2 Amadapụ 25 - FỊAFỊA BAỊBỤLỤ

Jeruselemu Ḅịkị Tẹẹ

¹ Ori ama-da tẹ esenia kụra karama kụra mẹ, ḅẹ oyia akalụ karama akalụ mẹ, ḅẹ oyi aḍin eneḅaka ḅụ, Nebukadineza Babịlọnị ḅẹ amadaḅọ ḅe nwẹnị ori ọmụ-ogbo mamgba na Jeruselemu ḅo tẹ anị ikelema-koro, tẹ nkọrọ soku, pịkị akpụrụ-awarị pike owu kẹ ịn paka ḅẹm gotẹ.

² Anị ḅara mie ini ama mẹ ikelema-koro tẹ sime wenii Zẹdẹkaya ama-da tẹ oyi gbọrụ kụra finji karama kụra la ḅara.

³ Ini akalụ karama akalụ mẹ ḅẹ eseni aḍin eneḅaka mẹ ịnụ mẹ opu ama mẹ ḅio kụrọ-gbagba tẹ ama mẹ ḅio ḅẹ atomi ma fị-fị fịye kalịye sọ nyana-a.

⁴ Anịtẹso ịn nwẹnị opu ama mẹ ḅẹ onu mẹ ḅụ gbọrụ anga kan; amadaḅọ ḅe na, ọmụapụ mamgba na ori na nwẹnị ḍin ḅụ kan finjima onu ma ogboku, amadaḅọ ḅe ḍụọ akaka ḅụ, Babịlọnị ḅẹ apụ ma opu ama mẹ ikelema wararị ogboku ḅụ mangị-so, tẹ tọrụ kẹ Araba da-mu.

⁵ Kụma Babịlọnị ḅẹ ọmụ-ogbo mẹ nwẹnị amadaḅọ ḅe ḍuka tẹ ori ọlọ Jeriko ḅẹ ele ḅio; tẹ ori ọmụ-ogbo mẹmgba nwẹnị ọ̀ ḅụụ mangị gala-gala.

⁶ Anịtẹso ịn nwẹnị amadaḅọ ḅe kun tẹ ori ọkị-ḅo Babịlọnị ḅẹ amadaḅọ ori ḅe tẹ tọn-pẹlẹm ịn ọ̀ ḅaa ḅẹ ḅọ ḅe pịrịm, Rabụla ḅụ.

⁷ Ịn nwẹnị Zẹdẹkaya tọrụ-ogbo ḅụ ori owiapụ-awọmẹ ma ḅaa ọ̀ tọrọkọ ḅụ, tẹ ori Zẹdẹkaya ḅe atọrụngbọ ma sọkị-siin, tẹ ikoli kẹ ọ̀ sụa, tẹ ori ọkị so Babịlọnị mum.

Ịn Tamụnọ Tẹkẹ-warị Mẹ Kanm

⁸ Sọnọ karama akalụ mẹ ḅẹ sọnọma ḍin karama eneḅaka anie Amadaḅọ Nebukadineza, Babịlọnị ḅẹ amadaḅọ ḅe sịḅị gbọrụ kụra fa si karama kụra ḅụ Babịlọnị ḅẹ amadaḅọ ḅe ḅụụ-ḍikiḍiki ọmụ-alaḅọ, ọ̀ fịrịmẹnjị gbọrụḅọ Nebuzaradanị Jeruselemu ḅom.

⁹ Ọ̀ nwẹnị KỊNỊNYANAḄỌ ḅe warị mẹ na, amadaḅọ ḅe warị mẹ na, Jeruselemu ḅẹ awarị mamgba dọkịma; opu warị goyegoye ọ̀ dọkịmam.

¹⁰ Babịlọnị ḅẹ ọmụ-ogbo mẹmgba tẹ ḅụụ-ḍikiḍiki ọmụ-alaḅọ ḅe na sime apụ mamgba Jeruselemu ikelema-koro onu ma kanm.

¹¹ Nebuzaradanị ḅụụ-ḍikiḍiki apụ ma ḅụ ḅẹ ọmụ-alaḅọ ḅe opu ama mẹ ḅio sime kọn apụ ma na, ama mẹ koroma-so Babịlọnị ḅẹ amadaḅọ ḅe ḍọkụma-mu apụ ma na kịẹnkịẹn-ọkụ-ofori atomi ma ḅẹ kirikọn atomi ma dogi-so Babịlọnị mum.

