2 Amadapụ 23 - FỊAFỊA BAỊBỤLỤ

Josaya Sunsin Oru Pịrị Dasịẹmam

¹ Anịtẹso, amadaḅọ ḅe nwẹnị fịrịma Juda na, Jeruselemu ḅẹ omongiapụ mamgba na sịn kobiri ọ̀ ḅụụ pịrị.

² Amadaḅọ ḅe nwẹnị Juda na Jeruselemu na ḅụ sime kala na opu na, agbamịẹapụ na ịkịankoroapụ na, tomi mamgba na kẹ KỊNỊNYANAḄỌ ḅe warị mu; ọ̀ nwẹnị ọḅọkụ ḍiri mẹ tẹ ịn KỊNỊNYANAḄỌ ḅe warị mẹ ḅio ḍọkị-ẹrị ye mẹ go tẹ ịn naa.

³ Amadaḅọ ḅe nwẹnị ḅeriye mẹ akaka sịẹsime tẹ KỊNỊNYANAḄỌ ḅe tọrọkọ ori na ọḅọkụ fị mịnẹ ori ò ḅioḅẹngbọ mẹmgba na, ọ̀ tẹmẹ mẹmgba na kẹ KỊNỊNYANAḄỌ ḅe ḍukamẹnjị tẹ ọ̀ tọn aị ma na, ò ḍuko aị ma na, ori oloko ma tẹ kẹẹ wararị aị ma na koko tẹ mị ḍiri mẹ ḅio kẹẹ wararị ọḅọkụ mẹ ḅẹ ẹkwẹn-aḅịḅị ma ḅẹẹ ḅara mịẹ ḅa; tẹ tomi mamgba nwẹnị ọḅọkụ mẹ ḅụ sọ.

⁴ Amadaḅọ ḅe nwẹnị tọn Hilikaya Sịḅịda-Agbamịẹḅọ ḅe na, maaịn karama ọrụ ḅụ sime agbamịẹapụ ma na, kọrịnama-kọrịapụ ma na pịrị ịn KỊNỊNYANAḄỌ ḅe tẹkẹ-warị mẹ ḅio ẹfẹrẹ ma tẹ ịn tẹmẹ Balị na, Asẹra na, So-ḅio sime aị mamgba na pịrị aị ma tan pakama-ḅoo; ọ̀ nwẹnị Jeruselemu ḅio ḅụ arị pakama tẹ Kidirọnị piri ḅio arị dọkịma tẹ arịḅẹ fọọn ma dogi-so Bẹtẹlị mu.

⁵ Ọ̀ nwẹnị fịrị ḅụ oru agbamịẹapụ ma tẹ Juda ḅẹ amadapụ ma tọnm Juda ḅẹ opu ama ma na, Jeruselemu ikelema-koro gele ayeyọ ma ḅụ kụnụaị dọkịma kẹ ḅẹẹ apụ ma na; ini ma tẹ kụnụaị dọkịma Balị na, ịrụa mẹ na, akalụ mẹ na, lolia-ogbo-ogbo ma na, so ma ḅio sime aị mamgba pịrịarị apụ ma na sịn.

⁶ Ọ̀ nwẹnị Asẹra fụḅara mẹ pakama-ḅo KỊNỊNYANAḄỌ ḅe warị ḅụ, tẹ Jeruselemu ḅụ anị pakama mu Kidirọnị kuroro ḅụ anị dọkịma tẹ anị dogi-ḅo fọọn sọ tẹ ini anị ḅẹ fọọn mẹ kẹ papaa atomi ma aḍuḅu ọgọnọ sara.

⁷ Ọ̀ nwẹnị ịn mịẹ-mịẹ ḅara ḅụ owiapụ sime tẹ sẹfị-fị awarị ma kan siin, arị aị ma tẹ KỊNỊNYANAḄỌ ḅe warị mẹ ḅio sime tẹ, ereme ma ḅọkọ gbaịn aḅịtẹ ḍori Asẹra ḅe pịrị-pịrị anga mẹ.

⁸ Ọ̀ nwẹnị Juda ḅẹ opu ama ma ḅụ sime agbamịẹapụ mamgba pakama-ḅo, tẹ gele-ayeyọ ma tẹ agbamịẹapụ ma kụnụaị dọkịma anga ma pilema Geba ḅụ so mu Biyasẹba la. Ọ̀ nwẹnị Gọvịna Jọsụwa nama wararị ogigo-ḅọkọ mẹ akaka simearị si-tẹmẹ oru-awarị ma kan-sara. Mị ogigo-ḅọkọ mẹ, anị opu ama mẹ sọ-muarị ogigo-ḅọkọ mẹ ḅẹ ere-ḅara ḅụ emi.

