2 Amadapụ 3 - FỊAFỊA BAỊBỤLỤ

Izirẹlị na Mohabụ na Gbin Ọmụ

¹ Jehosafatị Juda ḅẹ amadaḅọ ḅe ama-da tẹ maa kụra fa si karama kụra ḅụ Ehabụ owiḅọtụḅọ Joramụ ḅo Sameriya ḅụ sime tẹ oyi ma kụra finji kẹ Izirẹlị ḅụ ama-dam.

² Ọ̀ KỊNỊNYANAḄỌ ḅe ḍiki-tọrụ ḅụ siye mịẹm, ori ọ̀ ḍa na ò iyingi Jezibẹlị na mịẹ ḅara mịẹ-a sọ, gbala ori ọ̀ ḍa sịẹma Balị pịrị ịḅalị mẹ saakị-siinm ẹrẹsị.

³ Anịsọ ò Nebatị owiḅọtụḅọ Jerobohamụ mịẹ si mẹ mịẹm, aniemẹ tẹ ọ̀ mịẹ tẹ Izirẹlị si mịẹ ye mẹ, ori anị ḅụ sikima-a.

⁴ Mẹsa Mohabụ ḅẹ amadaḅọ ḅe anie anana-kokoḅọ; kụra-kụra ḅụ ori asambịrịma anana oyi maa puku finji na, oyi ẹndẹ na (100,000), pịkị ejimina oyi maa puku finji na oyi ẹndẹ (100,000) oju ḅẹ isuke kẹ Izirẹlị ḅẹ amadaḅọ ḅe fịrịma fịrịmam.

⁵ Kụma Ehabụ Izirẹlị ḅẹ amadaḅọ ḅe fịị tẹso, Mẹsa anie Mohabụ ḅẹ amadaḅọ ḅe nwẹnị sịḅị-kụrọma Izirẹlị ḅẹ amadaḅọ ḅe pịrị.

⁶ Anieḅụ amadaḅọ Joramụ nwẹnị Sameriya ḅụ mẹnjị paka-ḅo anị sakị mẹ ḅụ tẹ Izirẹlị mẹmgba kobiri tẹ ịn pekele-ḍikim.

⁷ Ọ̀ nwẹnị mu oku-ḅịḅị kẹ Jehosafatị Juda ḅẹ amadaḅọ fịrịma, “Mohabụ ḅẹ amadaḅọ sịḅị-kụrọma ị̀ pịrị tẹẹ; í gbeke ị̀ ḅụụ sọ tẹ mu Mohabụ na owu sọ ḅẹ?” Amadaḅọ Jehosafatị nwẹnị pakịrị, “À mu ḅa; yẹrị anie ị́yẹrị, ị̀ atomi anie ị́ atomi, ị̀ asụ ma anie ị́ asụ ma.”

⁸ Anịtẹso ọ̀ nwẹnị gbela, “Wa tọ etela ḅụ mẹnjị mu ḅẹ?” Joramụ nwẹnị pakịrị, “Idọmụ ḅẹ ịkpa mẹ muarị etela mẹ ḅụ mie wa mẹnjị mu ḅarịye.”

⁹ Anie ḅụ Izirẹlị ḅẹ amadaḅọ ḅe nwẹnị Juda ḅẹ amadaḅọ na, Idọmụ ḅẹ amadaḅọ ḅe na mu. Ịn sọnọma ḍin kẹ mẹnjị-ikelema ikelema sakị ọmụ-ogbo mẹ-o, ịn kẹ muarị anama ma sọ ḅarị minji nyana-a.

¹⁰ Anịtẹso Izirẹlị ḅẹ amadaḅọ nwẹnị ḅẹẹ, “yei! KỊNỊNYANAḄỌ ḅe mịna tẹra amadapụ ma sịn tẹ ịn kẹ Mohabụ ḅẹ amadaḅọ ḅe ḅara ḅio suu ọ̀ pịrị tẹ.”

