2 Amadapụ 20 - FỊAFỊA BAỊBỤLỤ

Amadaḅọ Hẹzịkaya Obim Tẹ Pịkị Gwọọm

¹ Arị ene ma ḅụ Hẹzịkaya nwẹnị obi tẹ fịị fịị ḅara sime. Ịkịankoroḅọ Ayịzaya Emọzị owiḅọtụḅọ ḅe nwẹnị ọ̀ ḍọkụma-ḅo, tẹ nwẹnị ọ̀ ḅẹẹ, “Mie KỊNỊNYANAḄỌ ḅe ḍuko yee, ‘Ị́ warị kẹ ọrụtọn wẹrị; kẹ gotẹ ọkọ ḅẹẹarị, ị́ fịị ḅa, í oju iḅi ḅịa.’ ”

² Anieḅụ Hẹzịkaya nwẹnị ọ̀ tọrụ pịkị agbakuru ḅio da, tẹ KỊNỊNYANAḄỌ ḅe tẹkẹ tẹ ḅẹẹ,

³ “Yei KỊNỊNYANAḄỌ, àrị ị́ tẹkẹm, à minini ḅụ ì ḅioḅẹngbọ mẹmgba kẹ ị́ tọrọkọ mẹnjị tẹ í ḍiki-tọrụ ḅụ iḅiye mịẹ ḅara kẹ ḅiokoroma ị̀ pịrịị.” Hẹzịkaya nwẹnị ye ḅụụ ḅụ akụ ḅara kẹ owu.

⁴ Tẹrẹmẹ Ayịzaya mu ḅiokiri ḅụ mẹnjị paka, KỊNỊNYANAḄỌ ḅe nwẹnị ọ̀ ḅẹẹ,

⁵ “Ọḅụ pịkịị, tẹ Hẹzịkaya ị̀ atomi ma amadaḅọ ḅe ḅẹẹ, Mie KỊNỊNYANAḄỌ, ị́ ḍa Devidi Tamụnọ ḅe ḅẹẹ ḅara: Àrị ị́ kọn tẹkẹ naa tẹẹ; à pịkị ị́ tọrụ sara owu-minji ma ẹrị tẹẹ. Àrị ị́ gwọ ḅa; tẹra aḍin karama ene ḅụ í saakị KỊNỊNYANAḄỌ Fịafịa-warị mẹ mu ḅa.

⁶ Anịsakị à jei akụra kẹ í ḍumo ḅụ sụa ḅa. Arị ị́yẹrị na mị opu sịẹ mẹ na ḍụa-ḅọrọma ḅa Asiriya ḅẹ amadaḅọ ḅe ḅara-ḅio, tẹ arị ì soku-ḅẹ ye na, ị̀ fịrịmẹnjịḅọ Devidi sịḅị na gotẹ à sịẹ mị opu sịẹ mẹ pịrị ḅa.”

⁷ Anịtẹso Ayịzaya nwẹnị ḅẹẹ, “Ọmịnị ịn ịla kẹ mịẹ kịkị ọkị-ḅo, tẹ yee ini anị ọkị tẹ kẹ ọpọpọlị mẹ ọgọnọ gbana, mịẹtẹ ori oju iḅi ḅẹ ḅara.”

⁸ Hẹzịkaya nwẹnị Ayịzaya ḅẹẹ, “Tọ elekima mịẹ ḅa mịnẹ KỊNỊNYANAḄỌ ḅe ị̀ gwọ ḅa, tẹ tẹra aḍin karama ene ḅụ à saakị tẹ KỊNỊNYANAḄỌ ḅe warị mẹ mu ḅẹ?”

⁹ Ayịzaya nwẹnị pakịrị, “Mie KỊNỊNYANAḄỌ ḅe ḅụụ ḅụ ḅo ị́ pịrị elekima, mịnẹ KỊNỊNYANAḄỌ ḅe ò minini ye mẹ mịẹ ḅa: bele ḅụ pakarị tẹmẹ mẹ anị oyia ḅụọ kẹ tọrọkọ mu ḅẹ mụnọọ anị oyia ḅụọ kẹ ọḅụ da ḅẹ?”

¹⁰ Hẹzịkaya nwẹnị pakịrị, “Anị sarasara ye sọ ịrụa ḅio pakarị tẹmẹ mẹ oyia ḅụọ kẹ nangwọ ḅẹ nakara yee ịrụa ḅio pakarị tẹmẹ mẹ oyia ḅụọ kẹ ọḅụ da.”

