2 Amadapụ 5 - FỊAFỊA BAỊBỤLỤ

Nahamanị Gwọ Tẹẹ

¹ Nahamanị Siriya ḅẹ ọmụ-ogbo mẹ sịḅịdaḅọ ḅe anie gburo-gburo ḅọ Amadaḅọ ḅe tọrọkọ, tẹ ọ̀ kẹ ye-sịn pịkị mangịma nyana ọ̀ pịrị ḅọ. Kẹ gotẹ ọkọ ḅẹẹarị, ọ̀ ḅụụ ḅụ mie KỊNỊNYANAḄỌ ḅe owu-ḅara-iḅi kẹ Siriya pịrị ye. Ori anie kụrọ nyana tẹ ọmụgbinḅọ, kụma ò sofịnị-obi kọnm.

² Siriya ḅẹ apụ ma mu ama gbaịn-gbaịn tẹ fọịn-arị gbọrụ ogbo ḅụ Izirẹlị ḅụ ịn nwẹnị gbọrụ kala fịrịmẹnjị-ẹrẹḅọtụḅọ dogi-so, á nwẹnị ḅo Nahamanị ta fịrịmẹnjịḅọ sọ.

³ Á nwẹnị á sịḅịda ẹrẹḅọ ma ḅẹẹ, “Ị̀ nyanaḅọ ḅe nwẹnị Sameriya ḅụ simearị ịkịankoroḅọ ḅe na emi ḅẹ kụma! Ori ọ̀ kọn-arị sofịnị-obi mẹ ḅụ ọ̀ gwọ ḅa.”

⁴ Anieḅụ Nahamanị nwẹnị sọ mu ḍuko ọ̀ nyanaḅọ pịrị, “Mị-ḅara mie Izirẹlị ḅụ ḅo fịrịmẹnjị-ẹrẹḅọtụḅọ ma kẹ ye ḍuko ḅara.”

⁵ Siriya ḅẹ amadaḅọ ḅe nwẹnị ḅẹẹ, “Mịọkụ muu, anịsakị à ḍiri kẹẹ tẹ kẹ Izirẹlị ḅẹ amadaḅọ ḅe fịrịma ḅa.” Anieḅụ ọ̀ nwẹnị iku fụn ninea akpa na gbasị seleḅa na, iku kẹlẹ-fa fụn maa akpa na gbasị golu na, oyi ye ḅiri opu-akapa na ọkị tẹ mu.

⁶ Ọ̀ nwẹnị ḍiri mẹ kẹ ḅo Izirẹlị ḅẹ amadaḅọ ḅe pịrị, anị mẹẹ, “Mị ḍiri mẹ ị́ ḅara la laa nimi mịnẹ yẹrị ị̀ fịrịmẹnjịḅọ Nahamanị ḅe kẹ ị́ fịrịmam mịẹtẹ ị́ ọ̀ kọn-arị sofịnị-obi mẹ gwọ ḅẹ ḅara.”

⁷ Izirẹlị ḅẹ amadaḅọ ḅe ḍiri mẹ go tẹso, ọ̀ nwẹnị ọ̀ kapa kan tẹ ḅẹẹ, “Yẹrị Tamụnọ, tẹ ḅaa tẹ, pịkị ḍumoma ḅẹ, tẹ ḅị tomḅọ ḅe oku kẹ ị̀ fịrịmarị à sofịnị-obi-kọnḅọ gwọ? Paa kuroma tẹ ẹrị ọ̀ kẹ kamụ kẹ ị̀ ḍọkịarị ḅara!”

⁸ Kụma Ịlayịsa Tamụnọ tomḅọ ḅe naam mịnẹ Izirẹlị ḅe amadaḅọ ọ̀ kapa kan tẹ ḅẹ ye ḅụ, ọ̀ nwẹnị fịrịma tẹ amadaḅọ ḅe gbela, “Í tiegotẹ ị́ kapa kan? Yee ori ị̀ ḍọkụma-ḅo mịọkụ, mịẹtẹ ò nimi ḅẹ ḅara mịnẹ Izirẹlị ḅụ ịkịankoroḅọ emi!”

⁹ Anieḅụ Nahamanị nwẹnị ori asụ ma na, ò kirimẹnjị-ọmụarụ ma na ḅo Ịlayịsa warị tọrọkọ daasịẹ.