¹¹ Jehosafatị nwẹnị gbela, “Mịanga KỊNỊNYANAḄỌ ḅe ịkịankoroḅọ tẹ wa ḅụụ ḅụ ḅọrọtẹ KỊNỊNYANAḄỌ ḅe gbela ḅẹ ḅọ ofori?” Anịtẹso Izirẹlị ḅẹ amadaḅọ ḅe afịrịmẹnjịapụ ma ḅẹ gbọrụḅọ nwẹnị pakịrị, “Ịlayịsa Safatị owiḅọtụḅọ ḅe tẹ ḅarasụa Ịlayịja pịrị-pịrị ḅọ ḅe mịanga emii.”

¹² Jehosafatị nwẹnị ḅẹẹ, “Oriḅe anie karakara ịkịankoroḅọ.” Anieḅụ Izirẹlị ḅẹ amadaḅọ ḅe na, Jehosafatị na, Idọmụ ḅẹ amadaḅọ ḅe na nwẹnị ọ̀ ḍọkụma-mu.

¹³ Ịlayịsa nwẹnị Izirẹlị ḅẹ amadaḅọ ḅe ḅẹẹ, “Àrị ị́nịna tọ mịẹye nyana gboloma ḅẹ? Ị́ ḍa na í iyingi na ịkịankoroapụ ma ḍọkụma-mu.” Kụma Izirẹlị ḅẹ amadaḅọ ḅe nwẹnị pakịrị, “Ẹn-ẹn KỊNỊNYANAḄỌ ḅe mie mịna tẹra amadapụ ma sịn tẹ ịn kẹ Mohabụ ḅẹ amadaḅọ ḅe ḅara-ḅio suu ḅẹ tẹ ye.”

¹⁴ Ịlayịsa nwẹnị ḅẹẹ, “Ọmụ-ogbo ma nyana KỊNỊNYANAḄỌ ḅe tẹ à fịrịmẹnjị pịrịarị ḅọ ḅe ḍumo wararị ogbo, à nwẹnị Juda ḅẹ amadaḅọ Jehosafatị ḅe kẹ ye-sịn-a namịna àrị í ḍiki ḅịa, à pịkị ị́ ẹrị ḅịa

¹⁵ Kụma mịọkụ ó mu akwa farị ḍin ḅọ ọkị-ḅo ị̀ pịrịị.” Akwa farị ḅọ ḅe akwa mẹ farị tẹso, KỊNỊNYANAḄỌ ḅe kụrọ mẹ nwẹnị ḅo ori ọgọnọ gbana,

¹⁶ tẹ ọ̀ nwẹnị ḅẹẹ, “Mie KỊNỊNYANAḄỌ ḅe ḍuko yee, ‘Anị samụnọ tẹ tọrụ mẹ ḅẹ kiri mẹ kẹ ewere-ewere-ewere mịẹ ḅinma ḅa.

¹⁷ Ọ́ kụrọ-fẹrụ anịanịa eene ẹrị ḅịa kụma samụnọ tọrụ mẹ ḅẹ kiri mẹ ḅụ minji ḅin ḅa, tẹ ọmịnị na, ọmịna nambulo ma na, ọmịna anama ma na ḅuu ḅa.’

¹⁸ Miemẹ anie KỊNỊNYANAḄỌ ḅe ḍiki-tọrụ ḅụ feke-feke ye; ò Mohabụ ḅẹ apụ ma sọ kẹ ọmịna ḅara-ḅio suu ḅa

¹⁹ tẹ ọmịnị ịn mịẹ kụrọma wararị opu ama ma na, ịna ḅụ yela opu ama ma goyegoye nẹngịma ḅa, ịna iḅi opu asịn goyegoye ọ́ pẹlẹ-gbin ḅa, ịna ngụngụḅa minji mẹmgba ọ́ dasịẹma ḅa, tẹ ḍụḅarị kẹ ịna ḍụọ ḍiḅi iḅi akiri mamgba gbaịn fama ḅa.”