¹² Kụma ḅụụ-ḍikiḍiki apụ ma ḅụụ ḅẹ ọmụ-alaḅọ ḅe ama mẹ ḅio igoin-tẹịn apụ ma ḅẹ ja apụ wẹrịsom, ịn kụrọ-tẹlẹmapụ na ọkọ-fịrịmẹnjịapụ na sọ.

¹³ Babịlọnị ḅẹ apụ ma nwẹnị KỊNỊNYANAḄỌ ḅe warị mẹ ḅio sime ojo ḅeriaị ma na, ye-sịẹma aị ma na, ojo minji-sụaye mẹ na kẹ pakịrị-pakịrị puu tẹ ojo ma dogi-so Babịlọnị mu.

¹⁴ Ịn ye-sọ aḅẹlẹ ma na, sọpụrụ ma na, dọkịtẹ tọnjọ ḅịḅị pẹlẹ aị ma na, ịn kẹ kụnụaị sụa tẹ dọkịmarị ẹfẹrẹ ma na, ojo ye-sụa-aị tẹ ịn Tẹkẹ-warị mẹ ḅio kẹ kọrịnama kọrịarị aị ma

¹⁵ anyịmgbọ tan apanị ma sọ na, bọlị ma na ịn tan so famam. Ịn golu kẹ tẹmẹ-aị na ịn seleḅa kẹ tẹmẹ-aị na goyegoye ḅụụ-ḍikiḍiki apụ ma ḅẹ ọmụ-alaḅọ ḅe arị dogi-so famam.

¹⁶ Maa ḅeriaị ma na, gbọrụ minji-sụaye mẹ na, ye-sịẹma-aị ma tẹ Sọlọmọnị mịẹ KỊNỊNYANAḄỌ ḅe warị mẹ pịrị aị ma ḅụ ḅẹ ojo mẹ ḅẹ iku kụma ḅakam.

¹⁷ Gbọrụ ḅeriye-ḅeriye ḅẹ gele anie tẹra ḅụọ-kuḅu fa ḅụọ-kuḅu asuei (8 m); anịsakị anị ọgọnọ ojo ejikila inia ḅụọ-kuḅu na pakịrị na (1.3 m) kẹ gele ye emii; ịgbọ ḍori ḅara kẹ ḍori-aị na, omburo na kẹ ejikila mẹ ḅirima ikelema-koro wararị, ojo kẹ ini arịmgba mịẹm. Maaịn karama ḅeriye mẹ sọ ịgbọ ḍori ḅara mẹ kẹ ḍori-aị ma na ọkọ simem.

In Juda Ḅẹ Apụ Ma Dogi Babịlọnị Mum

¹⁸ Ḅụụ-ḍikiḍikiapụ ma ḅẹ ọmụ-alaḅọ ḅe nwẹnị Sẹraya Sịḅịda-Agbamịẹḅọ ḅe na, Zẹfanaya maaịn karama agbamịẹḅọ ḅe na, Tamụnọ tẹkẹ-warị mẹ ḍikiḍikiarị tẹra opu fịrịmẹnjịapụ ma na ọkị,

¹⁹ ọ̀ nwẹnị pịkị opu ama mẹ ḅio gbọrụ opu fịrịmẹnjịḅọ anịngẹ-kụraḅio ọmụapụ ma ḅẹrẹtọnḅọ na, opu ama mẹ ḅio ọ̀ ḍọkị-ẹrị amadaḅọ ḅe ḅẹrẹtọn-siri ḅụ sime sọnọ apụ na; ọmụ-ogbo mẹ ḅẹ ḅẹrẹtọnḅọ ḅe ḍiri-kẹẹḅọ tẹ ḅẹrẹtọn ama-ama ma ḅẹ atomi ma pịrị ḅọ ḅe na, opu ama mẹ ḅio ịn ḍọkị-ẹrị ama-ama ma ḅụụ ḅo atomi ma ḅụ kịnị atesi na.

²⁰ Nebuzaradanị ḅụụ-ḍikiḍikiapụ ma ọmụ-alaḅọ ḅe ini ọkịm, tẹ ịn ọkị-ḅo Babịlọnị ḅe amadaḅọ pịrịm Ribula ḅụ.

²¹ Babịlọnị ḅe amadaḅọ ḅe nwẹnị ịn fomu tẹ ịn ḅaa Hamatị ye-yọ Ribula ḅụ. Anie ịn Juda ye-yọ ḅụ anị ọkị mu omoni sọma ḅara.