¹⁰ Ịlayịsa nwẹnị gbọrụ fịrịmẹnjịḅọ kẹ ọ̀ fịrịma, tẹ ḅẹẹm, “Mu Jodanị tọrụ mẹ ḅụ sọnọma sakị kẹ jaankoroo, anịsakị í oju-meni ḅo anị sime-ḅara sime tẹ welewele ḅa.”

¹¹ Kụma Nahamanị nwẹnị ịganị tẹ mẹnjị-so. Ọ̀ ḅẹẹm, “À ḅiotọnm ọ̀ paka ị̀ dama-ḅo ḅa, tẹ sịẹsime tẹ KỊNỊNYANAḄỌ ọ̀ Tamụnọ ḅe ẹrẹ mẹ sịn, tẹ ọ̀ ḅara kẹ sofịnị-obi mẹ sime anga mẹ ḅụ fẹngụ tẹ anị gwọ ḅa.

¹² Abana na Fapa na, Damasịkọsị ḅẹ atọrụ ma iḅi kẹ Izirẹlị ḅẹ aminji mamgba nẹngị-a? Àrị inetẹ arị aminji ma ḅio ḅiri tẹ fịafịa ḅịa?” Anieḅụ ọ̀ nwẹnị bụrọma vuunma pịkị tẹ mẹnjị-so.

¹³ Kụma ori afịrịmẹnjịapụ nwẹnị sọma-ḅo kpeki tẹ ọ̀ ḅẹẹ, “Wamịna ḍaḅọ, ịkịankoroḅọ ḅe nwẹnị gbọrụ gburo-gburotẹ ye kẹ ị́ ḅẹẹm mịẹ ḅẹ kụma, ị́ anị mịẹ ḅịa? Tọ-ḅara ḅụ, ‘Mu minji ḅiri tẹ fịafịa’ ngẹrị ọ̀ nwẹn kẹ ị́ ḅẹẹ ye mẹ sarasara na-iḅi-a?”

¹⁴ Anieḅụ ọ̀ nwẹnị mu Ịlayịsa wẹrịtẹ ḅẹẹ ḅara ḅụ, sọnọma asakị kẹ Jodanị tọrụ mẹ ḅụ jaankoro; tẹ ori oju-meni nwẹnị ḅo tarị anị sime-ḅara sime tẹ kalatụḅọ oju-meni kịka tẹ ọ̀ nwẹnị welewele.

¹⁵ Anịtẹso ori na ori na ḅo apụ ma na nwẹnị pịkịma Ịlayịsa ḍọkụma-ḅo tẹ ọ̀ tọrọkọ sịẹsime; tẹ ọ̀ nwẹnị ḅẹẹ, “Mẹkịnẹ à nimim mịnẹ tomikiri mẹmgba ḅụụ Tamụnọ ofori Izirẹlị ḅụ sakị sikima tẹ; ọkọẹrẹsị mịọkụ ị́ fịrịmẹnjịḅọ ḅara ḅụ gbọrụ ḍiepịrịye daa-ọkị.”

¹⁶ Kụma Ịlayịsa nwẹnị ḅẹẹ, “KỊNỊNYANAḄỌ ḅe tẹ à fịrịmẹnjị pịrịarị ḅọ ḅe ḍumo sime wararị ogbo, à gberie-sọ ọkị ḅịa.” Nahamanị kpọsịrị-kpọsịrịma ọ̀ ḅẹẹm ori anị ọkị, kụma ọ̀ ḍụkụ-a.

¹⁷ Anịtẹso Nahamanị nwẹnị ḅẹẹ, “Ọkọ-a ḅẹḅẹ, àrị ị́ tẹkẹm maa kụrọ-sịḅịsụa-asụ dogi ḅẹ ḅara ḅẹ kiri-kpo kẹ ị́ fịrịmẹnjịḅọ pịrị; gbala mịọkụ saakị tọrọkọ mu, ị́ fịrịmẹnjịḅọ ḅarị dọkịma-agba anịanịa agba mịẹ jen gbọrụ tamụnọ sọ pịrị ḅịa KỊNỊNYANAḄỌ ḅe sikima tẹ.

¹⁸ Kụma yee KỊNỊNYANAḄỌ si-wẹrịso kẹ ị́ fịrịmẹnjịḅọ pịrị mị gberie mẹ ḅụ; arị ị̀ sịḅịdaḅọ ḅụụ sọ tẹ Rimọnị warị sọ-mu tẹ ị̀ ḅara-kọngọ ḅụụ ị̀ sịḅịdaḅọ ḅe sịrẹrẹ tẹ ọ̀ sịḅị-tuu tẹ yẹrị sọ sịḅị-tuu sakị ḅụ anịanga.”

