2 Amadapụ 22 - FỊAFỊA BAỊBỤLỤ

Juda Ḅẹ Amadaḅọ Josaya

¹ Josaya sịḅị ninea kụra ḅọrọ tẹso, ọ̀ saakị ama-dam, tẹ kụra suei gbọrụ kụra finji kẹ ama-dam Jeruselemu ḅụ. Ò iyingi ẹrẹ Jedida, Bozikati ḅẹ Adaya ẹrẹḅọtụḅọ.

² Ọ̀ KỊNỊNYANAḄỌ ḅe ḍiki-tọrụ ḅụ kuraye mịẹm tẹ ò Devidi mẹnjị etela mẹmgba ḅụ mẹnjị tẹ tọrụ pịkị ama-ḅara anịanịa ere-ḅara da-a.

In Oloko Ḍiri Mẹ Ḍọkị-ẹrịm

³ Amadaḅọ Josaya ama-da tẹ maa akụra fa si karama kụra ḅụ, amadaḅọ ḅe nwẹnị Safani anie Azalaya owiḅọtụḅọ, pịkị Mesulamu taa-owiḅọtụḅọ ḍiri-kẹẹḅọ ḅe fịrịma KỊNỊNYANAḄỌ ḅe warị mu tẹ ḅẹẹ,

⁴ “Hilikaya Sịḅịda-Agbamịẹḅọ ḅe ḍọkụma-muu, mịẹtẹ ori igbigi mẹ tẹ ịn kẹ KỊNỊNYANAḄỌ ḅe warị mẹ ḅio ḅo tẹ anị ḍikiḍikiarị apụ ma, tomi ma ḅara ḅụ da kobiri tẹ ye mẹ kịẹn ḅẹ ḅara;

⁵ tẹ yee ini anị kẹ tọrụ kẹ KỊNỊNYANAḄỌ ḅe warị mẹ ḍiki-ikelema kọrịnama kọrị apụ ma pịrị, tẹ ini anị kẹ KỊNỊNYANAḄỌ ḅe warị mẹ ḅụ si anga si anga tẹlẹmarị apụ ma,

⁶ anie akanịapụ ma na, warị nama apụ ma na, ḍụḅarị warị nama apụ ma na pịrị, ịn pịkị anị kẹ opu sịn-aḅiri na, pẹlẹ tẹ ḍụḅarị na fẹẹ tẹ kẹ warị mẹ tẹlẹma.

⁷ Kụma ịn kẹ ịn pịrịtẹ ịna ḅara-ḅio sime igbigi mẹ ịn kọrị ḅara gbela ma, kẹ gotẹ ọkọ ḅẹẹarị, ịn ye mingirima-a ḅara kẹ kọrịarị.”

⁸ Hilikaya sịḅịda agbamịẹḅọ ḅe nwẹnị Safani ḍiri-kẹẹḅọ ḅe ḅẹẹ, “Arị Oloko mẹ ḅẹ ḍiri mẹ ḍọkị-ẹrị tẹ KỊNỊNYANAḄỌ ḅe warị mẹ ḅio.” Hilikaya nwẹnị ḍiri mẹ kẹ Safani pịrị tẹ ori anị gom.

⁹ Safani ḍiri-kẹẹḅọ ḅe nwẹnị amadaḅọ ḅe ḍọkụma-ḅo tẹ ḍuko amadaḅọ ḅe pịrị, “Ị́ afịrịmẹnjịapụ ma warị mẹ ḅio ịn ḍọkị-ẹrị igbigi mẹmgba tuma tẹ kẹ tọrụ kẹ KỊNỊNYANAḄỌ ḅe warị mẹ ḍiki-ikelemarị kọrịnama-kọrịapụ ma pịrị tẹẹ.”

¹⁰ Anịtẹso Safani ḍiri-kẹẹḅọ ḅe pịkị ḍuko amadaḅọ ḅe pịrịm, “Hilikaya agbamịẹḅọ ḅe gbọrụ ḍiri kẹ ị̀ pịrịm.” Tẹ Safani nwẹnị amadaḅọ ḅe tọrọkọ anị go.

¹¹ Amadaḅọ ḅe Oloko ḍiri mẹ ḅio ḅẹ ẹkwẹn-aḅịḅị ma naa tẹso, ọ̀ nwẹnị ori akapa kan.