Gedalaya, Juda Ḅẹ Gọvịna

²² Ini ma tẹ Nebukadineza Babịlọnị ḅẹ amadaḅọ ḅe wẹrịso tẹ Juda ḅẹ ama mẹ ḅio kọn apụ ma, ọ̀ Gedalaya Ahikamụ owiḅọtụḅọ, pịkị Safani taa-owiḅọtụḅọ ḅe tọnm ori ịna Gọvịna sọ.

²³ Mịọkụ opu sịẹ mẹ ḅụ sime osi ama ma ḅẹ ọmụ-ogbo ma ḅẹ ọmụ alapụ mamgba na, ịna atomi na naam mịnẹ Babịlọnị ḅẹ amadaḅọ ḅe tọn tẹ Gedalaya kẹ ḅẹrẹtọnḅọ sọma tẹso, ịn nwẹnị ịna atomi na Mizipa ḅụ Gedalaya ḍọkụma-ḅo; inima anie: Isimẹlị Netanaya owiḅọtụḅọ ḅe na, Johananị Kariya owiḅọtụḅọ ḅe na, Sẹraya Tanumẹtị Nẹtofati ḅẹ ḅo ḅe owiḅọtụḅọ ḅe na, Jezanaya, Mekati ḅẹ ḅọ ḅe owiḅọtụḅọ ḅe na.

²⁴ Gedalaya nwẹnị ye karị ọ̀ ḅụụ pịrị kẹ ini na ịna atomi ma na ḍie, tẹ ḅẹẹm, “Ọ́ Babịlọnị ḅẹ ọmụ-alapụ ma ḍiki-ḅalafa ma; ọmịnị ama mẹ ḅio angaa, tẹ fịrịmẹnjị namakọrị Babịlọnị ḅẹ amadaḅọ ḅe pịrị, anịsakị ye ọmịnị na iḅi ḅa.”

²⁵ Kụma sọnọma karama akalụ mẹ ḅụ, Isimẹlị anie Netanaya owiḅọtụḅọ, pịkị Ẹlịsama taa-owiḅọtụḅọ tẹ amada-furo mẹ ḅụ paka-ḅo ḅọ ḅe nwẹnị oyia apụ na ḅo owu kẹ Gedalaya paka tẹ ọ̀ ḅaa Mizipa ḅụ. Ọ̀ pịkị Juu-ḅẹ-apụ ma na Babịlọnị ḅẹ apụ ma na tẹ ori na sime apụ ma sọ ḅaam.

²⁶ Anịtẹso, tomi mamgba kala na opu na, ọmụ-ogbo mẹ ḅẹ ọmụ-alapụ ma na, nwẹnị saakị so Ijiputi mu, gbala ịn Babịlọnị ḅẹ apụ ma ḍiki-ḅalafarị ẹrẹsị.

In Jehohakịnị Pakama-ḅom Ikoli Ḅio

²⁷ Juda ḅẹ amadaḅọ Jehohakịnị omoni ḅara-ḅio sọ tẹ tẹra kụra fa kụra amesi karama kụra ḅụ, oyi maa akalụ finji karama akalụ mẹ ḅẹ tẹra aḍin fa suei karama eneḅaka ḅụ, Ịvụlụ-mẹro-dakị Babịlọnị ḅẹ amadaḅọ, ori saakị ama-da kụra ḅụ nwẹnị ḍiki-ḅụụjịrị ḅara ḅụ sịḅị nyana kẹ Jehohakịnị pịrị tẹ ọ̀ pakama-ḅo ikoli ḅio;

²⁸ ori iḅi ḅara kẹ ori na mịẹm, tẹ gele ori na Babịlọnị ḅụ ama-daarị amadapụ ma lẹgịaị ma nẹngị lẹgịye kẹ ọ̀ pịrịm.

²⁹ Anieḅụ Jehohakịnị nwẹnị ori oju ḅụụ ikoli opu akapa ma siin-koroma. Ọ̀ nwẹnị ò ḍumo ḅụ ene-ḅaaene-ḅaaene, sakị mẹmgba amadaḅọ ḅe dẹbịlẹ ọgọnọ ḅụ yefịm.

³⁰ Anịsakị ọ̀ ḅara-ọlọkọma ye kụma, amadaḅọ ḅe sakị mẹmgba ḅara-ọlọkọma ye kẹ ọ̀ pịrịm ò ḍumo wararị ene mamgba ḅụ.