¹⁹ Ịlayịsa nwẹnị ọ̀ ḅẹẹ, “Dein na muu.” Kụma Nahamanị ọ̀ ḅụụ so tẹ kẹlẹ mu tẹso,

²⁰ Gehazi, Ịlayịsa Tamụnọ tomḅọ ḅe fịrịmẹnjịḅọ nwẹnị ọ̀ ḅụụ ḅẹẹ, “Ḍikii, ị̀ sịḅịdaḅọ ḅe ḅie Nahamanị Siriya ḅẹ ḅọ ḅe ḅara ḅụ ọ̀ kẹ ḅo aị ma ọkị-a tẹ ọ̀ wẹrịso tẹ ò so tẹẹ. KỊNỊNYANAḄỌ ḅe ḍumo-sime wararị ogbo, arị ò ḍuka tẹ ọ̀ ḅara ḅụ ye ọkị ḅa.”

²¹ Anieḅụ Gehazi nwẹnị Nahamanị ḍuka. Nahamanị ẹrịm mịnẹ kịnị mangị ò ḍukarị tẹso, ọ̀ nwẹnị kirimẹnjị-ọmụarụ mẹ ḅio kuro tẹ ori na bịama ḅẹ mu, tẹ ḅẹẹ, “Gbeke iḅi wararị?”

²² Gehazi nwẹnị pakịrị, “Ye goyegoye iḅi wararị. Ị̀ sịḅịdaḅọ ị̀ kẹ fịrịmam àrị ị́ ḅẹẹ, ‘Mị gbọrụ sakị ḅụ Iferemu tụndụ ọgọnọ ḅẹ opu sịẹ mẹ ḅụ asambịrịma maa ịkịankoroapụ ogbo mẹ ḅio ị̀ ḍọkụma-ḅo tẹẹ; àrị ị́ tẹkẹm seleḅa pakịrị sọnọma ẹndẹ oyia asi finji na, ye-ḅiri maa opu akapa na kẹ ịn pịrịị.’”

²³ Nahamanị nwẹnị ḅẹẹ, “Sisi iku fụn gbọrụ akpa na ikiḅa kalịye na gbasị seleḅa ọkịị.” Ọ̀ nwẹnị kpọsịrị-kpọsịrịma ọ̀ ḅẹẹ, tẹ seleḅa pakịrị jei ẹndẹ kẹ maa akpa ḅio fịna, tẹ maa ye-ḅiri opu akapa na kẹ ori maa afịrịmẹnjịapụ ọgọnọ gbana tẹ ịn dogi Gehazi tọrọkọ tarịm.

²⁴ Ịn ḅo Ịlayịsa angarị tụndụ mẹ la tẹso, ọ̀ nwẹnị ịna aḅara ḅụ arị ọkị tẹ kẹ warị ḅio su, tẹ tomi ma fịrịma pịkị, tẹ ịn nwẹnị so.

²⁵ Ọ̀ nwẹnị warị sọ tẹ mu ọ̀ sịḅịdaḅọ tọrọkọ sịẹsime, tẹ Ịlayịsa nwẹnị ọ̀ gbela, “Ndẹẹ í sime tẹ ḅoarị anga, Gehazi?” Ọ̀ nwẹnị pakịrị, “Ị́ fịrịmẹnjịḅọ gbọrụ anga sọ mu-a.”

²⁶ Kụma Ịlayịsa nwẹnị ọ̀ ḅẹẹ, “Tẹmẹ ḅụụ arị ị́nịna mum, tomḅọ ḅe ò kirimẹnjị-ọmụarụ mẹ ḅụụ pịkịtẹ ḅo ị́nịna bịama sakị. Mie ḅọrọ igbigi na, opu akapa na, olivu ḍụọ na, girepu-ḍụọ na, anana na pootẹ-anambulo na owiapụ afịrịmẹnjịapụ na eremịna afịrịmẹnjịapụ na ọkị sakị?

²⁷ Ọkọẹrẹsị Nahamanị sofịnị-obi mẹ sime ị́yẹrị na ị́ ḅụụ paka-ḅo apụ na pịrị gbamasoo.” Anieḅụ ọ̀ nwẹnị eene-mgbọ pịna-pịna ḅara kẹ sofịnị-obi mẹ kọn tẹ pịna tẹ ọ̀ tọrọkọ mẹnjị paka.