2 Amadapụ 9 - FỊAFỊA BAỊBỤLỤ

In Pulo Kẹ Jehu Sịḅị Saram Izirẹlị Ḅẹ Amadaḅọ

¹ Anịtẹso Ịlayịsa nwẹnị ịkịankoroarị asambịrịma owiapụ ma ḅẹ gbọrụḅọ sịn tẹ ọ̀ ḅẹẹ, “Ị́ ḅụụ tẹlẹma tẹ mị pulo-sụaye mẹ ọkị tẹ Ramọtị-giliyadị muu.

² Í mu la tẹ ḅẹḅẹ, Jehu Jehosafatị owiḅọtụḅọ, pịkị Nimisi taa-owiḅọtụḅọ ḅe ḍọkịị anịjụ; ori na simearị apụ ma ḅụụ ọ̀ sịn ọkị, tẹ ori na kala-ḅio sọ-mu

³ tẹ pulo-sụaye mẹ ọkị tẹ pulo kẹ ọ̀ sịḅị sara tẹ ḅẹẹ, ‘Mie KỊNỊNYANAḄỌ ḅe ḅẹẹ ḅara mịnẹ Izirẹlị amadaḅọ ḅara ḅụ à pulo kẹ ị́ sịḅị sara.’ Tẹ ḅọkọ mẹ finji tẹ mangị-soo; kẹlẹ sọ sime ma.”

⁴ Anieḅụ asambịrịma ịkịankoro owiḅọ ḅe nwẹnị so Ramọtị-giliyadị mu.

⁵ Ò ḅo tẹso, ọ̀ nwẹnị ẹrị ọmụ-ogbo mẹ ḅẹ ḅẹrẹtọn-apụ mamgba kobiri tẹ ḅịḅị-ọkịyarị tẹ ọ̀ nwẹnị ḅẹẹ, “yei ḅẹrẹtọnḅọ, àrị oku da ḅo ị́ pịrị wararị.” Jehu nwẹnị ḅẹẹ, “Wamịna aḅụụ anie tụḅọ?” Ọ̀ nwẹnị Jehu ḅẹẹ, “yei ḅẹrẹtọnḅọ ị́yẹrị.”

⁶ Anieḅụ ọ̀ nwẹnị saakị mẹnjị warị sọ-mu tẹ ịkịankoro asambịrịma owiḅọ ḅe nwẹnị pulo mẹ kẹ Jehu sịḅị sara tẹ ọ̀ ḅẹẹ, “Mie KỊNỊNYANAḄỌ, Izirẹlịapụ tẹkẹarị Tamụnọ ḅe ḅẹẹ ḅara: ‘À pulo kẹ ị́ sịḅị sara tẹ ị́ kẹ amadaḅọ sọma tẹ kẹ ị̀ atomi Izirẹlị pịrị tẹẹ.

⁷ Ị́ ị́ sịḅịdaḅọ Ehabụ warị mẹ ḅaa fama ḅa, mịẹtẹ à Jezibẹlị ḅara ḅụ ị̀ afịrịmẹnjịapụ ma na ị̀ ịkịankoroapụ ma na ọmbie gbẹẹfị mẹ ḅii ḅẹ ḅara.

⁸ Gbala Ehabụ bebe warị suku mẹ fịị fama ḅa; tẹ à Ehabụ ḅụ owiḅọ goḅọ-goḅọ pẹlẹ-siin ḅa, anị ḍaḅọ-tụḅọ-o, furo-tụḅọ-o Izirẹlị mẹ ḅio.

⁹ À Ehabụ warị mẹ kẹ Nebatị owiḅọtụḅọ Jerobohamụ warị na Ahija owiḅọtụḅọ Bahasa warị na mịẹ ḅara mịẹ ḅa.

¹⁰ Obiri ma Jezibẹlị pẹị ḅa Jẹzirili ye-yọ mẹ ḅụ tẹ gbọrụḅọ-sọ á ḍiḅi ḅịa.’ ” Anịtẹso ọ̀ nwẹnị ḅọkọ mẹ finji tẹ mangị-so.

