2 Jọnị 1 - FỊAFỊA BAỊBỤLỤ

¹ Yẹrị sọsị mẹ ḅe Omongiḅọ ḅẹ, mị ḍiri mẹ kẹẹ tẹ kẹ Tamụnọ sẹlẹ-ọkị tẹ Opu Ẹrẹḅọ ma na árị awọmẹ na fịrịmarị, anie à karakara ḅara kẹ ḅẹlẹmarịapụ ma. Yẹrị kịngẹ ọ́ ḅẹlẹma-a, kụma karakara mẹ nimi wararị apụ mamgba sọ ọ́ ḅẹlẹmarị,

² anie karakara mẹ wamịna ḅụụ ḅio emi tẹ, wamịnị na sime mu ḅẹẹ-sakị ḅẹẹ-sakị la ḅarị mẹ ẹrẹsị.

³ Yee Tamụnọ Ḍaḅọ ḅe na, Jizọsị Kịrayịsị, Ḍaḅọ ḅe Tụḅọ ḅe na, ḍiki-ḅụụjịrị na, ọkụrụkụrụ na, dein na kẹ wa pịrị; karakara na ḅẹlẹma na ḅụ.

Karakara Na Ḅẹlẹma Na

⁴ Àrị ẹrịm ị́ awọmẹ ma ḅẹ ja apụ karakara mẹ minini tẹ anị ḅụ angarị ye mẹ kpọma ì ḅioḅẹlẹmam. Anị gbọrụ ḅara mẹ anie Ḍaḅọ ḅe tọn wa pịrị ḅara mẹ.

⁵ Mie ḅụ, Iḅi Ẹrẹḅọ, àrị ị́ ḅara ḅiiarị ye anie mie: ó yee wamịnị-mgba Tamụnọ ḅịḅị poki tẹ ọ̀ sụa wa pịrị oloko mẹ koko, tẹ jụmọ-jụmọ ḅẹlẹma. Miemẹ ịwọ oloko tẹ à kẹ ḍiri kẹẹ ọ́ fịrịmarị ye-a; anie wa saakị Tamụnọ ẹkwẹn mẹ naa kụra-ḅio sime oloko mẹ.

⁶ Tamụnọ na wamịna pembema atomi na ḅẹlẹma mẹ fiearị ye anie Tamụnọ ḍuko ye mịẹ. Oloko mẹ tẹ Anịngẹ-kụraḅio ọmịnị-mgba naa tẹ ye mẹ anie, ọ́ jụmọ-jụmọ ḅẹlẹma ḅụ angaa.

⁷ Oḅori-kẹ-kịnịsịn-arị tọnwa-apụ paka anga, anga mu tẹ, bebe tomikiri mẹ ḅụ; arị atomi ma anie Jizọsị Kịrayịsị ḅo tomḅọ sọm mẹ pikiarị apụ. Ọkọ sime tomḅọ mẹ anie oḅori kẹ kịnị sịn ḅọ, pịkị Kịrayịsị-na-tụḅụrụḅọ.

⁸ Ọkọẹrẹsị, ọmịnị ẹbịị, mịẹtẹ ọmịna ogboku wa kọrị tẹ kọrịnama mẹ papaa fa ọ́ pịrị ye sọ ḅịa ḅara; anie nakara, ó ḅintẹ ḅara kẹ Tamụnọ kẹ ọ́ wẹrịma iḅi aị ma nyana ḅarị ḅara.

⁹ Ḅẹḅọ-ḅẹḅọ tẹ Kịrayịsị tolumaye mẹ toluma-a, tẹ anị pịkị tẹ mḅọ ḅiotọn ḅara tolumarị ḅọ, gbala-gbala mḅọ Tamụnọ nimi-a. Ḅẹḅọ-ḅẹḅọ tẹ Kịrayịsị tolumaye mẹ ḅụ sịẹ tọrọkọ-tọrọkọ muarị ḅọ, anị ḅọ mẹ anie Tamụnọ Ḍaḅọ ḅe na ọ̀ Tụḅọ ḅe na nimi ḅọ.

¹⁰ Ọkọẹrẹsị gbọrụḅọ ọ́ ḍọkụma-ḅo tẹ Kịrayịsị tolumaye ḅụ kịrị wararị ye kẹ ḅo ḅoo, ọmịnị mḅọ da warị suu ma, “Dein sime ị́ pịrị” sịn-ḅịḅị mẹ kịngẹ sọ ọ́ kẹ mḅọ pịrị ma.

¹¹ Kẹ gotẹ ọkọ ḍukoarị, dein karị ọkọ sime tomḅọ pịrịarị ḅọ mẹ mḅọ na sọ tẹ mḅọ mịẹarị si-aị ma mịẹarị ḅọ sọ tẹ.

Kunoma Ẹkwẹn Ma

¹² À ḍuko ọ́ pịrị ḅẹ jaị ḅakam, kụma à ḅii-a àrị arị kẹ ḍiri kẹẹ, anie nakara à ḅarana ḅo tẹ ọmịnị na ẹrị-a ḅa; mịẹtẹ wa busunu tẹ ḅioḅẹlẹ nyana gboloma ḅarị ḅara.

¹³ Í iḅi mịnaḅọ ma awọmẹ ma í ḅiim.