrayịsị ḅe ḍiki-ḅụụjịrị mẹ na, Tamụnọ ḅẹlẹma mẹ na, pịkị Fịafịa Tẹmẹ ḅe gboloma mẹ na ọmịnị-mgba na simee.