⁹ Anịsọ gele-ayeyọ ma ḅẹ agbamịẹapụ ma ịn ḅo Jeruselemu ḅụ KỊNỊNYANAḄỌ ḅe agbamịẹ-anga mẹ la-a, kụma ini ịna amịnapụ ma sun-a fịturu fị fịm ịna ogboku ḅụ.

¹⁰ Ọ̀ nwẹnị Bẹnị-hinomu ḅẹ tụndụ ogboku ḅụ sime Tofẹti pilema mịẹtẹ gbọrụḅọ-sọ ḅarị mḅọ owiḅọtụḅọ, anịanịa ẹrẹḅọtụḅọ dọkịma tẹ kẹ agba mịẹ Molẹkị pịrị ḅịa ḅara.

¹¹ Ọ̀ nwẹnị asụ ma tẹ Juda ḅẹ amadapụ ma mịẹ fịafịama tẹ ịrụa tẹkẹ mẹ pịrị aị ma saakị siin, mẹnjị KỊNỊNYANAḄỌ ḅe warị sọarị anga Nẹtani-meleki opuḅọ ḅe kọrịnama kọrị warị anga ḅụ ogigo mẹ ḅio; ọ̀ nwẹnị fịnị kẹ ịrụa kirimẹnjị-ọmụarụ mẹ na,

¹² Ahazi warị mẹ ḅẹ ọgọnọ ḅẹ ḅio mẹ isun ọgọnọ sime ebeka mẹ, aniemẹ tẹ Juda ḅẹ amadapụ ma nama ye mẹ na, Manasẹ KỊNỊNYANAḄỌ ḅe warị mẹ ḅẹ anụngọ ma ḅụ nama ebeka ma na, kan sara tẹ kẹ pakịrị-pakịrị puu tẹ dọkịma fọọn mịẹ, tẹ nwẹnị arịḅẹ afọn ma kẹ Kidirọnị ḍaḅa ḅio nguma.

¹³ Amadaḅọ ḅe nwẹnị pịkị amadaḅọ Sọlọmọnị Izirẹlị ḅẹ amadaḅọ ḅe Jeruselemu ḅụ ịrụa-saakịarị-anga na, ịn kẹ Kịnị Sima Tụndụ “Koropusiyoni Tụndụ” sịn anga ḅẹ ideri pakịrị ḅụ nama kẹ Asịtatị pịrị Sidọnị ḅẹ apụ tọn-tọn oru pịrị gele-ayeyọ ma pilema.

¹⁴ Ọ̀ nwẹnị ịḅalị ma kẹ pakịrị-pakịrị puu, tẹ Asẹra fụḅara mẹ pẹlẹ-gbin tẹ tomina mgbe kẹ arị sime akiri ma sara ḅinma.

¹⁵ Anie sikima, Jerobohamụ Nebatị owiḅọtụḅọ ḅe tẹ mịẹtẹ Izirẹlị si mịẹ ḅọ ḅe, Bẹtẹlị ḅụ nama ebeka mẹ na gele-ayeyọ ma na, ori arị sukuruma gbin tẹ ḍụḅarị ma kẹ pakịrị-pakịrị puu tẹ arị gbẹẹ kọsịma fọọn mịẹm, tẹ pịkị Asẹra fụḅara mẹ dọkịmam.

¹⁶ Josaya tọrụ pịkị tẹso, ọ̀ nwẹnị anịanga tụndụ ọgọnọ ḅụ tọnwa ḍuḅu ẹrị; ọ̀ nwẹnị fịrịma mu mgbe ma tan ḅo ḍuḅu ma ḅio, tẹ arị dọkịma ebeka mẹ ọgọnọ tẹ kẹ anị pilema, KỊNỊNYANAḄỌ ḅe ẹkwẹn-ḅịḅị mẹ, tẹ mẹnịa ḅiri ḅụ Tamụnọ tomḅọ kpokpo gbolo ḅara kẹ wẹrịtẹ mịna aị ma ḍuko ḅara.

¹⁷ Anịtẹso, ọ̀ nwẹnị gbela, “Tọrọkọ arị ẹrịarị kpokobia mẹ tiye?” Ama ḅẹ apụ ma nwẹnị ḍuko ọ̀ pịrị, “aniemẹ anie Ịlayịsa tẹ Juda ḅụ ḅo mẹnịa ḅiri ḅụ mịna aị ma tẹ ị́ kẹ Bẹtẹlị ḅẹ ebeka mẹ mịẹ ḅara ḍuko ḅọ ḅe ḍuḅu.”