¹¹ Ayịzaya ịkịankoroḅọ ḅe nwẹnị owu KỊNỊNYANAḄỌ ḅe pịrị; tẹ KỊNỊNYANAḄỌ ḅe nwẹnị bele ḅio ḅẹ tẹmẹ mẹ kẹ oyia ḅụọ kẹ ọḅụ da anị sakị mẹ tẹ Ahazi nama kpọlị-iwo ẹbẹ mẹ ḅụ ịrụa mẹ tuuideri tẹ sakị mẹ ḅụ.

Oku-mẹnjịapụ Babịlọnị Ḅụ Ḅom

¹² Anị sakị mẹ ḅụ Babịlọnị ḅẹ amadaḅọ Mẹrodakị-Baladanị, Baladanị owiḅọtụḅọ ḅe nwẹnị fịrịmẹnjịapụ kẹ Hẹzịkaya fịrịma tẹ ḍiri-apakịrị na, ḍiepịrịye na ọkị-ḅo ọ̀ pịrị; gbala ọ̀ naam Hẹzịkaya obim.

¹³ Hẹzịkaya nwẹnị ịn daa-ọkị, tẹ ori ngọ warị mẹmgba, seleḅa mẹ na, golu mẹ na, ẹnyị ma na, yela pulo mẹ na, ori ọmụ-aị koko anga na, ò yekoko-awarị ḅio ḅụ ịn ḍọkị-ẹrị aị mamgba; mie kụma Hẹzịkaya kẹ ịn ḍie-a ye ofori ọ̀ warị ḅio anịanịa ò ye-yọ mẹmgba ḅụ.

Ayịzaya Koro Ịkịan

¹⁴ Anịtẹso Ayịzaya ịkịankoroḅọ ḅe nwẹnị Amadaḅọ Hẹzịkaya ḍọkụma-ḅo tẹ ọ̀ ḅẹẹ, “Mịna apụ ma ịn tiye ḍuko? Ịn tọ anga ḅụ sime tẹ ị́ ḍọkụma-ḅo?” Hẹzịkaya nwẹnị pakịrị, “Ini ala tẹ opu sịẹ ḅụ ḅom, Babịlọnị ḅụ.”

¹⁵ Ọ̀ nwẹnị gbela, “Ịn tiye na tiye na ẹrị ị́ warị mẹ ḅio?” Hẹzịkaya nwẹnị pakịrị, “Ini ị̀ warị ḅio sime ye mẹmgba ẹrị tẹẹ; ì yekoko-awarị ḅio sime tẹ à kẹ ịn ḍie-a ye ofori.”

¹⁶ Anịtẹso Ayịzaya nwẹnị Hẹzịkaya ḅẹẹ, “KỊNỊNYANAḄỌ ḅe ẹkwẹn-ḅịḅị mẹ naa;

¹⁷ Ḍikii, ene ḅoarị, ị́ warị ḅio sime aị mamgba na, ị́ aḍapụ koko wenii ḅo mịmgba la aị mamgba na dogi-so Babịlọnị mu ḅarị sakị; gberie-sọ arị ḅụ kọn ḅịa, KỊNỊNYANAḄỌ ḅe ọkọ ḅẹẹm.

¹⁸ Anịsakị ini iyi ị́ pịrị í soku-ḅẹ awọmẹ ma ḅẹ ja apụ ịn nwẹn dogi-so ḅa; tẹ ịn pootẹ apụ sọ ḅa Babịlọnị ḅe amadaḅọ ḅe ama-da warị mẹ ḅio.”

¹⁹ Anịtẹso Hẹzịkaya nwẹnị Ayịzaya ḅẹẹ, “KỊNỊNYANAḄỌ ḅe ẹkwẹn-ḅịḅị mẹ tẹ ị́ kọn ị̀ pịrị ye mẹ iḅim.” Kẹ gotẹ ọkọ ḅẹẹarị, ò ḅiotọnm, “Tiegotẹ, ì ene ma ḅụ dein na gbene na nwẹnị paka ḅẹ kụma, anị paka ḅịa?”

Hẹzịkaya Ama-da Mẹ Ḅẹ Kunoma

²⁰ Hẹzịkaya amịẹaị ma ḅẹ kirikọn-aị na, ori opu mẹmgba na, ọ̀ wẹrịtẹ minji ḅọrọ anga mịẹtẹ minji ọkị-ḅo opu ama mẹ ḅio su ḅara mẹ, Juda Amadapụ Ma Aḅụụ Paka-aị Ḍiri mẹ ḅio kẹẹ wararị.

²¹ Hẹzịkaya nwẹnị fịị, tẹ Manasẹ ori owiḅọtụḅọ nwẹnị ò kiri ọkị tẹ ama-da.