²⁰ Ene-ḅaa ḅẹ dede-ḅio, agbamịẹ mịẹ sakị pembe sakị ḅụ, minji nwẹnị Idọmụ pakịrị ḅụ seri ḅo wenii tẹ nwẹnị kiri mẹmgba gbaịn fama.

²¹ Mohabụ ḅẹ apụ mamgba amadapụ ma ḅo ini na owu-sọ ḅẹ ḅo tẹ ye mẹ naa tẹso, ịn nwẹnị asambịrịma owiapụ ḅụụ ọkị mu omongi tẹịn apụ ḅụ inetẹ owuaị ḅiri ḅẹ apụ mamgba sịn pakama owu-fụḅara mẹ ḅo.

²² Dede-ḅio dede-ḅio ịn saakị paka-ḅo tẹ otuka mẹ ḅịya minji mẹ sarama tẹso, Mohabụ ḅẹ apụ ma nwẹnị ini na dama-dama ḅụ minji mẹ ẹrị anị ọmbie awụ ḅịya ḅara ḅịyarị.

²³ Ịn nwẹnị ḅẹẹ, “Miemẹ anie ọmbie! Gbarị-a ḅara ḅụ, ini-ini-ini amadapụ ma owu-sọ tẹ jụmọ-jụmọ ḅaa tẹẹ. Ọkọẹrẹsị Mohabụ ḅẹ apụ ọ́ saakị tẹ mu ye fọịn!”

²⁴ Kụma ịn ḅo Izirẹlịapụ akpụrụ-warị mẹ la tẹso, Izirẹlịapụ ma nwẹnị saakị tẹ owu kẹ Mohabụ ḅẹ apụ ma paka wenii tẹ ịn nwẹnị ịna tọrọkọ mangị. Izirẹlịapụ ma mẹnjị-mẹnjị tọrọkọ mum, tẹ ịn muarị ḅara mie ịn pịkị Mohabụ ḅẹ apụ ma ḅaarị ḅara

²⁵ tẹ ini opu ama ma kanm tẹ owiḅọ goḅọ-goḅọ ḍụḅarị gbọrụ pakịrị gbọrụ pakịrị kẹ iḅi kiri goyegoye gbin nwenii ḍụḅarị apakịrị pakịrị anị gbaịn fama ḅa; ngụngụḅa minji goyegoye ịn dasịẹmam, tẹ iḅi sịn goyegoye pẹlẹ-gbinm. Ka-hẹrẹsị kịngẹ mie kọn tẹ anị ḅẹ aḍụḅarị ma arị sime kiri ḅụ emi ye, katapọtị pembe ye tẹịn-arị apụ ma nwẹnị anị ikelema-koro tẹ owu kẹ anị paka.

²⁶ Mohabụ ḅẹ amadaḅọ ẹrịm mịnẹ owu mẹ ọ̀ ḅara siiarị ḅẹ ye ḅụ ọ̀ nwẹnị okologie kẹ owu-sọarịapụ ḅụ kịnị ẹndẹ jeia si finji (700) ọkị ọ̀ ḅụụ sụa tẹ kẹ Idọmụ ḅẹ amadaḅọ ḅe na dama-dama wararị anga ḅụ kan-tolu tẹ mangị-so Siriya ḅẹ amadaḅọ ḍọkụma-mu ḅẹ ḅara, kụma ini ine-a.

²⁷ Anịtẹso ọ̀ nwẹnị ori owiapụ-awọmẹ ma ḅụụ omongi tẹịn ḅọ ḅe tẹ ò kiri ọkị tẹ ama mẹ da ḅẹ ḅọ ḅe onu mẹ ọgọnọ dọkịma-agba mịẹ. Gburo-gburotẹ ịganị nwẹnị ḅo Izirẹlị ọgọnọ gbana; tẹ ịn nwẹnị ọ̀ ḅụụ ḅụ ḅụụ nụnụ tẹ pịkịma-so ịna ama muu.