¹⁸ Ọ̀ nwẹnị ḅẹẹ, “Yee gbọrụḅọ-sọ ḅara kẹ ori mgbe ma lama tẹ saakị ma.” Anieḅụ ịn nwẹnị ori na Sameriya ḅụ ḅo ịkịankoroḅọ ḅe na mgbe ma wẹrịso.

¹⁹ Ọ̀ wẹrịtẹ kẹ Bẹtẹlị ḅụ gele-ayeyọ ma na oru-awarị mamgba na mịẹ ḅara, mie Josaya pịkị kẹ Sameriya ḅẹ opu ama ma ḅụ Izirẹlị ḅẹ amadapụ nama tẹ kẹ KỊNỊNYANAḄỌ ḅe ịganị sịn saakị aị ma kan-sara ḅara.

²⁰ Gele-ayeyọ ma ḅụ ebeka ma ḅụ sime agbamịẹapụ mamgba ori ịn ḅaa famam, tẹ tomina mgbe ma kẹ ebeka ma ọgọnọ dọkịmam. Anịtẹrẹmẹ ọ̀ pịkịma-so Jeruselemu mum.

Josaya Tọn Tomi Ma Pịrịm Ịn Saḅaḅọrọ-Alalị Mẹ Wẹrịị

²¹ Amadaḅọ ḅe nwẹnị tọn tomi mamgba pịrị, “Ọ́ Saḅaḅọrọ-Alalị mẹ wẹrị KỊNỊNYANAḄỌ ọmịna Tamụnọ ḅe pịrịị, anị wẹrịtẹ ọḅọkụ ḍiri mẹ ḅio kẹẹ ḅara.”

²² Kẹ gotẹ ọkọ ḅẹẹarị, ḅẹrẹkọn-apụ ma tẹ Izirẹlị kọn apụ ma eneḅaka ma kụra-ḅio, anịanịa Izirẹlị ḅẹ amadapụ ma, anịanịa Juda ḅẹ amadapụ ma eneḅaka mamgba ḅụ ọkọ sime Saḅaḅọrọ-Alalị fị-a,

²³ kụma Amadaḅọ Josaya ama-da tẹ maa kụra fa si karama kụra ḅụ mị Saḅaḅọrọ-Alalị mẹ Jeruselemu ḅụ fịị kẹ KỊNỊNYANAḄỌ ḅe pịrịm.

Ja Kịrị Tẹ Josaya Pakama Aị

²⁴ Anie sikima, Josaya Juda ḅẹ ama ḅio na, Jeruselemu na ḅụ ịn tọrụngbọ kẹ ẹrị fụḅara-ḍiki-ḅịrịapụ na, tẹmẹ sịn apụ na deem, tẹ warị wẹrịma ye ḅii-aị na, ḅara kẹ tẹmẹ oru na, tọn-tọn aị mamgba na tan siin famam, Hilikaya Sịḅịda-Agbamịẹḅọ ḅe KỊNỊNYANAḄỌ ḅe warị mẹ ḅio ḍọkị-ẹrị ḍiri mẹ ḅio kẹẹ wararị oloko mẹ ẹkwẹn-ḅịḅị ma ọ̀ wẹrịtẹ giregirema ḅẹẹ ḅara.

²⁵ Mozizi oloko mẹmgba wẹrịtẹ sime-ḅara kẹ vuunma pịkị tẹ ori amịna ḅioḅẹngbọ mẹmgba na, ọ̀ tẹmẹ mẹmgba na, ori ịnyọ mẹmgba na kẹ KỊNỊNYANAḄỌ ḅe da ò pembe amadaḅọ ọ̀ tọrọkọ ḅụ ofori; ọ̀ ḍa tẹ ḅọrọ sakị sọ, ọkọ sime pembe ḅọ amụ paka-ḅo-a.

²⁶ Kụma anịsọ, KỊNỊNYANAḄỌ ḅe paa ò gburo-gburotẹ ịganị mẹ kụrọ la ḅara ḅụ vuunma pịkị-a, Manasẹ kẹ ori ịganịma ye mẹmgba tẹ ori ịganị Juda ḅụụ ḅụ sara ye mẹ ẹrẹsị.

²⁷ KỊNỊNYANAḄỌ ḅe nwẹnị ḅẹẹ, “Arị ì ḍiki-tọrụ ḅụ Juda saakị siin ḅa, arị Izirẹlị saakị siin ḅara, anịsakị à mị opu ama, Jeruselemu tẹ à sẹlẹ-ọkị ye mẹ na, warị mẹ tẹ à ḅẹẹm ị̀ ẹrẹ anịjụ sime ḅa ḅẹẹ anga mẹ na kẹ wakị nguma ḅa.”

