2 Amadapụ 21 - FỊAFỊA BAỊBỤLỤ

Juda Ḅẹ Amadaḅọ Manasẹ

¹ Manasẹ sịḅị oyi maa kụra finji ḅọrọ tẹso, ọ̀ saakị ama-dam, tẹ Jeruselemu ḅụ kụra amesi oyi finji na sọnọa akụra kẹ ama-dam. Ò iyingi ẹrẹ anie Ẹfụziba.

² Ọ̀ KỊNỊNYANAḄỌ ḅe ḍiki-tọrụ ḅụ siye mịẹm, opu asịẹ ma tẹ KỊNỊNYANAḄỌ ḅe Izirẹlịapụ ma tọrọkọ dee pakama apụ ma wẹrịtẹ mịẹ-mịẹ tọn-tọn-aị ma.

³ Kẹ gotẹ ọkọ ḅẹẹarị, ò siin oru awarị ma namam, ọ̀ ḍa Hẹzịkaya kan aị ma; tẹ nwẹnị tọnwa ebeka nama Balị pịrị, Ehabụ Izirẹlị ḅẹ amadaḅọ ḅe wẹrịtẹ mịẹ tẹ sunsin tẹ fịrịmẹnjị kẹ So-ḅio sime aị mamgba piri ḅara.

⁴ KỊNỊNYANAḄỌ ḅe warị-ḅio ḅụ ori ebeka nama saram, aniemẹ tẹ KỊNỊNYANAḄỌ ḅe ḅẹẹm, “Jeruselemu ḅụ mie àrị ị̀ ẹrẹ mẹ kẹ sụa ḅarịye” ḅẹẹ anga mẹ.

⁵ Ori ebeka nama sara kẹ So-ḅio sime aị mamgba pịrịm maa anụngọ ma tẹ KỊNỊNYANAḄỌ ḅe warị mẹ ḅio sime aị ma ḅụ.

⁶ Ori ori owiḅọtụḅọ dọkịmam kẹ agba mịẹ ḅara ḅụ, tẹ fụḅara-ḍiki-ḅịrịapụ na, ye ḅii amịẹaị na mịẹm, tọrụ tolu tẹ okoḅa-sarasara-ye-gbelapụ na, arịapụ na aḅara ḅụ. Ọ̀ KỊNỊNYANAḄỌ ḅe ḍiki-tọrụ ḅụ ḅaka si mịẹm, kẹ ori ịganị sịn-saakịma.

⁷ Asịra oru-fụḅara mẹ tẹ ọ̀ tẹmẹ ye mẹ ọ̀ kẹ anị warị mẹ ḅio sịẹmam, anị warị mẹ tẹ KỊNỊNYANAḄỌ Devidi na, ori owiḅọtụḅọ Sọlọmọnị na ḅẹẹm, “Mị warị mẹ ḅio na Jeruselemu na tẹ arị Izirẹlị afuro mamgba ḅụ sẹlẹ-ọkị anga mẹ ḅụ, arị ị̀ ẹrẹ kẹ sụa gbamaso ḅa;

⁸ tẹ mịẹtẹ Izirẹlị aḅụọ ma ḅarị jen kẹ à kẹ ịna aḍapụ ma pịrị ama mẹ ḅụ ikelekele ḅịa, ịn nwẹnị paa ḅụụ ẹbị tẹ à tọn ịn pịrị ḅara mẹ kẹ à tọn aị mamgba na, ị̀ fịrịmẹnjịḅọ Mozizi kẹ ịn pịrị Oloko mẹmgba sime-ḅara ḍiki mịẹm ḅẹḅẹ.”

⁹ Kụma ịn poki-a, Manasẹ nwẹnị pịkị etela kẹ ịn ḍie irima tẹ ịn siye mịẹ inima tẹ KỊNỊNYANAḄỌ ḅe Izirẹlịapụ ma tọrọkọ ḅaa opu asịẹ ma nẹngị.

¹⁰ KỊNỊNYANAḄỌ ḅe nwẹnị ori afịrịmẹnjị-ịkịankoroapụ ḅụ ḅọrọtẹ ḅẹẹ,

¹¹ “Gbala Manasẹ Juda ḅẹ amadaḅọ ḅe mịna tọn-tọn-aị ma mịẹtẹ, pịkị si-sịḅịḅio-sụa Amọrayịtị ma mịẹ ye nẹngị tẹ inima tẹ ọ̀ tọrọkọ sime apụ ma, tẹ mịẹtẹ Juda pịkị ori oru ma na si mịẹ tẹ ẹrẹsị,

¹² anịẹrẹsị mie KỊNỊNYANAḄỌ Izirẹlịapụ tẹkẹarị Tamụnọ ḅe ḍuko yee, Ḍikii, à kẹ ḅo Jeruselemu na Juda na ọgọnọ gbana ḅẹ ḅoarị siye mẹ sime-ḅara anị naa ḅọ, naa ḅọ aḅeri tẹịn ḅa.