¹¹ Jehu paka-ḅo tẹ mu ọ̀ sịḅịdaḅọ afịrịmẹnjịapụ ma la tẹso, ịn nwẹnị ọ̀ ḅẹẹ, “Gbeke iḅi fama wararị? Ḅị nọmụḅọ ḅe ò tiegotẹ ị́ ḍọkụma-ḅo?” Ọ̀ nwẹnị ịn ḅẹẹ, “Ọ́ kọkọ ḅị tomḅọ ḅe na ori ẹkwẹn na nimi wararị”

¹² Ịn nwẹnị ḅẹẹ, “Anie iruo yee; karakara mẹ ḍuko wa pịrịị.” Ọ̀ nwẹnị ḅẹẹ, “Mie ọ̀ kẹ ẹkwẹn kọn ị̀ pịrị tẹ ḅẹẹ ḅara, ‘Mie KỊNỊNYANAḄỌ ḅe ḅẹẹ ḅara: À pulo kẹ ị́ sịḅị sara tẹẹ, Izirẹlị amadaḅọ ḅara ḅụ.’”

¹³ Anịtẹso ịna ḅụụ ọrụḅọ-ọrụḅọ nwẹnị fọnya mḅọ opu kapa mẹ sin tẹ kẹ ò suku kpọlị iwo-na-ideri-naarị anga mẹ ḅụ papaa kiri mẹ dẹẹ, tẹ ịn nwẹnị ọdụ ofuro tẹ gboloki tẹ oloku, “Jehu anie amadaḅọ.”

Ini Izirẹlị ḅẹ Amadaḅọ Joramụ Ḅaa Tẹ

¹⁴ Anịtẹso Jehu, Jehosafatị owiḅọtụḅọ, pịkị Nimisi taa-owiḅọtụḅọ ḅe nwẹnị ḅẹrẹ-ḅiya kẹ Joramụ pịrị. (Mị sakị mẹ bebe Izirẹlị mẹmgba Joramụ ḅụụ sọ tẹ Siriya ḅẹ amadaḅọ Azẹlị ẹbị gotẹ Ramọtị-giliyadị koruarị;

¹⁵ kụma amadaḅọ Joramụ ò Siriya ḅẹ amadaḅọ Azẹlị na Ramọtị-giliyadị ḅụ owu sọarị tẹ Siriya ḅẹ apụ kẹ ọ̀ lama ye kẹ pịkịma Jẹzirili ḅụ ọ̀ ḅụụ gwọ ḅẹ mu wararị.) Anieḅụ Jehu nwẹnị ḅẹẹ, “Miemẹ nwẹnị ọmịna aḅioḅẹngbọ ḅẹḅẹ, gbọrụḅọ-sọ ọmịna aḅụụ furu paka mu Jẹzirili ḅụ ịba-fị ma.”

¹⁶ Anịtẹso Jehu nwẹnị ori kirimẹnjị-ọmụarụ ḅụkụlọ tẹ dọkụ paka Jẹzirili mu, gbala Joramụ anịjụ obi iḅila ọgọnọ ḅụ emi tẹ Juda ḅẹ amadaḅọ Ahazaya ideri-ḅo ò ḍiki ḅẹ ḅo wararị.

¹⁷ Jẹzirili ḅụ eneḅaka-koruḅọ gele-warị ḅio ḅụ sịẹsime wararị tẹ nwẹnị Jehu ogbo mẹ wẹrịtẹ ḅoarị ḅara ẹrị tẹ fọnya mu ḍuko, “À dọkụ ḅoarị apụ ẹrịarị.” Joramụ nwẹnị ḅẹẹ, “Asụ dọkụ gbọrụḅọ kẹ fịrịma tẹ mu ini na bịama tẹ gbela, ‘Dein gbeke emi?’ ”

¹⁸ Anieḅụ gbọrụ asụ-dọkụḅọ nwẹnị asụ ọgọnọ ḅụ dọkụ ma-mu ori na bịama tẹ ọ̀ ḅẹẹ, “Mie amadaḅọ ḅe gbela yee, ‘Dein gbeke emi?’ ” Jehu nwẹnị pakịrị, “Í dein kẹ tiye mịẹ ḅẹ? Ị̀ ḅụụ sọ tẹ ị̀ ọḅụjụ dọkụ ḅoo.” Eneḅaka-koruḅọ ḅe nwẹnị paka ye mẹ ḍuko tẹ ḅẹẹ, “Fịrịmẹnjịḅọ ḅe mu ịn lam, kụma ọ̀ pịkịma-ḅo-a.”