Josaya Ama-da Kunoma

²⁸ Mịọkụ kirikọntẹ Josaya amịẹaị tẹ ọ̀ mịẹ aị, Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

²⁹ Ori ama-daarị eneḅaka ḅụ Ijiputi ḅẹ amadaḅọ Fero Neko Asiriya ḅẹ amadaḅọ na owu sọ ḅẹ Yuferetisi tọrụ mu tẹso, Amadaḅọ Josaya nwẹnị ọ̀ dasịẹma ḅẹ mu; Fero Neko ori ẹrị tẹso, ọ̀ nwẹnị ọ̀ ḅaa Mẹgido ḅụ.

³⁰ Ori afịrịmẹnjịapụ nwẹnị Mẹgido ḅụ kirimẹnjị-ọmụarụ kẹ ori oju-akpakpa sẹịn tẹ kẹ Jeruselemu ḅo, tẹ ọ̀ kẹ ò soku-ḅẹ ḍuḅu ḅio ḍiḅi. Ama mẹ ḅio ḅẹ apụ nwẹnị Jehohazị, Josaya owiḅọtụḅọ ḅe ọkị tẹ pulo kẹ ọ̀ sịḅị sara tẹ ọ̀ ḍa kiri ḅụ ọ̀ kẹ amadaḅọ mịẹm.

Juda Ḅẹ Amadaḅọ Jehohazị

³¹ Jehohazị sịḅị si tẹra kụra finji ḅọrọ tẹso, ọ̀ saakị Jeruselemu ḅụ ama-dam; tẹra kụra ọ̀ nwẹn kẹ ama-dam. Ò iyingi ẹrẹ Amutalị, Libina ḅẹ Jerimaya ẹrẹḅọtụḅọ ma.

³² Ọ̀ KỊNỊNYANAḄỌ ḅe ḍiki-tọrụ ḅụ siye mịẹm, ori aḍapụ wẹrịtẹ mịẹ ḅara mamgba.

³³ Fero Neko nwẹnị ọ̀ kẹ ikoli ḅio su Ribula ḅụ Hamatị ama ḅio, mịẹtẹ ọ̀ ḅarị inetẹ Jeruselemu ḅụ ama-da ḅịa ḅara, tẹ nwẹnị ama-oso-igbigi seleḅa tẹra puku fa puku amesi na pakịrị oyia ẹndẹ na (300,000), golu kpo sọnọma ẹndẹ oyia asi finji (3,000) kẹ ama ọgọnọ gbana.

³⁴ Fero Neko nwẹnị Ẹlịyakịmụ Josaya owiḅọtụḅọ ḅe kẹ ama-dama ọ̀ ḍa kiri mẹ ḅụ, tẹ ori ẹrẹ ḍima tẹ kẹ Jehohakịmụ mịẹ. Kụma ò Jehohazị kẹ so Ijiputi ḅom, tẹ ori anịanga ḅụ sime tẹ fịịm.

Juda Ḅẹ Amadaḅọ Jehohakịmụ

³⁵ Jehohakịmụ nwẹnị seleḅa mẹ na, golu mẹ na kẹ Fero pịrị, kụma ọ̀ nwẹnị Fero wẹrịtẹ tọn ḅara ḅụ anị kẹ ama-ama ọgọnọ gbana mịnẹ ịn mị igbigi mẹ gbẹẹ. Ọ̀ kụrọ ḅara kẹ ama mẹ ḅio ḅẹ atomi ma ḅara seleḅa mẹ na golu mẹ na pakama-ḅo tẹ kẹ Fero Neko pịrịm, ọ̀ wẹrịtẹ pẹlẹ sịḅị-sịḅị pịrị ḅara.

³⁶ Jehohakịmụ sịḅị si sọnọa kụra finji ḅọrọ tẹso ọ̀ saakị ama-dam, tẹ oyi gbọrụ kụra finji kẹ Jeruselemu ḅụ sime tẹ ama-dam. Ò iyingi ẹrẹ Zebida, Pedaya Ruma ḅẹ ḅọ ḅe ẹrẹḅọtụḅọ ma.

³⁷ Ọ̀ KỊNỊNYANAḄỌ ḅe ḍiki-tọrụ ḅụ siye mịẹm, ori aḍapụ ma wẹrịtẹ mịẹ ḅara mamgba.