¹³ Kẹ Sameriya tọn ye-tọn ḍigi mẹ na, Ehabụ warị ḅẹ gọmụ kpọ lụmọ ḍiki mẹ na à nwẹn sụn saḅama ḅa Jeruselemu ḅụ, tẹ tomḅọ ẹfẹrẹ kuḅu ọfịn ḅara kẹ Jeruselemu ọfịn tẹ anị pịkị iḅo ḅa.

¹⁴ Arị à nyana kirikọn-apụ ma sịkị ḅa tẹ ịn kẹ ini na fịya-a apụ ḅara-ḅio suu ḅa, tẹ ịn ḅo pẹị-pẹị anama na, sima-sima aị na sọ ini na fịya-a apụ mamgba pịrị ḅa,

¹⁵ gbala ini ì ḍiki-tọrụ ḅụ siye mịẹ tẹ ị̀ ịganị sịn-saakịma tẹ, ịna aḍapụ ma Ijiputi ḅụ paka-ḅo ene ḅụ ọkị-ḅo mịmgba la.”

¹⁶ Anie sikima, Manasẹ kpọma mịẹye-ofori apụ ḅaam Jeruselemu ḅụ, gbọrụ kunoma ḅụ saakị mu jen kunoma la; ò miemẹ mịẹm, ò Juda ḅẹ apụ toluma mu sunsin oru-afụḅara pịrị tẹ KỊNỊNYANAḄỌ ḅe ḍiki-tọrụ ḅụ siye mịẹ ye mẹ sikima.

¹⁷ Mịọkụ kirikọntẹ Manasẹ amịẹaị na, ọ̀ mịẹ aị mamgba na, Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

¹⁸ Manasẹ nwẹnị fịị, tẹ ịn nwẹnị Uza ḍụọ ḅio, ọ̀ warị mẹ ḅẹ ḍụọ ḅio ḅụ ò ḍiḅi; tẹ ori owiḅọtụḅọ Amọnị nwẹnị ò kiri ḅụ ama-da.

Juda Ḅẹ Amadaḅọ Amọnị

¹⁹ Amọnị si maa kụra finji ḅọrọ tẹso, ọ̀ saakị ama-dam, tẹ maa akụra kẹ ama-dam Jeruselemu ḅụ. Ò iyingi ẹrẹ Mẹsulẹmẹtị Joliba ḅẹ Aruzu ẹrẹḅọtụḅọ ma.

²⁰ Ọ̀ KỊNỊNYANAḄỌ ḅe ḍiki-tọrụ ḅụ siye mịẹm, ọ̀ ḍa Manasẹ wẹrịtẹ mịẹ ḅara.

²¹ Ori ọ̀ ḍa mẹnjị etela mẹmgba ḅụ mẹnjịm, tẹ fịrịmẹnjị ọ̀ ḍa fịrịmẹnjị pịrị oru ma pịrị tẹ sunsin ịn pịrịm;

²² Ọ̀ KỊNỊNYANAḄỌ ori aḍapụ ma Tamụnọ ḅe sịkịm, tẹ KỊNỊNYANAḄỌ ḅe etela mẹ ḅụ mẹnjị-a.

²³ Amọnị afịrịmẹnjịapụ ma nwẹnị ḅẹrẹ-ḅiya ọ̀ pịrị tẹ amadaḅọ ḅe ḅaa ọ̀ warị ḅio ḅụ.

²⁴ Kụma ama mẹ ḅẹ apụ ma nwẹnị ḅẹrẹ-ḅiya Amadaḅọ Amọnị pịrị apụ mamgba ḅaa, tẹ ori owiḅọtụḅọ Josaya kẹ ò kiri ḅụ amadaḅọ sọma

²⁵ Mịọkụ kirikọntẹ Amọnị amịẹaị tẹ ọ̀ mịẹ aị, Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

²⁶ Ịn nwẹnị ọ̀ kẹ ò ḍuḅu ḅio ḍiḅi Uza ḍụọ mẹ ḅio; tẹ ori owiḅọtụḅọ Josaya ò kiri ḅụ ama-dam.