¹⁹ Anịtẹso ọ̀ nwẹnị maaịn karama asụ-dọkụḅọ ḅe tẹ ḅo ịn la tẹ ḅẹẹm, “Mie amadaḅọ ḅe gbela yee, ‘Dein gbeke emi?’ ” ḅẹẹ ḅọ ḅe kẹ fịrịma. Jehu nwẹnị pakịrị, “Í dein kẹ tiye mịẹ ḅẹ? Pịkị tẹ ị̀ ọḅụjụ dọkụ ḅoo.”

²⁰ Eneḅaka-koruḅọ ḅe nwẹnị paka ye mẹ ḍuko tẹ ḅẹẹ, “Ò mu ịn lam, kụma ọ̀ pịkị-ḅo-a. Dọkụ ḅara mẹ Nimisi tụḅọ Jehu dọkụ dọkụ ḅara kịkam; ye bala-a ḅara mie ori owima dọkụ ḅoarị ḅara.”

²¹ Joramụ nwẹnị tọn, “ị̀ kirimẹnjị-ọmụarụ tẹlẹmaa.” Ịn nwẹnị anị tẹlẹma. Anịtẹso Joramụ, Izirẹlị ḅẹ amadaḅọ ḅe na Ahazaya Juda ḅẹ amadaḅọ ḅe na ọrụ-sịḅị-sịḅị ḅụ amịnẹ kirimẹnjị-ọmụarụ ḅụkụlọ tẹ Jehu na donia ḅẹ mum. Ịn nwẹnị mu Nebọtị Jẹzirili ḅẹ ḅọ ḅe ḍụọ ḅụ ori na donia.

²² Joramụ Jehu ẹrị tẹso, ọ̀ nwẹnị ò gbela, “Jehu, dein gbeke emi?” Jehu nwẹnị pakịrị, “Tọ dein inetẹ paka ḅẹ, í iyingi Jezibẹlị saakị wararị mẹ na, oru mịẹ-mịẹ sẹfị mẹ na paa ḅin wararị ḅẹ saakị?”

²³ Anịtẹso Joramụ nwẹnị fọnya vuunma pịkị tẹ mangị tẹ Ahazaya ḅẹẹ, “yei ḅẹrẹ paka tẹẹ Ahazaya!”

²⁴ Jehu nwẹnị ori ịnyọ mẹmgba kẹ ori iboli nụnụ tẹ kẹ Joramụ tẹịn ori amaa apana ma ogboku, tẹ ḍiein mẹ nwẹnị mu ò ḅioḅẹngbọ kpịra, tẹ ọ̀ nwẹnị ori kirimẹnjị-ọmụarụ mẹ ḅio ḅịkị-koro tẹ fịị

²⁵ Jehu nwẹnị Bidika, ò suku-ḅio sime tẹ ḅarasụa ọ̀ pịrịarị opu fịrịmẹnjịḅọ ḅe ḅẹẹ, “Ọ̀ saakị tẹ kẹ sime Nebọtị Jẹzirili ḅẹ ḅọ ḅe piri ḍụọ mẹ ḅio wakị koromaa. Kẹ ḅiokoromaa, yẹrị na ị́nịna ịrụa-ịrụa ọ̀ ḍa Ehabụ ọḅụjụ dọkụarị sakị KỊNỊNYANAḄỌ ḅe ọ̀ ḅụụ paka ḅẹ ye mẹ ḍuko ḅara,

²⁶ KỊNỊNYANAḄỌ ḅe mẹẹ, ‘Ḅịẹịn à Nebọtị na, ori owiapụ-awọmẹ na ọmbie ẹrịm, karakara-ḅara-ḅụ àrị ị́ mịẹtẹ ị́ anị gbẹẹ ḅa mị gbọrụ kiri anga mẹ ḅụ.’ Mịọkụ, ọ̀ saakị wakị koroma anịanga mẹ ḅụ, KỊNỊNYANAḄỌ ḅe ẹkwẹn-ḅịḅị mẹ wẹrịtẹ ḅẹẹ ḅara.”

