2 Kọrịntị 10 - FỊAFỊA BAỊBỤLỤ

Pọlụ Ọ̀ Mẹnjịarị Fịrị Mẹ Karakara Sime Ḅara Ḍukoarị

¹ Yẹrị, Pọlụ, ḅụụ-lẹgịma tẹ kẹ ọ́ tẹkẹarị ye anie arị ọmịna tọrọkọ ofori sakị tomi kẹ kịnị tọrụ ine-a ḅara kẹ ḅụụ-kpootẹ yaụ-simearị, tẹ à jen anga emi kụma gadapụ-gadapụ (anịanịa sịrị) ḅara kẹ ye mịẹarị ḅọ sịn ḅọ ḅe. Kịrayịsị gbene na iḅi-yemịẹ-ḅara na mie à kẹ ọ́ tẹkẹ ye,

² mịnẹ ọmịnị ị̀ mịẹtẹ à ḅo sakị à sịrị sọ ọ́ pịrị ma; kẹ gotẹ ọkọ ḍukoarị, à ḅo sakị, ịn ḅẹẹarị mịnẹ wa tomikiri ḅẹ tẹmẹ kẹ wa mịẹarị aị ma mịẹarị ḅẹẹ apụ ma à nimi lama wararị wa sịrị sọ ịn pịrị ḅa.

³ Karakaraye wa tomikiri angarị ḅẹsọ, wa tomikiri ḅẹ tẹmẹ kẹ wa sọarị owu mẹ sọ-a.

⁴ Wa kẹ owu mẹ sọarị aị ma pịkị tomikiri ḅẹ owuna-aị-a, kụma Tamụnọ kụrọtẹ owuna-aị mie wa kẹ kụrọnị-anga mamgba kan guluguluma sararị. Wa iruo ẹkwẹn ma kan guluguluma sararị;

⁵ Tomi ḅụụ-gelema ḅụ kẹ ḅo Tamụnọ nimi ḅọkọ mẹ ẹngbẹsẹ ye goyegoye wa nụnụ ḅo kiri ḅio sararị; wa kuroma goyegoye kuun-sịẹma tẹ anị Kịrayịsị ḅịḅị pokiarị.

⁶ Tẹ ọ́ gbọrsịḅị Kịrayịsị suku-ḅio sọ tẹ ḅẹḅẹ, anị sakị rẹ mie wa tẹlẹma tẹ fomu-ḅara kẹ kọngọ kụrọma ḅọ ḅe pịrị ḅarịye.

⁷ Ọgọnọ-ọgọnọ mie ọ́ kẹ ye ḍikiarị. Tụḅọ emi tẹ amịna ḅụụ kẹ sime Kịrayịsị pịrị ḅọ ọkịarị? Iḅim, yee mḅọ sin kuroma, kẹ gotẹ ọkọ ḍukoarị, wamịnị sọ sime Kịrayịsị pịrị gbọrụ ḅara mẹ mie mḅọ sọ sime ọ̀ pịrị ḅara.

⁸ Kẹ gotẹ ọkọ ḍukoarị, à nwẹnị KỊNỊNYANAḄỌ ḅe kẹ ị̀ pịrị tẹ kụrọ mẹ ḅẹ ḅụụ-boma kalịye nyanarị sọ, anị ị̀ ḅụụ-jịrịma-a, anị kụrọ mẹ kẹ ọ́ nama sịẹma ḅẹ ye, kẹ ọ́ kan sara ḅẹ ye-a.

⁹ À ḅii-a mịnẹ ọmịnị à ḍiri kẹẹ, kẹẹ tẹ kẹ ọmịna tẹmẹ-naịn-naịnma ḅẹ ḍọkịarị tọrụ kẹ ì ḍiki.

¹⁰ Gbọrụḅọ ḅẹẹ ḅa, “Pọlụ kẹẹarị aḍiri ma kụrọ ḅakam, kụma ọ̀ wamịnị na emi sakị ọ̀ ḅụụ ịnyọ ofori, tẹ ori ẹkwẹn ma pịkị ye ḅụ ofori.”

¹¹ Ọkọ sime ḅọ mẹ mḅọ nimii mịnẹ wa ọmịnị na ofori tẹ kẹẹarị aḍiri ma na wa ọmịnị na emi tẹ mie ḅarị ye na ogboku kịrị ofori.

¹² Ye sime-ḅara ḅụ, opu ḅara kẹ ḅụụ saakị-gelemarị apụ ma, wa ḅiokpọma tẹ wamịna-aḅụụ kẹ ịn sịẹ kiri sịẹma ḅịa, pịkị wamịna-aḅụụ kẹ ini na tọnma ḅịa. Ini oḅori-sọ ḅara ḍikii! Ini ḅarana ịn kẹ ịna aḅụụ tọn ḍiki ḅẹ ye, tọn wẹrị tẹ ịna aḅụụ tọn tẹ kọn-arị!

¹³ Anị sime-ḅara, sime-ḅara sọ, wamịnị kịngẹ kụma, wa ḅụụ-boma mu la na-iḅi-a anga la ḅịa; Tamụnọ saakị wa pịrịm wa kọrị nwẹn ḅẹẹ kọrịnama mẹ mu la ḅẹ anga anie anị pịkị daasịẹ ḅẹ anga, tẹ ọmịna ogboku wa kọrịarị kọrịnama mẹ sọ anị ḅụ emi.

¹⁴ Tamụnọ kẹ wa pịrịm wa kọrị nwẹn ḅẹẹ kọrịnama mẹ ḅụ ọmịnị emi sakị goyegoye, amụ wa oke saḅa-a, wa Kịrayịsị gboloma Iḅi Oku mẹ kẹ ḅo ọ́ la sakị.

¹⁵ Mie ḅụ, wa Tamụnọ kẹ wa pịrịm wa kọrịnama kọrị ḅẹẹ anga saḅa-ḅọrọ ḅụ ja apụ kọrị tẹ kọrịnama kẹ ḅụụ-boma-a. Anie nakara, wa ḅiokpọ wararị mịnẹ ọmịna minini ḍụḅa ḅa, mịẹtẹ wa inetẹ ọmịna ogboku tarị wa kọrị ye nẹngị kọrịnama kọrị ḅẹ ḅara, anie sakị mamgba Tamụnọ tọn wa pịrị anga mẹ ḅụ.

¹⁶ Anịtẹso wa inetẹ mu ja asịẹ, tẹ ọ́ ḅọrọ fa mu wararị anga ma la tẹ Iḅi-Oku mẹ ḍuko tẹ, ḅarị jen tomḅọ kọrịnama kọrị ḅọrọma tẹ kiri ḅụ kọrịnama kẹ ḅụụ-boma apụ sọ ḅịa.

¹⁷ Kụma Fịafịa Ḍiri mẹ ḅẹẹarị ḅara ḅụ, “Ḅụụ-boma ḅẹ ḅọ goḅọ-goḅọ, mḅọ KỊNỊNYANAḄỌ ḅe kọrị tẹ kọrịnama mẹ gboloma ye ḅẹ ḅụụ bomaa.”

¹⁸ Kẹ gotẹ ọkọ ḍukoarị, KỊNỊNYANAḄỌ ḅe kẹ iḅi ḅọ sịn tẹ ḅọ mẹ, anị ḅọ anie iḅi ḅọ, mḅọ ḅarana iḅi-ḅọ kẹ amịna ḅụụ sịn-arị sakị-a.