¹² Amadaḅọ ḅe nwẹnị tọn Hilikaya agbamịẹḅọ ḅe na, Ahikamụ Safani owiḅọtụḅọ ḅe na, Akịbọ Mayịkaya owiḅọtụḅọ ḅe na, Safani ḍiri-kẹẹḅọ ḅe na, Asaya amadaḅọ ḅe fịrịmẹnjịḅọ ḅe na pịrị, tẹ ḅẹẹm,

¹³ “Ó mu KỊNỊNYANAḄỌ ḅe ḅịḅị ḅii kẹ yẹrị na, tomi ma na, bebe Juda mẹmgba na pịrị, mị ḍiri mẹ tẹ ịn ḍọkị-ẹrị ye mẹ ḅio ḅẹ ẹkwẹn-aḅịḅị ma gboloma ye; kẹ gotẹ ọkọ ḅẹẹarị, wamịna aḍapụ ma mị ḍiri mẹ ḅio ḅẹ ẹkwẹn-aḅịḅị ma poki tẹ anị wẹrịtẹ wa gboloma ḅara ḅụ kẹẹ ḅara mamgba ḍiki mịẹ-a ẹrẹsị KỊNỊNYANAḄỌ ḅe gburo-gburotẹ ịganị ḅo wamịna ọgọnọ gbana tẹ.”

¹⁴ Anieḅụ Hilikaya agbamịẹḅọ ḅe na, Ahikamụ na, Akịbọ na, Safani na, Asaya na, nwẹnị Ịkịankoro-ẹrẹḅọ Huluda na ẹkwẹnma ḅẹ mu. Árị anie Salumu ta — oriḅe anie Tikiva owiḅọtụḅọ, pịkị Hahasi taa-owiḅọtụḅọ tẹ kapa koko igbe mẹ ḍikiḍikiarị ḅọ ḅe. (Jeruselemu ḅụ Ịwọma Pakama Anga mẹ ḅụ árị angam). Ịn nwẹnị árị na ẹkwẹn.

¹⁵ Á nwẹnị ịn ḅẹẹ, “Ó ḍuko ọ́ kẹ ị̀ fịrịmaḅọ ḅe pịrịị,

¹⁶ mie KỊNỊNYANAḄỌ Izirẹlịapụ tẹkẹarị Tamụnọ ḅe ḅẹẹ ḅara: ‘ḍikii, à siye kẹ ḅo mị ye-yọ mẹ na anị ḅio sime aị ma na ọgọnọ gbana ḅa, anie ẹkwẹn-aḅịḅị mamgba tẹ Juda ḅẹ amadaḅọ ḅe go aị ma.

¹⁷ Kẹ gotẹ ọkọ ḅẹẹarị, ini ị̀ sịkị tẹ kụnụaị dọkịma tẹ kẹ oru-atamụnọ pịrị tẹẹ, mịẹtẹ ịn ḅara kẹ mịẹ aị ḅụ ini ị̀ ḅụụ ịganị saakị ḅẹ ḅara, ọkọẹrẹsị ị̀ ịganị mị yọ mẹ ḅụ saakị ḅa, tẹ biin ḅịa.’

¹⁸ Juda ḅẹ amadaḅọ ḅe tẹ ọ́ fịrịmam ó ḅo KỊNỊNYANAḄỌ ḅe ḅịḅị ḅii ḅẹ ḅọ ḅe kụma, mie ọ́ kẹ ọ̀ ḅẹẹ ḅarị ḅara, mie KỊNỊNYANAḄỌ, Izirẹlịapụ tẹkẹarị Tamụnọ ḅe ḅẹẹ ḅara: ‘Ẹkwẹn-aḅịḅị ma tẹ ị́ naa aị ma gbolomaye,

¹⁹ tẹmẹ ḅụ ị́ si ḅụ pịkị tẹ KỊNỊNYANAḄỌ ḅe tọrọkọ ị́ ḅụụ sin-saram, ị́ à mị yọ mẹ na, anị ḅụ sime aị ma ḅụ à si ẹkwẹn kọn ḅara mẹ naa tẹso, mịnẹ ịn woritẹ fa tẹ ye-yọ sọ ḅa ḅẹ ye ḅụ ị́ nwẹnị ị́ akapa kan tẹ ị̀ tọrọkọ owu ye mẹ, yẹrị sọ àrị ị́ naa tẹ,’ KỊNỊNYANAḄỌ ḅe ọkọ ḅẹẹm.

²⁰ Anịẹrẹsị, ḍikii àrị í kobiri tẹ kẹ ị́ aḍapụ ma sime anga mu ḅa, anịsakị dein ḅụ arị í kobiri í ḍuḅu ḅio su ḅa, tẹ ị́ atọrụngbọ mịna si aị mamgba tẹ arị ọkị-ḅo mị yọ mẹ ọgọnọ gbana ḅẹ aị ma ẹrị ḅịa.” Ịn nwẹnị ma ẹkwẹn-aḅịḅị ma da ḅo amadaḅọ ḅe pịrị.