Ịn Juda ḅẹ Amadaḅọ Ahazaya Ḅaam

²⁷ Juda ḅẹ amadaḅọ Ahazaya miemẹ ẹrị tẹso, ọ̀ nwẹnị tọrụ kẹ Bẹtị-aganị pakịrị da tẹ mangị. Jehu nwẹnị ò ḍuka tẹ ḅẹẹ, “Ọmịnị ori sọ tẹịn;” ọ̀ kpọlị mu Gọọ, Ibilamụ ama na kpeki ama mẹ la ḅẹ-muarị ogbo mie ini ọ̀ tẹịn ye ori kirimẹnjị-ọmụarụ mẹ ḅio. Ọ̀ nwẹnị mangị mẹ kẹ mu Mẹgido la tẹ anịjụ fịị

²⁸ Ori afịrịmẹnjịapụ nwẹnị gbọrụ kirimẹnjị-ọmụarụ ḅio ọ̀ ḍụẹịn mẹ sẹịn ḅo Jeruselemu la, tẹ kẹ ini ori aḍapụ ma ḍiḅi anga ḅụ ò ḍuḅu ḅio ḍiḅi, Devidi opu ama mẹ ḅụ.

²⁹ Ehabụ owiḅọtụḅọ Joramụ ama-da tẹ oyi gbọrụ kụra finji karama kụra ḅụ mie Ahazaya saakị Juda ḅụ ama-da ye.

Ịn Jezibẹlị Amadaḅọ Ta Ḅaam

³⁰ Jehu ḅo Jẹzirili la tẹso, Jezibẹlị nwẹnị ori ḅẹ ḅo mẹ naa tẹ á ḅụụ ḅirima tẹ ye kẹ á tọrụngbọ suku ọmbị tẹ á sịḅị-ḅẹ-inume tẹlẹma, tẹ ikiḅa-ḅọkọ ḅụ toluma ḍiki.

³¹ Jehu ogigo-ḅọkọ mẹ sọ gbọrụ sakị, á nwẹnị gbela, “Ị́yẹrị ḅie Zimiri amịna sịḅịdaḅọ ḅaa ḅọ ḅe, dein gbeke emi?”

³² Ọ̀ nwẹnị tọrụ saakị ikiḅa-ḅọkọ mẹ da, tẹ ḅẹẹ, “Tụḅọ ị̀ jụụ ḅụ emi? Tụḅọ? Ḅụụ fịị tẹ maa apụ anịanịa tẹra apụ nwẹnị ikiḅa-ḅọkọ ḅụ toluma ò ḍiki.

³³ Ọ̀ nwẹnị ịn ḅẹẹ, Ọmịnị á kẹ kiri-ḅio gbin.” Anieḅụ ịn nwẹnị á kẹ gbin; tẹ á ḅụụ ḅẹ ọmbie fuku warị-anga mẹ na, asụ ma na oju sara, tẹ ịn nwẹnị ḅụọ kẹ jasị-jasịma á nanga.

³⁴ Anịtẹrẹmẹ mie ori amadaḅọ warị mẹ sọ-mu tẹ fị na ḅuu na ye, tẹ nwẹnị ḅẹẹ, “Ó mu mie woritẹ ẹrẹḅọ ma ọkị tẹ ḍiḅii; árị ma gbala amadaḅọ ẹrẹḅọtụḅọ ẹrẹsị.”

³⁵ Kụma ịn paka á ḍiḅi ḅẹ mu sakị á sịḅị-okpolomokpo mẹ na, árị aḅụọ ma na, árị aḅara ma na sikima in jen ḍọkị-ẹrịa.

³⁶ Ịn pịkị ḅo ḍuko ọ̀ pịrị tẹso, ọ̀ nwẹnị ḅẹẹ, “Mie KỊNỊNYANAḄỌ ḅe ẹkwẹn-ḅịḅị mẹ tẹ ori ọ̀ fịrịmẹnjịḅọ Tisibi ḅẹ Ịlayịja ḅụ ḅọrọtẹ kọn ẹkwẹn mẹ, ‘Jẹzirili ye-yọ ḅụụ obiri Jezibẹlị meni mẹ pẹị ḅa.’

³⁷ Anịsakị á ḍụẹịn mẹ nwẹnị sịra ọgọnọ ḅẹ fun sara ḅara sara ḅa Jẹzirili ye-yọ mẹ ḅẹ kiri mẹ ḅio, tẹ gbọrụḅọ-sọ inetẹ ḅẹẹ ḅịa, ‘Mie Jezibẹlị.’ ”